ISIHLOKO ESISEKUQALISENI | IMPI EYANTSHINTSHA UMHLABA

Ngubani Sibili Obangela iMpi Lokuhlupheka?

IMpi Yomhlaba Wonke Yokuqala yaphela mhlaka-11 November ngo-1918. Kwavalwa amabhizimusi njalo abantu bagida emigwaqweni yamadolobho. Kodwa ukuthaba lokhu akuzange kuthathe isikhathi. Enye inkemenkeme eyayibuhlungu kakhulu ukwedlula inkafulakufa yalandela ezithendeni zempi yomhlaba wonke.

Ngo-June 1918 umkhuhlane oyingozi kakhulu okuthiwa yi-Spanish flu wahlasela amabutho ayesilwa eFrance. Umkhuhlane lo waqeda abantu. Ngokwesibonelo, ngemva kwezinyanga ezilutshwana nje, wabulala amasotsha e-America amanengi ayeseFrance ukwedlula ayebulewe yisitha. Kanti njalo umkhuhlane lo wamemetheka wagcwala umhlaba wonke ngesikhatshana nje ngoba amasotsha awuthwala esebuyela emazweni akibo impi iphela.

Kanti njalo iminyaka eyalandelayo yayigcwele indlala kanye lokuwa kwezomnotho. Ngo-1918 impi iphela, indlala yayihlasele amazwe amanengi kakhulu kwele-Europe. Ngo-1923 imali yeGerman yayingasathengi lutho ngitsho. Eminyakeni eyisithupha eyalandelayo umnotho womhlaba wonke wadilika. Kusenjalo nje ngo-1939 kwaqubuka impi yomhlaba wonke yesibili, esingathi kwakuyikuqhubekela phambili kwempi yomhlaba yokuqala. Kambe ngubani owayebangela inyakanyaka yonke le ebuhlungu kangaka?

ISIBONISO SEZINSUKU ZOKUCINA

Isiphrofetho seBhayibhili siyasinceda ukuthi sibone ukuthi kuyini obekubangela izehlakalo lezi ebezisenzakala embalini, ikakhulu nxa sikhangele iMpi Yomhlaba Wonke Yokuqala. UJesu wakhuluma ngokuthi “isizwe sizahlasela isizwe” lokuthi kwakuzakuba lokuswelakala kokudla kanye lemikhuhlane emhlabeni wonke. (UMathewu 24:3, 7; ULukha 21:10, 11) Watshela abafundi bakhe wathi izehlakalo lezi zazizakuba yisiboniso sokuqala kwezinsuku zokucina. Okunengi mayelana lalokhu sikuthola ebhukwini leSambulo, elichaza ukuthi izinhlupho ezisemhlabeni zihambelana lempi yasezulwini.—Khangela ibhokisi elithi “IMpi Emhlabeni Kanye leMpi Ezulwini.”

Ibhuku leSambulo lisitshela langabagadi bamabhiza abane ababizwa langokuthi ngabagadi bamabhiza be-Apocalypse, okutsho ukwambulelwa. Abagadi bamabhiza laba abathathu bamela izinhlupho ezazikhulunywe nguJesu esiphrofethweni sezinsuku zokucina, ezigoqela izimpi, indlala kanye lemikhuhlane. (Khangela ibhokisi elithi “Abagadi Bamabhiza Abane Sebeqalisile Yini?”) Kuyacaca ukuthi impi yomhlaba wonke yokuqala yalumathisa izinhlupho ezilokhu ziqhubekela phambili. Kanti njalo iBhayibhili liveza ukuthi uSathane nguye owaqalisa konke lokhu. (1 UJohane 5:19) Kodwa uzajeziswa yini?

Ibhuku leSambulo lisiqinisekisa langokuthi uSathane usesalelwe ‘yisikhathi esifitshane.’ (ISambulo 12:12) Yikho elolaka njalo ebangela izinhlupho ezinengi kangaka emhlabeni. Kanti njalo izinhlupho esizibonayo zitshengisa ukuthi uSathane usesalelwe yisikhathi esifitshane.a

UKUCHITHA IMISEBENZI KADEVELI

Impi Yomhlaba Wonke Yokuqala yawuntshintsha sibili umhlaba. Yabangela ukuthi abantu abanengi bangenele ezimpini, imibuso igenqulwe njalo intshintshwe lokuthi ababusi bangathenjwa. Yatshengisa lobufakazi bokuthi uSathane usexotshiwe sibili ezulwini. (ISambulo 12:9) Umbusi womhlaba lo ongabonakaliyo wenza njengombusi onguntandokayiphikiswa okwaziyo ukuthi sesalelwe yizinsuku ezilutshwana. Ngesikhathi izinsuku lezi ziphela, isikhathi sezinhlupho esabangelwa yiMpi Yomhlaba Wonke Yokuqala siyabe sesifike komlindi uyacina.

Yikho-ke ubufakazi beziphrofetho eziseBhayibhilini benza sibe lethemba lokuthi masinya nje iNkosi yethu esezulwini, uJesu Khristu, ‘izayichitha imisebenzi kaSathane.’ (1 UJohane 3:8) Izigidi zabantu bezilokhu zithandazela ukuthi uMbuso kaNkulunkulu uze. Wena uyakwenza yini lokhu? Siyawubonga kakhulu uMbuso lo ngoba sekuseduze ukuthi wenze abantu babone intando kaNkulunkulu isenziwa emhlabeni, hatshi ekaSathane. (UMathewu 6:9, 10) EMbusweni kaNkulunkulu ngeke kuphinde kube lempi yomhlaba wonke kumbe ezinye nje izimpi. (IHubo 46:9) Funda okunengi ngoMbuso lo ukuze ube lethuba lokuzibonela ngawakho ukuthula sekugcwele emhlabeni wonke.—U-Isaya 9:6, 7.

IMpi Emhlabeni Kanye leMpi Ezulwini

USathane wathembisa uJesu “yonke imibuso yomhlaba” kusasele amakhulu eminyaka angaba ngu-19 ukuthi iMpi Yomhlaba Wonke Yokuqala iqalise. (UMathewu 4:8, 9) UJesu wasinqoba isilingo lesi, futhi ngemva kwesikhathi wachaza uDeveli ngokuthi “inkosi yalo umhlaba.” (UJohane 14:30) Kanti njalo, umphostoli uJohane wabhala ukuthi “umhlaba wonke ungaphansi kwamandla omubi.”—1 UJohane 5:19.

Nxa kuyikuthi uSathane ulamandla amakhulu kangaka emhlabeni siyabe siphambanisa yini uma singathi waba lesandla empini yomhlaba wonke yokuqala kanye lempumela yayo ebuhlungu? Yikho ibhuku leSambulo lichaza ukuthi izehlakalo ebezihlupha abantu emhlabeni kusukela ngo-1914 bezibangelwa nguSathane. Nanka amanye amavesi akhuluma ngezehlakalo ezichazwa kuSambulo isahluko-12:

Ivesi 7 Kuba lempi ezulwini, uMikhayeli (uJesu Khristu) esilwa lomgobho (uSathane).
Ivesi 9 UDeveli “odukisa umhlaba wonke” uphoselwa emhlabeni.
Ivesi 12 “Maye kuwo umhlaba lolwandle ngoba omubi useze phansi kini! Ugcwele intukuthelo, ngoba uyakwazi ukuthi isikhathi sakhe sifitshane.”

Ukulandelana kwezenzakalo eziseBhayibhilini kanye lezehlakalo zomhlaba kutshengisa ukuthi impi yasezulwini, yaqalisa uMbuso kaNkulunkulu usubekiwe ezulwini ngo-1914.? Yikho-ke ngomnyaka lo oqakathekileyo kwaba lempi emhlabeni kanye lempi ezulwini.

a Khangela isahluko-8 ebhukwini elithi IBhayibhili Lifundisani Sibili? elidindwa ngoFakazi bakaJehova.

Abagadi Bamabhiza Abane Sebeqalisile Yini?

Ibhiza elimhlophe ligadwe yinkosi yasezulwini. UJesu Khristu, iNkosi ehamba endleleni yokulunga. (IHubo 45:4) Umsebenzi wayo wokuqala ngowokususa uSathane lamadimoni akhe.—ISambulo 6:2; 12:9.

Ibhiza elibomvu okomlilo lilomgadi olamandla “okususa ukuthula emhlabeni.” (ISambulo 6:4) Kusukela ngo-1914, izimpi bezilokhu zihlupha abantu. Ngemva kweminyaka engu-21 iMpi Yomhlaba Wonke Yokuqala iphelile, kwaqalisa impi yomhlaba wonke yesibili eyabulala abantu abanengi kakhulu. Abanye bacabangela ukuthi iMpi Yomhlaba Wonke Yesibili yabulala abantu abayizigidi ezingu-60. Kusukela ngo-1945, bekusiba lezimpi ezindaweni ezinengi njalo kuyizimpi ezilesihluku esifananayo. Abanye abezembali bacabangela ukuthi ngekhulu lesi-20 izimpi zabulala abantu abedlula izigidi ezingu-100.

Ibhiza elimnyama lilomgadi ophethe isikali sokulinganisa esimela indlala. (ISambulo 6:5, 6) Ngesikhathi sempi yomhlaba wonke yokuqala, amazwe ayelwisana leGermany avimbela ukungeniswa kwempahla elizweni lelo kwasekubangela ukuthi abantu abangaba ngu-750 000 bafe ngenxa yendlala. Ngo-1921 abantu baseRussia abedlula izigidi ezimbili bafa ngenxa yendlala njalo lokhu kwaqalisa ukwenzakala lakwezinye izindawo. Nxa sibala konke lokhu kucatshangelwa ukuthi ngekhulu lesi-20 kwafa abantu abangaba ngamamiliyoni angu-70 ngenxa yendlala. Minyaka yonke abantwana abedlula izigidi ezintathu abaphansi kweminyaka emihlanu bayafa ngenxa yokuswela ukudla okwakha umzimba.

Ibhiza eliliganu lilomgadi oletha imikhuhlane ebulala abantu. (ISambulo 6:8) Umkhuhlane wokuqala owawusesabeka ngekhulu lesi-20 yi-Spanish flu. Lanxa amanani aqanjwayo etshiyana kucatshangelwa ukuthi umkhuhlane lo wabulala abantu abangaba yizigidi ezingu-50. Ibhuku elithi Man and Microbes lithi, “Umkhuhlane lo waba ngesinye sezigemegeme ezinkulu ukwedlula zonke ezake zabakhona embalini. Kanti njalo le-bubonic plague [umkhuhlane wezimbilaphi] awuzange ubulale abantu abanengi kangako ngesikhathi esincane njengalesi.” I-Smallpox, uqhuqho kanye lofuba ngeminye imikhuhlane eyingozi eyabulala amakhulu ayizigidi ngekhulu lesi-20.