Ukumelela eJerusalema

ABANTU laba abalapha ngabalandeli bakaJesu. Bahlale eJerusalema njengoba uJesu ayebatshelile. Besalindile bendawonye, kuzwakala umsindo ogcwala indlu yonke. Kuzwakala angani ngumoya olamandla ovunguzayo. Kuvela amalangabi omlilo emakhanda abalandeli bakaJesu. Uyawubona yini umlilo osemakhanda abo? Kutshoni lokhu?

Yisimanga! UJesu usebuyele ezulwini waya kuBaba wakhe njalo usethululela umoya ongcwele kaNkulunkulu kubalandeli bakhe. Uyakwazi ukuthi umoya lo ubenza ukuthi benzeni? Bonke baqalisa ukukhuluma ngezindimi ezitshiyeneyo.

Abantu abanengi eJerusalema bayawuzwa umsindo lo ozwakala angani ngumoya olamandla besebebuya bezobona ukuthi kwenzakalani. Abanye abantu bavela kwamanye amazwe njalo balande umkhosi wama-Israyeli wePhentekhosti. Abantu laba abavakatshileyo bayamangala kakhulu! Bazwa abafundi bekhuluma izindaba ezinhle ngezindimi zabo. Izindaba lezi ziphathelane lalokhu uNkulunkulu akwenzileyo.

Abantu abavakatshileyo bathi: ‘Abantu laba bonke bavela eGalile. Kungani manje besenelisa ukukhuluma ngezindimi lezi ezitshiyeneyo zamazwe esivela kuwo?’

UPhethro uyasukuma ukuze abachasisele. Uphakamisa ilizwi lakhe abesebatshela ukuthi uJesu wabulawa njani lokuthi uJehova wamvusa ekufeni. UPhethro uthi: ‘Khathesi uJesu usesezulwini ngakwesokunene sikaNkulunkulu, njalo usethulule umoya ongcwele ayewuthembisile. Yikho libone lezizimangaliso njalo lazizwa.’

Lapho uPhethro ekhuluma ngezinto lezi, abanengi bezwa ubuhlungu ngalokho okwenziwa kuJesu. Ngakho bayabuza: ‘Kumele senzeni?’ UPhethro uyabatshela: ‘Kumele lintshintshe impilo zenu, beselibhaphathizwa.’ Ngakho ngalelolanga kubhaphathizwa abantu abangu-3 000 njalo baba ngabalandeli bakaJesu.