Amacebo Anceda Imuli Ukuthi Ithokoze

“Amadoda kumele athande omkawo ngendlela athanda ngayo imizimba yawo. Indoda ethanda umkayo iyazithanda yona ngoba kakho owake wazonda umzimba wakhe, kodwa uyawunika ukudla futhi awuphathe kuhle.”—KWABASE-EFESU 5:28, 29.

Indoda iyinhloko yemuli yayo. (Kwabase-Efesu 5:23) Indoda elothando kayiphathi umkayo ngesihluku kumbe imbambe ngamandla ukuthi enze lokho ekufunayo. Iyamqakathekisa futhi iyamnakekela njalo imenza azizwe ethandwa. Kanti njalo yenza konke engakwenza ukuthi imthokozise futhi kayihlali iqakathekisa lokho okufunwa yiyo. (KwabaseFiliphi 2:4) Iyamtshela indlela ezizwa ngayo lalokho ekucabangayo njalo iyamlalela nxa ekhuluma. ‘Kayimthukutheleli kakhulu’ kumbe imtshaye loba imtshele amazwi abuhlungu.—KwabaseKholose 3:19 lamabala angaphansi.

‘Inkosikazi kumele iyihloniphe kakhulu indoda yayo.’—KWABASE-EFESU 5:33.

Nxa inkosikazi ihlonipha umkayo njalo isekela izinqumo azenzayo yenza ukuthi kube lokuthula emulini. Nxa umkayo esenza amaphutha kayimeyisi kodwa iqhubeka imnene njalo imhlonipha kakhulu. (U-1 Phetro 3:4) Nxa inkosikazi leyo ifuna ukukhuluma ngohlupho oluthile iyakhetha isikhathi esihle sokwenza njalo, ibisikhuluma ngenhlonipho.—UmTshumayeli 3:7.

‘Indoda izamanyana lomkayo, bona babe nyamanye.’—UGENESISI 2:24.

Nxa indoda lomkayo bangatshada baba lobudlelwano obuseduze kakhulu. Kumele basebenze nzima ukuze bagcine umtshado wabo uqinile ngokuhlala bexoxa bekhululekile, bengafihlelani lutho langokuba lomusa komunye lomunye. Kanti njalo kumele bathembeke, bangayi emacansini lomuntu abangatshadanga laye. Ukungathembeki kulowo otshade laye kungenza omunye wakho azwe ubuhlungu obukhulu. Kwenza lingasathembani njalo umtshado wenu ucine uchitheka.—KumaHebheru 13:4.

“Fundisa umntwana indlela amele ahambe ngayo, kuzakuthi esemdala kayikuphambuka kuyo.”—IZAGA 22:6.

UNkulunkulu unike abazali umlandu wokufundisa abantwababo. Lokhu kugoqela ukubafundisa ukuthi baziphathe njani lokuba yisibonelo esihle kubo. (UDutheronomi 6:6, 7) Nxa umntwana engalaleli, umzali ohlakaniphileyo kaphangisi ukuvuka ngolaka kodwa ‘uyaphangisa ukulalela, aphuze ukukhuluma, aphuze lokuzonda.’ (UJakhobe 1:19) Nxa umzali angabona ukuthi umntanakhe sedinga ukukhuzwa, ukwenza ngendlela elothando hatshi ngolaka.

‘Bantwana, lalelani abazali benu. “Hlonipha uyihlo lonyoko.”’—KWABASE-EFESU 6:1, 2.

Abantwana kumele balalele abazali babo njalo babahloniphe kakhulu. Nxa abantwana behlonipha abazali babo kuba lokuthula lentokozo emulini. Abantwana asebekhulile batshengisa ukuthi bayabahlonipha abazali babo ngokubanakekela. Lokhu kugoqela ukubancedisa ukugcina ikhaya labo lilihle kumbe ukubasiza ngemali.—1 KuThimothi 5:3, 4.