Abelusi Bomhlambi KaNkulunkulu

NGESIKHATHI esemhlabeni, uJesu wenza ngendlela eyayitshengisa ukuthi ‘ungumelusi omuhle.’ (Joh. 10:11) IBhayibhili lithi lapho ebona amaxuku abantu emlandela “wawazwela usizi ngoba ayehlukuluzekile futhi elahlelwe iganga njengezimvu ezingelamelusi.” (Mat. 9:36) UJesu wayetshiyene labakhokheli bako-Israyeli ababengawunakekeli umhlambi kaNkulunkulu. (Hez. 34:7, 8) Wafundisa futhi wanakekela izimvu zikaNkulunkulu waze wanikela ngokuphila kwakhe ngenxa yazo. UPhetro labanye abaphostoli babeyithanda indlela uJesu ayesenza ngayo. Bafunda esibonelweni sakhe ukuthi bangabancedisa njani abantu abalokholo ukuthi babuyele kuJehova, ‘ongumelusi lombonisi wemiphefumulo yabo.’—1 Pet. 2:25.

² Ngelinye ilanga uJesu exoxa loPhetro, wamqonqosela ukuthi anike izimvu zakhe ukudla njalo azeluse. (Joh. 21:15-17) Akuthandabuzwa ukuthi ingxoxo le yamthinta kakhulu uPhetro yikho wakhuthaza abadala bebandla lobuKhristu wathi: “Yelusani umhlambi kaNkulunkulu eliwugcinisiweyo, libe ngababonisi bawo. Lokho kwenzeni ngenhliziyo yonke phambi kukaNkulunkulu, hatshi ngokubanjwa ngamandla, njalo lingakwenzeli ukuthola inzuzo yokungathembeki, kodwa lizimisele. Lingazenzi amakhosi phezu kwalabo abalilifa likaNkulunkulu, kodwa libe yizibonelo emhlambini.” (1 Phet. 5:1-3) Amazwi la ayasebenza lasebadaleni bebandla lamuhla. Abadala balingisela uJesu ngokwelusa izimvu ngenhliziyo yonke langokuba yisibonelo esihle ekukhonzeni.—Heb. 13:7.

³ Siyathokoza ukuba lababonisi emabandleni ababekwe nguJehova esebenzisa umoya wakhe ongcwele. Ukuba khona kwabo kuyasinceda kakhulu. Ngokwesibonelo bakhuthaza futhi bancedise ngamunye wethu ebandleni. Maviki wonke bayakhokhela emihlanganweni esiba layo, lapho esithola khona ukudla okusiqinisa ukholo. (Rom. 12:8) Benza konke okusemandleni abo ukuze bavikele umhlambi ezintweni ezingawulimaza. (Isaya. 32:2; Tit. 1:9-11) Ukukhuthala kwabo ekutshumayeleni izindaba ezinhle kwenza lathi sikhuthalele ukwenza umsebenzi lo nyanga zonke. (Heb. 13:15-17) UJehova usebenzisa ‘izipho lezi ezingabantu’ ukuthi akhe ibandla futhi aliqinise.—Efe. 4:8, 11, 12.

⁴ Amadoda abekwa ukuba ngababonisi kumele akhethwe kusetshenziswa lokho okubhalwe eLizwini likaNkulunkulu ukuze ibandla linakekelwe kuhle. Kungenziwa njalo kuyabe kusitsho ukuthi amadoda lawo akhethwe ngumoya ongcwele. (ImiSeb. 20:28) Liqiniso sibili ukuthi lokho okukhangelelwe kulabo ababekwa ukuba ngababonisi kungakhanya kunzima ngenxa yokuthi umsebenzi okumele bawenze uqakathekile. Kodwa khona akunzima kakhulu. Amadoda amthandayo sibili uJehova lazimiseleyo ukusetshenziswa nguye angenelisa ukwenza lokho okukhangelelwe kuwo. Kumele kucace kubo bonke ukuthi ababonisi bayazisebenzisa izimiso eziseBhayibhilini empilweni zabo.

⁵ Encwadini yokuqala ayibhalela uThimothi lasencwadini ayibhalela uThithusi, umphostoli uPhawuli wakhuluma ngendlela ababonisi okumele baziphathe ngayo. Ku-1 Thimothi 3:1-7, wathi: “Nxa indoda ilalamela umsebenzi wokuba ngumbonisi, ifisa umsebenzi omuhle. Ngakho umbonisi kumele abe yindoda engasolekiyo, elenkosikazi eyodwa, ezibambayo kukho konke ekwenzayo, esebenzisa kuhle ingqondo yayo, ehlelekileyo, eyamukela izihambi, eyenelisa ukufundisa, engayisiso sidakwa, engeladlakela, kodwa ezwisisayo, engathandi ingxabano, engathandi imali, ewukhokhela kuhle umuzi wayo, elabantwana abalalelayo futhi abalembeko, (ngoba nxa indoda ingenelisi ukukhokhela umuzi wayo, ingenelisa njani ukunakekela ibandla likaNkulunkulu?), ingabi ngumuntu osanda kuguquka ngoba ingazikhukhumeza, ithole ukwahlulelwa okunjengokukaDeveli. Phezu kwalokho, kumele abantu abangayisiwo malunga ebandla babe bekhuluma kuhle ngayo ukuze ingasolwa ngalutho njalo ingaweli emjibileni kaDeveli.”

⁶ UPhawuli wabhalela uThithusi wathi: “Ngakutshiya eKhrethe ngisenzela ukuthi uqondise izinto ezazonakele lokuthi ubeke abadala edolobheni ngalinye, njengoba nje ngangithe wenze njalo, nxa kuyikuthi kulendoda engasolekiyo, elenkosikazi eyodwa futhi elabantwana abakholwayo okungelamuntu obasola ngokuthi baziphethe butshapha loba ngokuthi bangabahlamuki. Umbonisi ungumphathi kaNkulunkulu, yikho kumele abe ngongasolekiyo, ongelayo inkani, ongazondi masinyane, ongayisiso sidakwa, ongeladlakela njalo ongayisiso sihwaba esithanda ukuthola inzuzo ngokungathembeki. Kodwa kufanele abe ngowamukela izihambi, lothanda okuhle, losebenzisa kuhle ingqondo yakhe, lolungileyo, loqotho, lozibambayo, lonamathela elizwini elithembekileyo nxa esebenzisa ubungcitshi bakhe bokufundisa, ukuze enelise ukukhuthaza ngemfundiso eqondileyo lokukhuza abaphikisayo.”—KuThithusi 1:5-9.

⁷ Lanxa okutshiwo yiMibhalo ngalokho okukhangelelwe kubabonisi kungakhanya kunzima, amadoda angamaKhristu akumelanga esabe ukulalamela imisebenzi ebandleni. Nxa bangalandela lokho okutshiwo yiMibhalo ekuphileni kwabo, bazakhuthaza bonke ebandleni ukuthi labo benze njalo. UPhawuli wathi ibandla liphiwe ‘izipho lezi ezingabantu’ “ukuze kulungisiswe abangcwele ukwenzela ukuthi benze umsebenzi wenkonzo njalo bakhe umzimba kaKhristu, sonke size sibe munye ekukholweni laselwazini oluqondileyo olumayelana leNdodana kaNkulunkulu, sibe njengomuntu osekhule ngokweneleyo, sifike ebangeni lokukhula ngokugcweleyo njengoKhristu.”—Efe. 4:8, 12, 13.

⁸ Ababonisi akumelanga kube ngabafana abancane kumbe amadoda asanda kuguquka. Kumele babe ngabantu asebeyazi indlela amaKhristu okumele aphile ngayo, abayizwisisa kuhle iMibhalo njalo abathanda bonke ebandleni. Kufanele babelesibindi sokukhuza lokuqondisa labo abaphambukayo ukuze bavikele izimvu kuloba ngubani ofuna ukuziphambanisa. (Isaya. 32:2) Indlela abaphila ngayo kumele yenze kucace kubo bonke ebandleni ukuthi bangamadoda aqinileyo ekukhonzeni futhi alendaba lomhlambi kaNkulunkulu.

⁹ Amadoda afanele ukuba ngababonisi kumele aphile ngendlela etshengisa ukuthi alokuhlakanipha. Nxa etshadile, umbonisi kumele alandele indlela amaKhristu atshadileyo okumele aziphathe ngayo. Lokhu kutsho ukuthi kumele abe lenkosikazi eyodwa njalo awukhokhele kuhle umuzi wakhe. Nxa umbonisi elabantwana abakholwayo, abalalelayo futhi abalembeko, kungelamuntu obasola ngokuthi baziphethe butshapha lokuthi bangabahlamuki, kuzakuba lula ukuthi abanye ebandleni bazodinga kuye amacebo okuthi bangaphatha njani imuli zabo lokuthi bangaphila njani ngendlela yamaKhristu. Kanti njalo kumele abe ngumuntu ongasolekiyo futhi okhulunyelwa kuhle langabantu abangayisiwo malunga ebandla. Akufanelanga kube lensolo ngaye engenza ukuthi abantu bakhulume kubi ngebandla. Akumelanga kube ngumuntu osanda kusolwa ngenxa yesono asenzileyo. Lokhu kuzakwenza kube lula ukuthi abanye ebandleni balingisele isibonelo sakhe esihle lokuthi bamthembe.—1 Khor. 11:1; 16:15, 16.

¹⁰ Nxa ababonisi bangaba njalo bazakwenelisa ukulinakekela kuhle ibandla njengabadala bako-Israyeli iBhayibhili elibachaza ngokuthi ‘babekhaliphile, bezwisisa njalo belolwazi.’ (Dute. 1:13) Lokhu akutsho ukuthi abadala bebandla abalasono kodwa bangabantu abaziwa ngokuziphatha kuhle ebandleni lasemphakathini njalo abatshengisa ukuthi bayamesaba uNkulunkulu lokuthi balandela izimiso zakhe. Ukuziphatha ngaleyondlela kwenza ukuthi bafundise ibandla bekhululekile.—Rom. 3:23.

¹¹ Amadoda afanele ukuba ngababonisi ayazibamba kukho konke akwenzayo futhi aphatha kuhle abanye. Kawadlulisi amalawulo kulokho akwenzayo kodwa ayalinganisela futhi ayazibamba. Ngokwesibonelo ayalinganisela ezintweni ezinjengokudla, ukunatha, ezokuzilibazisa lokunye nje. Kawanathi adlulise ukuze kungakhulunywa kubi ngawo kumbe acine esaziwa njengezidakwa. Phela nxa ingqondo yomuntu isiphanjaniswe butshwala kubanzima ukuthi azibambe lokuthi enelise ukunakekela ibandla likaNkulunkulu.

¹² Ukuze umuntu enelise ukukhokhela kuhle ibandla kumele ahleleke. Okunye okutshengisa ukuthi umuntu uhlelekile yindlela azilungisa ngayo, indlela umuzi wakhe obukeka ngayo lezinto azenza nsuku zonke. Kabalisi nxa kulemisebenzi okumele ayenze, kodwa uyananzelela okuqakathekileyo abesehlela kuhle izinto zakhe. Uyazama ukunamathela ezimisweni zeBhayibhili kukho konke akwenzayo.

¹³ Umbonisi kumele abe ngumuntu ozwisisayo. Kumele enelise ukusebenza kuhle lequla labadala futhi abambisane lalo. Akumelanga azibone engcono kulabanye kumbe abatshele okokwenza. Kasoze afune ukuthi abanye bahlale belalela yena ngoba ebona angani akukhulumayo kungcono kulokwabo. Kufanele akhumbule ukuthi abanye balempawu ezinhle loba iziphiwo yena angelazo. Umdala utshengisa ukuthi uyazwisisa ngokwenza izinqumo zakhe esebenzisa iMibhalo njalo uzama ngamandla wonke ukulandela isibonelo sikaJesu Khristu. (Flp. 2:2-8) Kanti njalo akumelanga abe ngolodlakela kumbe othanda ingxabano kodwa kumele ahloniphe abanye ngoba ebabona bengcono kulaye. Akufanelanga abe lenkani kumbe ahlale efuna ukuthi izinto zenziwe ngendlela yakhe. Kazondi masinyane kodwa uhlalisana labanye ngokuthula.

¹⁴ Okunye njalo okukhangelelweyo yikuthi umbonisi abe ngumuntu osebenzisa kuhle ingqondo yakhe. Lokho kutsho ukuthi kumele abe ngobekekileyo njalo ongawalazeliyo nxa esenza izinqumo. Uzizwisisa kuhle izimiso zikaJehova lokuthi kumele zisebenze njani. Umuntu oyisebenzisa kuhle ingqondo yakhe uyavuma ukwelulekwa kumbe ukuqondiswa. Kanti njalo kenzi izinto efuna ukuvala abantu amehlo.

¹⁵ UPhawuli wakhumbuza uThithusi ukuthi umbonisi kumele abe ngumuntu othanda okuhle. Kufanele abe ngolungileyo loqotho. Lokhu kubonakala ngendlela aphatha ngayo abanye lasendleleni anamathela ngayo kokuhle lokulungileyo. Kumele azimisele ukukhonza uJehova, ahlale esebenzisa izimiso eziseMibhalweni njalo enelise ukugcina imfihlo. Kufanele emukele izihambi njalo azimisele ukusebenzisa isikhathi sakhe, amandla kanye lempahla yakhe ukuze ancede abanye.—ImiSeb. 20:33-35.

¹⁶ Ukuze umbonisi alinakekele kuhle ibandla kumele abe yindoda eyenelisa ukufundisa. Amazwi kaPhawuli awabhalela uThithusi athi umbonisi kumele abe “ngonamathela elizwini elithembekileyo nxa esebenzisa ubungcitshi bakhe bokufundisa, ukuze enelise ukukhuthaza ngemfundiso eqondileyo lokukhuza abaphikisayo.” (Tit. 1:9) Kumele enelise ukubonisana labantu eveza ubufakazi obuqinileyo njalo asebenzise iMibhalo ngendlela ethinta inhliziyo lezaqinisa abanye ukholo. Konke lokhu kumele akwenze ngezikhathi ezinhle langezikhathi ezinzima. (2 Tim. 4:2) Kufanele abekezele njalo abe lomusa nxa ekhuza othile kumbe encedisa othandabuzayo abesemkhuthaza ukuthi enze okulungileyo. Nxa umbonisi esenelisa ukufundisa ebandleni kumbe ukuncedisa ummemezeli othile uyabe etshengisa ukuthi ufanele ukwenza lowomsebenzi.

¹⁷ Kuqakathekile ukuthi abadala bawukhuthalele umsebenzi wokutshumayela. Kumele kucace ukuthi bayamlingisela uJesu ngokwenza umsebenzi lo. UJesu wayewuqakathekisa kakhulu umsebenzi wokutshumayela njalo wayencedisa abafundi bakhe ukuthi bawenze kuhle. (Mak. 1:38; Luk. 8:1) Nxa abadala bengazimisela ukuya ekutshumayeleni lanxa belemisebenzi eminengi, bonke ebandleni labo bazakwenza njalo. Ukuphuma lemuli zabo kanye labanye ebandleni kuzabanika ithuba lokuthi ‘bakhuthazane.’—Rom. 1:11, 12.

¹⁸ Kunengi sibili okukhangelelwe ukuthi ababonisi bakwenze futhi kungaba nzima ukuthi bakwenze kuhle konke ngenxa yokuthi balesono. Loba kunjalo akumelanga kube lomdala ohlala esehluleka ukwenza okuthile kuze kucine sokusolisa. Abadala bayatshiyana, abanye bazingcitshi ekwenzeni imisebenzi ethile loba ekutshengiseni ubuntu obuthile. Ukutshiyana lokhu kwenza ukuthi iqula labadala selilonke libe lazo zonke impawu ezifunekayo ukuze ibandla likaNkulunkulu linakekelwe kuhle.

¹⁹ Nxa abadala bekhetha abazalwane ukuthi babe ngababonisi, kuhle ukuthi bakhumbule amazwi akhulunywa ngumphostoli uPhawuli athi: “Ngitshela wonke umuntu phakathi kwenu ukuthi angacabangi ukuthi ungcono kulalokho ayikho khona, kodwa acabange ngendlela etshengisa ukuthi usebenzisa kuhle ingqondo, kusiya ngokholo ngamunye aluphiwe nguNkulunkulu.” (Rom. 12:3) Umdala ngamunye kumele azithobe, angaziboni “elunge” kakhulu nxa kuhlolisiswa ukuthi othile ufanele yini loba hatshi. (UmTshu. 7:16) Abadala kufanele bakhangelisise ukuthi othile uyakwenza yini lokho okutshiwo liBhayibhili mayelana lababonisi kodwa bengakhangeleli okunengi kakhulu kulowomuntu. Kumele bakhumbule ukuthi laye uyawenza amaphutha ngoba ulesono, yikho kufanele benze isinqumo esitshengisa ukuthi balandela izimiso zikaJehova lokuthi bafuna ibandla lithuthuke. Kumele bakhuleke nxa behlolisisa ukuthi umzalwane othile uyafanela yini ukuba ngumbonisi njalo bavumele umoya ongcwele kaNkulunkulu ubaqondise. Lo ngumsebenzi oqakatheke kakhulu abadala abalawo, yikho kumele balandele isixwayiso sikaPhawuli esithi: “Ungaphangisi ukubeka izandla zakho kuloba ngubani.”—1 Tim. 5:21, 22.

²⁰ Amadoda angababonisi kumele aphile ngendlela etshengisa ukuthi alezithelo zomoya ukuze kukhanye ukuthi akhokhelwa ngumoya ongcwele. UPhawuli wathi izithelo lezi “luthando, lokuthokoza, lokuthula, lokubekezela, lomusa, lobuhle, lokholo, lobumnene, lokuzibamba.” (Gal. 5:22, 23) Ukuba lababonisi abanjalo kuyalikhuthaza ibandla njalo kwenza bonke ebandleni bakhonze uJehova bemanyene. Ukuziphatha kwabo lemisebenzi emihle abayenzayo kutshengisa ukuthi babekwe ngumoya ongcwele.—ImiSeb. 20:28.

²¹ Kuqakathekile ukuthi ababonisi babambisane ukuze ibandla limanyane. Lanxa belobuntu obutshiyeneyo, bazakwenza ukuthi kube lokumanyana nxa belalelana futhi behloniphana. Kuhle ukuthi umdala ngamunye asekele izinqumo ezenziwayo lanxa engavumelani lazo ingqe nje kungephulwanga izimiso eziseBhayibhilini. Ukwenza njalo kuzatshengisa ukuthi ukhokhelwa ‘yikuhlakanipha okuvela phezulu’ ‘okulokuthula njalo okuzwisisayo.’ (Jak. 3:17, 18) Akulamdala okumele azibone engcono kulabanye kumbe engumaqhuzu. Nxa abadala besebenza ndawonye ngobunye bayabe bebambisana loJehova.—1 Khor., isahl. 12; Kol. 2:19.

²² Amadoda alokholo oluqinileyo kumele abe lesifiso sokuba ngababonisi. (1 Tim. 3:1) Kodwa ukuba ngumdala ngumsebenzi odinga ukuthi umuntu azinikele njalo azimisele ukuncedisa abazalwane ebandleni. Ukuze umuntu abe ngumbonisi kumele alwise ukulandela okutshiwo yiMibhalo mayelana lalokho okukhangelelwe kubabonisi.

²³ Kungenzakala ukuthi umdala othile acine engasenelisi ukwenza eminye imisebenzi eyenziwa ngabadala ngenxa yokukhubazeka, ukuguga loba ukugula. Kodwa akudingakali ukuthi atshiye ukuba ngumdala ngenxa yesimo asekuso. Yikho akumelanga akhangelelwe phansi ngoba ulokhu engumdala, kufanele aqhubeke ehlonitshwa njengabo bonke abadala abasebenza nzima ukuze banakekele ibandla.

²⁴ Kodwa umzalwane ukhululekile ukuma ukuba ngumdala nxa izimo zakhe zingasamvumeli. (1 Phet. 5:2) Angakhetha ukwenza njalo kumele siqhubeke simhlonipha. Kunengi angakwenza ebandleni lanxa engasaphiwa imisebenzi yabadala.

²⁵ Abadala benza imisebenzi etshiyeneyo ebandleni. Kulomhleli wequla labadala, unobhala, umbonisi wenkonzo, oqhuba i-Nqabayokulinda, lohlela uMhlangano Wempilo Lenkonzo. Abadala baphinda babe lomsebenzi wokuba ngababonisi bamaqembu. Akulasikhathi esibekiweyo sokuthi imisebenzi le kumele iphiwe umuntu okwesikhathi esinganani. Nxa umdala obesenza umsebenzi othile angathutha kumbe acine engasenelisi ngenxa yokugula loba ukwehliswa, kuyakhethwa omunye umdala ukuthi enze lowomsebenzi. Kwamanye amabandla alabadala abalutshwane kungadingakala ukuthi umdala oyedwa enze imisebenzi eminengi kuze kube yilapho kubekwa abanye ukuthi babe ngabadala.

²⁶ Umhleli wequla labadala nguye oba ngumgcinisihlalo emihlanganweni yabadala. Loba kunjalo, kaziphakamisi kodwa ubambisana labanye abadala ekunakekeleni umhlambi kaNkulunkulu. (Rom. 12:10; 1 Phet. 5:2, 3) Kumele abe ngumuntu ohlelekileyo futhi owenelisa ukukhokhela kuhle.—Rom. 12:8.

²⁷ Unobhala nguye ogcina amafayili ebandla njalo okunye akwenzayo yikutshela abadala nxa kulencwadi abayibhalelweyo. Nxa kulesidingo kungacelwa omunye umdala kumbe inceku ekhonzayo efaneleyo ukuthi imncedise.

²⁸ Umbonisi wenkonzo ukhangela konke okuphathelane lomsebenzi wokutshumayela. Ngokwesibonelo, nguye okhangela zonke inhlelo zokutshumayela. Uyakhetha iviki eyodwa ngenyanga lapho azavakatshela khona iqembu elithile. Emabandleni amancane angenelisa ukuvakatshela iqembu ngalinye kabili ngomnyaka. Nxa evakatshile nguye oqhuba umhlangano wenkonzo, abesephuma labamemezeli abatshiyeneyo ukuze abancedise ezimpindelweni lasezifundweni zabo.

²⁹ Omunye umsebenzi ophiwa umdala ngowokuba ngumbonisi weqembu. Umsebenzi lo ugoqela (1) ukuncedisa ummemezeli ngamunye eqenjini ukuthi aqine ekukhonzeni; (2) ukuncedisa ngamunye eqenjini ukuthi akhuthale njalo athuthuke emsebenzini wokutshumayela; (3) lokuncedisa inceku ezikhonzayo ukuthi zithuthuke ukuze zibe ngabadala. Iqula labadala yilo elikhethayo ukuthi yibaphi abazalwane abafaneleyo ukuba ngababonisi bamaqembu.

³⁰ Nxa kuvuma, umbonisi weqembu kumele abe ngumdala ngenxa yalokho okukhangelelwe ukuthi akwenze. Kodwa kwesinye isikhathi kungacelwa inceku ekhonzayo efaneleyo ukuthi yenze umsebenzi lo kuze kube lomdala ongawenza. Inceku ephiwa umsebenzi lo ibizwa ngokuthi yinceku yeqembu ngoba kayikabi ngumbonisi ebandleni. Kumele isebenze iqondiswa ngabadala.

³¹ Okunye okuqakathekileyo okwenziwa ngumbonisi weqembu yikukhokhela iqembu ekutshumayeleni. Ukukhuthala kwakhe kanye lokuqakathekisa umsebenzi wokutshumayela kuzabakhuthaza abanye eqenjini. Kuhle ukuthi kukhethwe isikhathi sokutshumayela abanengi abakhululeke ngaso ukuze bonke eqenjini bathole ithuba lokukhuthazana. (Luk. 10:1-16) Okunye okumele akwenze yikuba leqiniso lokuthi kulendawo eneleyo okuzatshunyayelwa kuyo. Nguye njalo okumele aqhube umhlangano wenkonzo futhi ahlele ukuthi abamemezeli bazasebenza njani. Nxa ezabe engekho, kumele acele omunye umdala kumbe inceku ekhonzayo ukuthi iqhube lowomhlangano. Nxa kungelamdala kumbe inceku kumele acele ummemezeli ofaneleyo ukuthi akhokhele iqembu.

³² Nxa iqembu lizavakatshelwa ngumbonisi wenkonzo, umbonisi weqembu kumele alungiselele kuseselesikhathi. Lokhu kugoqela ukutshela abaseqenjini lakhe lokubakhuthaza ukuthi babekhona ukuze bancedakale. Abamemezeli bangatshelwa kuseselesikhathi bazakwenelisa ukulungiselela kuhle lokusekela uhlelo lolu.

³³ Iqembu ngalinye liba labamemezeli abalutshwane ukuze umbonisi weqembu enelise ukubasiza kuhle bonke. Kumele atshengise ukuthi ungumelusi olothando ngokuba lendaba lomuntu ngamunye eqenjini. Kufanele azimisele ukukhuthaza lokuncedisa abaseqenjini ukuthi bakhuthale ekutshumayeleni lokuthi bayingene yonke imihlangano yebandla. Kanti njalo kufanele azame ngamandla wonke ukusiza umuntu ngamunye ukuthi ahlale eqinile ekukhonzeni. Abagulayo labadanileyo uyabavakatshela ukuze abakhuthaze. Ukhuthaza abazalwane abeseqenjini lakhe ukuthi balalamele imisebenzi ebandleni ukuze babe lusizo kwabanye. Lanxa umbonisi weqembu ekhangela kakhulu labo abaseqenjini lakhe, akutsho ukuthi kaselandaba labanye ebandleni. Uhlala ezimisele njalo ekulungele ukuncedisa bonke abadinga usizo njengoba engumdala futhi engumelusi.—ImiSeb. 20:17, 28.

³⁴ Okunye umbonisi weqembu akwenzayo yikwemukela imibiko kulabo abaseqenjini lakhe, abeseyihambisa kunobhala. Abamemezeli bangenza umsebenzi wakhe ube lula ngokuphangisa ukuletha imibiko yabo. Lokhu bangakwenza ngokuthi bahle bamnike nxa inyanga iphela kumbe bayifake ebhokisini lemibiko nxa likhona eWolu yoMbuso.

³⁵ Ikhomithi Yenkonzo ibunjwa ngumhleli wequla labadala, unobhala lombonisi wenkonzo futhi yenza imisebenzi etshiyeneyo ebandleni. Ngokwesibonelo ikhomithi le yiyo enika imvumo yokuthi iWolu yoMbuso ingasetshenziswa yini nxa kungaba lemfa kumbe umtshado. Yiyo futhi ehlela ukuthi abamemezeli bazakuba kuwaphi amaqembu. Iphinda ikhangele izicelo zalabo abafuna ukuba ngamaphayona esikhathi sonke kumbe asizayo loba ukwenza eminye imisebenzi etshiyeneyo eyenziwa enhlanganisweni. Ikhomithi le yenza imisebenzi yayo iqondiswa liqula labadala.

³⁶ Igatsha yilo elitshoyo ukuthi imisebenzi yabadala kumele yenziwe njani, okuhlanganisa ukuqhuba i-Nqabayokulinda lokuhlela uMhlangano Wempilo Lenkonzo.

³⁷ Iqula labadala liyahlangana ngezikhathi ezithile ukuze lixoxe ngezindaba eziphathelane lentuthuko yebandla. Ngokwesibonelo abadala bahlangana lombonisi wesiqinti nxa evakatshele ibandla, baphinde bahlangane ngemva kwezinyanga ezintathu edlulile ebandleni. Kodwa kungaba lesimo esidinga ukuthi bahlangane masinyane, bangenza njalo loba nini.

³⁸ Abadala bebandla balesono njengathi sonke. Loba kunjalo, bonke ebandleni kufanele bazithobe futhi bazehlise kubo ngoba babekwe nguJehova. Abadala bazalandisa kuye ngalokho abakwenzayo ngoba bamele yena. UHebheru 13:17 uthi: “Lalelani abakhokhelayo phakathi kwenu, lizehlise kubo ngoba bayalilinda futhi bazalandisa. Lingenza njalo, umsebenzi wabo bazawenza bethokoza hatshi bekhonona ngenxa yokuthi lokhu kungalilimaza.” UJehova usebenzisa umoya wakhe ongcwele ukubeka umzalwane ukuthi abe ngumbonisi ebandleni. Uphinda awusebenzise ukukhipha loba ngubani ongasafanelanga ukuba ngumdala ngenxa yokuphila ngendlela engahambelani lalokho okutshiwo yiMibhalo kumbe ukwehluleka ukutshengisa izithelo zomoya.

³⁹ Siyababonga kakhulu abadala ngomsebenzi onzima abawenzayo lokuba yizibonelo ezinhle. Umphostoli uPhawuli wabhalela ibandla laseThesalonika wathi: “Siyalicela-ke bafowethu ukuthi libahloniphe abasebenza nzima phakathi kwenu, belikhokhela eNkosini futhi beleluleka; libaqakathekise kakhulu njalo libathande ngenxa yomsebenzi wabo.” (1 Thes. 5:12, 13) Ukusebenza nzima kwabo kwenza ukukhonza kwethu uNkulunkulu kube lula futhi kuthokozise. Encwadini yokuqala ayibhalela uThimothi, uPhawuli wakhuluma ngendlela abanye ebandleni okumele baphathe ngayo abadala. Wathi: “Abadala abakhokhela ngendlela enhle kufanele bahlonitshwe ngokuphindiweyo, ikakhulu labo abasebenza nzima befundisa futhi bekhuluma.”—1 Tim. 5:17.

⁴⁰ Kwezinye izikhathi abanye abadala bayacelwa ukuthi babe semaqenjini avakatshela izigulane. Abanye njalo bakumakhomithi abona ngokusebenzelana lezibhedlela futhi umsebenzi wabo ngowokukhulumisana labodokotela ngezindlela ezingasetshenziswa ekwelapheni oFakazi bakaJehova kungasetshenziswanga igazi. Abanye ababonisi bancedisa ukwakhiwa lokunakekelwa kwamaWolu oMbuso lamaWolu Emihlangano Emikhulu ikanti abanye bakumakhomithi emihlangano yezabelo. Ukusebenza nzima kanye lokuzinikela kwabo kuyabanceda kakhulu bonke abafowethu labodadewethu. Kumele “siwaqakathekise kakhulu amadoda anjalo.”—Flp. 2:29.

⁴¹ IQula Elibusayo likhetha abanye abadala abafaneleyo ukuthi babe ngababonisi beziqinti. Umbonisi wesiqinti ngamunye uthunywa ligatsha ukuthi avakatshele amabandla asesiqintini asiphiweyo njalo ibandla ngalinye ujayele ukulivakatshela kabili ngomnyaka. Kwezinye izikhathi ababonisi beziqinti bavakatshela lamaphayona asezindaweni ezikhatshana. Bawuhlela kuhle umsebenzi wabo njalo bahle bazise amabandla abazawavakatshela kuseselesikhathi ukuze bonke abasemabandleni la balungiselele.

⁴² Umhleli wequla labadala nguye ohamba phambili ekwenzeni amalungiselelo ukuze ukufika kombonisi wesiqinti kuncede ibandla lonke. (Rom. 1:11, 12) Nxa esekwazi ukuthi umbonisi wesiqinti ubuya nini, uhle acele abazalwane ukuthi bamncedise ukulungiselela izinto ezifunakalayo lendawo lapho azafikela khona. Umhleli ubaleqiniso lokuthi bonke ebandleni kanye lombonisi wesiqinti bayatshelwa ngamalungiselelo aseyenziwe.

⁴³ Umbonisi wesiqinti kufanele athintane lomhleli wequla labadala ukuze akwazi ngenhlelo ezenziweyo mayelana lokungena imihlangano lokuphuma ekutshumayeleni. Amalungiselelo la enziwa kulandelwa lokho okukhulunywe ngumbonisi wesiqinti lewofisi yegatsha. Bonke ebandleni kumele batshelwe izikhathi kanye lendawo okuzangenelwa khona imihlangano yebandla, umhlangano wamaphayona lowabadala lezinceku ezikhonzayo. Kumele baziswe lokuthi abantu bazahlangana ngaphi njalo sikhathi bani nxa sebesiya ekutshumayeleni.

⁴⁴ NgoLwesibili emini umbonisi wesiqinti uba lesikhathi sokuhlola amafayili ebandla okuhlanganisa amakhadi abamemezeli, amafomu atshengisa inani labantu abangena imihlangano, amafomu atshengisa indawo esitshumayela kuyo kanye lawezimali. Lokhu kuzamnceda abone ukuthi angalincedisa njani ibandla lalabo abagcina amafayili lawo. Umhleli wequla labadala kumele abone ukuthi umbonisi wesiqinti uthola izinto lezi kuseselesikhathi.

⁴⁵ Ngesikhathi esebandleni umbonisi wesiqinti uba lesikhathi sokuxoxa labamemezeli, kungaba semihlanganweni yebandla, ekutshumayeleni, nxa bemnxuse ukuzokudla lakwezinye izikhathi lapho athole khona ithuba. Uphinda ahlangane labadala lezinceku ezikhonzayo ukuze asebenzise iMibhalo ukubakhuthaza lokubacebisa ukuthi bangawunakekela njani umhlambi abawuphathisiweyo. (Zaga. 27:23; ImiSeb. 20:26-32; 1 Tim. 4:11-16) Uba lesikhathi sokuhlangana lamaphayona ukuze awakhuthaze njalo awancedise lapho adinga khona usizo emsebenzini wokutshumayela.

⁴⁶ Umbonisi wesiqinti uyancedisa nxa kulezinye izindaba ezifuna ukulungiswa. Nxa konke okumele kulungiswe kungasaphelanga ngaleyoviki, uyancedisa abadala ukuthi bathole iziqondiso eziseMibhalweni abangazisebenzisa. Nxa igatsha kumele laziswe ngendaba le, yena labadala bayalibhalela bechasisa ngendaba yakhona.

⁴⁷ Ngeviki avakatshe ngayo, umbonisi wesiqinti kumele ayingene yonke imihlangano yebandla. Imihlangano le ingatshintshwa kulandelwa lokho okutshiwo ligatsha. Kuba lezinkulumo azilungiselelayo ukuze akhuthaze, afundise njalo aqinise ibandla. Kufanele azame ngazo zonke indlela ukunceda abanye ukuthi bathande uJehova loJesu kanye lenhlanganiso.

⁴⁸ Okunye okwenziwa ngumbonisi wesiqinti ngaleyoviki yikukhuthaza abamemezeli bonke ukuthi bawukhuthalele umsebenzi wokutshumayela njalo bawenze ngendlela ephumelelayo. Abamemezeli bangahlela ukuthi bathole isikhathi esithe xaxa sokuphuma ekutshumayeleni ngaleyoviki, mhlawumbe ngokuba ngamaphayona asizayo ngaleyonyanga. Bonke abafisa ukusebenza laye kumbe lomkakhe bangahlela ukwenza njalo. Kuyanceda kakhulu ukuthi abamemezeli bahambe lombonisi wesiqinti kumbe umkakhe ezifundweni lasezimpindelweni zabo. Ukuzama ngazo zonke indlela ukusekela uhlelo lolu kuzakunika ithuba lokuncedisa abanye njalo kuzakusiza kakhulu.—Zaga. 27:17.

⁴⁹ Minyaka yonke isiqinti ngasinye siba lemihlangano yesiqinti emibili. Komunye wakhona kuba lommeli wegatsha. Umbonisi wesiqinti nguye okumele abe leqiniso lokuthi imihlangano le ilungiselelwa kuhle. Uyakhetha umzalwane ozaba ngumbonisi womhlangano kanye lomunye ozamncedisa. Laba bobabili kumele babambisane laye ekwenzeni amalungiselelo omhlangano. Lokho kwenza kube lula ukuthi umbonisi wesiqinti agxilise ingqondo yakhe ehlelweni lomhlangano. Umbonisi wesiqinti uphinda akhethe abanye abazalwane abazakhangela inhlangothi ezithile. Uyakhetha abantu abazakuthi nxa umhlangano usuphelile bakhangele ukuthi imali isetshenziswe njani. Kwezinye izikhathi isiqinti siyehlukaniswa ngenxa yokuthi ezinye indawo okungenelwa kuzo umhlangano zincane kumbe zikhatshana kakhulu, yikho amaqembu la ayabe ezangena umhlangano ngezikhathi ezitshiyeneyo.

⁵⁰ Ekupheleni kwenyanga ngayinye umbonisi wesiqinti uthumela umbiko wakhe wenkonzo egatsheni. Nxa kulebandla elingenelisanga ukumncedisa ngemali yezindleko zokudla, okokuhambisa, indawo yokuhlala lokunye okudingakalayo abesesebenzisa eyakhe, angacela ukuthi igatsha limncedise. Ababonisi abavakatshela amabandla baleqiniso lokuthi nxa bangafaka uMbuso kaNkulunkulu kuqala bazakuthola konke abakudingayo njengoba uJesu watsho. (Luk. 12:31) Amabandla wonke kumele akwazi ukuthi kuyisibusiso esikhulu sibili ukuncedisa abadala laba abazinikeleyo.—3 Joh. 5-8.

⁵¹ Ewofisini yegatsha ngayinye yaboFakazi bakaJehova kuba lamadoda akhethwayo ukuthi abumbe iKhomithi yeGatsha. Ikhomithi le iba labadala abathathu kumbe abedlula lapho njalo yiyo ekhangela umsebenzi wokutshumayela owenziwa kulelolizwe lakwamanye amazwe angaphansi kwalelogatsha. Omunye wabo uba ngumhleli wekhomithi le.

⁵² Abadala abakuKhomithi yeGatsha bakhangela indaba eziphathelane lamabandla wonke asendaweni ekhangelwa ligatsha lelo. Bakhangela lomsebenzi wokutshumayela kuleyondawo njalo bahlela amabandla leziqinti ngendlela ezakwenza ukuthi kube lula ukwenza umsebenzi lo. IKhomithi le iphinda ikhangele umsebenzi owenziwa ngabanali, amaphayona aqakathekileyo, amaphayona esikhathi sonke kanye lasizayo. Ngesikhathi kulungiselelwa imihlangano yeziqinti leyezabelo, iba leqiniso lokuthi “zonke izinto zenziwe ngendlela efaneleyo lehlelwe kuhle.”—1 Khor. 14:40.

⁵³ Elizweni elingelaKhomithi yeGatsha, kuyakhethwa abadala kulelolizwe ukuthi babumbe iKhomithi yeLizwe ezakhangela umsebenzi owenziwa kuleyondawo. Ikhomithi le isebenza iqondiswa yiKhomithi yeGatsha ekwelinye ilizwe. Lokhu kwenza kube lula ukukhangela umsebenzi owenziwa emazweni angelamaKhomithi eGatsha. IKhomithi yeLizwe ikhangela okwenziwa eBhetheli, izincwadi lemibiko kanye lomsebenzi wokutshumayela owenziwa kulelolizwe. IKhomithi yeLizwe isebenza ibambisana leKhomithi yeGatsha ukuze umsebenzi ophathelane loMbuso uqhubekele phambili.

⁵⁴ IQula Elibusayo yilo elikhetha abadala ababumba iKhomithi yeGatsha leKhomithi yeLizwe.

⁵⁵ IQula Elibusayo liyathuma abazalwane abafaneleyo ukuthi bavakatshele amagatsha emhlabeni wonke. Umzalwane othunywe ukuthi enze umsebenzi lo ubizwa ngokuthi ngummeli wamawofisi ethu amakhulu. Umsebenzi wakhe oyisiqokoqela yikukhuthaza imuli yeBhetheli lokuncedisa iKhomithi yeGatsha nxa kulenhlupho kumbe belemibuzo ephathelane lomsebenzi wokutshumayela lowokwenza abafundi. Umzalwane lo uyahlela ukuthi abe lomhlangano lababonisi beziqinti abathile njalo kwezinye izikhathi angaphinda abonane labanali. Uyaxoxisana labo ngenhlupho abangabe belazo lokunye abakudingayo njalo abakhuthaze ukuthi baqhubekele phambili ngomsebenzi oqakathekileyo wokutshumayela ngoMbuso lowokwenza abafundi.

⁵⁶ Ummeli wamawofisi ethu amakhulu ukhangela lokuthi umsebenzi wokutshumayela uhamba kuhle yini okuhlanganisa leminye imisebenzi eyenziwa ngamabandla. Nxa isikhathi simvumela uyavakatshela lamawofisi okuhumutsha. Ngesikhathi evakatshele igatsha uyaphuma labanye ekutshumayeleni nxa isikhathi sivuma.

⁵⁷ Ukusebenza nzima kwamadoda akhutheleyo ekukhonzeni kanye lokusinakekela kwawo ngendlela elothando kuyasinceda kakhulu. Nxa singaqhubeka sizehlisa kulabo abaphiwe umsebenzi wokunakekela umhlambi kaNkulunkulu siyabe sibambisana loKhristu uJesu iNhloko yebandla. (1 Khor. 16:15-18; Efe. 1:22, 23) Lokhu kuzakwenza ukuthi umoya kaNkulunkulu usebenze emabandleni njalo leLizwi lakhe liqhubeke lisikhokhela emsebenzini esiwenzayo emhlabeni wonke.—Hubo. 119:105.