UPhawuli useRoma

KHANGELA amaketane asezandleni zikaPhawuli, kanye lesotsha elingumRoma elimlindileyo. UPhawuli ubotshiwe eRoma. Umelele ukuthi uKhesari waseRoma acabange ukuthi uzamenzani. Lapho ebotshiwe, abantu bayavunyelwa ukumvakatshela.

Sekungamalanga amathathu uPhawuli eseRoma. Khathesi ucela ukubizelwa abakhokheli bamaJuda ukuthi babuye bazombona. Ngakho amaJuda amanengi aseRoma ayabuya. UPhawuli uyabatshumayeza ngoJesu langombuso kaNkulunkulu. Abanye bayakholwa babe ngamaKhristu, kodwa abanye kabakholwa.

UPhawuli utshumayeza lamasotsha atshiyeneyo amlindayo. UPhawuli ubotshwa lapha okweminyaka emibili njalo uzama ukutshumayeza wonke umuntu angamtshumayeza. Ngenxa yalokho, imuli kaKhesari layo iyazizwa izindaba ezinhle zoMbuso, njalo abanye bakhona baba ngamaKhristu.

Kodwa omvakatsheleyo ohlezi etafuleni ebhala ngubani? Ungazama ukumqamba ukuthi ngubani? Ye, nguThimothi. UThimothi laye kade ebotshelwe ukutshumayela ngoMbuso kodwa khathesi sekhululiwe. Uze lapha ukuzoncedisa uPhawuli. Uyakwazi yini ukuthi uThimothi ubhalani? Ake sibone.

Usakhumbula yini ukuthi endabeni u-110 sixoxe ngedolobho laseFiliphi lelase-Efesu? UPhawuli wancedisa ukubumba amabandla esiKhristu emadolobheni la. Khathesi uPhawuli ubhalela amaKhristu la izincwadi esejele. Izincwadi lezi ziseBhayibhilini, njalo zibizwa kuthiwa kwabase-Efesu enye ithiwa kwabaseFiliphi. Khathesi uPhawuli utshela uThimothi okokubhalela abangane babo abangamaKhristu abaseFiliphi.

AbaseFiliphi benzele uPhawuli umusa omkhulu. Bathumezele uPhawuli isipho esejele ngakho uyababonga ngaso. Obuye lesipho lesi ngu-Ephafrodithu. Kodwa wasuka wagula kakhulu waze waphosa wafa. Khathesi usengcono njalo selungele ukubuyela ekhaya. Ngakho uzahamba lencwadi evela kuPhawuli loThimothi nxa esebuyela eFiliphi.

UPhawuli ubhala ezinye izincwadi ezimbili esilazo eBhayibhilini esejele. Eyinye yakhona iya kumaKhristu asedolobheni laseKholose. Uyakwazi ukuthi ibizwa ngokuthini? Ithiwa kwabaseKholose. Enye incwadi uyibhalele umngane wakhe amthandayo okuthiwa nguFilimoni ohlala eKholose. Incwadi yakhona imayelana lenceku kaFilimoni okuthiwa ngu-Onesimu.

U-Onesimu wabalekela uFilimoni wabuya eRoma. Kufanele ukuthi u-Onesimu wezwa ukuthi uPhawuli wayesejele khonapha eRoma. Ngakho wavakatshela uPhawuli, uPhawuli wasemtshumayeza. Masinyane u-Onesimu waba ngumKhristu. Khathesi u-Onesimu usezisola ukuthi wabaleka. Uyakwazi yini ukuthi uPhawuli ubhalani encwadini eya kuFilimoni?

UPhawuli ucela uFilimoni ukuthi axolele u-Onesimu. UPhawuli uyabhala: ‘Ngiyamletha futhi kuwe. Khathesi kaseyinceku yakho kuphela kodwa usengumzalwane ongumKhristu.’ U-Onesimu ubuyela eKholose elencwadi ezimbili. Eyinye iya kwabaseKholose eyinye iya kuFilimoni. Kufanele ukuthi uFilimoni uthaba kakhulu ukwazi ukuthi inceku yakhe u-Onesimu isingumKhristu.

UPhawuli ubhalela abaseFiliphi loFilimoni ebatshela izindaba ezinhle kakhulu. UPhawuli utshela abaseFiliphi ukuthi: ‘Ngithuma uThimothi kini. Kodwa ngizalivakatshela masinyane nje.’ Ubhalela uFilimoni esithi: ‘Ngilungisela indawo yokuhlala.’

UPhawuli esekhululiwe ejele, uvakatshela abazalwane labodadewabo abangamaKhristu endaweni ezinengi. Kodwa kungakayingaphi, uPhawuli uyabotshwa futhi eRoma. Khathesi uyakwazi ukuthi uzabulawa. Ngakho ubhalela uThimothi abesemcela ukuthi abuye ngokuphangisa. UPhawuli uyabhala, ‘Ngithembekile kuNkulunkulu njalo uNkulunkulu uzanginika umvuzo.’ Ngemva kweminyaka emilutshwane uPhawuli ebulewe, iJerusalema liyabhidlizwa futhi. Kodwa khathesi libhidlizwa ngamaRoma.

Kodwa kulokunye eBhayibhilini. UJehova uNkulunkulu utshela uJohane ukuthi abhale amabhuku eBhayibhili awokucina kanye lebhuku likaSambulo. USambulo ukhuluma ngokuzakwenzakala esikhathini esizayo. Ake sifunde ngokuzakwenzakala esikhathini esizayo.