Abantu abanengi kabakhululekanga ukukhuluma ngendaba zemacansini. Kodwa iBhayibhili liyakhuluma ngendaba le futhi liyibeka ngendlela elesithunzi. Elikutshoyo kuyasinceda njalo kuyasivikela ngoba kuvela kuJehova uMdali wethu. UJehova ufuna senze okumthokozisayo ngoba uyakwazi ukuthi ukwenza njalo kuzasenza sithokoze kuze kube nini lanini.

1. UJehova uthini ngokuya emacansini?

Ukuya emacansini yisipho uJehova asinike abantu. Kodwa uthi indoda lomfazi abatshadileyo yibo kuphela okumele baye emacansini. Isipho lesi sinika abatshadileyo ithuba lokuthi batshengisane ukuthi bayathandana lelokuba labantwana. IBhayibhili lithi: “Thokoza ngomfazi wobutsha bakho.” (IZaga 5:18, 19) UJehova ufuna amaKhristu atshadileyo athembeke kubomkawo. Lokhu kutsho ukuthi akumelanga aye emacansini labanye abantu.—Bala uHebheru 13:4.

2. Kutshoni ukungaziphathi?

IBhayibhili lithi: “Labo abafebayo . . . abasoze balithole ilifa loMbuso kaNkulunkulu.” (1 KwabaseKhorinte 6:9, 10) Abalobi beBhayibhili ababhala ngesiGrikhi basebenzisa ibala elithi por·neiʹa ngesikhathi bekhuluma ngokungaziphathi. Ibala leli ligoqela (1) ukuya emacansini lomuntu ongatshadanga laye,a (2) ukuba yisitabane (3) lokulala lenyamazana. Ukubalekela “ubufebe” kwenza uJehova athokoze njalo kuyasivikela.—1 KwabaseThesalonika 4:3.

GEBHA UJULE

3. Balekela ubufebe

Ijaha elalithembekile okuthiwa nguJosefa labaleka ngesikhathi owesifazana othile efuna ukulala lalo. Bala uGenesisi 39:1-12 beselixoxa ngemibuzo le:

• Kuyini okwenza uJosefa wabaleka?—Khangela ivesi 9.

• Ucabanga ukuthi okwenziwa nguJosefa kwakuqondile yini? Kungani usitsho njalo?

IVIDIYO: Balekela Ubufebe (5:06)

UJehova ufuna sonke sibalekele ubufebe. Bala u-1 Khorinte 6:18 beselixoxa ngemibuzo elandelayo:

• Yiziphi izimo ezingenza umuntu acine efebile?

• Ungakubalekela njani ukungaziphathi?

4. Ungasinqoba isilingo!

IVIDIYO: Nqoba Isilingo Ngokubala IBhayibhili (3:02)

• Umfowethu wenzeni ngesikhathi enanzelela ukuthi izinto azenzayo lazicabangayo zizakwenza ukuthi acine engasathembekanga kumkakhe?

AmaKhristu athembekileyo lawo ayake athwale nzima ngezinye izikhathi ukuthi ahlale elemicabango ehlanzekileyo. Ungenzani ukuze ukhiphe imicabango emibi engqondweni yakho? Bala uFiliphi 4:8 beselixoxa ngemibuzo le:

• Yizinto ezinjani okumele sicabange ngazo?

• Ukubala iBhayibhili lokwenza okunengi emsebenzini kaJehova kungasinceda njani ukuthi sibalekele ukwenza isono?

5. Ukulalela uJehova kuyasinceda

IVIDIYO: Ukuswela Ulwazi Olweneleyo (9:31)

• Ijaha elisakhulayo lazifaka njani esilingweni?—Khangela iZaga 7:8, 9.

• IZaga 7:23, 26 zitshengisa ukuthi ukungaziphathi kubangela ubuhlungu obukhulu. Ukubalekela ubufebe kusivikela njani?

• Ukuziphatha kuhle kungasinceda njani ukuthi sihlale sithokoza?

Abanye abantu bathi okutshiwo liBhayibhili mayelana lobutabane kucindezela abanye. Kodwa okwenza uJehova wafaka imithetho enjalo yikuthi ufuna sithokoze. Abalalela imithetho le bazaphila kuze kube nini lanini. Bala u-1 Khorinte 6:9-11 beselixoxa ngombuzo lo:

• Ngaphandle kobutabane, yiziphi ezinye izinto eziqanjwe emavesini la ezingamthokozisiyo uNkulunkulu?

Sonke kumele sitshintshe indlela esiphila ngayo ukuze sithokozise uNkulunkulu. Kungani kuqakathekile ukuthi senze njalo? Bala iHubo 19:8, 11 beselixoxa ngemibuzo elandelayo:

• Ubona angani indlela uJehova afuna siziphathe ngayo iqondile yini? Kungani usitsho njalo?

ISIFINQO

Ukuya emacansini yisipho uJehova asinike indoda lomfazi abatshadileyo.

Ufundeni?

• Kutshoni ukuziphatha kubi?

• Kuyini okuzasinceda sibalekele ubufebe?

• Kusinceda ngani ukulalela imithetho kaJehova emayelana lokuziphatha?

THOLA OKUNENGI

Bala isihloko lesi ukuze ubone ukuthi kungani uNkulunkulu efuna indoda lomfazi baqale batshade bengakahlali bonke.

“IBhayibhili Lithini Ngendoda Lomfazi Abahlala Ndawonye Bengatshadanga?” (Isihloko esikuwebhusayithi yethu)

Bala isihloko lesi uzwe ukuthi kungani kungamelanga sizizonde izitabane lanxa iBhayibhili lisithi ubutabane abuqondanga.

“Ukuba Yisitabane Kubi Yini?” (Isihloko esikuwebhusayithi yethu)

Bala isihloko lesi ukuze ubone ukuthi imithetho kaNkulunkulu emayelana lokuziphatha isivikela njani.

“Ukumumuza Izitho Zensitha Zomunye Umuntu Yikuya Emacansini Yini?” (Isihloko esikuwebhusayithi yethu)

Bala isihloko esithi “Abazange Bangenyanye” ukuze ubone ukuthi kuyini okwenza indoda eyayiyisitabane yatshintsha indlela eyayiphila ngayo ukuze ithokozise uNkulunkulu.

“IBhayibhili Liyamntshintsha Umuntu” (INqabayokulinda, April 1, 2011)

Abanye abantu bathi ukutshada yikho okwenza umuntu athokoze. Kodwa iqiniso yikuthi ayisibo bonke abatshadileyo abathokozayo futhi ayisibo bonke abakhethe ukuhlala bengatshadanga abangathokoziyo. IBhayibhili litshengisa ukuthi kokubili ukutshada lokuhlala ungatshadanga yizipho ezivela kuJehova.

1. Kunceda ngani ukuhlala ungatshadanga?

IBhayibhili lithi: “Otshadayo wenza kuhle, kodwa ohlala engatshadanga wenza kuhle kakhulu.” (Bala u-1 Khorinte 7:32, 33, 38.) Kutshoni ukuthi umuntu ohlala engatshadanga “wenza kuhle kakhulu”? UmKhristu okhetha ukuhlala engatshadanga kalamthwalo onjengowomuntu otshadileyo, owokunakekela omunye wakhe. Ulenkululeko ethe xaxa yokwenza okunengi ekukhonzeni uJehova. Ngokwesibonelo, kulula ukuthi athuthele kwelinye ilizwe ukuze ayetshumayela khona njalo ulesikhathi esinengi sokuqinisa ubungane bakhe loJehova.

2. Kunceda ngani ukutshada ngokusemthethweni?

Ukutshada lakho kuyanceda. IBhayibhili lithi “ababili bangcono kuloyedwa.” (UmTshumayeli 4:9) Amazwi la aliqiniso ikakhulu kwabatshadileyo abasebenzisa izimiso eziseBhayibhilini. Phela ukutshada ngokusemthethweni kwenza indoda lomkayo bazimisele ukuqhubeka bethandana, behloniphana futhi beqakathekisana. Kanti njalo kwenza bathembane kakhulu, okuyinto engaba nzima kulabo abahlala ndawonye bengatshadanga. Ukutshada kunceda lokuthi abazali bakhulise abantwababo bendawonye futhi lokhu kwenza abantwana bakhule behlalisekile.

3. UJehova uthini ngokutshada?

Ngesikhathi uJehova ehlanganisa u-Adamu lo-Eva wathi: “Indoda izatshiya uyise lonina inamathele kumkayo.” (UGenesisi 2:24) UJehova ufuna indoda lomkayo abatshadileyo bathandane futhi bahlale ndawonye okwempilo yabo yonke. Uthi bangadivosa kuphela nxa omunye wabo efebile futhi lowo owonelweyo nguye olelungelo lokukhetha ukuthi uzadivosa yini loba hatshi.a (UMathewu 19:9) UJehova kafuni ukuthi amaKhristu eqiniso athathe isithembo.—1 KuThimothi 3:2.

GEBHA UJULE

4. Sisebenzise kuhle isipho sokuhlala ungatshadanga

UJesu wathi ukungatshadi yisipho. (UMathewu 19:11, 12) Bala uMathewu 4:23 beselixoxa ngombuzo lo:

• UJesu wasisebenzisa njani isipho sokungatshadi?

AmaKhristu akhetha ukuhlala engatshadanga angalingisela uJesu ngokusisebenzisa kuhle isipho lesi. Bukelani IVIDIYO beselixoxa ngombuzo olandelayo.

IVIDIYO: Abangatshadanga Abathembekileyo (3:11)

• AmaKhristu akhetha ukuhlala engatshadanga angasisebenzisa njani isipho lesi?

Ubukwazi yini?

IBhayibhili alitsho ukuthi umuntu kumele atshade eseleminyaka emingaki. Kodwa lithi kumele atshade nxa “sekwedlule isikhathi lapho imizwa yakhe yobutsha elamandla khona.” Lesi yisikhathi lapho isifiso sokuya emacansini esilamandla kakhulu emuntwini osakhulayo futhi kubanzima ukuthi akhethe kuhle.—1 KwabaseKhorinte 7:36.

5. Khetha kuhle umuntu wokutshada laye

Ukukhetha umuntu wokutshada laye yisinqumo esiqakatheke kakhulu. Bala uMathewu 19:4-6, 9 beselixoxa ngombuzo lo:

• Kungani kungamelanga umKhristu ajahe ukutshada?

IBhayibhili lilamacebo azakunceda ukuthi ukhethe kuhle umuntu wokutshada laye. Okuqakatheke kakhulu yikuthi ukhethe umuntu othanda uJehova.b Bala u-1 Khorinte 7:39 lo-2 Khorinte 6:14 beselixoxa ngemibuzo le:

• Kungani kumele utshade lomuntu okhonza uJehova njengawe?

• Ubona angani uJehova uzwa njani nxa ungatshada lomuntu ongamkhonziyo?

6. Qakathekisa umtshado njengoJehova

Amanye amadoda ako-Israyeli ayetshiya omkawo ngezizatho ezingatsho lutho. Bala uMalaki 2:13, 14, 16 beselixoxa ngombuzo olandelayo:

• Kungani uJehova ekuzonda ukuthi abatshadileyo badivose kungelasizatho esivela eBhayibhilini?

Bukelani IVIDIYO beselixoxa ngombuzo olandelayo.

IVIDIYO: Umtshado Akumelanga Uchithwe (4:30)

• Kuyini ongakwenza ukuze lihlale lithokoza lanxa utshade lomuntu ongakhonzi uJehova?

7. Sebenzisa izimiso ezivela kuJehova

IVIDIYO: Uyenelisa Ukulalela Okutshiwo NguJehova Mayelana Lokutshada (4:14)

Bala uHebheru 13:4 beselixoxa ngemibuzo le:

• Ubona angani imithetho kaJehova emayelana lokutshada iyanceda yini? Kungani usitsho njalo?

Emazweni amanengi ohulumende bakhangelele ukuthi abantu batshade ngokusemthethweni futhi badivose ngokusemthethweni. UJehova ukhangelele ukuthi amaKhristu eqiniso ayilandele imithetho le. Bala uThithusi 3:1 beselixoxa ngombuzo olandelayo:

• Litshade ngokusemthethweni yini?

ISIFINQO

Ukutshada lokuhlala ungatshadanga yizipho ezivela kuJehova. Kokubili kungenza sithokoze nxa silandela okufunwa nguJehova.

Ufundeni?

• Umuntu okhetha ukuhlala engatshadanga angasisebenzisa njani isipho sokungatshadi?

• Kungani iBhayibhili lisithi umKhristu kumele atshade lomuntu okhonza uJehova kuphela?

• IBhayibhili lithi yisiphi isizatho esingenza abatshadileyo badivose?

THOLA OKUNENGI

Bala isihloko lesi uzwe ukuthi kutshoni ukutshada ‘eNkosini’ kuphela.

“Imibuzo Ebuzwa Ngabafundi” (INqabayokulinda, July 1, 2004)

Bukela ividiyo le ukuze ubone ukuthi ungakulungiselela njani ukutshada.

Ukulungiselela Ukutshada (17:05)

Bukela ividiyo le uzwe ukuthi omunye umzalwane watshiyani ukuze akhonze uJehova.

Ngangicabanga Ukuthi Uzavuma Ukufunda IBhayibhili (1:56)

Bala uzwe ukuthi kuyini okumele umuntu acabange ngakho nxa efuna ukudivosa kumbe ukwehlukana lomkakhe okwesikhathi esithile.

“Kuhloniphe ‘Lokho UNkulunkulu Asekuhlanganisile’” (INqabayokulinda, December 2018)