ISIFUNDO 36
Thembeka Kukho Konke
Sonke siyakufuna ukuba labangane abathembekileyo. UJehova laye ufuna abangane abathembekileyo. Kodwa kungaba nzima ukuhlala sithembekile ngoba abantu abanengi lamuhla abathembekanga. Kuyanceda yini ukuba ngabantu abathembekileyo kukho konke?
1. Kungani kuqakathekile ukuthi sithembeke?
Nxa sithembekile kukho konke esikwenzayo siyabe sitshengisa uJehova ukuthi siyamthanda lokuthi siyamhlonipha. Phela uyakubona konke esikwenzayo lesikucabangayo. (KumaHebheru 4:13) Yikho uyathokoza kakhulu nxa esibona sithembekile. ILizwi lakhe lithi: “UJehova uyamzonda umuntu oliqili, kodwa ungumngane omkhulu wabathembekileyo.”—IZaga 3:32.
2. Singatshengisa njani ukuthi sithembekile?
UJehova ufuna ‘sikhulume iqiniso komunye lomunye.’ (UZekhariya 8:16, 17) Lokhu kutsho ukuthi akumelanga siqambe amanga kumbe sikhohlise loba ngubani, kungaba ngamalunga emuli zethu, esisebenza labo, esikhonza labo kumbe iziphathamandla zikahulumende. Abantu abathembekileyo abatshontshi futhi kabaqili abanye. (Bala iZaga 24:28 lo-Efesu 4:28.) Bayabhadala lemithelo efunwa nguhulumende. (KwabaseRoma 13:5-7) Lezi ngezinye indlela esingatshengisa ngazo ukuthi sizimisele “ukuthembeka kukho konke.”—KumaHebheru 13:18.
3. Kuyanceda yini ukuba ngabantu abathembekileyo?
Ukuba ngabantu abathembekileyo kuyanceda sibili. Kwenza abanye basithembe, kusenze sibe lomzwangedwa ohlanzekileyo futhi kwenza lebandla limanyane. Ukuthembeka kwethu ‘kucecisa lemfundiso yoMsindisi wethu uNkulunkulu’ njalo kwenza labanye abantu bafune ukumkhonza.—KuThithusi 2:10.
GEBHA UJULE
Engxenyeni le uzabona ukuthi uJehova uyabathanda abantu abathembekileyo lokuthi ukuthembeka kuzakunceda njani. Uzabona lokuthi ungatshengisa njani ukuthi uthembekile.
4. Ukuthembeka kuyamthokozisa uJehova
Bala iHubo 44:21 loMalaki 3:16 beselixoxa ngemibuzo le:
Ubona angani kukhona yini esingakufihlela uJehova?
Ucabanga ukuthi uJehova uzwa njani nxa esibona sikhuluma iqiniso lanxa kunzima ukwenza njalo?
Abazali bayathokoza nxa abantwababo bekhuluma iqiniso. UJehova laye uyathokoza nxa sikhuluma iqiniso
5. Thembeka kukho konke
Abantu abanengi bacabanga ukuthi akulamuntu ongahlala ethembekile ngaso sonke isikhathi. Kodwa ake sibone ukuthi kungani kumele sithembeke ngaso sonke isikhathi. Bukelani IVIDIYO.
Bala uHebheru 13:18 beselixoxa ngokuthi singatshengisa njani ukuthi sithembekile . . .
emulini.
esikolo loba emsebenzini.
lakokunye esikwenzayo.
6. Ukuthembeka kuyasinceda
Lanxa ukuthembeka kungenza sithwale nzima ngezinye izikhathi, okuhle yikuthi asisoze sizisole ngakho. Bala iHubo 34:12-16 beselixoxa ngombuzo lo:
Ubona angani impilo yakho izakuba njani nxa ungahlala uthembekile?
Ukuthembeka emuntwini otshade laye kuzalenza lithokoze
Nxa ungathembeka emsebenzini, umqhatshi wakho uzakuthemba
Ukulandela imithetho kahulumende kuzakwenza iziphathamandla zikuthembe
ABANYE BATHI: “Ukukhuluma amanga amancane akukubi.”
Ubona angani uJehova kalandaba lamanga amancane yini?
ISIFINQO
UJehova ufuna abangane bakhe bathembeke kukho konke abakwenzayo labakutshoyo.
Ufundeni?
Singatshengisa njani ukuthi sithembekile?
Ubona angani kukhona yini esingakufihlela uJehova?
Kungani kumele uthembeke zikhathi zonke?
THOLA OKUNENGI
Bukela ividiyo le ubone ukuthi abazali bangabafundisa njani abantwababo ukuthi bathembeke.
Bukela ividiyo le ukuze ubone ukuthi kunceda ngani ukugcina izithembiso esizenzayo.
Bala isihloko lesi ubone ukuthi kungani kumele sibhadale imithelo kungelani lokuthi imali yakhona isetshenziswa njani.
“Kungani Kumele Sibhadale Imithelo?” (INqabayokulinda, September 1, 2011)
Bala uzwe ukuthi kuyini okwanceda eyinye indoda eyayingathembekanga ukuthi itshintshe indlela eyayiphila ngayo.
“Ngazibonela Ukuthi UJehova Ulesihawu Njalo Uyathethelela” (INqabayokulinda, May 1, 2015)