Ukuthanda UJehova Kuzakwenza Ubhabhathizwe

1-2. Ngokwalokho okutshiwo kumiSebenzi 8:27-31, 35-38, kuyini okwenza isiphathamandla esingumTopiya sabhabhathizwa?

UYAFUNA yini ukubhabhathizwa ukuze ube ngumfundi kaKhristu? Abantu abanengi bakhethe ukubhabhathizwa ngoba bemthanda uJehova futhi beqakathekisa lokho abenzele khona. Cabanga ngalokho okwenziwa yisiphathamandla sendlovukazi yamaTopiya.

² UmTopiya wahle wabhabhathizwa ngemva kokufunda eMibhalweni ukuthi kumele enze njalo. (Bala imiSebenzi 8:27-31, 35-38.) Kuyini okwamenza wabhabhathizwa? Kusegcekeni ukuthi wayeliqakathekisa iLizwi likaNkulunkulu ngoba wayebala amavesi asebhukwini lika-Isaya ngesikhathi esenqoleni. Kanti njalo ukuxoxa loFiliphu kwamenza wakuqakathekisa lokho uJesu ayemenzele khona. Kodwa okwenza isiphathamandla lesi saya eJerusalema yikuthi sasesivele simthanda uJehova. Sikwazi njani lokhu? Phela sasivela mkhonza eJerusalema. Kukhanya indoda le yayisitshiye inkolo yayo yazihlanganisa lesizwe esasizinikele kuNkulunkulu weqiniso. Ukuthanda uJehova yikho futhi okwenza yakhetha ukwenza okunye okuqakathekileyo. Yabhabhathizwa njalo yaba ngumfundi kaKhristu.—Mat. 28:19.

3. Kuyini okungavimbela umuntu ukuthi abhabhathizwe? (Khangela ibhokisi elithi “Inhliziyo Yakho Injengawuphi Umhlabathi?”)

³ Ukuthanda uJehova kungakwenza ufune ukubhabhathizwa. Kodwa uthando lungaphinda lukuvimbele ukwenza njalo. Njani? Ngokwesibonelo, ungabe ubathanda kakhulu abangakini labangane okokuthi ungakhathazeka ngokuthi bazakuzonda nxa ungabhabhathizwa. (Mat. 10:37) Ungabe uthanda ukwenza izinto okwaziyo ukuthi uNkulunkulu uyazizonda futhi kungabe kunzima ukuthi uzitshiye. (Hubo. 97:10) Kanti njalo kungenzeka wakhula unanza imikhosi yenkolo yamanga futhi ungabe ulokhu ukuthanda ukuyinanza. Lokhu kungenza kube kunzima ukuthi utshiye imikhosi engamthokozisiyo uJehova. (1 Khor. 10:20, 21) Yikho kumele ukhethe ukuthi yikuphi kumbe ngubani omthanda kakhulu.

4. Yisiphi isizatho esiqakatheke kulazo zonke sokuthi ufune ukubhabhathizwa?

⁴ Zinengi izinto ezinhle ozithandayo loziqakathekisayo. Ngokwesibonelo, kungenzeka ukuthi wawuvele uliqakathekisa kakhulu iBhayibhili ungakaqalisi ukufunda laboFakazi bakaJehova futhi kungenzeka wawusumthanda uJesu. Khathesi mhlawumbe uyakuthanda ukuba laboFakazi njengoba usubazi. Kodwa ukuthanda uJesu, oFakazi leBhayibhili ayisikho kodwa okungenza ufune ukuzinikela kuJehova njalo ubhabhathizwe. Ukuthanda uJehova uNkulunkulu yiso isizatho esiqakatheke kulazo zonke sokuthi ufune ukubhabhathizwa. Nxa umthanda ukwedlula zonke ezinye izinto, awusoze uvume ukuthi olunye ulutho loba omunye umuntu akuvimbele ukumkhonza. Ukuthanda uJehova kuzakwenza ufune ukubhabhathizwa njalo kuzakunceda ukuthi uqhubeke uthembekile kuye ngemva kokubhabhathizwa.

5. Sizaxoxa ngani esihlokweni lesi?

⁵ UJesu wathi kumele sithande uJehova ngenhliziyo yethu yonke, langomphefumulo wonke, langengqondo yonke, langamandla ethu wonke. (Mak. 12:30) Ungenzani ukuze umthande futhi umhloniphe kangako uJehova? Ukucabangisisa ngokuthi uJehova usithanda kangakanani kuzakwenza lathi simthande. (1 Joh. 4:19) Esihlokweni lesi sizaxoxa ngezinto ezitshiyeneyo ezizakunceda ukuthi ukwenze lokhu. Sizaphinda sixoxe ngokunye okuzakwenzakala nxa usumthanda kakhulu uJehova.b

6. Ngokwalokho okutshiwo kuRoma 1:20, yiphi enye indlela esingafunda ngayo ngoJehova?

⁶ Funda ngoJehova ezintweni azidalileyo. (Bala uRoma 1:20; Isam. 4:11) Cabangisisa ngezimila langezinyamazana uJehova azidalileyo eziveza ukuthi ulenhlakanipho enkulu. Funda ngendlela emangalisayo umzimba wakho owenziwe ngayo. (Hubo. 139:14) Cabanga langamandla aselangeni, ubusukhumbula ukuthi ilanga ngelinye nje lezinkanyezi ezingamabhiliyoni.c (Isaya. 40:26) Nxa ungenza njalo, uzamhlonipha kakhulu uJehova. Kuqakathekile sibili ukwazi ukuthi uJehova uhlakaniphile futhi ulamandla. Lanxa kunjalo, kumele wazi okunengi ngaye ukuze umthande kakhulu futhi ube ngumngane wakhe oseduze.

7. Kuyini okumele uqiniseke ngakho ukuze umthande kakhulu uJehova?

⁷ Kumele uqiniseke ukuthi uJehova uyakuthanda sibili. Kukuthwalisa nzima yini ukukholwa ukuthi uMdali wamazulu lomhlaba uyakwazi lokuthi ulendaba lawe? Nxa kukuthwalisa nzima, khumbula ukuthi uJehova ‘kakhatshana komunye lomunye wethu.’ (ImiSeb. 17:26-28) ‘Uhlola zonke izinhliziyo’ njalo uthembisa ukuthi uzamthola nxa umdinga. (1 ImiLan. 28:9) Phela okwenza ufunde iBhayibhili khathesi yikuthi ‘udonswe nguBaba.’ (Joh. 6:44) Uzamthanda kakhulu nxa ungakuqakathekisa konke akwenzele khona.

8. Ungenzani ukuze utshengise ukuthi uyambonga uJehova ngothando lwakhe?

⁸ Okunye ongakwenza ukuze utshengise ukuthi uyambonga uJehova ngothando lwakhe yikuthandaza kuye. Uzamthanda kakhulu uNkulunkulu nxa uthandaza kuye umtshela okukukhathazayo futhi umbonga ngakho konke akwenzele khona. Kanti njalo ubungane benu buzaqina nxa ubona indlela aphendula ngayo imithandazo yakho. (Hubo. 116:1) Kawusoze uthandabuze ukuthi uyakuzwisisa. Kodwa ukuze ube seduze kakhulu loJehova kumele uzwisise indlela acabanga ngayo. Kumele wazi lokuthi ufuna wenzeni. Ukutaditsha iLizwi lakhe iBhayibhili yikho kodwa okuzakwenza uthole ulwazi lolu.

9. Ungatshengisa njani ukuthi uyaliqakathekisa iBhayibhili?

⁹ Qakathekisa iLizwi likaNkulunkulu iBhayibhili. IBhayibhili yilo lodwa elikhuluma iqiniso ngoJehova langalokho ahlose ukukwenzela khona. Nxa ulibala nsuku zonke, ulungiselela ozakufunda lomuntu okufundisayo futhi usebenzisa okubalayo uyabe utshengisa ukuthi uyaliqakathekisa. (Hubo. 119:97, 99; Joh. 17:17) Ulohlelo lokubala iBhayibhili nsuku zonke yini? Uyalulandela yini?

10. Kuyini okwenza iBhayibhili lingafanani lamanye amabhuku?

¹⁰ Okunye okwenza iBhayibhili lingafanani lamanye amabhuku yikuthi lilezindaba ezilandiswa ngabantu abaphila loJesu. Yilo lodwa ibhuku elikhuluma iqiniso ngalokho uJesu akwenzele khona. Kumele ukuthi uzakuba ngumngane wakhe nxa ungafunda ngalokho akutshoyo lakwenzayo.

11. Kuyini okuzakunceda ukuthi uthande uJehova?

¹¹ Ukuthanda uJesu kuzakwenza umthande kakhulu uJehova. Kungani sisitsho njalo? UJesu walingisela ubuntu bukaYise ngendlela epheleleyo. (Joh. 14:9) Yikho nxa ungafunda okunengi ngoJesu, uzamzwisisa kakhulu uJehova futhi umqakathekise. Cabanga ngesihawu uJesu asitshengisa abantu ababeseyiswa ngoba bengabayanga, begula njalo bebuthakathaka. Cabanga futhi ngamacebo akunika wona lokuthi impilo yakho intshintsha njani nxa uwasebenzisa.—Mat. 5:1-11; 7:24-27.

12. Kuyini okungenzakala nxa ungafunda ngoJesu?

¹² Kumele ukuthi uzamthanda kakhulu uJesu nxa ungacabangisisa ngomhlatshelo awenzayo ukuze izono zethu zithethelelwe. (Mat. 20:28) Nxa ungazwisisa ukuthi uJesu wayezimisele ukukufela, kungenzeka uphenduke njalo ucele uJehova akuthethelele. (ImiSeb. 3:19, 20; 1 Joh. 1:9) Nxa ungamthanda kakhulu uJehova loJesu uzafisa ukuba labantu ababathandayo.

13. UJehova uzakunikani?

¹³ Thanda labo uJehova abathandayo. Abangakini abangamkhonziyo uJehova labakade bengabangane bakho bangabe bengazwisisi ukuthi kungani ufuna ukuzinikela kuJehova. Bangakuphikisa lokukuphikisa. Kodwa uJehova uzakunika abazalwane ebandleni abazakuba yimuli yakho. Nxa ungahlala useduze labafowethu labodadewethu laba, bazakuthanda futhi bakusekele. (Mak. 10:29, 30; Heb. 10:24, 25) Ngokuhamba kwesikhathi abangakini labo bangakhetha ukukhonza uJehova njalo balalele izimiso zakhe.—1 Phet. 2:12.

14. Ngokwalokho okutshiwo ku-1 Johane 5:3, kuyini osukunanzelele ngezimiso zikaJehova?

¹⁴ Qakathekisa izimiso zikaJehova futhi uzilandele. Kungenzeka ungakamazi uJehova wawuzikhethela ukuthi yikuphi okuqondileyo lokungaqondanga. Kodwa khathesi usubonile ukuthi ukulandela izimiso zikaJehova kungcono. (Hubo. 1:1-3; bala u-1 Johane 5:3.) Cabanga ngalokho okutshiwo liBhayibhili okunceda amadoda, amakhosikazi, abazali labantwana. (Efe. 5:22–6:4) Imuli yakho isithokoza yini ngokusebenzisa amacebo lawo? Ukulalela okutshelwa nguJehova mayelana lokukhetha abangane kwenze impilo yakho yaba ngcono yini? Usuthokoza kakhulu yini? (Zaga. 13:20; 1 Khor. 15:33) Kumele ukuthi imibuzo le uyiphendule ngoyebo.

15. Ungenzani nxa ufuna uncedo lokuthi ungazisebenzisa njani izimiso zeBhayibhili?

¹⁵ Ngezinye izikhathi ungakuthola kunzima ukwazi ukuthi ungazisebenzisa njani izimiso zeBhayibhili ozifundayo. Yikho uJehova esebenzisa inhlanganiso yakhe ukuthi akunike amabhuku asekelwe eBhayibhilini akunceda ukuthi wehlukanise okuhle lokubi. (Heb. 5:13, 14) Nxa ungawataditsha amabhuku la, uzabona ukuthi akunceda njani lokuthi kungaphi lapho ongakusebenzisa khona okubale kuwo. Kanti njalo ungafisa ukuba phakathi kwenhlanganiso kaJehova.

16. UJehova ubahlele njani abantu bakhe?

¹⁶ Thanda inhlanganiso kaJehova njalo uyisekele. UJehova uhlele abantu bakhe baba ngamabandla futhi iNdodana yakhe uJesu iyinhloko yawo wonke amabandla. (Efe. 1:22; 5:23) UJesu ukhethe iqenjana lamadoda agcotshiweyo ukuthi likhokhele ekuhleleni umsebenzi afuna wenziwe. UJesu wathi iqembu leli ‘yinceku ethembekileyo lehlakaniphileyo.’ Iqembu leli liyawuqakathekisa kakhulu umsebenzi walo wokukuncedisa usondele kuNkulunkulu lokuthi uhlale ungumngane wakhe. (Mat. 24:45-47) Enye indlela inceku ethembekileyo ekuncedisa ngayo yikuba leqiniso lokuthi amadoda afaneleyo ayakhethwa ukuba ngabadala ukuze akweluse. (Isaya. 32:1, 2; Heb. 13:17; 1 Phet. 5:2, 3) Abadala bazimisele ukwenza loba yini ukuze bakuncede njalo bazimisele ukukududuza lokukusiza ukuthi ube seduze kakhulu loJehova. Kodwa okuqakatheke kakhulu abangakwenzela khona yikukuncedisa ukuthi wenelise ukufundisa abanye ngoJehova.—Efe. 4:11-13.

17. Ngokwalokho okutshiwo kuRoma 10:10, 13, 14, kungani sitshela abanye ngoJehova?

¹⁷ Ncedisa abanye bathande uJehova. UJesu watshela abalandeli bakhe ukuthi bafundise abanye ngoJehova. (Mat. 28:19, 20) Umuntu angawulalela umlayo lo ngenxa nje yokuthi kumele ulalelwe. Kodwa nxa ungamthanda kakhulu uJehova uzalingisela umphostoli uPhetro lomphostoli uJohane abathi: “Kasingeke siyekele ukukhuluma ngezinto esizibonileyo lesizizwileyo.” (ImiSeb. 4:20) Uzathokoza kakhulu nxa ungancedisa umuntu othile ukuthi athande uJehova. Kumele ukuthi umvangeli uFiliphu wathokoza kakhulu esencedise umTopiya ukuthi afunde iqiniso eliseMibhalweni njalo abhabhathizwe. Nxa ungalingisela uFiliphu futhi ulalele umlayo kaJesu wokuthi utshumayele, uyabe utshengisa ukuthi uyafuna ukuba nguFakazi kaJehova. (Bala uRoma 10:10, 13, 14.) Ngalesosikhathi kumele ukuthi uzabuza umbuzo owabuzwa ngumTopiya: “Kuyini okungivimbela ukuthi ngibhabhathizwe?”—ImiSeb. 8:36.

18. Sizaxoxa ngani esihlokweni esilandelayo?

¹⁸ Nxa ungabhabhathizwa uyabe wenze into eqakatheke kulazo zonke ongazenza empilweni. Njengoba ukubhabhathizwa kuqakatheke kangaka, kumele ucabangisise ngokuthi kutshoni. Kuyini okumele ukwazi ngokubhabhathizwa? Kuyini okumele ukwenze ungakabhabhathizwa lalapho usubhabhathiziwe? Sizaxoxa ngemibuzo le esihlokweni esilandelayo.