UJezebeli​—⁠Indlovukazi Embi

UJEROBHOWAMI esefile, wonke amakhosi abusa umbuso wasenyakatho owezizwana ezilitshumi zako-Israyeli aba ngangalunganga. Inkosi u-Ahabi, yiyo embi ukudlula wonke amakhosi. Uyakwazi ukuthi kungani? Isizatho esikhulu ngumfazi wakhe omubi oyiNdlovukazi okuthiwa nguJezebeli.

UJezebeli kasuye umIsrayeli. Uyindodakazi yenkosi yaseSidoni. Ukhonza unkulunkulu wamanga uBhali, njalo wenza ukuthi u-Ahabi lama-Israyeli amanengi bakhonze uBhali. UJezebeli uyamzonda uJehova njalo ubulala abaphrofethi bakhe abanengi. Abanye kumele bacatshe ezimbalwini ukuze bangabulawa. Nxa uJezebeli efuna ulutho, angabulala umuntu ukuze aluthole.

Ngelinye ilanga inkosi u-Ahabi idane kakhulu. Yikho-ke, uJezebeli uyambuza: ‘Udaneleni lamuhla?’

U-Ahabi uyaphendula: ‘Kungenxa yalokho uNabothi angitshele khona. Bengifuna ukuthenga isivini sakhe kodwa ungitshele ukuthi ngeke anginike sona.’

UJezebeli uthi: ‘Ungakhathazeki, ngizakuzuzela sona.’

Yikho-ke, uJezebeli ubhalela ezinye izinduna ezisedolobheni okuhlala khona uNabothi. Ubatshela ukuthi: ‘Dingani amadoda ayizigangi ukuthi athi uNabothi uthuke uNkulunkulu lenkosi. Beselithatha uNabothi limkhuphele phandle kwedolobho limkhande ngamatshe aze afe.’

Lapho uJezebeli esizwa ukuthi uNabothi usefile, uthi ku-Ahabi: ‘Hamba uyethatha isivini sakhe.’ Uyakubona yini ukuthi uJezebeli kumele ajeziswe ngenxa yokwenza into embi kangaka?

Ngokuhamba kwesikhathi, uJehova uthuma uJehu ukuthi amjezise. Lapho uJezebeli esizwa kuthiwa uJehu uyeza, upenda amehlo akhe njalo azilungise kuhle ukuze abukeke. Kodwa nxa uJehu efika ebona uJezebeli esewindini, umemeza amadoda asendlini athi: ‘Mphoseleni phansi!’ Amadoda la ayalalela, njengoba ubona emfanekisweni. Bayamphosela phansi afe. Lesi yisiphetho seNdlovukazi embi uJezebeli.