Okwenza Balahlekelwa Likhaya Labo

KHANGELA ukuthi kuyini osekusenzakala khathesi. U-Adamu lo-Eva sebexotshwa esivandeni esihle sase-Edeni. Uyakwazi ukuthi kungani bexotshwa?

Kungenxa yokuthi benze into embi kakhulu. Yikho-ke, uJehova usebajezisa. Uyakwazi ukuthi kuyini okubi u-Adamu lo-Eva abakwenzileyo?

Benze into uNkulunkulu ayebatshele ukuthi bangayiyenzi. UNkulunkulu wayebatshele ukuthi babengazidlela izithelo zezihlahla ezazisesivandeni. Kodwa uNkulunkulu wabatshela ukuthi bangadli esinye isihlahla ngoba babezakufa bangasidla. Wayegcine isihlahla lesi ngoba sasingesakhe. Siyakwazi ukuthi kubi ukuthatha into yomunye umuntu. Kodwa kwenzakalani?

Ngelinye ilanga u-Eva eyedwa esivandeni, inyoka yakhuluma laye. Akumangalisi yini lokhu? Yatshela u-Eva ukuthi adle isithelo sesihlahla uNkulunkulu ayethe bangasidli. Kodwa uJehova edala inyoka wazidala ngendlela yokuthi zazingakhulumi. Yikho-ke, lokhu kutsho ukuthi kulomuntu owayesenza ukuthi inyoka le ikhulume. Kwakungubani lowomuntu?

Kwakungayisuye u-Adamu. Kutsho ukuthi kwakumele kube ngesinye sezidalwa uJehova ayezidalile engakadali umhlaba. Izidalwa lezi yizingilosi njalo kasenelisi ukuzibona. Ingilosi le yayisizikhukhumeza kakhulu. Yaqalisa ukucabanga ukuthi yayingaba ngumbusi njengoNkulunkulu. Yayifuna lokuthi abantu balalele yona kulokuthi balalele uJehova. Ingilosi le yiyo eyenza ukuthi inyoka ikhulume.

Ingilosi le yenelisa ukuqila u-Eva. Lapho itshela u-Eva ukuthi wayezakuba njengoNkulunkulu nxa engadla isithelo, u-Eva wayikholwa. Yikho-ke wadla lo-Adamu wadla. U-Adamu lo-Eva kabalalelanga uNkulunkulu yikho baxotshwa ekhaya labo elihle eliyisivande.

Kodwa ngelinye ilanga uNkulunkulu uzakwenza ukuthi umhlaba wonke ube muhle njengesivande sase-Edeni. Ngokuhamba kwesikhathi sizafunda ngongakwenza lawe ukuze umhlaba ubenjalo. Kodwa okwakhathesi ake sibone ukuthi kuyini okwenzakalayo ku-Adamu lo-Eva.