Usukulungele Yini Ukubhabhathizwa?

Selokhu waqalisa ukufunda iBhayibhili kunengi osukwazi ngoJehova. Akuthandabuzwa ukuthi sekulezinto ozitshintshileyo empilweni yakho ukuze umthokozise. Kodwa engxenye kukhona okwenza wesabe ukuzinikela kuJehova ubusubhabhathizwa. Esifundweni lesi sizaxoxa ngezinye izizatho ezenza abanye besabe ukubhabhathizwa lokuthi ungenzani ukuze unqobe ukwesaba lokho.

1. Kumele ube lani ukuze ubhabhathizwe?

Kumele ube ‘lolwazi oluqondileyo lweqiniso’ nxa ufuna ukubhabhathizwa. (1 KuThimothi 2:4) Kodwa lokhu akutsho ukuthi sekumele ube lezimpendulo zemibuzo yonke ongayibuzwa ngabantu mayelana leBhayibhili. Phela lamaKhristu aselesikhathi eside ebhabhathiziwe alokhu efunda izinto ezintsha eBhayibhilini. (KwabaseKholose 1:9, 10) Kodwa kumele ubezazi imfundiso eziqakathekileyo eziseBhayibhilini. Abadala bebandla bazakunceda ubone ukuthi usuzazi yini imfundiso lezi.

2. Kuyini okumele ukwenze ungakabhabhathizwa?

Ungakabhabhathizwa kumele ‘uphenduke njalo uguquke.’ (Bala imiSebenzi 3:19.) Lokhu kutsho ukuzisola ngezono owazenzayo, ngemva kwalokho ubusucela uJehova akuthethelele. Kutsho lokubalekela ukwenza loba yini angayifuniyo ukuze uphile ngendlela ezamthokozisa. Okunye okumele ukwenze yikungena imihlangano yebandla sikhathi sonke futhi uqalise lokutshumayela labanye abasebandleni.

3. Kungani kungamelanga wesabele khatshana?

Abanye abantu bayafuna ukubhabhathizwa kodwa bayesaba ukuthi abasoze benelise ukuhlala bethembekile kuJehova. Liqiniso ukuthi uzaphambanisa ngezinye izikhathi njengoba nje amadoda labesifazana ababethembekile okukhulunywa ngabo eBhayibhilini babeke baphambanise. UJehova uyakwazi ukuthi okwenza siphambanise yikuthi silesono. (Bala iHubo 103:13, 14.) Uyathokoza kakhulu nxa ekubona ulwisa ukwenza okulungileyo futhi uzaqhubeka ekuncedisa. UJehova usithembisa ukuthi akulalutho ‘olungasehlukanisa lothando’ lwakhe.—Bala uRoma 8:38, 39.

GEBHA UJULE

4. Mazi kuhle uJehova

Kumele umazi kangakanani uJehova ungakabhabhathizwa? Kumele umazi kuhle okokuthi uzwa usumthanda njalo ufuna ukwenza okumthokozisayo. Bukelani IVIDIYO libone ukuthi abanye benzani ukuze babhabhathizwe. Ngemva kwalokho xoxani ngombuzo olandelayo.

IVIDIYO: Ongakwenza Ukuze Ubhabhathizwe (3:56)

• Kuyini okwanceda abantu obabone kuvidiyo ukuthi balungele ukubhabhathizwa?

Bala uRoma 12:2 beselixoxa ngemibuzo le:

• Kukhona yini okusolayo kulokho osukufunde eBhayibhilini? Uyake uthandabuze yini ukuthi oFakazi bakaJehova bafundisa iqiniso?

• Ubona angani ungenzani ukuze unqobe ukuthandabuza ongabe ulakho?

5. Nqoba loba yini ekwenza wesabe

Bukhona ubunzima esingahlangana labo nxa sikhetha ukuzinikela kuJehova futhi sibhabhathizwa. Ake sibone okwenzakala komunye. Bukelani IVIDIYO beselixoxa ngemibuzo elandelayo.

IVIDIYO: Ukuthanda UJehova Kusenza Sinqobe Ubunzima (5:22)

• Yibuphi ubunzima udadewethu abunqobayo ukuze akhonze uJehova?

• Ukuthanda uJehova kwamnceda njani ukuthi anqobe ubunzima ayephakathi kwabo?

Bala iZaga 29:25 lo-2 Thimothi 1:7 beselixoxa ngombuzo lo:

• Kuyini okungenza sibe lesibindi sokulwisana lobunzima esihlangana labo?

6. Cela uJehova akuncedise

UJehova uzakuncedisa ukuthi wenze okumthokozisayo. Bukelani IVIDIYO beselixoxa ngemibuzo elandelayo.

IVIDIYO: UJehova UNkulunkulu Uzakuncedisa (2:50)

• Kuyini okwenza indoda le eyayifunda iBhayibhili yesaba ukubhabhathizwa?

• Yafundani okwayinceda ukuthi imthembe kakhulu uJehova?

Bala u-Isaya 41:10, 13 beselixoxa ngombuzo lo:

• Kungani kungamelanga uthandabuze ukuthi uzakwenelisa ukuhlala uthembekile kuJehova?

7. Cabangisisa ngendlela uJehova akuthanda ngayo

Nxa ungacabangisisa ngendlela uJehova akuthanda ngayo, uzakuba lesifiso sokumbonga lesokumkhonza kuze kube nini lanini. Bala iHubo 40:5 beselixoxa ngombuzo lo:

• Yiziphi izinto ofuna ukumbonga ngazo uJehova?

Umphrofethi uJeremiya wayemthanda uJehova njalo elithanda lelizwi lakhe. Wayeqakathekisa lesibusiso sokuba yinceku kaJehova. Wathi: “Ilizwi lakho lenza inhliziyo yami yagubhazela ngentokozo, ngoba ngibizwa ngebizo lakho, awu Jehova Nkulunkulu wamabutho.” (UJeremiya 15:16) Xoxani ngemibuzo elandelayo:

• Kungani kuyisibusiso ukuba nguFakazi kaJehova?

• Uyafuna yini ukubhabhathizwa ube nguFakazi kaJehova?

• Kukhona yini okwenza kube nzima ukuthi ubhabhathizwe?

• Ubona angani kumele wenzeni ukuze ubhabhathizwe?

ISIFINQO

UJehova uzakuncedisa ukuthi unqobe loba yini ekwenza wesabe ukubhabhathizwa.

Ufundeni?

• Kumele ube lolwazi olunganani ukuze ubhabhathizwe?

• Kuyini okumele ukwenze ungakabhabhathizwa?

• Kungani kungamelanga wesabele khatshana ukubhabhathizwa?

THOLA OKUNENGI

Bala isihloko lesi ukuze ubone ukuthi usukulungele yini ukubhabhathizwa.

“Usukulungele Yini Ukubhabhathizwa?” (INqabayokulinda, March 2020)

Bala isihloko lesi uzwe ukuthi kuyini okungenza umuntu esabe ukubhabhathizwa.

“Kuyini Okungivimbela Ukuthi Ngibhabhathizwe?” (INqabayokulinda, March 2019)

Bukela ividiyo le ubone ukuthi eyinye indoda yabunqoba njani ubunzima eyayikubo ukuze ibhabhathizwe.

‘Kuyini Okukuvimba Ukuthi Ubhabhathizwe?’ (1:10)

Indoda okuthiwa ngu-Ataa yaqala ithikaza ukubhabhathizwa. Bukela ividiyo le ubone ukuthi kuyini okwenza yacina ibhabhathizwa.

Kambe Yimi Lowu! (7:21)