Thokozisa UJehova Ngokuba Ngumuntu Ohlanzekileyo

Cabanga ngomama oncedisa umntanakhe amthandayo ukuthi alungiselele ukuya esikolo. Uba leqiniso lokuthi umntanakhe ugezile lokuthi izigqoko zakhe zihlanzekile. Lokhu kunceda umntwana ukuthi abe lempilakahle njalo kutshengisa lokuthi abazali bakhe bayamnakekela. UJehova uBaba wethu laye ufuna sihlale sihlanzekile njalo siziphatha kuhle. Ukwenza njalo kuyasinceda kakhulu futhi kwenza lokuthi uJehova adunyiswe.

1. Kumele senzeni ukuze sihlale sihlanzekile?

UJehova uthi ‘kumele sibe ngcwele.’ (1 UPhetro 1:16) Ukuba ngcwele kutsho ukuziphatha ngendlela ehlanzekileyo lokuhlanzeka kukho konke. Lokhu sikwenza ngokugeza nsuku zonke, ukugqoka impahla ezihlanzekileyo lokugcina imizi lezimota zethu kuhlanzekile. Kumele sigcine leWolu yethu yoMbuso ihlanzekile. Ukuhlala sihlanzekile kuzakwenza ukuthi uJehova adunyiswe.—2 KwabaseKhorinte 6:3, 4.

2. Yiphi imikhuba okumele siyibalekele ukuze sihlale sihlanzekile?

IBhayibhili lithi: “Asizihlambululeni ezintweni zonke ezingcolisa umzimba lomoya.” (2 KwabaseKhorinte 7:1) Lokhu kutsho ukuthi kumele sibalekele loba yini engasingcolisa emzimbeni lasengqondweni. Esikucabangayo kumele kuthokozise uJehova, yikho kufanele sikhiphe loba yiphi imicabango engalunganga ezingqondweni zethu. (IHubo 104:34) Kumele sizimisele lokukhuluma amazwi ahlanzekileyo.—Bala uKholose 3:8.

Zinengi izinto ezingasingcolisa okumele sizibalekele. Okunye kwakhona yikubhema igwayi loba imbanje kumbe ukusebenzisa izidakamizwa. Ukuxwaya imikhuba le kuzasenza sibe lempilakahle futhi kutshengisa ukuthi siyasiqakathekisa isipho sokuphila. Kumele sibalekele lomkhuba wokutshaya ibhonyaponya lowokubukela iphonografi. (IHubo 119:37; Kwabase-Efesu 5:5) Akulula ukuyitshiya imikhuba le, kodwa uJehova uzasincedisa.—Bala u-Isaya 41:13.

GEBHA UJULE

3. Ukuba ngabantu abahlanzekileyo kwenza uJehova adunyiswe

Imithetho emayelana lokuhlanzeka eyanikwa ama-Israyeli isifundisa okunengi ngendlela uJehova ayibona ngayo indaba le. Bala u-Eksodusi 19:10 lo–30:17-19 beselixoxa ngemibuzo elandelayo:

• Amavesi la atshengisa njani ukuthi uJehova uyakuqakathekisa ukuhlanzeka?

• Kumele wenzeni ukuze uhlale uhlanzekile?

Kumele sizimisele ukuhlala sihlanzekile kungelani lokuthi sihlala ngaphi, ukuthi sinothile yini kumbe singabayanga. Bukelani IVIDIYO beselixoxa ngombuzo olandelayo.

IVIDIYO: UNkulunkulu Uthanda Abantu Abahlanzekileyo (4:10)

• Kungani abantu esibatshumayezayo bedumisa uJehova nxa sihlanzekile kukho konke?

4. Nqoba imikhuba emibi

Engxenye uyakwazi ukuthi kungumqanso sibili ukutshiya umkhuba wokubhema kumbe owokusebenzisa izidakamizwa. Kodwa kuyini okuzakunceda ukuthi unqobe umkhuba lo? Yikucabanga ngalokho okuzakwenzakala nxa ungaqhubeka ngawo. Bala uMathewu 22:37-39 beselixoxa ngokuthi ukubhema lokusebenzisa izidakamizwa . . .

• kubuphambanisa njani ubungane bakho loJehova?

• kuyiphambanisa njani imuli yakho labanye abantu?

Hlela ukuthi uzakwenzani ukuze unqobe umkhuba omubi.a Bukelani IVIDIYO.

IVIDIYO: Zifundise Ukuzibamba Ezintweni Zonke (2:47)

Bala uFiliphi 4:13 beselixoxa ngombuzo lo:

• Ukuhlala uthandaza, ukubala iBhayibhili lokungena imihlangano zikhathi zonke kuzakunceda njani ukuthi unqobe umkhuba omubi?

5. Zimisele ukulwisana lemicabango kanye lemikhuba engcolileyo

Bala uKholose 3:5 beselixoxa ngemibuzo le:

• Kungani uJehova esithi ukutshaya ibhonyaponya, ukuthumelana imilayezo ekhuluma ngezemacansini lokubukela iphonografi yimikhuba engcolileyo?

• Ubona angani singenelisa yini ukuziphatha ngendlela uJehova afuna siziphathe ngayo? Kungani usitsho njalo?

Bukelani IVIDIYO ukuze ubone ukuthi ungayinqoba njani imicabango engcolileyo.

IVIDIYO: Lwisana Lemicabango Engcolileyo (1:51)

UJesu wasebenzisa umzekeliso osinceda sibone okumele sikwenze ukuze sihlale sihlanzekile ekuziphatheni. Bala uMathewu 5:29, 30 beselixoxa ngombuzo lo:

• UJesu wayengatsho ukuthi sikhiphe izitho zomzimba kodwa wayesifundisa ukuqakatheka kokuthatha inyathelo masinyane ukuze sikhiphe imicabango engcolileyo. Ungenzani ukuze ubalekele imicabango engcolileyo?b

UJehova uyathokoza nxa ekubona uzama ngamandla wonke ukulwisana lemicabango engcolileyo. Bala iHubo 103:13, 14 beselixoxa ngombuzo olandelayo:

• Amavesi la angakunceda njani ukuthi ungakhalali nxa ulwisana lomkhuba omubi?

Ungakhalali!

Uyake uzizwe uphela amandla yini nxa ngezinye izikhathi ubuyelela umkhuba omubi ozama ukulwisana lawo? Cabanga ngomzekeliso womuntu osemncintiswaneni wokugijima umango omude: Nxa angawa, akutsho ukuthi senqotshiwe kumbe ukuthi sokumele ayeqalisa kutsha, kodwa kuyabe kumele avuke aqhubeke egijima. Kunjalo lokuzama ukutshiya umkhuba omubi, nxa ungawubuyelela ngezinye izikhathi akutsho ukuthi usuyehlulekile kumbe ukuthi awusoze uwunqobe. Akumelanga ukhalale ngoba vele siwa sivuka! UJehova uzakuncedisa ukuthi unqobe umkhuba omubi.

ISIFINQO

Sithokozisa uJehova nxa sihlala sihlanzekile emzimbeni, engqondweni lasekuziphatheni.

Ufundeni?

• Kungani kuqakathekile ukuthi sihlale sihlanzekile kukho konke?

• Ungenzani ukuze uhlale uhlanzekile?

• Kuyini ongakwenza ukuze uhlale uhlanzekile ekuziphatheni lasemcabangweni?

THOLA OKUNENGI

Bukela ividiyo le ubone ukuthi yiziphi izinto ongazenza ukuze uhlale uhlanzekile kungelani lokuthi uhlala ngaphi.

Inhlanzeko Lempilakahle—Ukugeza Izandla (3:01)

Bala imagazini le ubone ukuthi ungenzani ukuze utshiye ukubhema.

“Ongakwenza Ukuze Utshiye Ukubhema” (Vukani!, May 2010)

Bala imagazini le uzwe ukuthi kungani ukubukela iphonografi kuyingozi.

“Iphonografi Iyingozi Yini Kumbe Hatshi?” (INqabayokulinda, August 1, 2013)

Bala uzwe ukuthi eyinye indoda yawunqoba njani umkhuba wokubukela iphonografi.

“Ngehluleka Kanengi Kodwa Ngacina Ngiphumelela” (INqabayokulinda No. 4 2016)