ISIFUNDO 35
Kuyini Okuzakunceda Ukuthi Ukhethe Kuhle?
Sonke kumele senze izinqumo futhi ezinye zakhona zingasinceda kumbe zisizwise ubuhlungu, ikanti ezinye zingaphambanisa ubungane bethu loJehova. Ngokwesibonelo, kumele sikhethe ukuthi sizahlala ngaphi, sizakwenza msebenzi bani lokuthi sizatshada yini loba hatshi. Nxa singakhetha kuhle sizathokoza njalo sithokozise loJehova.
1. IBhayibhili lingakunceda njani ukuthi ukhethe kuhle?
Ungakenzi loba yisiphi isinqumo, thandaza kuJehova njalo uhlolisise ukuthi iBhayibhili lithini ngalokho ofuna ukukwenza. (Bala iZaga 2:3-6.) Amanye amavesi aseBhayibhilini ahle asitshele ukuthi uJehova ufuna senzeni futhi ukulandela lokho asitshela khona kuyasinceda.
Kodwa uJehova uzakuncedisa njani nxa eBhayibhilini kungelamthetho otshoyo ukuthi kumele wenzeni? Uzakutshengisa ‘indlela okufanele uhambe ngayo’ esebenzisa izimiso eziseLizwini lakhe iBhayibhili. (U-Isaya 48:17) Kodwa kuyini isimiso? Isimiso liqiniso elingatshintshiyo elitshengisa indlela uNkulunkulu abona ngayo izindaba ezitshiyeneyo. Ezinye izindaba eziseBhayibhilini zilezimiso ezisinceda sizwisise ukuthi uNkulunkulu uthini ngendaba ethile. Nxa singazwisisa ukuthi uJehova uyibona njani indaba ethile, sizakhetha ngendlela ezamthokozisa.
2. Kuyini okumele ucabangisise ngakho ungakenzi loba yisiphi isinqumo?
IBhayibhili lithi: ‘Umuntu okhaliphileyo uyacabangisisa ngawo wonke amanyathelo akhe.’ (IZaga 14:15) Lokhu kutsho ukuthi kumele siqale sicabangisise ngalokho esifuna ukukwenza. Zibuze ukuthi: ‘IBhayibhili lithini ngalokho engifuna ukukukhetha? Angisoze ngizisole yini ngesinqumo lesi? Engikukhethayo kuzabaphatha njani abanye? Kuzamthokozisa yini uJehova?’—UDutheronomi 32:29.
UJehova nguye olelungelo lokusitshela ukuthi yikuphi okuhle lokubi. Yikho ukwazi izimiso lemithetho yakhe kanye lokuzimisela ukuyilandela kuzasinceda ukuthi siqeqetshe umzwangedwa wethu. Umzwangedwa yilokho esikuzwa ngaphakathi okusinceda sehlukanise okuhle lokubi. (KwabaseRoma 2:14, 15) Umzwangedwa ofundiswe kuhle uzasinceda ukuthi sikhethe kuhle.
GEBHA UJULE
Engxenyeni le uzabona ukuthi izimiso eziseBhayibhilini kanye lomzwangedwa ofundiswe kuhle kuzakunceda njani ukuthi ukhethe kuhle.
3. Vuma ukuqondiswa liBhayibhili
Izimiso eziseBhayibhilini zingakunceda njani ukuthi ukhethe kuhle? Bukelani IVIDIYO beselixoxa ngemibuzo elandelayo.
Yisiphi isipho esiligugu esisiphiwe nguJehova?
Kungani uJehova esinike inkululeko yokuzikhethela?
Kuyini asinike khona okusinceda senelise ukuyisebenzisa kuhle inkululeko yethu yokuzikhethela?
Bala u-Efesu 5:15, 16 ukuze ubone esinye isimiso esiseBhayibhilini. Ngemva kwalokho xoxani ngokuthi ungasisebenzisa njani isimiso lesi ukuze . . .
uthole isikhathi sokubala iBhayibhili nsuku zonke.
uthuthukise indlela ophatha ngayo abanye emulini kungelani lokuthi ungumzali kumbe ungumntwana.
ungene imihlangano yebandla.
4. Fundisa umzwangedwa wakho ukuze ukuncede ukhethe kuhle
Kulula ukukhetha kuhle nxa kulomthetho oseBhayibhilini ositshela okumele sikwenze endabeni ethile. Kodwa kuthiwani nxa kungelamthetho otshoyo ukuthi kumele senzeni? Bukelani IVIDIYO beselixoxa ngombuzo olandelayo.
Kuyini okwenziwe ngudadewethu esimbone kuvidiyo ukuze aqeqetshe umzwangedwa wakhe njalo akhethe ngendlela ethokozisa uJehova?
Kungani kungamelanga sicele abanye ukuthi basenzele izinqumo? Bala uHebheru 5:14 beselixoxa ngemibuzo le:
Lanxa kulula ukucela abanye ukuthi basenzele izinqumo, kuyini okumele sizifundise khona?
Kuyini ongakusebenzisa ukuze ufundise umzwangedwa wakho?
Umzwangedwa unjengemephu esitshengisa indlela eqondileyo okumele sihambe ngayo
5. Cabanga ngemizwangedwa yabanye
Abantu batshiyene yikho besenza izinqumo ezitshiyeneyo. Singatshengisa njani ukuthi silendaba lemizwangedwa yabanye? Ake sixoxe ngezibonelo ezimbili:
Isibonelo sokuqala: Udadewethu othanda ukuzicomba uthuthela ebandleni elilabodadewethu abaphatheka kubi nxa bebona umuntu othanda ukuzicomba.
Bala uRoma 15:1 lo-1 Khorinte 10:23, 24 beselixoxa ngemibuzo elandelayo:
Ngemva kokucabangisisa ngamavesi lawa, udadewethu lo angakhetha ukwenzani? Uzakwenzani nxa kulomuntu ongakhubeka ngenxa yento umzwangedwa wakho okuvumela ukuthi uyenze?
Isibonelo sesibili: Lanxa umfowethu ekwazi ukuthi akukubi ukunatha utshwala, yena ukhetha ukungabuthinti. Uthi enxuswe komunye umbuthano abone abafowethu benatha.
Bala umTshumayeli 7:16 loRoma 14:1, 10 beselixoxa ngemibuzo le:
Ngemva kokucabangisisa ngamavesi lawa, umzalwane lo angakhetha ukwenzani? Uzakwenzani nxa ungabona umuntu esenza into umzwangedwa wakho ongakuvumeliyo ukuthi uyenze?
Okuzakunceda ukuthi ukhethe kuhle
1. Thandaza kuJehova umcele akuncedise ukuthi ukhethe kuhle.—UJakhobe 1:5.
2. Hlolisisa okutshiwo liBhayibhili lamabhuku adindwe yinhlanganiso yethu ukuze uthole izimiso ongazisebenzisa. Ungacela lokuthi amaKhristu aqinileyo ekukhonzeni akucebise.
3. Cabangisisa ngokuthi awusoze uzisole yini ngesinqumo sakho lokuthi sizabaphatha njani abanye.
ABANYE BATHI: “Wonke umuntu ukhululekile ukuzikhethela akufunayo. Akumelanga uzihluphe ngokuthi abanye abantu bacabangani.”
Kungani kumele sicabange ngoNkulunkulu langabanye abantu nxa sisenza izinqumo?
ISIFINQO
Okuzasinceda ukuthi sikhethe kuhle yikuzibuza ukuthi esikukhethayo kuzamthokozisa yini uJehova lokuthi kuzabaphatha njani abanye.
Ufundeni?
Kuyini okuzakunceda ukuthi wenze izinqumo ezithokozisa uJehova?
Ungawuqeqetsha njani umzwangedwa wakho?
Ungatshengisa njani ukuthi ulendaba lemizwangedwa yabanye?
THOLA OKUNENGI
Bala isihloko lesi ubone okuzakunceda ukuthi wenze izinqumo ezizakwenza uqhubeke ungumngane kaJehova.
“Khetha Ngendlela Ezathokozisa UNkulunkulu” (INqabayokulinda, April 15, 2011)
Bukela ividiyo le ukuze ufunde okunengi ngokuthi uJehova ubakhokhela njani abantu bakhe.
Bukela ividiyo le ubone ukuthi kuyini okwanceda eyinye indoda ukuthi ikhethe kuhle.
Bala isihloko lesi ubone ukuthi ungazenza njani izinqumo ezithokozisa uJehova lanxa kungelamthetho oseBhayibhilini.