Lingisela UNkulunkulu ‘Ngokwenza Okulungileyo’

 1-3. (a) Kungani kumele simbonge uJehova? (b) UJehova ufuna senzeni?

AKE uzibone usemkhunjini osucwila emanzini. Kukhanya kungaselathemba lokuthi ungaphuma. Kodwa kusenjalo kufike omunye umuntu ehamba ngesinye isikepe akukhiphe akuhambise endaweni ephephileyo, abesesithi: “Ungesabi, ususendaweni ephephileyo khathesi.” Uzwa kusithi hu! Akuthandabuzwa ukuthi ubungambonga kakhulu umuntu lo ngoba ngabe kafikanga ubuzaphelela emanzini.

² Umzekeliso lo usinceda sizwisise esakwenzelwa nguJehova. Kumele simbonge kakhulu ngoba wasipha inhlawulo esikhulula esonweni lasekufeni. Nxa singatshengisa ukuthi silokholo emhlatshelweni lo oligugu, uJehova uzasithethelela izono zethu futhi asiphe impilo engapheliyo. (1 UJohane 1:7; 4:9) Njengoba sibonile eSahlukweni 14, uJehova utshengise ukuthi uyasithanda kakhulu ngokusipha inhlawulo. Manje singatshengisa njani ukuthi siyambonga uJehova ngalokho asenzele khona?

³ Kumele senze lokho uJehova afuna sikwenze ngoba nguye owasikhululayo. Wathuma umphrofethi uMikha ukuthi athi: “Ukutshelile okuhle, wena muntu. Kambe uJehova ufunani kuwe? Akufunayo nje yikuthi wenze okulungileyo lokuthi uthande ubuqotho, njalo uhambe loNkulunkulu wakho ngokuzithoba.” (UMikha 6:8) Ngakho uJehova ufuna ‘senze okulungileyo.’ Kutshoni lokhu?

 4. Sazi njani ukuthi uJehova ufuna siphile ngezimiso zakhe ezilungileyo?

⁴ UJehova ufuna siphile ngezimiso zakhe ezisitshela ukuthi yikuphi okulungileyo lokungalunganga. Ngakho ukwenza okulungileyo kutsho ukulandela izimiso zakhe. U-Isaya 1:17 uthi: “Fundani ukwenza okuhle njalo lahlulele kuhle.” ILizwi likaNkulunkulu lisikhuthaza ukuthi ‘sidinge ukulunga.’ (UZefaniya 2:3) Liphinda lisitshele ukuthi ‘sigqoke ubuntu obutsha obadalwa ngentando kaNkulunkulu futhi obuvumelana lokulunga kweqiniso.’ (Kwabase-Efesu 4:24) Nxa sifuna ukwenza okulungileyo kumele sibalekele udlakela, ukungcola kanye lobufebe ngenxa yokuthi loba ngubani owenza izinto lezi wephula imithetho kaNkulunkulu.—IHubo 11:5; Kwabase-Efesu 5:3-5.

 5, 6. (a) Kungani kungekho nzima ukulandela izimiso zikaJehova? (b) IBhayibhili litshengisa njani ukuthi ukudinga ukulunga yinto okumele siqhubeke siyenza?

⁵ Kunzima yini ukulandela izimiso zikaJehova ezilungileyo? Hatshi. Nxa simthanda uJehova sizazimisela ukulandela izimiso zakhe. Sifuna ukuphila ngendlela ethokozisa uNkulunkulu wethu ngenxa yokuthi siyamthanda. (1 UJohane 5:3) Khumbula ukuthi uJehova “uthanda izenzo ezinhle.” (IHubo 11:7) Nxa sifuna ukulingisela ukwahlulela kuhle kukaNkulunkulu kumbe ukulunga kwakhe kumele sithande lokho akuthandayo besesizonda lokho akuzondayo.—IHubo 97:10.

⁶ Akulula ukuthi sihlale sisenza okulungileyo ngenxa yokuthi silesono. Kumele sitshiye imikhuba emibi futhi sikhiphe ubuntu obudala sigqoke ubuntu obutsha. IBhayibhili lithi ubuntu lobu ‘benziwa bube butsha’ ngolwazi oluqondileyo. (KwabaseKholose 3:9, 10) Amabala athi ‘benziwa bube butsha’ atshengisa ukuthi ukugqoka ubuntu obutsha asikwenzi kanye kuphela kodwa yinto okumele siqhubeke sizama ngamandla wonke ukuyenza. Lanxa singazama kangakanani ukwenza okulungileyo, ngezinye izikhathi siyake sicabange okubi, sikhulume kubi kumbe senze izinto ezimbi ngenxa yokuthi silesono.—KwabaseRoma 7:14-20; UJakhobe 3:2.

 7. Kuyini okungamelanga sikwenze nxa singehluleka ukwenza okulungileyo?

⁷ Sihlala sizama ukwenza okulungileyo kodwa kwezinye izikhathi siyaphambanisa. Nxa singaphambanisa akumelanga sizitshele ukuthi esikwenzileyo akukubi kangako. Lanxa kunjalo akumelanga silahle ithemba, sicabange ukuthi amaphutha ethu enza singafaneli ukukhonza uJehova. UNkulunkulu wethu olesihawu uzimisele ukusithethelela nxa siphenduka ngenhliziyo yonke. Umphostoli uJohane wabhala amazwi la aduduzayo athi: “Ngilibhalela izinto lezi ukuze lingasenzi isono. Kodwa nxa loba ngubani angenza isono, silomsizi kuBaba. Umsizi lo nguJesu Khristu.” (1 UJohane 2:1) UJehova usiphe inhlawulo kaJesu ukuze simkhonze ngendlela ayamukelayo lanxa silesono. Ukwazi lokhu kwenza sizame ngazo zonke izindlela ukuthokozisa uNkulunkulu wethu osithandayo.

 8, 9. Ukutshunyayelwa kwezindaba ezinhle kutshengisa njani ukuthi uJehova wahlulela kuhle?

⁸ UJehova nguNkulunkulu olungileyo futhi owahlulela kuhle. Singamlingisela ngokutshela abanye izindaba ezinhle zoMbuso wakhe ngazo zonke izikhathi. Ukutshunyayelwa kwezindaba ezinhle kutshengisa njani ukuthi uNkulunkulu ulungile?

⁹ UJehova kasoze abhubhise abantu abangalunganga engaqalanga wabaxwayisa. UJesu wathi ekhuluma ngokwakuzakwenzakala ezinsukwini zokucina wathi: “Izindaba ezinhle kumele ziqale zitshunyayelwe ezizweni zonke.” (UMakho 13:10; UMathewu 24:3) Ibala elithi “ziqale” litshengisa ukuthi kulezinye izinto ezizakwenzakala ngemva kokutshunyayelwa kwezindaba ezinhle. Okunye kwakhona yikuhlupheka okukhulu. UJehova uzabhubhisa bonke abantu abenza okubi abesetshintsha umhlaba ube lipharadayisi. (UMathewu 24:14, 21, 22) Akulamuntu ongasola uJehova esithi kabahlulelanga kuhle abenza okubi ngoba uyabe ebaxwayisile wabanika ithuba lokutshintsha izindlela zabo ukuze bangabhujiswa.—UJona 3:1-10.

10, 11. Nxa sitshumayela izindaba ezinhle siyabe silingisela uNkulunkulu wethu owahlulela kuhle?

¹⁰ Nxa sitshumayela izindaba ezinhle siyabe silingisela uNkulunkulu wethu owahlulela kuhle. Njani? Okokuqala, nxa sizama ngamandla wonke ukunceda abanye ukuthi basindiswe siyabe sisenza lokho uNkulunkulu akufunayo. Ake sibuyele emzekelisweni wesikepe esesicwila. Nxa sebekukhiphile esikepeni esicwilayo bakufaka esikepeni sokuhlenga abantu, ngeke ufise yini ukunceda abanye asebecwila? Lathi kumele sibancede abanye ukuze basinde nxa uJehova esebhubhisa abantu ababi. Lanxa abanengi bengalaleli nxa sibatshumayeza, uJehova ulokhu ebabekezelela. Ngakho kumele siqhubeke sizama ukubanceda ukuthi “baphenduke” ukuze bathole ithuba lokusindiswa.—2 UPhetro 3:9.

¹¹ Nxa sitshumayela izindaba ezinhle kubo bonke abantu esihlangana labo, siyabe silingisela uJehova ngenye indlela eqakathekileyo. IBhayibhili lithi: “UNkulunkulu kakhethi kodwa kuzo zonke izizwe, uyamamukela umuntu omesabayo futhi owenza okulungileyo.” (ImiSebenzi 10:34, 35) Ngakho lathi asibabandlululi abantu nxa sitshumayela. Sitshumayeza bonke abantu kungelani lokuthi bangumhlobo bani, balesikhundla bani emphakathini kumbe banothile yini. Sinika bonke ithuba lokuzwa izindaba ezinhle lelokukhetha ukuthi bazamkhonza yini uNkulunkulu.—KwabaseRoma 10:11-13.

12, 13. (a) Kungani kungamelanga sisole kumbe sahlulele abanye? (b) UJesu wayesitshoni lapho esithi “yekelani ukwahlulela” futhi ‘yekelani ukusola’? (Khangela lamabala angaphansi.)

¹² Singalingisela uNkulunkulu wethu owahlulela kuhle ngokuphatha abanye ngendlela yena asiphatha ngayo. Kulula kakhulu ukuthi sahlulele abanye, sikhulume kubi ngabo futhi sisole abakwenzayo. Kodwa ngubani ongafuna ukuthi uJehova ahlale elandelela konke akuphambanisayo futhi amsole lanxa esenza okuhle? UJehova kasiphathi njalo. Umhubi wathi: “Aluba wena ubukhangela esikuphambanisayo awu Jah, ngubani obengama phambi kwakho Jehova?” (IHubo 130:3) Siyambonga kakhulu uNkulunkulu wethu olesihawu futhi owahlulela kuhle ngokuthi kalandeleli esikuphambanisayo. (IHubo 103:8-10) Manje thina singamlingisela njani?

¹³ Akumelanga sahlulele abanye ngendaba ezingelani lathi loba ezingaqakathekanga. ENtshumayelweni yakhe yaseNtabeni, uJesu waxwayisa wathi: “Yekelani ukwahlulela ukuze lani lingahlulelwa.” (UMathewu 7:1) IVangeli likaLukha lithi uJesu waqhubeka wathi: “Liyekele lokusola abanye ukuze lani lingasolwa.”a (ULukha 6:37) UJesu wayekwazi ukuthi abantu bayakuthanda ukwahlulela abanye lokubasola. Nxa babekhona kulabo ababemlalele ababelomkhuba wokusola abanye kwakumele bawutshiye.

14. Kungani kumele ‘siyekele ukwahlulela’ abanye?

¹⁴ Kungani kumele ‘siyekele ukwahlulela abanye’? Kungenxa yokuthi kasilalungelo lokwenza njalo. Umfundi uJakhobe wathi: ‘Munye kuphela otshaya imithetho longuMahluleli. Manje wena ungubani ukuthi wahlulele umakhelwane wakho?’ (UJakhobe 4:12; KwabaseRoma 14:1-4) Ngakho uJehova nguye kuphela olelungelo lokwahlulela abantu. Esinye isizatho yikuthi silesono futhi isono singenza sahlulele abanye ngendlela engayisiyo. Zinengi izinto ezingaphambanisa indlela esibona ngayo abanye. Izinto lezo zingagoqela ubandlululo, ukuzigqaja, umhawu kanye lokuzibona silungile. Silokunye futhi esingenelisi ukukwenza. Kasingeke sibone okusenhliziyweni yomuntu kumbe sazi konke okwenzakala empilweni yakhe. Manje thina singobani ukuthi sesingasola abafowethu labodadewethu sisithi balenhloso ezimbi loba kabenzi konke abangakwenza ekukhonzeni uNkulunkulu? Ukucabanga ngalokhu kuzasinceda ukuthi singahlali silandelela lokho abakuphambanisayo. Kungcono kakhulu ukuthi silingisele uJehova ngokubona okuhle kwesikhonza labo kulokugxila emaphutheni abo!

15. Izikhonzi zikaNkulunkulu kumele zibaphathe njani abanye futhi kungani?

¹⁵ Kumele sibaphathe njani abanye emulini? Emulini kumele kube lothando lokuthula kodwa kuyadanisa ukuthi izimuli ezinengi ziphathana ngendlela ebuhlungu. Kwandile ukuzwa ngamadoda ahlukuluza omkawo, abesifazana abaphatha kubi omkabo kumbe abazali abatshela abantwababo amazwi ahlabayo mhlawumbe baze babatshaye kabuhlungu. Izikhonzi zikaNkulunkulu akumelanga zikhulume amazwi ahlabayo futhi ziphathe kubi abanye. (Kwabase-Efesu 4:29, 31; 5:33; 6:4) Amazwi kaJesu athi ‘siyekele ukwahlulela’ futhi ‘siyekele ukusola’ ayasebenza lasemulini. Khumbula ukuthi ukwenza okulungileyo kugoqela ukuphatha abanye ngendlela uJehova abaphatha ngayo. Phela uNkulunkulu wethu kasiphathi ngesihluku, “ulozwelo olukhulu” kulabo abamthandayo. (UJakhobe 5:11) Lesi yisibonelo esihle kakhulu okumele sisilingisele!

16, 17. (a) Kuyini uJehova akhangelele ukuthi abadala bakwenze? (b) Kuyini okumele kwenziwe nxa isoni singaphenduki ngenhliziyo yonke njalo kungani lokho kuqakathekile?

¹⁶ Sonke kumele sibaphathe kuhle abanye kodwa abadala abasebandleni lobuKhristu bona balomlandu omkhulu endabeni le. U-Isaya wathi ekhuluma ‘ngabakhokheli’ kumbe abadala wathi: “Khangelani! Inkosi izabusa ngokulunga, labakhokheli abazabusa bazakwahlulela kuhle.” (U-Isaya 32:1) UJehova ukhangelele ukuthi abadala bahlulele kuhle. Manje bangakwenza njani lokhu?

¹⁷ Amadoda la ayakunanzelela ukuthi kumele agcine ibandla lihlanzekile ngoba uNkulunkulu esimkhonzayo ungcwele futhi ulungile. Ngezinye izikhathi abadala kuyabe kumele bancedise umuntu oyabe enze isono esikhulu. Lokhu bakwenza bekhumbula ukuthi uJehova ufuna ukuthi bamtshengise isihawu lowo owonileyo nxa kufanele. Ngakho bayazama ukumnceda ukuthi aphenduke. Kodwa benzani nxa engaphenduki ngenhliziyo yonke lanxa sekwenziwe imizamo eminengi yokumnceda? Benza lokho okutshiwo liLizwi likaNkulunkulu. Lithi: “Susani umuntu owenza okubi phakathi kwenu.” Lokhu kutsho ukumsusa ebandleni. (1 KwabaseKhorinte 5:11-13; 2 UJohane 9-11) Kuyabadanisa abadala ukuthatha inyathelo leli kodwa bayananzelela ukuthi kuqakathekile ukugcina ibandla lihlanzekile. Lanxa kunjalo, bayathemba ukuthi ngelinye ilanga lowo owonileyo uzaphenduka ebandleni.—ULukha 15:17, 18.

18. Kuyini okumele abadala bakukhumbule nxa beseluleka abanye?

¹⁸ Abadala baphinda balingisele uNkulunkulu wethu owahlulela kuhle ngokweluleka abanye besebenzisa iBhayibhili. Lanxa bengahlali belandelela lokho abanye abakuphambanisayo, kungenzakala ukuthi omunye esikhonza laye ‘aphambuke engananzeleli.’ Nxa sekunjalo abadala ‘bayazama ukumbuyisela endleleni eqondileyo.’ Lokhu ‘bakwenza bemnene’ ngoba bayakwazi ukuthi uNkulunkulu kahluleli ngesihluku futhi kasiphathi kubi. (KwabaseGalathiya 6:1) Abadala kabangeke bamhalade umuntu lowo owonileyo kumbe bamkhuze ngamazwi abuhlungu. Kodwa bameluleka ngendlela elothando ukuze bamkhuthaze ukuthi enze okulungileyo. Lanxa kumele bamvezele egcekeni lokho akuphambanisileyo, akumelanga bakhohlwe ukuthi ulokhu eyimvu esemhlambini kaJehova.b (ULukha 15:7) Nxa abadala beseluleka umuntu ngomusa futhi betshengisa ukuthi bayamthanda, kuzaba lula ukuthi asamukele iseluleko sabo.

19. Yiziphi izinqumo okumele abadala bazenze futhi kuyini okubaqondisayo ekwenzeni izinqumo ezinjalo?

¹⁹ Izikhathi ezinengi abadala kumele benze izinqumo eziphathelane lalabo abakhonza labo. Ngokwesibonelo, bayahlangana ukuze baxoxe ngokuthi bakhona yini abanye abazalwane ebandleni asebengaba ngabadala loba izinceku ezikhonzayo. Abadala bayakwazi ukuthi kuqakathekile ukungabandlululi. Kabalandeli imizwa yabo kodwa balandela lokho iBhayibhili elikutshoyo mayelana labantu okumele babe ngabadala kumbe zinceku ezikhonzayo. ‘Kababandlululi futhi kabakhethi.’—1 KuThimothi 5:21.

20, 21. (a) Kuyini okumele abadala bahlale bekwenza futhi kungani kufanele benze njalo? (b) Kuyini abadala abangakwenza ukuze bancede “abahlulukelweyo”?

²⁰ Kulezinye indlela abadala abangatshengisa ngazo ukuthi balingisela uNkulunkulu. Ngemva kokukhuluma ngokuthi abadala “bazakwahlulela kuhle,” u-Isaya waqhubeka wathi: “Ngamunye uzakuba njengendawo yokucatshela umoya, abe yisiphephelo sokucatshela izulu elina ngamandla, njengezifula zamanzi elizweni elingelamanzi, lanjengomthunzi wedwala elikhulu elizweni elomileyo.” (U-Isaya 32:2) Ngakho abadala kumele bahlale bekhuthaza futhi beduduza labo abakhonza labo.

²¹ Lamuhla abantu bakaJehova bayakufuna ukukhuthazwa ngenxa yezinhlupho ezibehlelayo. Badala, kuyini elingakwenza ukuze lincede “abahlulukelweyo”? (1 KwabaseThesalonika 5:14) Balaleleni ngesineke. (UJakhobe 1:19) Umuntu ohlulukelweyo angafuna ukuxoxa lomuntu amthembayo amtshele okusenhliziyweni yakhe. (IZaga 12:25) Bancedeni abadanileyo babone ukuthi uJehova uyabaqakathekisa futhi uyabathanda lokuthi abafowabo labodadewabo labo bayabathanda. (1 UPhetro 1:22; 5:6, 7) Okunye elingakwenza yikukhuleka labo kumbe ukubakhulekela. Kungabaduduza kakhulu ukuzwa umdala ebaqamba emthandazweni wakhe. (UJakhobe 5:14, 15) UJehova uNkulunkulu wethu owahlulela kuhle uyayibona yonke imizamo eliyenzayo yokunceda abadanileyo.

22. Yiziphi izindlela esingalingisela ngazo uJehova futhi uzwa njani nxa sisenza okulungileyo?

²² Ukulingisela uJehova kusenza sisondele kakhulu kuye! Simlingisela ngokulandela izimiso zakhe ezilungileyo langokutshela abanye izindaba ezinhle ezisindisa ukuphila. Singatshengisa ukuthi sahlulela kuhle njengaye ngokukhangela okuhle okwenziwa ngabanye kulokuthi silandelele amaphutha abawenzayo. Badala, lingalingisela uNkulunkulu wethu owahlulela kuhle ngokugcina ibandla lihlanzekile, ngokweluleka abanye lisebenzisa iMibhalo langokungabandlululi nxa lisenza izinqumo. Okunye futhi elingakwenza yikukhuthaza lokuqinisa abadanileyo. Kufanele ukuthi uJehova uyathokoza kakhulu nxa ebona abantu bakhe bezama ngamandla wonke ukwahlulela kuhle ‘lokwenza okulungileyo’!