Ncedisa Ebandleni Okulo

Kulamamiliyoni abantu abakhonza uJehova besemabandleni aboFakazi asemhlabeni wonke. Bayayithanda imfundo abayithola lapho futhi bazimisele ukuncedisa ngezindlela ezinengi emabandleni abakuwo. Wena ulaso yini isifiso sokuncedisa ebandleni okulo?

1. Kuyini ongakwenza ukuze uncedise ebandleni?

Kukhona sonke esingakwenza ukuze sincedise ebandleni. Ngokwesibonelo, nxa kulabakhulileyo kumbe abagulayo, ungabancedisa yini ukuthi benelise ukuba khona emihlanganweni yebandla? Ungabancedisa yini ngokuyabathengela abakudingayo, ukubenzela imisebenzi yangekhaya kumbe okunye nje? (Bala uJakhobe 1:27.) Okunye ongakwenza yikuncedisa nxa kuklinwa kumbe kulungiswa iWolu yoMbuso. Akulamuntu osibamba ngamandla ukwenza konke lokhu. ‘Siyazinikela’ ukukwenza ngenxa yokuthi siyamthanda uNkulunkulu futhi siyabathanda abafowethu labodadewethu.—IHubo 110:3.

OFakazi ababhabhathiziweyo balethuba lokuncedisa ebandleni langezinye indlela ezitshiyeneyo. Ngokwesibonelo, abafowethu bangaba zinceku ezikhonzayo kumbe babe ngabadala nxa belandela lokho iBhayibhili elikukhangelele kulabo abaphiwa imisebenzi le. Kanti njalo abafowethu labodadewethu bangenza okunengi emsebenzini wokutshumayela nxa bangaba ngamaphayona. Abanye bangancedisa ekwakheni izakhiwo zokukhonzela kumbe bathuthele emabandleni adinga ukuncediswa.

2. Ungancedisa njani ebandleni ngemali yakho kumbe ngezinye izinto olazo?

Sonke silethuba ‘lokudumisa uJehova ngokuhle kakhulu esilakho.’ (IZaga 3:9) Kuyasithokozisa ukunikela ngemali kumbe okunye esingabe silakho ukuze sincedise ebandleni loba emsebenzini wokutshumayela owenziwa emhlabeni wonke. (Bala u-2 Khorinte 9:7.) Iminikelo yethu incedisa lalabo abehlelwe ngumonakalo. Abanengi bakubona kungcono ukuthi babeke okuthile eceleni nyanga zonke ukuze banikele ngakho. (Bala u-1 Khorinte 16:2.) Iminikelo le singayiphosela emabhokisini eminikelo asezindaweni esikhonzela kuzo kumbe sisebenzise ingxenye ethi donate.jw.org ekuwebhusayithi yethu. Ukunikela ngalokho esilakho ngeyinye indlela esingatshengisa ngayo ukuthi siyamthanda uJehova.

GEBHA UJULE

3. Ncedisa ngokunikela ngemali kumbe ngokunye olakho

UJehova loJesu bayabathanda abantu abanikela ngokuthanda kwabo. Ngokwesibonelo, uJesu wakhuluma kuhle ngomfelokazi owanikelayo lanxa wayengumyanga. Bala uLukha 21:1-4 beselixoxa ngemibuzo le:

• Kumele unikele ngemali enganani ukuze uthokozise uJehova?

• UJehova loJesu bezwa njani nxa sinikela ngenhliziyo yonke?

Bukelani IVIDIYO ukuze libone ukuthi iminikelo yethu isetshenziswa njani. Ngemva kwalokho xoxani ngombuzo olandelayo.

IVIDIYO: ‘Isipho KuJehova’ (4:47)

• Iminikelo yethu isetshenziswa njani?

4. Ncedisa kokunye okwenziwayo ebandleni

Izinceku zikaJehova okukhulunywa ngazo eBhayibhilini zazingapheleli ekunikeleni ngemali kuphela kodwa zazisebenza nzima ukulungisa indawo ezazikhonzela kuzo. Bala u-2 ImiLando 34:9-11 beselixoxa ngombuzo olandelayo:

• Um-Israyeli ngamunye wancedisa njani ngesikhathi kulungiswa indlu kaJehova?

Bukelani IVIDIYO ukuze libone ukuthi oFakazi bakaJehova bawalingisela njani ama-Israyeli. Ngemva kwalokho xoxani ngemibuzo elandelayo.

IVIDIYO: Ukunakekela Izindawo Zethu Zokukhonzela (3:31)

• Kungani kuqakathekile ukuklina lokulungisa iWolu yoMbuso?

• Wena ungenzani ukuze uncedise?

5. Abafowethu balethuba lokwenza okunengi ebandleni

IBhayibhili likhuthaza amadoda angamaKhristu ukuthi azimisele ukwenza okusemandleni awo ukuncedisa ebandleni. Ukuze ubone ukuthi bangakwenza njani lokhu, bukelani IVIDIYO beselixoxa ngombuzo olandelayo.

IVIDIYO: Bafowethu, Lalamelani Umsebenzi Omuhle (5:19)

• Kuyini okwenziwa nguRyan ukuze ancedise abanye ebandleni?

IBhayibhili liyasitshela ukuthi kuyini okulindelwe kubafowethu abafisa ukuba zinceku ezikhonzayo kumbe ukuba ngabadala. Bala u-1 Thimothi 3:1-13 beselixoxa ngemibuzo le:

• Kuyini okulindelwe kubafowethu abafisa ukuba zinceku ezikhonzayo lokuba ngabadala?

• Nxa umfowethu elemuli, kukhangelelweni emulini yakhe?—Khangela ivesi 4 lo-11.

• Ubona angani ibandla lincedakala njani nxa abafowethu bezimisele ukwenza lokho iBhayibhili elithi kumele bakwenze ukuze babe zinceku ezikhonzayo kumbe abadala?

ISIFINQO

UJehova uyakuqakathekisa kakhulu konke esikwenzayo ukuze sincedise ebandleni.

Ufundeni?

• Kuyini ongakwenza ukuze uncedise ebandleni?

• Ungancedisa njani ebandleni ngemali yakho kumbe ngezinye izinto olazo?

• Kuyini ofisa ukukwenza ukuze uncedise ebandleni?

THOLA OKUNENGI

Bala isihloko lesi uzwe ukuthi kungani uNkulunkulu engasakhangelelanga ukuthi sikhiphe okwetshumi.

“IBhayibhili Lithini Ngokunikela Okwetshumi?” (Isihloko esikuwebhusayithi yethu)

IBhayibhli liyasitshela ngemisebenzi okumele yenziwe ngamadoda abhabhathiziweyo. Kodwa kuthiwani nxa sekumele yenziwe ngowesifazana obhabhathiziweyo?

“Ukuzwisisa Ubunhloko Ebandleni” (INqabayokulinda, February 2021)

Bukela ividiyo le ubone ukuthi abanye oFakazi benzani ukuze bancede abanye babo.

Ukuhambisa Amabhuku Asekelwe EBhayibhilini Ezindaweni Ezitshiyeneyo ECongo (4:25)

Bala isihloko lesi uzwe ukuthi indlela esinikela ngayo itshiyene njani leyamanye amasonto.

“OFakazi BakaJehova Bayithatha Ngaphi Imali Yokuqhuba Umsebenzi Wabo?” (Isihloko esikuwebhusayithi yethu)