Amacebo Asinceda Ukuthi Sihlalisane Kuhle Labanye

‘Qhubekani lithethelelana ngenhliziyo yonke lanxa umuntu engabe elesizatho sokusola omunye.’—KWABASEKHOLOSE 3:13.

Sonke siyaphambanisa. Singaphambanisela abanye, loba bona basiphambanisele. Lokhu kutshengisa ukuthi siyakudinga ukuthethelelwa lokuthi kumele sithethelele abanye. Nxa sithethelela asisoze sihlale simbambele isikhwili umuntu osiphambaniseleyo. ‘Asimbuyiseli ngokubi’ lowo osiphathe kubi futhi asihlali simkhumbuza amaphutha awenzayo. (KwabaseRoma 12:17) Kodwa ake sithi usizwise ubuhlungu obuzwayo futhi kuyala ukuthi siyidlulise indaba. Kuyabe sekumele sixoxisane ngenhlonipho lalowomuntu ngodaba lwakhona. Inhloso yethu ngeyokuthi senze ukuthi kube lokuthula hatshi ukumtshengisa ukuthi uphambanisile.—KwabaseRoma 12:18.

“Ngokuthobeka bonani abanye bengcono kulani.”—KWABASEFILIPHI 2:3.

Abantu bazakukholisa ukuba lathi nxa sithobekile futhi sibahlonipha. Bayabe besazi ukuthi silomusa njalo silendaba labo lokuthi asisoze senze izinto ezizabazwisa ubuhlungu ngabomo. Kodwa nxa sizibona singcono kulabanye kumbe sifuna ukuthi izinto zihlale zisenziwa ngendlela yethu, sizabangela ukuthi kube lokuxabana kanye lenzondano. Abantu bazasibalekela futhi asisoze sibe labangane.

“UNkulunkulu kakhethi, kodwa kuzo zonke izizwe uyamemukela umuntu omesabayo njalo owenza okulungileyo.”—IMISEBENZI 10:34, 35.

UMdali wethu kabandlululi abantu ngokuthi bavela kuliphi ilizwe, bakhuluma luphi ulimi, bangabayanga kumbe banothile loba balombala onjani. “Ngomuntu oyedwa wenza zonke izizwe zabantu.” (ImiSebenzi 17:26) Lokhu kutsho ukuthi sonke siyizihlobo. Abantu bayathokoza nxa sibaphatha ngenhlonipho langomusa. Lathi ngokwethu siyathokoza futhi sithokozisa loMdali wethu.

‘Gqokani ubumnene.’—KWABASEKHOLOSE 3:12.

Nxa simnene senza abanye bakhululeke nxa belathi. Bayakhululeka ukukhuluma lathi ngitsho lokusikhuza ngoba bayakwazi ukuthi kasisoze sivuke ngolaka. Kanti njalo impendulo emnene yenza umuntu osizondeleyo ehlise umoya. IZaga 15:1 zithi: “Impendulo ethobileyo iyaludedisa ulaka, kodwa ilizwi elilukhuni livusa ulaka.”

“Ukupha kuyathokozisa kakhulu ukwedlula ukwamukela.”—IMISEBENZI 20:35.

Abantu abanengi lamuhla bayizihwaba futhi baqakathekisa lokho okufunwa yibo kuphela. Kodwa singaba ngabantu abaphanayo sizathokoza kakhulu. (ULukha 6:38) Abantu abaphanayo bayathokoza ngoba bathanda abantu ukwedlula izinto abalazo. Ukuthanda abanye kwenza babonge nxa benzelwe ulutho oluhle futhi batshengise ukuthi bayakuqakathekisa lokho abakwenzelwayo. (KwabaseKholose 3:15) Zibuze, ‘Ngithanda ukuba lomuntu oncitshanayo futhi ongabongiyo yini kumbe ngithanda ukuba lophanayo njalo obongayo?’ Lokhu kusifundisani? Woba yilokho ofuna abanye babe yikho.—UMathewu 7:12.