Kungani Kuqakathekile Ukubingelela?

“SAKUBONA! Injani impilo?”

Akuthandabuzwa ukuthi lawe ujayele ukusebenzisa amazwi la nxa ubingelela abanye. Izikhathi ezinengi lawomazwi ayabe ehambisana lokuxhawula ombingelelayo. Indlela abantu ababingelelana ngayo lamazwi abawasebenzisayo ayatshiyana kusiya ngendawo kodwa inhloso yokubingelela iyafanana. Kwezinye indawo nxa ungabingeleli kumbe ungavumi nxa ubingelelwa abantu bakuthatha njengomuntu ongelathando loba ongahloniphiyo.

Kayisibo bonke abantu abakuthandayo ukubingelela. Abanye bayesaba ukubingelela ngenxa yokuthi balenhloni kumbe bazikhangelela phansi. Abanye bakuthola kunzima ukubingelela ngenxa yokukhangela ukuthi umuntu ungumhlobo bani, amasiko akhe, iminyaka, isikhundla alaso loba ukuthi ngowesilisa yini kumbe ngowesifazana. Kodwa iqiniso elikhona yikuthi ukubingelela kulempumela emihle.

Ngakho zibuze: ‘Kungani kuqakathekile ukubingelela? ILizwi likaNkulunkulu lingifundisani ngokubingelela?’

Ngesikhathi umphostoli uPhetro esamukela uKhoneliya, owayengokuqala kwabezizwe ukungena ebandleni lobuKhristu, wathi: “UNkulunkulu kathandi abanye kulabanye abantu.” (ImiSeb. 10:34) Ngokuhamba kwesikhathi wabhala ukuthi uNkulunkulu ufuna ‘ukuba umuntu wonke aphenduke.’ (2 Phet. 3:9) Mhlawumbe singaba lomcabango wokuthi amavesi la asebenza kulabo abafunda iqiniso. Kodwa uPhetro waphinda wakhuthaza amaKhristu esithi: “Hloniphani abantu bonke, lithande abazalwane.” (1 Phet. 2:17, The Holy Bible in Ndebele) Amazwi la atshengisa ukuthi kufanele sibingelele abanye kungelani lokuthi bangumhlobo bani, balamasiko anjani loba ukuthi bakhulele ngaphi. Nxa sisenza njalo siyabe sibatshengisa uthando lenhlonipho.

Umphostoli uPhawuli wakhuthaza amaKhristu wathi: “Yamukelani, omunye lomunye, njengalokhu uKhristu walamukela.” (Rom. 15:7) Wakhuluma ikakhulu ngabazalwane ababemnike ‘induduzo’ ukuze bamqinise. Lathi lamuhla kumele sibaduduze abafowethu labodadewethu ukuze baqine ngoba uSathane ubathwalise nzima abantu bakaNkulunkulu.​—Kol. 4:11; Isam. 12:12, 17.

Izibonelo eziseMibhalweni zitshengisa ukuthi ukubingelela kunceda abanye ngezindlela ezinengi.

Sathi sesifikile isikhathi sokuthi ukuphila kweNdodana kaNkulunkulu kudluliselwe esibelethweni sikaMariya, uJehova wathuma ingilosi yakhe ukuthi iyekhuluma laye. Ingilosi yafika kuMariya yathi: “Sabona, wena othandiweyo! INkosi ilawe.” Amazwi la amhlupha kakhulu uMariya ngoba wayezibuza ukuthi kungani ingilosi ikhuluma laye. Ingilosi yakubona lokhu yasisithi kuye: “Ungesabi, Mariya, uthole umusa kuNkulunkulu.” Yasimtshela ukuthi uzakhulelwa njalo abelethe uMesiya. UMariya kazange aqhubeke ekhathazekile kodwa waphendula ngokuzithoba wathi: “Ngiyincekukazi yeNkosi. Kakwenzeke kimi njengoba utshilo.”​—Luk. 1:26-38.

Ingilosi le yayilesibusiso esikhulu sokuba yisithunywa sikaJehova kodwa lokhu akuzange kuyenze ibe lomcabango wokuthi ukubingelela umuntu olesono kuzayiyehlisa isithunzi. Yikho yaqala ngokumbingelela uMariya. Thina sifundani kulokhu? Kumele sizimisele ukubingelela abanye futhi sibakhuthaze. Ngamazwi amalutshwana nje singenelisa ukunceda lokukhuthaza abanye ukuze babone sibili ukuthi bangamalunga emuli kaJehova.

UPhawuli wayesazana labazalwane abanengi emabandleni ase-Asia Minor lase-Europe. Manengi amazwi okubingelela atholakala ezincwadini zakhe. Ngokwesibonelo kuRoma isahluko 16, uPhawuli wathumela ukubingelela kubazalwane abanengi. Wakhuluma ngodadewethu okwakuthiwa nguFebhi njalo wakhuthaza abazalwane wathi “ngiyalicela ukuba limamukele eNkosini ngendlela efanele abangcwele njalo limsize ngakho konke angakuswela kini.” Ngemva kwalokho wabingelela uPrisila lo-Akhwila, wasesithi “akusimi kuphela kodwa wonke amabandla abezizwe ayababonga kakhulu.” Waphinda wabingelela labanye okungakhulunywa ngabo kakhulu. Wathi bingelelani “umngane wami othandekayo u-Ephenethusi” kanye ‘loTrifayena loTrifosa’ abasebenza kakhulu eNkosini. Siyabona ukuthi uPhawuli wayekuqakathekisa ukubingelela abazalwane.​—Rom. 16:1-16.

Ake ucabange ukuthi ukubingelelwa lokhu kwabakhuthaza njani abazalwane laba. Akuthandabuzwa ukuthi kwabenza bamthanda kakhulu uPhawuli njalo kwaqinisa ubudlelwano babo. Kumele ukuthi kwakhuthaza lamanye amaKhristu futhi kwaqinisa ukholo lwawo. Ukubingelela okuvela enhliziyweni lokubancoma abanye kuqinisa ubungane njalo kwenza abantu bakaNkulunkulu bamanyane.

Ngesikhathi uPhawuli esiya eRoma wadlula ethekwini lasePhuthewoli futhi kwafika abazalwane bevela eningizimu bezombona. IBhayibhili lithi uPhawuli wathi ebabona “wabonga uNkulunkulu njalo waqiniswa.” (ImiSeb. 28:13-15) Kwezinye izikhathi singabingelela umuntu ngokubobotheka nje kumbe ngokumphakamisela isandla. Lanxa kungakhanya kuyinto encane ukwenza njalo kungamvuselela umuntu odanileyo.

Umfundi uJakhobe kwakumele anike abazalwane iseluleko esilamandla ngenxa yokuthi abanye babo basebeqalisa ukwakha ubungane lomhlaba. (Jak. 4:4) Kodwa nanzelela ukuthi uJakhobe wayethula njani incwadi yakhe:

“UJakhobe inceku kaNkulunkulu leyeNkosi uJesu Khristu, kuzizwana ezilitshumi lambili ezihlakazekele phakathi kwezizwe: Ngiyalibingelela.” (Jak. 1:1) Asithandabuzi ukuthi abazalwane basamukela kuhle iseluleko sakhe ngoba wababingelela ngokuzithoba etshengisa ukuthi laye uyinceku kaNkulunkulu njengabo. Kuyacaca ukuthi ukubingelela omunye ngokuzithoba yindlela enhle yokwethula indaba futhi kungavula ithuba lokuthi uxoxe laye ngendaba eqakathekileyo.

Lanxa ungatshongo okunengi, ukubingelela omunye ngobuqotho langothando kuyanceda kakhulu. Kwesinye isikhathi ungazitshela ukuthi okwenzileyo akutsho lutho. (Mat. 22:39) Omunye udadewethu wase-Ireland wafika eWolu yoMbuso ehaluzela imihlangano isizaqalisa. Wathi engena nje omunye umzalwane watshibilika, wabobotheka, wathi kuye: “Sabona. Kuhle ukukubona.” Udade wazidlulela wayahlala phansi.

Ngemva kwamaviki athile udade lo walanda umzalwane lowo wamtshela ukuthi uselesikhathi elwisana lesimo esinzima emzini wakhe. Wathi kuye: “Mhlalokhuyana ngaphosa ngayekela ukubuya eWolu yoMbuso ngoba ngangicaphukile. Angisakhumbuli ukuthi safundani emhlanganweni kodwa engikukhumbulayo yikuthi wangibingelela. Kwangenza ngakhululeka. Ngiyabonga.”

Umzalwane lo kazange ananzelele ukuthi ukubingelela kwakhe kwakuzakuba lempumela bani. Uthi: “Wathi engitshela ukuthi amazwi engawatshoyo amsiza njani, ngathokoza kakhulu ngomzamo engawenzayo.”

USolomoni wabhala wathi: “Phosela isinkwa sakho phezu kwamanzi, ngoba ngemuva kwezinsuku ezinengi uzasifumana futhi.” (UmTshu. 11:1) Ngakho nxa singahlala sikuqakathekisa ukubingelela abanye, ikakhulu labo esikhonza labo sizabaqinisa njalo lathi sizaqina. Ngakho kasingakuthathi lula ukubingelela.