Amazwi UJesu Awatsho Esezakufa Asifundisani?

 1-2. Chaza okwenzakala uJesu engakafi.

KUMHLAKA 14 ngenyanga kaNisani ngo-33 C.E. UJesu umangalelwa ngento angayenzanga abesedliwa licala. Ngemva kwalokho wenziwa inhlekisa ahlukuluzwe kabuhlungu, abesebethelwa izandla lenyawo esigodweni. Ukuphefumula lokuvula nje umlomo ekhuluma kumzwisa ubuhlungu obukhulu. Kodwa kumele akhulume ngoba kukhona okuqakathekileyo okufanele akutsho.

² Kasixoxeni ngamazwi uJesu awatsho esesigodweni sokuhlutshwa besesibona ukuthi sifundani kiwo. Ngamanye amazwi, ‘kasimlaleleni.’—Mat. 17:5.

 3. UJesu wayengabe ekhuluma ngabobani ngesikhathi esithi: “Baba, bathethelele”?

³ Wathini uJesu? Esebethelwe esigodweni, wathandaza esithi: “Baba, bathethelele.” Athethelele obani? Amazwi alandelayo asinceda sizwisise ukuthi uJesu wayekhuluma ngabobani, athi: “Kabakwazi abakwenzayo.” (Luk. 23:33, 34) UJesu wayengabe esitsho amasotsha angamaRoma ayebethele izipikili ezandleni lasenyaweni zakhe. Ayengakwazi ukuthi uyiNdodana kaNkulunkulu. Wayengabe esitsho lalabo ababefuna abulawe kodwa ababezakuba lokholo kuye ngokuhamba kwesikhathi. (ImiSeb. 2:36-38) Kazange avumele ukuphathwa kubi kumenze azonde kumbe abambe isikhwili. (1 Phet. 2:23) Kodwa wacela uJehova ukuthi abathethelele labo abambulalayo.

 4. Ukuzimisela kukaJesu ukuthethelela ababemphikisa kusifundisani?

⁴ Sifundani emazwini kaJesu? Kumele simlingisele ngokuzimisela ukuthethelela abanye. (Kol. 3:13) Abanye abantu, okuhlanganisa lezihlobo zethu bangabe besiphikisa ngoba bengazizwisisi izinto esizikholwayo lendlela esiphila ngayo. Bangaqamba amanga ngathi, basiyangise phambi kwabantu, batshise loba badabule amabhuku ethu kumbe basethusele ngokuthi bazasilimaza. Akumelanga sibabambele isikhwili, kodwa kufanele sicele uJehova abancedise bamukele iqiniso. (Mat. 5:44, 45) Kwesinye isikhathi kungaba nzima ukuthi sibathethelele, ikakhulu nxa besiphathe kubi kakhulu. Kodwa singababambela isikhwili, siyabe sizilimaza. Omunye udadewethu wathi: “Nxa ngithethelela, akutsho ukuthi ngivumelana lalokho okwenzakeleyo, kumbe ukuthi ngivumela abantu ukuthi bangiphathe kubi. Kodwa kutsho ukuthi ngikhetha ukungababambeli isikhwili.” (Hubo. 37:8) Nxa sithethelela abanye siyabe sikhetha ukungavumeli izinto ezimbi ezenzakale kithi zibangele ukuthi sihlale sizondile.—Efe. 4:31, 32.

 5. UJesu wasithembisani isigebenga esasibethelwe eceleni kwakhe futhi kungani wenza njalo?

⁵ Wathini uJesu? Kwakulezigebenga ezimbili ezazibethelwe ziphahle uJesu. Ekuqaliseni zonke zazimthethisa. (Mat. 27:44) Kodwa sekudlule isikhathi, esinye sazo sazisola sasesiyekela ukwenza njalo. Sananzelela ukuthi uJesu ‘konanga lutho.’ (Luk. 23:40, 41) Saphinda satshengisa ukuthi siyakholwa ukuthi uJesu uzavuswa lokuthi ngelinye ilanga uzakuba yiNkosi. Sathi kuye: “Jesu, ungikhumbule nxa ufika eMbusweni wakho.” (Luk. 23:42) Indoda le yatshengisa ukuthi ilokholo sibili. UJesu wayiphendula wathi: “Ngikutshela iqiniso lamuhla ngithi, uzakuba lami ePharadayisi [hatshi eMbusweni].” (Luk. 23:43) Nanzelela ukuthi uJesu wasebenzisa amazwi aveza ukuthi wayengathembisi abantu abanengi, kodwa wayethembisa indoda le uqobo lwayo. Wakhuluma amazwi ayenika isigebenga lesi esasesizakufa ithemba ngoba wayekwazi ukuthi uYise ulesihawu.—Hubo. 103:8.

 6. Sifundani emazwini uJesu awatshela isigebenga?

⁶ Sifundani emazwini kaJesu? UJesu ufuze uYise. (Heb. 1:3) UJehova uzimisele sibili ukusithethelela lokusitshengisa isihawu, kodwa ukuze enze njalo kumele sizisole ngezono esazenzayo futhi sitshengise ukuthi silokholo emhlatshelweni kaJesu Khristu. (1 Joh. 1:7) Abanye kubathwalisa nzima ukukholwa ukuthi uJehova angazithethelela izono abazenza kudala. Nxa ungomunye wabo, cabanga ngalokhu: UJesu wathi esezakufa, watshengisa indoda eyayiyisigebenga isihawu lanxa yayisanda kuqalisa ukuba lokholo kuye. Pho kuthiwani ngezinceku zikaJehova ezithembekileyo, ezizama ngamandla wonke ukulalela imilayo yakhe? Akuthandabuzwa ukuthi uJehova uzazitshengisa isihawu.—Hubo. 51:1; 1 Joh. 2:1, 2.

 7. Ngokwalokho okutshiwo kuJohane 19:26, 27, uJesu wathini kuMariya lakuJohane futhi kungani watsho njalo?

⁷ Wathini uJesu? (Bala uJohane 19:26, 27.) UJesu wayekhathazekile ngonina, okungenzakala wayesengumfelokazi. Abanawakhe babengenelisa ukumnakekela. Kodwa ngubani owayezamncedisa ekukhonzeni? Phela akulalutho olutshengisa ukuthi abafowabo bakaJesu basebengabafundi ngalesosikhathi, kodwa uJohane wayengumphostoli othembekileyo futhi engumngane wakhe oseduze. UJesu wayebona labo ababekhonza uJehova beyimuli yakhe. (Mat. 12:46-50) Wayemthanda unina futhi efuna ukuba leqiniso lokuthi uyanakekelwa. Yikho wacela uJohane ukuthi enze njalo, ngoba wayekwazi ukuthi uzamncedisa ukuthi aqhubeke ekhonza uJehova. Wathi kunina: “Nansi indodana yakho!” Wasesithi kuJohane: “Nangu unyoko!” Kusukela ngalelolanga, uJohane wayesengani yindodana kaMariya, futhi wayesemnakekela angathi ngunina. UJesu watshengisa ukuthi uyamthanda unina, owamnakekela kusukela ezalwa futhi owayemile eceleni kwakhe ngesikhathi esifa.

 8. Sifundani emazwini uJesu awatshela uMariya loJohane?

⁸ Sifundani emazwini kaJesu? Singaba seduze labafowethu labodadewethu ukwedlula abangakithi. Izihlobo zethu zingasiphikisa zize zisilahlele iganga, kodwa uJesu wathembisa ukuthi nxa singahlala siseduze loJehova lenhlanganiso yakhe, ‘sizathola sekuphindwe ka-100’ lokho okuyabe kusilahlekele. Sizakuba lamadodana lamadodakazi, obaba labomama abanengi. (Mak. 10:29, 30) Uzwa njani ngokuba lilunga lemuli emanyeneyo ngenxa yokuthi ilokholo kuJehova futhi iyamthanda njalo iyathandana?—Kol. 3:14; 1 Phet. 2:17.

 9. Amazwi kaJesu akuMathewu 27:46 asitshelani?

⁹ Wathini uJesu? UJesu wathi esezakufa wamemeza wathi: “Nkulunkulu wami, Nkulunkulu wami, ungitshiyeleni na?” (Mat. 27:46) IBhayibhili kalisitsheli ukuthi uJesu wawakhulumelani amazwi la, kodwa kasihloleni ukuthi asifundisani. Okunye esikufundayo yikuthi ngesikhathi uJesu ekhuluma amazwi la, wayegcwalisa isiphrofetho esikuHubo 22:1.b Kanti njalo amazwi la enza kwacaca ukuthi uJehova ‘wayengayibiyelanga ngothango’ iNdodana yakhe. (Jobe. 1:10) UJesu wayezwisisa ukuthi uYise wayevumele ukuthi izitha zakhe zinyikinye ukholo lwakhe kuze kube sekufeni kwakhe. Akulamuntu owake wehlelwa yibunzima obulingana lalobo obehlela uJesu. Amazwi la aphinda aveze ukuthi uJesu wayengenzanga cala elalingenza afanele ukubulawa.

10. Sifundani emazwini uJesu awatshela uYise?

¹⁰ Sifundani emazwini kaJesu? Sifunda ukuthi akumelanga sikhangelele ukuthi uJehova asivikele kubo bonke ubunzima obunganyikinya ukholo lwethu. Lathi njengoJesu kumele sizimisele ukuhlala sithembekile kuze kube sekufeni. (Mat. 16:24, 25) Lanxa kunjalo, siyaqiniseka ukuthi uJehova ngeke avume ukuthi silingwe ngalokho esingeke senelise ukukubekezelela. (1 Khor. 10:13) Okunye esikufundayo yikuthi lathi njengoJesu singaphathwa kubi lanxa kungelanto embi esiyenzileyo. (1 Phet. 2:19, 20) Okwenza siphathwe njalo yikuthi kasisibo bomhlaba futhi sifakaza iqiniso. (Joh. 17:14; 1 Phet. 4:15, 16) UJesu wayekwazi ukuthi kungani uNkulunkulu evumela ukuthi ahlupheke. Kodwa ezinye izinceku zikaJehova ezake zaba phakathi kobunzima zazizibuza ukuthi kungani uJehova evumela ukuthi ezinye izinto zenzakale. (Hab. 1:3) UNkulunkulu wethu olesihawu futhi obekezelayo uyakwazi ukuthi okwenza izinceku zakhe zizibuze lokhu kayisikho ukuthi kazilakholo kodwa zidinga ukududuzwa nguye.—2 Khor. 1:3, 4.

11. Kungani uJesu wakhuluma amazwi atholakala kuJohane 19:28?

¹¹ Wathini uJesu? (Bala uJohane 19:28.) Kungani uJesu wathi: “Sengomile”? Lokhu wakutsho “ukuze umbhalo ugcwaliseke,” okutsho isiphrofetho esikuHubo 22:15 esithi: “Amandla ami asetshile qhu ingathi ludengezi, lolimi lwami luyanamathela olwangeni lwami.” Okunye okungabe kwenza watsho amazwi la yikuthi wayesewomile njengoba wayehlukuluziwe njalo esizwa ubuhlungu obukhulu ngenxa yokubethelwa esigodweni. Wayedinga umuntu ongamncedisa ukuthi aqede ukoma kwakhe.

12. Sifundani emazwini kaJesu athi “Sengomile”?

¹² Sifundani emazwini kaJesu? UJesu kwakungamyangisi ukutsho lokho ayekudinga, lathi akumelanga kusiyangise. Mhlawumbe kasisibobantu abajayele ukucela uncedo kwabanye. Kodwa nxa sidinga uncedo, akumelanga siyekele ukulucela. Ngokwesibonelo, nxa sesigugile kumbe singaphilanga kuhle emzimbeni, singacela umngane ukuthi asiphelekezele ezitolo kumbe ukuyabona udokotela. Nxa udanile ungacela umdala webandla kumbe omunye umKhristu oqinileyo ekukhonzeni ukuthi akulalele loba akutshele “ilizwi elilomusa” ukuze akukhuthaze. (Zaga. 12:25) Asikhumbuleni ukuthi abafowethu labodadewethu bayasithanda lokuthi bafuna ukusinceda ‘ngezikhathi zenhlupheko.’ (Zaga. 17:17) Kodwa kabenelisi ukwazi esikucabangayo, yikho bangabe bengakwazi ukuthi sidinga uncedo nxa singazange sibatshele.

13. Ukuthembeka kukaJesu kuze kube sekufeni kwanceda ngani?

¹³ Wathini uJesu? Kwathi sekungabo-3 emini mhlaka 14 ngenyanga kaNisani, uJesu wamemeza esithi: “Sekwenzakele!” (Joh. 19:30) Amazwi la asitshengisa ukuthi wathi esezakufa wayekwazi ukuthi usekwenze konke uJehova ayefuna akwenze. Zinengi izinto uJesu azenzayo ngokuhlala ethembekile kuze kube sekufeni. Okokuqala, watshengisa ukuthi uSathane ungusomangase. Watshengisa ukuthi umuntu ongelasono angaqhubeka ethembekile kungelani lokuthi uSathane wenzani. Okwesibili, uJesu wanikela ngokuphila kwakhe ukuze kube yinhlawulo. Ukunikela ngokuphila kwakhe kwenza abantu abalesono babe ngabangane bakaNkulunkulu futhi babe lethemba lokuthola ukuphila okungapheliyo. Okwesithathu, uJesu watshengisa ukuthi uJehova nguMbusi olungileyo futhi wangcwelisa ibizo likaYise.

14. Kumele sizimisele ukwenzani? Chasisa.

¹⁴ Sifundani emazwini kaJesu? Nsuku zonke kumele senze konke okusemandleni ethu ukuze sihlale sithembekile kuJehova. Ake sixoxe ngokwatshiwo ngumfowethu uMaxwell Friend, owayengomunye wababefundisa eSikolo SeGiliyadi. Wathi esenza inkulumo emayelana lokuthembeka emhlanganweni omkhulu, wathi: “Ungalindi kuze kube kusasa nxa kuyikuthi uyenelisa ukwenza kumbe ukutsho ulutho oluthile lamuhla. Uyakwazi ukuthi uzabe uphila yini kusasa? Phila usuku ngalunye angathi lilanga lakho lokucina lokutshengisa ukuthi ufanele ukuphila phakade.” Kasiphileni usuku ngalunye angathi lilanga lethu lokucina lokutshengisa ukuthi sithembekile. Singenza njalo, lanxa sesikhangelane lokufa singenelisa ukuthi, “Jehova, ngenze konke okusemandleni ami ukuthi ngihlale ngithembekile, ngatshengisa ukuthi uSathane ungusomangase futhi ngalwela ibizo lakho kanye lobukhosi bakho!”

15. Ngokwalokho okutshiwo kuLukha 23:46, kuyini uJesu ayengakuthandabuzi?

¹⁵ Wathini uJesu? (Bala uLukha 23:46.) UJesu wathi: “Baba, umoya wami ngiwubeka ezandleni zakho.” Wayekwazi ukuthi ikusasa lakhe lisezandleni zikaJehova, njalo wayengakuthandabuzi ukuthi uYise uzamkhumbula.

16. Ufundani kulokho okwenzakala komunye uFakazi owayeleminyaka engu-15?

¹⁶ Sifundani emazwini kaJesu? Zimisele ukufaka ukuphila kwakho ezandleni zikaJehova, okutsho ukuhlala uthembekile kuye lanxa ukuphila kwakho sekusengozini. Kumele ‘uthembe uJehova ngenhliziyo yakho yonke’ ukuze wenelise ukwenza njalo. (Zaga. 3:5) Cabanga ngokwenzakala komunye uFakazi owayeleminyaka engu-15 okuthiwa nguJoshua owayelomkhuhlane omubi. Wala ukwelatshwa ngendlela eyayisephula umthetho kaNkulunkulu. Wathi esezakufa watshela unina wathi: ‘Mama, ngisezandleni zikaJehova. Nanku engingakutshela khona ngingathandabuzi: Ngiyakwazi ukuthi uJehova uzangivusa loba sekutheni. Uyakwazi engikucabangayo lendlela engizizwa ngayo, futhi ngiyamthanda sibili.’c Ngamunye wethu kumele azibuze umbuzo lo, ‘Ngizaqhubeka ngithembekile yini kuJehova nxa ukholo lwami lunyikinywa ngokunye okungenza ngicine ngifile?’

17-18. Sifundeni? (Khangela lebhokisi elithi “Esikufunda Emazwini UJesu Awatsho Esezakufa.”)

¹⁷ Amazwi uJesu awatsho esezakufa alezifundo eziqakathekileyo sibili! Asikhumbuza ukuthi kufanele sithethelele abanye, njalo sithembe ukuthi uJehova uzasithethelela. Sibusisiwe ngokuba labafowethu labodadewethu abazimisele ukusincedisa, kodwa kumele silucele uncedo lolo ukuze siluthole. Siyakwazi ukuthi uJehova uzasincedisa siqinisele kungelani lobunzima obusehlelayo. Kanti njalo sifunde ukuthi kuqakathekile ukuphila usuku ngalunye angathi lilanga lethu lokucina lokutshengisa ukuthi sithembekile, siqiniseka ukuthi ukuphila kwethu kuvikelekile ezandleni zikaJehova.

¹⁸ Kunengi sibili esikufunda emazwini uJesu awatsho ebethelwe esigodweni sokuhlutshwa. Nxa singakusebenzisa esikufundileyo, siyabe silalela lokho uJehova akutshoyo mayelana leNdodana yakhe, wathi: “Yilaleleni.”—Mat. 17:5.