Hlonipha Abazali Bakho Asebekhulile

 1. Abazali bethu basenzelani esingeke sikubhadale, njalo kumele sibaphathe njani?

ENYE indoda ehlakaniphileyo eyaphila kudala yake yathi: “Lalela uyihlo owakuletha emhlabeni, njalo ungeyisi unyoko nxa eseluphele.” (IZaga 23:22) Mhlawumbe ungathi wena ngeke wafa wabakhangelela phansi abazali bakho. Abanengi bethu bayabathanda kakhulu abazali babo okokuthi ngeke baqale ukubeyisa. Siyakwazi ukuthi abasenzela khona kunengi kakhulu okokuthi ngeke senelise ukubabhadala. Phela yibo abasizalayo. Lanxa uJehova enguye umthombo wokuphila, sasingeke sibekhona abazali bethu bengekho. Akulalutho esingabanika lona oluligugu njengokuphila abasipha khona. Kabacinanga ngokusinika ukuphila, kodwa babehlala bekhathazekile besinakekela, besebenzisa imali yabo ukuze basondle futhi basithanda kusukela sizalwa saze saba ngabantu abadala. Yikho kuqakathekile ukuthi silalele iseluleko esiseBhayibhilini esithi: ‘Hlonipha uyihlo lonyoko ukuze kukulungele lokuba ube lempilo ende emhlabeni.’​—Kwabase-Efesu 6:2, 3.

 2. Abantwana asebekhulile ‘bangakwenanisa’ njani lokho abakwenzelwa ngabazali babo?

² Umphostoli uPhawuli wabhalela amaKhristu wathi: “Kumele [abantwana loba abazukulu] bafunde kuqala kulakho konke ukusebenzisa ukholo lwabo ngokukhathalela abendlu yakwabo ngalokho besenanisa kubazali babo lakubazali babazali babo, ngoba lokhu kuyamthokozisa uNkulunkulu.” (1 KuThimothi 5:4) Abazali, ogogo labokhulu bathatha iminyaka eminengi besebenzela abantwababo, bebondla futhi betshengisa ukuthi bayabathanda. Yikho-ke abantwana asebekhulile ‘bayenanisa’ kubo ngokutshengisa ukuthi bayabonga. Nxa bebathanda abazali babo futhi bebaqakathekisa, kuzakhanya ukuthi bayababonga. Asebekhulile bayathokoza kakhulu nxa bephathwa kuhle. Bafuna kukhanye lokuthi labo baqakathekile njalo kabakaphelelwa ngumphako.

 3. Singatshengisa njani ukuthi siyabahlonipha abazali labogogo kanye labokhulu bethu?

³ Yikho-ke nxa sitshela abazali bethu labogogo kanye labokhulu ukuthi siyabathanda, siyabe sitshengisa ukuthi siyabahlonipha. (1 KwabaseKhorinte 16:14) Lanxa singasahlali ngekhaya, kumele sikhumbule ukuthi bayathokoza okwamagama nxa behlala besizwa ukuthi siyaphila. Bayajabula kakhulu nxa sibabhalela izincwadi, sibafonela kumbe sibavakatshela. Omunye ugogo okuthiwa nguMiyo ohlala eJapan owayeseleminyaka engu-82 wake wabhala ngendodakazi yakhe etshade lombonisi ohambelayo wathi: “Indodakazi yami ihlala isithi: ‘Mama ngifuna uhlale ukwazi ukuthi singaphi.’ Ihlala ingithumela uhlelo lwendawo abazahamba kuzo kanye lenombolo zocingo zalapho abayabe bekhona iviki ngayinye. Yikho nxa ngivula imephu ngihle ngibone ukuthi bangaphi ngalesosikhathi. Ngihlala ngimbonga uJehova ngokuthi wangibusisa ngokunginika umntwana okhathalela kangaka.”

 4. Abakhokheli benkolo yamaJuda babekhuthaza abantu ukuthi babaphathe njani abazali babo asebekhulile?

⁴ Izikhathi ezinengi ukuhlonipha abazali kugoqela lokuthi umuntu atshone esikhwameni. Ngesikhathi uJesu eseselapha emhlabeni, abakhokheli benkolo abangamaJuda babelesiko elalisithi nxa umuntu angafunga ukuthi imali yakhe kumbe impahla angabe elayo “yisipho esiqanjulelwe uNkulunkulu,” akusamelanga ancedise abazali bakhe ngezinto zokuziphilisa. (UMathewu 15:3-6) Babelolunya lwenyoka sibili. Phela kwakufanana lokuthi bakhuthaza abantu ukuthi bangazihluphi ngokuhlonipha abazali babo kodwa babadelele, babatshiye behawula. Kakumelanga senze njengabo loba sekutheni.​—UDutheronomi 27:16.

 5. Lanxa uhulumende elenhlelo zokuphathisa asebeluphele, kungani kumele sizimisele ukuncedisa abazali nxa kulokunye abakuswelayo?

⁵ Emazweni amanengi ohulumende balenhlelo zokuphathisa asebeluphele ngokubanika ukudla, impahla, indawo zokuhlala kanye lokunye. Kungenzeka lokuthi abazali balemali ababeyiqogelela ukuze bayisebenzise sebekhulile. Kodwa nxa kulokunye abakuswelayo, abantwababo batshengisa ukuthi bayabahlonipha ngokwenza konke okusemandleni abo ukuze babancedise. Kanti njalo nxa bebanakekela, bayabe betshengisa lokuthi bayamhlonipha uJehova uNkulunkulu owaqalisa imuli.

 6. Abantwana abanengi bajayele ukwenzani ukuze bancedise abazali babo asebekhulile?

⁶ Abantwana abanengi asebekhulile bayazinikela ukuphathisa abazali babo abangezwa kuhle futhi bayabathanda. Abanye bayabathatha bahlale labo. Abanye bathuthela eduze lalapho okuhlala khona abazali babo kumbe bahle bayehlala labo emizini yabo. Izikhathi ezinengi lokhu kwenza impilo yabalupheleyo leyabantwababo ibe lula.

 7. Kungani kungamelanga ugijimele ukwenza izinqumo eziphathelane labazali asebekhulile ungaqalanga wacabangisisa?

⁷ Kodwa kwezinye izikhathi umntwana uyaphambanisa izinto yena esithi uyanceda. Njani? Mhlawumbe uyabe ekhathazekile abesegijimela ukwenzela abazali okuthile engazange ahlale phansi wanakana ngakho. Kodwa iBhayibhili lilesixwayiso esithi: ‘Umuntu olengqondo uyakucabangisisa konke akwenzayo.’ (IZaga 14:15) Ngokwesibonelo ake sithi umzali wakho uhlala yedwa njalo sekulokunye okumhluphayo. Nxa ucabanga ukuthi kungamnceda ukuthi abuye azohlala lani, nanku ongacabangisisa ngakho: Kuyini akuswelayo sibisibili? Zikhona yini indawo zokugcina asebeluphele loba ezinye izindlela zokubanakekela ezingaphathisa? Yena uyafuna yini ukuthutha? Nxa efuna, ukuntshintsha indlela ayephila ngayo akusoze kumkhathaze yini? Kasoze afike abe lesizungu na? Usuke wambuza yini ukuthi yena uthini? Ukuthutha kwakhe kuzakuphatha njani wena lomkakho kanye labantwabakho? Nxa umzali wakho efuna ukongiwa, ngubani ozamnakekela? Abanye bona bazancedisa njani? Usuke waxoxa labo yini bonke okumele bayazi indaba le?

 8. Endabeni yokuthi umzali anganakekelwa njani, ngobani ongaxoxa labo?

⁸ Umzali ngowabantwana bonke. Yikho-ke endabeni yokuthi uzanakekelwa njani, kungaba kuhle ukuthi imuli yonke ihlangane ukuze ngamunye aphose elakhe. Kungalisiza lokuthi lixoxe labadala bebandla loba labangane asebake bahlangana lezinto ezinjalo empilweni yabo. IBhayibhili lithi: “Amaqhinga ayehluleka uma kungelazeluleko, kodwa ayaphumelela ngabeluleki abanengi.”​—IZaga 15:22.

9, 10. (a) Lanxa abazali bakho sebekhulile kuyini okungamelanga ukukhohlwe? (b) Kuyini okumele kunanzelelwe ngumntwana oncedisa abazali bakhe?

⁹ Nxa uhlonipha abazali asebeluphele kumele ubazwisise uphinde ube lesihawu. Ukuguga kungenza ukuthi bacine sebesehluleka ukuhamba, ukudla kanye lokukhumbula ezinye izinto. Yikho kuyabe sekumele ubancedise. Kodwa abantwana abanengi bayabe sebefuna ukubenzela konke lokuhlala bebelusile. Lanxa kunjalo, asebeluphele balolwazi olunengi lenhlakanipho njalo sebeleminyaka bezenzela izinqumo zabo. Yikho-ke kumele unanzelele ukuthi balokhu bengabazali bakho lokuthi bangabantu abadala. Lokhu kuzabenza bazizwe belesithunzi. Nxa bangabona angathi usubaphatha njengabantwana bangadana loba bacaphuke. Abanye abazali bacina bengasazwanani labantwababo nxa bebona angathi bafuna ukubaphatha angathi bafuyiwe.

¹⁰ Kunzima sibili ukunakekela abazali asebekhulile kodwa nxa ulomusa uzabavumela ukuthi baziphilele impilo yabo futhi benze lokho abenelisa ukuzenzela khona. Qala ubabuze ukuthi bona bacabangani, ungabahambeli phambili. Lanxa kungabe kukunengi abangasenelisi ukukwenza, ungangeneli kakhulu empilweni yabo. Nxa ungayekela ukuhlala ubelusile, ingxabano zingaba zilutshwana njalo lonke lizathokoza. Kwezinye izikhathi kungenzeka ukuthi uphikisane lalokho abakufunayo ukuze kubahambele kuhle. Kodwa nxa ubahlonipha kawusoze ubaphathe njengabantwana loba sekutheni. ILizwi likaNkulunkulu lithi: “Sukumelani asebeluphele, lihloniphe abantu abadala.”​—ULevi 19:32.

11-13. Nxa umntwana engazange akhuliswe kuhle ngabazali bakhe, angenzani ukuze abanakekele nxa sebekhulile?

¹¹ Okunye okungenza ukuthi kube nzima ukuthi umuntu ahloniphe abazali bakhe asebekhulile yindlela ababemphatha ngayo esakhula. Mhlawumbe uyabe wakhuliswa ngubaba owayengamnanzi njalo engamphathi kuhle, kumbe elomama owayelesihluku futhi enguntandokayiphikiswa. Kungabe kumzwisa ubuhlungu sibili ukuthi abazali bakhe kabamkhulisanga ngendlela eqondileyo, aze ahlale esefuthelene. Kodwa kungenzeka yini ukuthi antshintshe indlela azizwa ngayo.a

¹² UBasse owakhulela eFinland wathi: “Ubaba owangikhulisayo wayekade elisotsha lamaNazi eGermany. Wayengaphuzi ukuvuka ulaka ahle abe yisilwane. Ngambona kanengi ngawami etshaya umama. Ngelinye ilanga wangizondela wangitshaya ngebhanti, insimbi yalo yangitshaya ebusweni ngawela embhedeni.”

¹³ Loba kunjalo, kukhona okuhle ayekwenza. UBasse waqhubeka wathi: “Kodwa ubaba wayesebenza liphuma lize liyetshona ukuze ondle imuli yakhe. Loba nje wayengelamusa, ngangisazi ukuthi kwakusenziwa kuyini. Unina wayemxotshile ngakibo esesengumfanyana nje. Wakhula engowezibhakela njalo waya empini eseselijaha. Ngazama ukumzwisisa futhi ngangingasamsoli. Ngathi sengikhulile ngazimisela ukuthi ngimncedise lapho engangisenelisa khona waze watshona. Kwakunzima kodwa ngenza okwakusemandleni ami. Ngazama ukuba ngumntwana olungileyo waze waziphumulela, laye ngicabanga ukuthi wakubona lokho.”

14. Yiwuphi umbhalo okumele siwusebenzise zikhathi zonke lalapho sinakekela abazali asebeluphele?

¹⁴ IBhayibhili lileseluleko esingasebenza emulini lakwezinye indawo. Sithi: “Zembeseni ngesihawu, umusa, ukuzithoba, ubumnene kanye lokubekezela. Bekezelelanani, lithethelelane loba kuyinsolo bani omunye angaba layo ngomunye. Thethelelani njengoba iNkosi yalithethelela.”​—KwabaseKholose 3:12, 13.

15. Kungani ukunakekela abazali kubuhlungu kwezinye izikhathi?

¹⁵ Ukonga umzali osesehluleka ngumsebenzi onzima, othatha isikhathi eside njalo kunengi okuyabe kumele kwenziwe. Kodwa okuhlupha kakhulu yibuhlungu obusenhliziyweni. Kuqeda amandla ukubona umzali edliwa ngumkhuhlane, eseqalisa ukukhohlwa njalo esesehluleka ukuzenzela loba yini. USandy odabuka ePuerto Rico wathi: “Umama wayeyikho konke ngekhaya. Yikho kwakuzwisa usizi ukumbona esebuhlungwini. Waqala ngokuqhula, wazohamba ngodondolo, wahamba ngezinsimbi ayebambelela kuzo, saze samdingela lewilitsheya. Kusukela lapho waqalisa ukuphela kancane kancane waze wacina etshona. Ngangimnakekela ubusuku lemini ngoba wayelemvukuzane yamathambo. Sasimgezisa, simdlise siphinde simbalele amabhuku. Kwakunzima sibili, ngihlala ngidanile. Ngathi sengikubona ukuthi umama usephela, ngakhala ngoba ngangimthanda kakhulu.”

16, 17. Kuyini okunganceda umuntu onakekela umzali wakhe ukuthi angazibulali ezama ukwenza lokho angenelisi ukukwenza?

¹⁶ Nxa sekukuqondile ungenzani? Kungakunceda kakhulu ukubala iBhayibhili uzwe ukuthi uJehova ukucebisani uphinde uthandaze ukhuluma laye. (KwabaseFiliphi 4:6, 7) Dlana ukudla okwakha umzimba uphinde ulale ngesikhathi ukuze ube lamandla. Ungenza njalo kawusoze uphelelwe ngamandla okunakekela ogulayo futhi kawusoze ukhathazeke kakhulu. Mhlawumbe ungazinika lesikhathi sokutshaywa ngumoya. Lanxa ungeke wenelise ukuyavakatsha, kuqakathekile ukuthi ube lesikhathi sokuzilibazisa. Ungacela omunye ukuthi azokuphumuza, akhangele umzali wakho ukuze uthole ithuba lokutshaywa ngumoya.

¹⁷ Abanengi abanakekela abantu abagulayo bacabanga ukuthi bangakulungisa konke okungahambi kuhle. Nxa kuyikuthi lawe ucabanga njalo, ungazithonisisi ngokuthi kulezinye izinto ezikwehlulayo. Phela ngezinye izikhathi ungacina ubona sekungcono ukuthi umzali wakho umhambise lapho okunakekelwa khona asebeluphele. Nxa kunguwe omnakekelayo, ungazikhami uzama ukwenza izinto ongeke wenelise ukuzenza. Kumele uhlele ukuze unakekele kuhle abazali bakho, abantwabakho, owangakwakho uphinde ube lesikhathi sokuzenzela izinto zakho.

18, 19. UJehova ubathembisani abakhathazekileyo, njalo indaba kaMyrna itshengisa njani ukuthi uyasigcwalisa isithembiso sakhe?

¹⁸ UJehova usebenzisa iLizwi lakhe iBhayibhili ukuze asincedise ukuthi sinakekele abazali bethu asebeluphele. Kodwa kayisiyo yodwa indlela asiphathisa ngayo. Umhubi waphefumulelwa ukuthi abhale athi: ‘UJehova useduze kulabo abacela kuye, kubo bonke abacela kuye ngeqiniso. Uyezwa ukukhala kwabo abasindise.’ UJehova uzabasindisa loba abavuselele labo abathembekileyo lanxa izinto zingaze zibe nzima njani.​—IHubo 145:18, 19.

¹⁹ UMyrna ohlala ePhilippines wakubona lokhu ngesikhathi enakekela unina owayetshaywe yisitirokhu wasala engasenelisi ukwenza loba yini. Wabhala wathi: “Akulalutho olubuhlungu njengokubona umuntu omthandayo efuthelwa, esehluleka lokukhuluma ukuthi kungaphi lapho okubuhlungu khona. Kwakungathi ngimbukele egalula emanzini kancane kancane, kungelandlela engingamphathisa ngayo. Angikwazi lokuthi ngaguqa kangaki ngikhuluma loJehova ngimtshela ukuthi mina sengidiniwe bo. Ngakhala njengoDavida owacela uJehova ukuthi amfakele inyembezi zakhe egabheni lesikhumba abesemkhumbula. [IHubo 56:8, nwt] UJehova wagcwalisa isithembiso sakhe, wanginika amandla engangiwadinga. ‘UJehova waba yinsika yami.’”​—IHubo 18:18.

20. Yiziphi izithembiso eziseBhayibhilini ezinceda abanakekela abazali babo ukuthi bangalahli ithemba lanxa bangaze bafelwe?

²⁰ Bathi ukunakekela umzali yindaba elesiphetho esibuhlungu zikhathi zonke. Phela oseluphele angacina etshonile lanxa ungaze usebenze gadalala umnakekela. Yikho kanye okwenzakala kunina kaMyrna. Kodwa abathemba uJehova bayakwazi ukuthi ukufa kayisikho kuphela kwendaba. Umphostoli uPhawuli wathi: ‘Ngilalona lelo themba kuNkulunkulu, ukuthi kuzakuba lokuvuka kwabafileyo, abalungileyo lababi.’ (ImiSebenzi 24:15) Labo asebatshiywa ngabazali kuyabaduduza kakhulu ukwazi ukuthi bazavuswa baphile emhlabeni omutsha, ozalungiswa nguNkulunkulu lapho ‘okungasayikuba khona futhi ukufa.’​—ISambulo 21:4.

21. Kuba njani nxa singahlonipha abazali bethu asebekhulile?

²¹ Abantu abakhonza uNkulunkulu bayabaqakathekisa kakhulu abazali babo lanxa sebekhulile. (IZaga 23:22-24) Bayabahlonipha sibili. Nxa besenza njalo, bayakubona kusenzakala lokho okwalotshwa eBhayibhilini. Lithi: “Sengathi uyihlo lonyoko bangathokoza; sengathi lowo owakuzalayo angajabula!” (IZaga 23:25) Okuqakatheke kulakho konke yikuthi nxa behlonipha abazali babo asebekhulile, bayabe behlonipha loJehova uNkulunkulu njalo bemthokozisa.