Imuli Labangane
Abantu abanengi bakuthola kunzima ukuzwanana lamalunga emuli kumbe ukuba labangane. Kodwa kulezimiso eziseBhayibhilini ezingakunceda uthuthuke endabeni le.
QAKATHEKISA OKUFUNWA NGABANYE
ISIMISO ESISEBHAYIBHILINI: “Lingaqakathekisi lokho okufunwa yini kuphela kodwa liqakathekise lalokho okufunwa ngabanye.”—KwabaseFiliphi 2:4.
KUTSHONI? Ukuqakathekisa okufunwa ngabanye kuzakwenza sizwanane labo. Kodwa nxa ungaqakathekisa okufunwa nguwe kuphela awusoze ube lobudlelwano obuhle labo. Ngokwesibonelo, umuntu otshadileyo oqakathekisa izifiso zakhe kuphela angacina eye emacansini lomunye umuntu. Kanti njalo akulamuntu ongafisa ukuba ngumngane womuntu ozigqaja ngolwazi lwakhe kumbe ngezinto alazo. Ibhuku elithiwa The Road to Character lithi, “abantu abangelandaba labanye bajayele ukuba lenhlupho ezinengi.”
ONGAKWENZA:
Siza abanye. Abangane beqiniso bayathembana futhi bayancedana zikhathi zonke. Okunye ukuhlola okwenziwayo kutshengisa ukuthi abantu abalendaba labanye kukalutshwana ukuthi bahlulukelwe kumbe bazizwe bengaqakathekanga.
Woba lozwelo. Ukuba lozwelo kwandise ukuchasiswa ngokuthi yikuzwa ubuhlungu bomunye enhliziyweni yakho. Nxa silozwelo kasisoze sikhulume amazwi ahlabayo futhi angacina elimaze abanye lanxa siyabe sicabanga ukuthi siyadlala.
Nxa ulozwelo awusoze ukhangelele ukuthi abanye bangenzi amaphutha. Ukuba lozwelo kuzakunceda ukuthi ungabi lobandlululo kodwa ube labangane abalamasiko atshiyeneyo futhi abakhuliswe ngendlela ezitshiyeneyo.
Zinike isikhathi sokuba labanye. Ukuzinika isikhathi sokuba labanye kuzakwenza ubazi ngcono. Nxa ufuna ukuthola abangane abahle, kumele uxoxe ngezinto abazithandayo labaziqakathekisayo njalo ulalelisise. Woba lendaba lalokho okubakhathazayo. Ukuhlola okusanda kwenziwa kutshengisa ukuthi abantu bayancedakala nxa bangazinika isikhathi sokuxoxa ngezinto abaziqakathekisayo.
KHETHA KUHLE ABANGANE
ISIMISO ESISEBHAYIBHILINI: “Ukuba lobudlelwano labantu ababi kona ukuziphatha okuhle.”—1 KwabaseKhorinte 15:33, amabala angaphansi.
KUTSHONI? Abantu otshona labo bangenza wenze okuhle loba okubi. Izingcitshi ezihlola ngezokuhlalisana kwabantu ziyavuma ukuthi abangane bangamntshintsha umuntu. Ngokwesibonelo, zithi nxa ungaba labangane ababhemayo lawe ungaqalisa ukubhema. Ikanti nxa ungaba labangane abafuna ukudivosa lawe ungacina usufuna ukudivosa.
ONGAKWENZA: Woba labangane abalobuntu obuthandayo kumbe abaziphatha ngendlela ofuna ukuziphatha ngayo. Ngokwesibonelo, dinga abangane abalendaba labanye, abahloniphayo, abaphanayo futhi abalomusa.
EZINYE IZIMISO EZISEBHAYIBHILINI
Bukela amavidiyo asekelwe eBhayibhilini enzelwe ukunceda abantu abatshadileyo, abasakhulayo, kanye labantwana
UNGAKHULUMI AMAZWI AZAZWISA ABANYE UBUHLUNGU.
“Amazwi okubhuda agwaza njengenkemba.”—IZAGA 12:18.
WOBA NGOPHANAYO.
“Lowo ophanayo uzaphumelela.”—IZAGA 11:25.
PHATHA ABANYE NGENDLELA OFUNA BAKUPHATHE NGAYO.
“Zonke izinto elifuna abantu bazenze kini, lani kumele lizenze kubo.”—UMATHEWU 7:12.