Yenza Ngokuvumelana Lomthandazo KaJesu Otshengisa Uthando

1, 2. Chasisa ukuthi uJesu wabenzelani abaphostoli bakhe abathembekileyo ngemva kokunanza iPhasika ngo-33 C.E.

NGUMNYAKA ka-33 C.E. ngoNisani-14 njalo sekuhlwile. UJesu labangane abathandayo basanda kunanza iPhasika elibakhumbuza ngendlela uNkulunkulu akhulula ngayo okhokho babo ebugqilini baseGibhithe. Kodwa abafundi bakhe abathembekileyo sebezathola “ukukhululwa okulaphakade” okukhulu. Ngelanga elilandelayo, uMkhokheli wabo ongelasono uzabulawa yizitha zakhe. Kodwa isenzo leso solunya sizantshintsha sibe yisibusiso. Igazi likaJesu elizachitheka lizakwenza ukuthi abantu bakhululwe esonweni lasekufeni.​—Heb. 9:12-14.

² Ukuze abe leqiniso lokuthi asilukhohlwa lolu hlelo olutshengisa uthando, uJesu waqalisa umkhosi omutsha owenziwa minyaka yonke owathatha isikhundla sePhasika. Wenza lokhu ngokuhlephula isinkwa esingelamvubelo wasesinika abaphostoli bakhe abathembekileyo abangu-11 wathi: “Lo ngumzimba wami ophiwe lina; kwenzeni lokhu kube yisikhumbuzo sami.” Waphinda wenza lokhu ngenkomitshi yewayini elibomvu wathi kubo: “Inkomitshi le iyisivumelwano esitsha egazini lami elichithelwa lina.”​—Luk. 22:19, 20.

 3. (a) Yiluphi untshintsho olukhulu olwaba khona uJesu esanda kufa? (b) Yiphi imibuzo okumele siyiphendule mayelana lomthandazo kaJesu obhalwe kuJohane isahluko-17?

³ Kwasekuseduze ukuthi siphele isivumelwano soMthetho esidala esasiphakathi kukaNkulunkulu losendo lwako-Israyeli. Sasizathathelwa indawo yisivumelwano esitsha esasizaba phakathi kukaJehova labalandeli bakaJesu abagcotshiweyo. UJesu wayekhathazeke kakhulu ngenhlalakahle yesizwe lesi esitsha esingokomoya. Ukukhonza kosendo lwako-Israyeli kwasekutshiyene njalo lomphakathi wawuhlukene futhi lokhu kwasekungcolisa ibizo likaNkulunkulu elingcwele. (Joh. 7:45-49; ImiSeb. 23:6-9) Kodwa uJesu wayelesifiso sokuthi abalandeli bakhe bahlale bemanyene ngokupheleleyo ukuze basebenze ngobunye besebekhazimulisa ibizo likaNkulunkulu. Manje uJesu ukhetha ukwenzani? Unika umthandazo omuhle kulayo yonke okokuthi kuyisibusiso kubani lobani ukuwubala. (Joh. 17:1-26; khangela umfanekiso osekuqaliseni.) Singazihlolela ubufakazi bokuphendula umbuzo lo, “UNkulunkulu usewuphendulile yini umthandazo kaJesu?” Kanti njalo kumele sizibuze ukuthi, “Ngenza ngokuvumelana lawo yini?”

4, 5. (a) Sifundani endleleni uJesu aqalisa ngayo umthandazo wakhe? (b) UJehova wasiphendula njani isicelo sikaJesu esasiphathelane lekusasa lakhe?

⁴ UJesu uxoxa labafundi bakhe kuze kube phakathi kobusuku ebafundisa ngolwazi oluligugu oluvela kuNkulunkulu. Abesekhangela phezulu ezulwini ethandaza esithi: ‘Baba, isikhathi sesifikile. Khazimulisa iNdodana yakho, ukuze iNdodana ikukhazimulise. Ngokuba wayinika amandla phezu kwabantu bonke ukuthi ibaphe ukuphila okungapheliyo kubo bonke labo obanike yona. Sengikulethele inkazimulo emhlabeni ngokuphelelisa umsebenzi owanginika wona ukuthi ngiwenze. Manje, Baba, akungikhazimulise phambi kwakho ngaleyonkazimulo engangilayo lawe umhlaba ungakabi khona.’​—Joh. 17:1-5.

⁵ Nanzelela ukuthi kuyini okwaqakathekiswa nguJesu ekuqaleni komthandazo wakhe. Ayekhathazeke ngakho ukwedlula konke kwakuyikuthi ibizo likaYise osezulwini likhazinyuliswe njalo lokhu kuvumelana lesicelo sakhe sokuqala emthandazweni wakhe oyisibonelo esithi: “Baba kalidunyiswe ibizo lakho.” (Luk. 11:2) Okwesibili kuphathelane lezidingo zabafundi bakhe, wacela ‘ukubapha ukuphila okungapheliyo.’ Ngemva kwalokho uJesu wenza isicelo esiqondane laye esithi: “Baba, akungikhazimulise phambi kwakho ngaleyonkazimulo engangilayo lawe umhlaba ungakabi khona.” UJehova unika iNdodana yakhe ethembekileyo okunengi ukwedlula lokho ekucelileyo ngoba uyinika ‘ibizo elikhulu’ kulelezingilosi.​—Heb. 1:4.

 6. Abaphostoli kwakumele benzeni ukuze bathole ukuphila okungapheliyo njalo sikwazi njani ukuthi baphumelela?

⁶ Okunye uJesu akuthandazelayo yilokho okumele sikwenze thina izoni ukuze senelise ukuthola isipho sokuphila okungapheliyo esingasifanelanga. (Bala uJohane 17:3.) Uthi kumele sihlale ‘simazi’ uNkulunkulu loKhristu. Enye indlela esingakwenza ngayo lokhu igoqela ukusebenzisa amehlo ethu lezindlebe ukuze sifunde okunengi ngoJehova langeNdodana yakhe. Okunye okuqakathekileyo esingakwenza yikuzwa intokozo etholakala ngokusebenzisa lokho esikufunda ngaye. Abaphostoli basebezenza lezizinto ezinika ukuphila ngoba uJesu waqhubeka ekhuleka esithi: “Ngabanika amazwi owanginika wona bona bawemukela.” (Joh. 17:8) Kodwa kwakumele baqhubeke becabangisisa ngamazwi kaNkulunkulu njalo bawasebenzise ekuphileni kwabo nsukuzonke ukuze bathole ukuphila okungapheliyo. Abaphostoli laba ababethembekile baphumelela yini ukwenza lokhu kwaze kwaba sekucineni kokuphila kwabo emhlabeni? Baphumelela sibili. Lokhu sikwazi ngokuthi amabizo abo bonke abhalwe lapho angacitsheki khona ematsheni ayisisekelo angu-12 eJerusalema eLitsha lasezulwini.​—Isam. 21:14.

 7. “Ukwazi” uNkulunkulu kutshoni, njalo kungani lokhu kuqakatheke kakhulu?

⁷ Izikhwicamfundo zolimi lwesiGiriki zithi umutsho wesiGiriki othi “ukungenisa ulwazi, NW” ungahunyutshwa ngokuthi “kumele siqhubeke sikwazi” kumbe “kumele sihlale sikwazi.” Imitsho le iyavumelana njalo yonke iqakathekile. Amabala angaphansi kaJohane 17:3 aku-Reference Bible asinika enye endlela umutsho lo ongahunyutshwa ngayo, ngathi: “Ukukwazi kwabo.” Yikho-ke, “ukungenisa ulwazi” kutsho indlela eqhubekayo ecina ngokunika umuntu isibusiso “sokwazi” uNkulunkulu. Kodwa ukwazi umuntu omkhulu kulabo bonke emhlabeni kugoqela okunengi okwedlula ukuzwisisa izimpawu zobuntu bakhe kanye lenjongo yakhe. Ukwazi uJehova kugoqela ukuba lesibopho sothando esiqinileyo laye kanye lesikhonza labo. IBhayibhili lichasisa ukuthi: “Ongathandiyo kamazi uNkulunkulu.” (1 Joh. 4:8) Ngakho-ke ukwazi uNkulunkulu kugoqela ukumlalela. (Bala u-1 Johane 2:3-5.) Kuyisibusiso esimangalisayo ukuba ngomunye wabantu abamaziyo uJehova! Kodwa isibusiso lesi esiligugu singasilahlekela nxa singenza njengoJudasi Isikariyothi. Kasisebenzeni nzima ukuze sihlale silaso. Singenza njalo sizaba sesimeni esihle sokuthola isipho sokuphila okungapheliyo esingasifanelanga.​—Mat. 24:13.

 8, 9. Kuyini okwakuqakathekile kuJesu ukwedlula zonke izinto ngesikhathi esenza inkonzo yakhe yasemhlabeni njalo yiliphi isiko okumele ukuthi walilahla?

⁸ Ngemva kokubala umthandazo kaJesu okuJohane isahluko 17, ngubani kambe ongathandabuza ukuthi uJesu wayengathandi kuphela abaphostoli bakhe ababelaye kodwa wayethanda lalabo ababezakuba ngabafundi bakhe esikhathini esizayo? (Joh. 17:20) Lanxa kunjalo, kumele sizwisise ukuthi ukusindiswa kwethu akusikho okuqakatheke kakhulu kuJesu. Injongo yakhe enkulu kusukela ekuqaliseni kwenkonzo yakhe yasemhlabeni waze wayayiphetha kwakuyikusebenzela ukukhazimuliswa kanye lokungcweliswa kwebizo likaYise. Ngokwesibonelo, lapho ebika ngomsebenzi wakhe esinagogeni laseNazaretha, wabala umgoqwancwadi ka-Isaya wathi: ‘Umoya weNkosi uphezu kwami, ngoba ingigcobile ukutshumayela izindaba ezinhle kubayanga.’a Akuthandabuzwa ukuthi uJesu walibiza ngokucacileyo ibizo likaNkulunkulu lapho ebala umlayo lo.​—Luk. 4:16-21.

⁹ Ngokwesiko lesiJuda, abakhokheli benkolo babekhuthaza abantu ukuthi bangasebenzisi ibizo likaNkulunkulu kusasele isikhathi eside ukuthi uJesu abuye emhlabeni. Singaba leqiniso lokuthi uJesu walilahla ngokupheleleyo lelosiko elalingasekelwanga emibhalweni. Wathi kubaphikisi bakhe: “Ngizile ngebizo likaBaba, kodwa kalingamukeli; kodwa nxa omunye efika ngebizo lakhe, lizamamukela.” (Joh. 5:43) Sekusele amalanga amalutshwana ukuthi uJesu afe, wakhuluma ngokwakumkhathaza kakhulu empilweni yakhe lapho ekhuleka esithi: “Baba, khazimulisa ibizo lakho!” (Joh. 12:28) Yikho-ke akumelanga kusimangalise ukuthi uJesu ukhuluma kanengi ngesicelo lesi esimayelana loYise emthandazweni wakhe esiwuhlolayo khathesi.

10, 11. (a) Ukwenza kukaJesu ukuthi ibizo likaYise laziwe kwakugoqelani? (b) Abafundi bakaJesu kumele basebenze belayiphi inhloso?

¹⁰ UJesu wathandaza wathi: “Ngikuvezile kulabo owangipha bona emhlabeni. Babengabakho; wangipha bona njalo labo balilalele ilizwi lakho. Kangisayikuhlala emhlabeni kusukela kulesi isikhathi, kodwa bona lokhu besemhlabeni, mina ngiza kuwe. Baba ongcwele, bavikele ngamandla kumbe ngenxa yebizo lakho​—ibizo owanginika lona​—⁠ukuze babe munye njengalokhu thina simunye.”​—Joh. 17:6, 11.

¹¹ Ukwenza ibizo likaYise laziwe kubafundi bakhe kwakungatsho ukulibiza ngomlomo kuphela. UJesu wabancedisa ukuthi bakwazi ukuthi ibizo likaNkulunkulu limelelani, okutsho izimpawu zobuntu bukaNkulunkulu lendlela asebenzelana ngayo lathi. (Eks. 34:5-7) Kanti njalo esikhundleni sakhe esikhazimulayo ezulwini uJesu lokhu eqhubeka encedisa abafundi bakhe ukuthi benze ibizo likaJehova laziwe emhlabeni wonke. Ehloseni? Ukuthi kubuthwe abafundi abanengi ukuphela komumo lo wezinto kungakafiki. Ngemva kwalokho, uNkulunkulu uzazenzela ibizo elihle kakhulu ngesikhathi ethatha inyathelo lokusindisa ofakazi bakhe abathembekileyo.​—Hez. 36:23.

12. Yiziphi izinto ezintathu ezidingekayo ukuze siphumelele ukwenza umsebenzi wethu osindisa abantu?

¹² Ngesikhathi esesemhlabeni, uJesu wasebenza gadalala encedisa abafundi bakhe ukuthi banqobe ubuthakathaka babo. Lokhu kwakudingakala sibili ukuze baphutshise umsebenzi uJesu ayewuqalisile. UJesu wathandaza esithi: “Njengalokhu wangithuma emhlabeni, lami ngibathuma emhlabeni.” Ukuze baphumelele emsebenzini lo osindisa abantu uJesu wagcizelela izinto ezintathu ezazimele zenziwe. Okokuqala, uJesu uthandazela ukuthi abafundi bakhe bangabi yingxenye yomhlaba kaSathane ongcolileyo. Okwesibili, uthandazela ukuthi bangcweliswe kumbe bagcinwe bengcwele ngokusebenzisa iqiniso leLizwi likaNkulunkulu ekuphileni kwabo. Okwesithathu, uJesu uphindaphinda ukubancengela ukuthi babemunye ngesibopho sothando esifanana laleso yena loYise abalaso. Lokhu kudinga ukuthi sizihlole. Munye ngamunye wethu kumele azibuze ukuthi, ‘Ngenza ngokuvumelana lezicelo zikaJesu ezintathu yini?’ Ngokugxila ezintweni lezi uJesu wayetshengisa ithemba lokuthi ‘umhlaba wawuzakholwa ukuthi uthunywe’ nguNkulunkulu.​—Bala uJohane 17:15-21.

13. Umthandazo kaJesu waphendulwa njani ngekhulu lokuqala C.E.?

¹³ Ukuthi umthandazo kaJesu waphendulwa sikubona ngokutaditsha ibhuku leBhayibhili elilandela amaVangeli amane, elibizwa ngokuthi, ImiSebenzi yabaPhostoli. Cabanga ukuthi kwakulula njani ukuthi amaKhristu okuqala ehlukane phakathi, njengoba kwakuhlangene amaJuda labeZizwe, abanothileyo labayanga kanye lezigqili lamakhosi azo. Kodwa babemanyene okokuthi babengaze bafaniswe lezitho ezitshiyeneyo zomzimba olenhloko enguJesu. (Efe. 4:15, 16) Le yimpumelelo emangalisayo emhlabeni kaSathane ohlukene phakathi. Udumo lwakho konke lokhu kumele luye kuJehova, onguye owakwenza kwaphumelela esebenzisa umoya wakhe ongcwele olamandla.​—1 Khor. 3:5-7.

14. Umthandazo kaJesu uphendulwe njani ezinsukwini zalamuhla?

¹⁴ Okudanisayo yikuthi ukumanyana lokhu okumangalisayo akuzange kuqhubeke abaphostoli sebefile. Njengoba kwakuvele kwabikezelwa, izihlubuki ezinengi zahlasela kwacina kulamasonto amanengi ahlukene phakathi azibiza ngokuthi ngawesiKhristu. (ImiSeb. 20:29, 30) Kodwa ngo-1919 uJesu wakhipha abalandeli bakhe abagcotshiweyo ebugqilini bokukhonza kwamanga wababuthelela ndawonye ‘ekumanyaneni okupheleleyo.’ (Kol. 3:14) Ukutshumayela kwabo kube lompumela bani emhlabeni wonke jikelele? “Ezinye izimvu” ezedlula izigidi ezingu-7 ezivela ‘ezizweni zonke, lasezizwaneni, lasebantwini lasezindimini zonke’ zilethwa ukuthi zizokuba ngumhlambi owodwa omanyeneyo kanye labagcotshiweyo bakaNkulunkulu. (Joh. 10:16; Isam. 7:9) Le yimpendulo ehlabusayo yomthandazo kaJesu othi, “ukutshengisa umhlaba ukuthi [Jehova] ungithumile njalo ubathandile njengalokhu ungithandile mina.”​—Joh. 17:23.

15. UJesu wenza sicelo bani esiqakathekileyo mayelana labafundi bakhe abagcotshiweyo?

¹⁵ Kusanda kuhwalala ngoNisani-14 uJesu wabakhazimulisa abaphostoli bakhe ngokwenza labo isivumelwano sokubusa kanye laye eMbusweni wakhe. (Luk. 22:28-30; Joh. 17:22) Ngakho-ke mayelana lalabo ababezakuba ngabalandeli bakhe abagcotshiweyo, uJesu wathandaza wathi: “Baba, ngifuna ukuthi labo ongiphe bona babe lami lapho engikhona, njalo bayibone inkazimulo yami, onginike yona ngoba wangithanda umhlaba ungakadalwa.” (Joh. 17:24) Lokhu kwenza ezinye izimvu zithokoze kulokuthi zibe lomhawu njalo kufakazela ukuthi kulokubambana okukhona kuwo wonke amaKhristu eqiniso lamuhla.

16, 17. (a) Yikuphi ukuzimisela uJesu akuthintayo ekucineni komthandazo wakhe? (b) Kumele sizimisele ukwenzani?

¹⁶ Abantu abanengi emhlabeni bathatheka ngalokho okutshiwo ngabakhokheli bamasonto abo, baze bakhethe ukungazihluphi ngobufakazi obucacileyo bokuthi uJehova ulabantu bakhe abamanyeneyo abamazi ngeqiniso. Kwakunjalo langesikhathi sikaJesu. Yikho-ke uphetha ngamazwi la ahlabusayo: “Baba olungileyo, loba umhlaba ungakwazi, mina ngiyakwazi, njalo bayakwazi ukuthi ungithumile. Ngikuvezile mina kubo njalo ngizaqhubeka ukwenza ukuthi waziwe ukuze kuthi uthando olalo kimi lube ngolwabo njalo lokuthi mina ngokwami ngibe kubo.”​—Joh. 17:25, 26.

¹⁷ Ngubani ongaphika ukuthi uJesu wenza ngokuvumelana lalokho ayekucelile emthandazweni wakhe? Njengoba eyiNhloko yebandla uqhubeka esincedisa ukuthi sikwazi ibizo likaYise lezinjongo zakhe. Asiqhubekeni sizithoba ebunhlokweni bakhe ngokulalela umlayo wakhe wokuthi sitshumayele ngentshiseko njalo senze abafundi. (Mat. 28:19, 20; ImiSeb. 10:42) Njalo sisebenze ngamandla ukuze silondoloze ukumanyana kwethu okuligugu. Ngokwenza lokhu, sizabe sisenza ngokuvumelana lomthandazo kaJesu, besesikhazimulisa ibizo likaJehova njalo sithokoze kuze kube nini lanini.