“Lizakuba Ngofakazi Bami”

1, 2. (a) Ngubani ufakazi kaJehova omkhulu kulabo bonke? (b) Litshoni ibizo likaJesu, njalo kuyini okutshengisa ukuthi wenza lokho okutshiwo libizo lakhe?

“NGEQINISO ngazalelwa lokho, njalo ngalanda khona lokho emhlabeni, ukuzafakaza iqiniso.” (Bala uJohane 18:33-37.) Amazwi la akhulunywa nguJesu Khristu ngesikhathi umbusi waseJudiya ongumRoma emthonisisa icala elalilesigwebo sokufa. UJesu wayesanda kumtshela ukuthi uyinkosi. Lokhu kwatshengisa ukuthi wayelesibindi sibili. Yikho ngemva kweminyaka ethile umphostoli uPhawuli wakhuluma ngalokhu esithi: ‘Wathi efakaza phambi kukaPhontiyu Philathu, wenza ukuvuma okuhle.’ (1 Tim. 6:13) Yikho-ke kuyakhanya ukuthi kwezinye izikhathi kudinga isibindi sibili ukuba ‘ngufakazi othembekileyo loqotho’ emhlabeni kaSathane ogcwele inzondo.​—Isam. 3:14.

² UJesu wayevele esengufakazi kaJehova ngoba wazalwa ngabazali abangamaJuda. (Isaya. 43:10) Nguye umuntu owafakaza ngebizo likaNkulunkulu ukwedlula bonke ofakazi abake babakhona. Ibizo ayeliphiwe nguNkulunkulu lalisitsho okuthile njalo wasebenza gadalala ukuze enze lokho elalikutsho. Ingilosi yatshela uJosefa ukuthi lokho uMariya ayekukhulelwe kwakwenziwe ngomoya ongcwele, njalo yaphinda yathi: ‘UMariya uzabeletha indodana ozayetha ibizo uthi nguJesu, ngokuba izasindisa abantu ezonweni zabo.’ (Mat. 1:20, 21) Izifundiswa zeBhayibhili ezinengi ziyavuma ukuthi ibizo likaJesu lithethwe ebizweni lesiHebheru elithi Jeshua, elitsho ukuthi: UJehova Uyinsindiso. UJesu wakwenza okutshiwo libizo lakhe ngokunceda ‘izimvu ezazilahlekile zako-Israyeli’ ukuthi ziphenduke ezonweni zazo ukuze zamukelwe nguJehova. (Mat. 10:6; 15:24; Luk. 19:10) Wayekhuthele kakhulu ekutshumayeleni ngoMbuso kaNkulunkulu. Umlobi weVangeli uMakho wabika ukuthi: “UJesu waya eGalile ememezela izindaba ezinhle zikaNkulunkulu. Wathi, ‘Isikhathi sesifikile. Umbuso kaNkulunkulu ususeduze. Phendukani likholwe izindaba ezinhle!’” (Mak. 1:14, 15) Kanti njalo uJesu wayelesibindi sokubasola abaholi benkolo abangamaJuda njalo lokhu kwenza ukuthi bacine besithi kabulawe.​—Mak. ­11:17, 18; 15:1-15.

 3. Ngelanga lesithathu uJesu esanda kubulawa kwenzakalani?

³ Ngelanga lesithathu uJesu esanda kubulawa kabuhlungu, kwenzakala isimanga sezimanga. UJehova wamvusa eseyisidalwa sasezulwini esingafiyo. (1 Phet. 3:18) INkosi uJesu yabonakala ilomzimba wenyama ukuze kungabi lothandabuzayo ukuthi yayisivusiwe sibili. Ngelanga eyavuswa ngalo, yabonakala kubafundi bayo abatshiyeneyo izikhathi ezingaba zinhlanu.​—Mat. 28:8-10; Luk. 24:13-16, 30-36; Joh. 20:11-18.

 4. Yiwuphi umhlangano uJesu awenza ngelanga avuswa ngalo, njalo wabacaciselani abafundi bakhe?

⁴ UJesu wathi ebonakala okwesihlanu, wayefuna ukuyahlangana labaphostoli bakhe labanye ababebuthene labo. Emhlanganweni lo ababengeke bawukhohlwe, uJesu wabafundisa iLizwi likaNkulunkulu. “Wasebavula izingqondo zabo ukuze bakwazi ukuzwisisa iMibhalo.” Yikho-ke basebekuzwisisa ukuthi ukubulawa kwakhe yizitha zikaNkulunkulu kanye lokuvuswa kwakhe okuyisimangaliso kwakuvele kuphrofethiwe eMibhalweni. Umhlangano lo ususiyaphela, uJesu wabacacisela ukuthi yiwuphi umsebenzi okwakumele bawenze. Wabatshela ukuthi “ukuphenduka lokuthethelelwa kwezono kuzatshunyayelwa ebizweni lakhe ezizweni zonke, kuqaliswa eJerusalema.” Wasesithi: “Lingofakazi balezizinto.”​—Luk. 24:44-48.

5, 6. (a) Kungani uJesu wathi: “Lizakuba ngofakazi bami”? (b) Yiwuphi umlayezo omutsha okwasekumele abafundi bakaJesu bawutshele abantu?

⁵ Yikho-ke ngemva kwamalanga angu-40, uJesu esebonakala kubaphostoli bakhe okokucina, kumele ukuthi bazwisisa ukuthi wayesitshoni lapho esebanika umlayo ocacileyo njalo oqakathekileyo othi: “Lizakuba ngofakazi bami eJerusalema, lakulo lonke eleJudiya laseSamariya, lasemikhawulweni yomhlaba.” (ImiSeb. 1:8) Kungani uJesu wathi: “Lizakuba ngofakazi bami” kulokuthi athi lizakuba ngofakazi bakaJehova? Ngoba wayekhuluma labantu ­bako-Israyeli ababevele bengofakazi bakaJehova.

⁶ Abalandeli bakaJesu kwasekumele baqalise ukutshela abanye umlayezo omutsha ophathelane lenjongo kaJehova. Umlayezo lo wawuqakatheke kakhulu ukwedlula ukukhululwa kwabako-Israyeli ebugqilini baseGibhithe kanye lokukhululwa kwabo ekuthunjweni kwaseBhabhiloni. Wawuphathelane lokuthi ukufa lokuvuswa kukaJesu Khristu kubanceda njani abantu ukuze bangaqhubeki beyizigqili zesono lokufa. NgePhentekhosti lika-33 C.E., abafundi bakaJesu ababesanda kugcotshwa batshela abantu “izimangaliso zikaNkulunkulu” njalo abanengi ababelalele baphenduka. ­Yikho-ke uJesu esehlezi kwesokunene sikaYise wabona ukuthi ibizo ayeliphiwe litsho okukhulu ngoba izinkulungwane zabantu zaziphenduka njalo zisiba lokholo lokuthi uJehova uyamsebenzisa ukuze abantu basinde.​—ImiSeb. 2:5, 11, 37-41.

 7. Kwakutshengisani okwenzakala ngePhentekhosti lika-33 C.E.?

⁷ Okwenzakala ngelanga lePhentekhosti ngo-33 C.E., kwakutshengisa ukuthi uJehova wayesewamukele sibili umhlatshelo kaJesu opheleleyo ukuze kuhlawulelwe isono. (Heb. 9:11, 12, 24) UJesu wayevele etshilo ukuthi indodana ‘yayingezelanga ukuzakhonzwa, kodwa ukukhonza, lokunikela ukuphila kwayo kube lihlawulo labanengi.’ (Mat. 20:28) ‘Abanengi’ uJesu ayezabahlawulela kwakungasiwo maJuda ayephendukile kuphela. Ngani? Ngoba kuyintando kaNkulunkulu ukuthi “abantu bonke basindiswe” njalo inhlawulo ‘isusa isono somhlaba!’​—1 Tim. 2:4-6; Joh. 1:29.

 8. Abafundi bakaJesu batshumayela baze bafika ngaphi, njalo kungani baphumelela ukwenza lokhu?

⁸ Asithandabuzi ukuthi abafundi bakaJesu bokuqala babelaso sibili isibindi sokuqhubeka befakaza ngaye. Kodwa lokhu babengeke bakwenze ngamandla abo kuphela. Umoya ongcwele kaJehova wabenza baba lamadlabuzane lamandla okuqhubeka befakaza. (Bala imiSebenzi 5:30-32.) Yikho-ke ngemva kwePhentekhosti lika-33 C.E., sekudlule iminyaka engu-27, babengasathandabuzi ukuthi ‘ilizwi leqiniso, ivangeli,’ laselifikile kumaJuda kanye labeZizwe “kuzo zonke izidalwa ngaphansi kwezulu.”​—Kol. 1:5, 23.

 9. UJesu wathi kwakuzakwenzakalani ebandleni lamaKhristu okuqala?

⁹ Kodwa kuyadanisa ukuthi izimfundiso zamanga zaqalisa ukungena kancane kancane ebandleni lamaKhristu okuqala. (ImiSeb. 20:29, 30; 2 Phet. 2:2, 3; Jud. 3, 4) UJesu wayevele watsho ukuthi kwakuzakuba labahlamuki abavela ‘komubi,’ uSathane, ababezakuba banengi kungakhanyi ukuthi amaKhristu eqiniso yiwaphi kuze kufike “ekupheleni komhlaba.” (Mat. 13:37-43) Ngemva kwalokho uJehova wayezabeka uJesu ukuthi abeyiNkosi yabantu bonke. Lokhu kwenzakala ngo-October 1914 lapho kuqalisa ‘izinsuku zokucina’ zomhlaba kaSathane omubi.​—2 Tim. 3:1.

10. (a) Yiwuphi umnyaka oqakathekileyo owaqanjwa ngamaKhristu agcotshiweyo? (b) Kwenzakalani ngo-October 1914, njalo sikwazi njani ukuthi lokhu kwenzakala?

¹⁰ Ezinsukwini zalamuhla, amaKhristu agcotshiweyo akukhuluma kuseselesikhathi ukuthi ngo-October 1914 kwakuzakwenzakala izinto eziqakathekileyo. Lokhu babekuthethe esiphrofethweni sikaDanyeli esasiphathelane lenkalakatha yesihlahla esaqunywayo kodwa esasizaphinda sikhule ngemva ‘kwezikhathi loba iminyaka eyisikhombisa.’ (Dan. 4:16) UJesu ephrofetha ngokuba khona kwakhe esikhathini esizayo kanye “lokucina kwesikhathi,” wabiza izikhathi eziyisikhombisa ngokuthi ‘yizikhathi zabeZizwe.’ UKhristu wabekwa ukuthi abe yiNkosi entsha ngo-1914. Kusukela lapho, ‘isiboniso sokuza kwakhe [“ukuba khona kwakhe,” NW]’ sesibacacela abanengi. (Mat. 24:3, 7, 14; Luk. 21:24) Yikho-ke kusukela lapho, “izimangaliso zikaNkulunkulu” sezigoqela lokubekwa kukaJesu ukuthi abe yiNkosi yabantu bonke.

11, 12. (a) INkosi entsha yaqala ukwenzani ngo-1919 impi isiphelile? (b) Kusukela kubo-1930 kusiya phambili, kuyini okunye okwenzakalayo? (Khangela umfanekiso osekuqaliseni.)

¹¹ UJesu Khristu esanda kubekwa ukuthi abe yiNkosi wahle waqalisa ukukhipha abalandeli bakhe abagcotshiweyo ebugqilini ‘beBhabhiloni eNkulu.’ (Isam. 18:2, 4) Ngo-1919 ngemva kwempi yomhlaba wonke yokuqala, kwaba lethuba lokufakaza emhlabeni wonke mayelana lalokho uNkulunkulu ayekusebenzisa ukuze asindise abantu, kanye lelokutshumayela izindaba ezinhle eziphathelane loMbuso obekiweyo. AmaKhristu agcotshiweyo awazange alidlalise ithuba leli njalo lokhu kwenza ukuthi ezinye izinkulungwane zabagcotshiweyo ziqoqwe ukuze zibe yizindlalifa kanye loKhristu.

¹² Kusukela kubo-1930 kusiya phambili, kwacaca ukuthi uKhristu wayeseqalisile lokuqoqa “ezinye izimvu” ezazizabumba ‘ixuku elikhulukazi’ elivela ezizweni zonke. Ixuku leli lilandela isibonelo sikaJesu sokuba lesibindi njalo lifakaza ebantwini bonke ukuthi insindiso yalo ivela kuNkulunkulu lakuKhristu. Lokhu likwenza likhokhelwa ngamaKhristu agcotshiweyo. Nxa libambelela emsebenzini wokufakaza njalo liqhubeka likholwa emhlatshelweni wenhlawulo kaKhristu, lizasinda “ekuhluphekeni okukhulu” okuzasusa umhlaba kaSathane.—Joh. 10:16; Isam. 7:9, 10, 14.

13. Kumele sizimisele ukwenzani, njalo sikwazi njani ukuthi sizaphumelela loba sekutheni?

¹³ Kumele siqhubeke siqakathekisa isibusiso sokuba ngoFakazi ‘bezimangaliso’ ezenziwe nguJehova uNkulunkulu kanye lalokho asithembisa ukuthi uzasenzela khona kwelizayo. Kodwa kwezinye izikhathi ukufakaza akulula. Abafowethu abanengi batshumayela lapho okulabantu abangafuniyo ukutshunyayezwa, ababalulazayo kumbe ababahlukuluzayo sibili. Lanxa kunjalo, kumele silingisele ­umphostoli uPhawuli kanye labanye bakhe. Wathi: “Ngosizo lukaNkulunkulu wethu saba lesibindi sokulitshela ivangeli lakhe lanxa nje kwakulobunzima obukhulu.” (1 Thes. 2:2) Phela akulahlwa mbeleko ngokufelwa, yikho kumele sizimisele ukuthi senze lokho esathembisa ukukwenza mhla sizinikela kuJehova. Kanti njalo siqhubeke sikwenza lokhu njengoba umhlaba kaSathane usutshabalala. (Isaya. 6:11) Kodwa lokhu asingeke sikwenze ngamandla ethu kuphela. Yikho-ke kumele silingisele amaKhristu okuqala ngokuthandazela ukuthi uJehova asinike ‘amandla amakhulukazi’ esebenzisa umoya wakhe.​—Bala u-2 Khorinte 4:1, 7; Luk. 11:13.

14, 15. (a) AmaKhristu ayephathwa njani ekhulwini lokuqala C.E., njalo umphostoli uPhetro wathini ngawo? (b) Kumele senzeni nxa siphathwa kubi ngenxa yokuthi singoFakazi bakaJehova?

¹⁴ Lamuhla abantu abanengi bathi bangamaKhristu “kodwa ngezenzo zabo bayamphika [uNkulunkulu]. Bayenyanyeka, bayadelela njalo kabafanelanga ukwenza loba kuyini okuhle.” (Tit. 1:16) Kumele sikhumbule ukuthi ekhulwini lokuqala abantu abanengi babewazonda amaKhristu eqiniso. Yikho umphostoli uPhetro wabhala wathi: ‘Uma lithukwa ngenxa yebizo likaKhristu, libusisiwe, ngoba umoya kaNkulunkulu uhlezi phezu kwenu.’​—1 Phet. 4:14.

¹⁵ Amazwi la aphefumulelwayo ayasebenza yini kuboFakazi bakaJehova lamuhla? Ayasebenza sibili ngoba lathi sifakaza ngoJesu oseyiNkosi. Yikho-ke, nxa sizondwa ngenxa yokuthi sibizwa ngebizo likaJehova kufanana lokuthi siyabe ‘sithukwa ngenxa yebizo likaKhristu [uJesu],’ owathi kwababemphikisa: “Ngizile ngebizo likaBaba, kodwa kalingamukeli.” (Joh. 5:43) Nxa uphikiswa, woba lesibindi uqhubeke ufakaza ngoba ukuphikiswa kwakho kutshengisa ukuthi uNkulunkulu uyakwamukela kanye lokuthi umoya wakhe ‘uhlezi phezu kwakho.’

16, 17. (a) Kuyini okwenzakalayo ebantwini bakaJehova ezindaweni ezinengi? (b) Uzimisele ukwenzani?

¹⁶ Okunye okungamelanga ukukhohlwe yikuthi ezindaweni ezinengi abantu balokhu bebuya enhlanganisweni kaJehova. Lasendaweni esihlala sitshumayela kuyo kokuphela, siyabe silokhu sibathola abantu abafuna ukulalela, besesibatshela umlayezo omangalisayo ophathelane lensindiso. Kanti njalo kumele singayekeli ukubuyela ebantwini abalesifiso sokufunda iBhayibhili, sibancede ukuthi bathuthuke baze bazinikele njalo babhaphathizwe. Akuthandabuzwa ukuthi lawe uzwa njengoSarie waseSouth Africa oseleminyaka edlula-60 ekhuthele emsebenzini wokutshumayela. Uthi, “Ngiswele amazwi okubonga umhlatshelo kaJesu wenhlawulo ngoba ungenza ngenelise ukuba lobuhlobo obuhle loJehova uMbusi wendawo yonke, njalo kuyangithokozisa ukuthi ngenza ibizo lakhe elikhazimulayo laziwe.” Yena lomkakhe uMarti­nus sebencede abantwababo abathathu kanye labanye abanengi ukuthi babe yizikhonzi zikaJehova. USarie uqhubeka esithi, “Awukho omunye umsebenzi ongangenza ngisuthiseke kangaka, njalo uJehova uyasinika sonke umoya ongcwele ukuze sibe lamandla okuqhubeka sisenza umsebenzi lo owenza abantu bathole ukuphila.”

¹⁷ Kunengi kakhulu okwenza sibonge ukuthi silesibusiso sokuba senhlanganisweni yaboFakazi bakaJehova esemhlabeni wonke, kungelani lokuthi sifuna ukubhaphathizwa kumbe singamaKhristu asebhaphathiziwe. Yikho-ke, qhubeka ufakaza ngokupheleleyo futhi ulwise ukuthi uhlale ungangcoliswanga ngumhlaba kaSathane. Lokhu kuzakwenza ukuthi uBaba wethu osezulwini osithandayo ahlonitshwe ngoba sibizwa ngebizo lakhe elikhazimulayo.