Idonki Iyakhuluma

WAKE wezwa idonki ikhuluma yini? Ungahle uthi: ‘Hatshi, izinyamazana azikhulumi.’ Kodwa iBhayibhili lisitshela ngedonki eyakhulumayo. Ake sibone ukuthi lokho kwenzakala njani.

Ama-Israyeli aselungele ukungena elizweni laseKhenani. UBhalaki, inkosi yamaMowabi uyawesaba ama-Israyeli. Ngakho ubiza indoda ehlakaniphileyo okuthiwa nguBhalamu ukuthi izoqalekisa ama-Israyeli. UBhalaki uthembisa ukuthi uzanika uBhalamu imali enengi, ngakho uBhalamu uthatha idonki yakhe abesesiya bona uBhalaki.

UJehova kafuni ukuthi uBhalamu aqalekise abantu bakhe. Ngakho uthuma ingilosi elenkemba ende ukuthi iyekuma endleleni ukuze ivimbe uBhalamu. UBhalamu kayiboni ingilosi kodwa idonki yakhe iyayibona. Ngakho idonki izama ukubalekela ingilosi, ekucineni ilala phansi endleleni. UBhalamu usezondile njalo utshaya idonki yakhe ngomqwayi.

UJehova wenza ukuthi uBhalamu azwe idonki yakhe ikhuluma laye. Idonki iyabuza, ‘Kanti ngenzeni kuwe uze ungitshaye?’

UBhalamu uthi, ‘Ungenze isithutha, ngabe bengilenkemba bengizakubulala!’

Idonki ithi, ‘Ngijayele ukukwenza njalo yini?’

UBhalamu uphendula esithi, ‘Hatshi’

Ngakho uJehova wenza ukuthi uBhalamu ayibone ingilosi elenkemba imile emgwaqweni. Ingilosi ithi: ‘Uyitshayeleni idonki yakho? Ngibuye ukuzokuvimbela, ngoba bekungamelanga ukuthi uhambe uyeqalekisa ama-Israyeli. Ngabe idonki yakho kayiphambukanga, ngabe sengikubulele kodwa bengingasoze ngiyilimaze idonki yakho.’

UBhalamu uthi: ‘Ngonile, bengingazi ukuthi ume endleleni.’ Ingilosi iyamekela uBhalamu ahambe, njalo uBhalamu uyaqhubeka esiyabona uBhalaki. Ulokhu ezama ukuqalekisa u-Israyeli kodwa uJehova umenza ukuthi abusise ama-Israyeli izikhathi ezintathu.