• “Yena Wasithanda Kuqala”
    Sondela KuJehova

    • “UNkulunkulu Uluthando”

      15. IBhayibhili lithini ngophawu lukaJehova lothando njalo kungani lokhu kumangalisa? (Khangela lamabala angaphansi.)

      15 IBhayibhili lilokunye elikutshoyo ngothando elingakutshoyo ngezinye izimpawu zobuntu bukaJehova. IMibhalo kayitsho ukuthi uNkulunkulu ungamandla kumbe ukuthi uyikwahlulela okuhle loba ukuthi uyinhlakanipho. Ulazo izimpawu lezo, ungumthombo wazo njalo ngeke waqathaniswa laloba ngubani ekutshengiseni impawu lezo. Kodwa nxa iBhayibhili selikhuluma ngophawu lwakhe lwesine lithi: “UNkulunkulu uluthando.”b (1 UJohane 4:8) Kutshoni lokhu?

      16-18. (a) Kungani iBhayibhili lisithi “uNkulunkulu uluthando”? (b) Kuzo zonke izidalwa ezisemhlabeni, kungani kuqondile ukuthi kube ngumuntu omela uphawu lukaJehova lothando?

      16 Umutsho othi “uNkulunkulu uluthando” awutsho ukuthi uNkulunkulu ulingana lothando. Kasingeke siwuphendulele umutsho lo sithi “uthando nguNkulunkulu” ngoba uJehova ngeke alinganiswe lophawu lolo. Ulothando futhi ulemizwa etshiyeneyo kanye lempawu ezitshiyeneyo. Lanxa kunjalo, uthando lujulile kuJehova. Elinye ibhuku lithi ngokuphathelane levesi le: “Uthando yibunguye bukaNkulunkulu kumbe imvelo yakhe.” Singakucabanga ngalindlela: Amandla kaJehova amenza enelise ukwenza okuthile. Ukwahlulela kwakhe okuhle kanye lenhlakanipho yakhe kuqondisa indlela enza ngayo. Kodwa uthando lukaJehova yilo olumfuqa ukuthi enze okuthile. Okunye yikuthi uthando lwakhe luhlezi lukhona lapho esebenzisa ezinye izimpawu zakhe.

      17 UJehova uyisibonelo esihle sibili endabeni yokutshengisa uthando. Ngakho nxa sifuna ukufunda ngothando olulezimiso, kumele sifunde ngoJehova. Abantu labo balalo uphawu lolu oluhle. Kodwa kungani belalo? Ngesikhathi edala izinto, uJehova watshela iNdodana yakhe wathi: “Asenze umuntu ngomfanekiso wethu, afanane lathi.” (UGenesisi 1:26) Kuzo zonke izidalwa ezisemhlabeni, umuntu nguye kuphela owenelisa ukuthanda futhi nxa ekwenza lokhu uyabe elingisela uYise osezulwini. Khumbula ukuthi uJehova wasebenzisa izidalwa ezitshiyeneyo ukuthi zimele izimpawu zakhe eziqakatheke ukwedlula zonke. Lanxa kunjalo, uJehova wakhetha ukuthi umuntu kube nguye omela uthando, uphawu lwakhe oluqakatheke kakhulu.—UHezekheli 1:10.

  • “Yena Wasithanda Kuqala”
    Sondela KuJehova

    • b Kulemitsho emibili eMibhalweni ephosa ihambelane lawonalo. Kulothi “uNkulunkulu uyikukhanya” lothi ‘uNkulunkulu ungumlilo otshabalalisayo.’ (1 UJohane 1:5; KumaHebheru 12:29) Kodwa imitsho le akumelanga ithathwe injengoba injalo ngoba ifanisa uJehova lezinto ezingokoqobo. UJehova unjengokukhanya, ngenxa yokuthi ungcwele njalo uqotho. Akula ‘bumnyama’ kumbe ukungcola kuye. Angafaniswa lomlilo ngenxa yokusebenzisa kwakhe amandla okubhubhisa.