UJona Lenhlanzi Enkulu

KHANGELA indoda le esemanzini. Isengozini enkulu. Inhlanzi leyo isifuna ukumginya! Uyakwazi yini ukuthi indoda le ingubani? Ibizo layo nguJona. Ake sibone ukuthi ungene njani engozini engaka.

UJona ungumphrofethi kaJehova. Kungakabi yisikhathi eside umphrofethi u-Elisha efile, uJehova utshela uJona: ‘Hamba uye edolobheni elikhulu laseNineve. Ububi babantu bakhona sebubukhulu kakhulu, ngakho ngifuna ukuthi uyebatshela ngobubi babo.’

Kodwa uJona kafuni ukuhamba. Ngakho ugada umkhumbi ongayi eNineve. UJehova kakuthandi ukubaleka kukaJona. Ngakho wenza ukuthi kube lesiphepho esikhulu. Ngenxa yokuthi isiphepho lesi sikhulu kakhulu, umkhumbi ususengozini yokucwila. Abasemkhunjini sebesesaba kakhulu, ngakho baqalisa ukumemeza becela ukuthi onkulunkulu babo babancede.

Ekucineni uJona uyabatshela: ‘Ngikhonza uJehova, uNkulunkulu owadala izulu lomhlaba. Ngibalekela ukwenza lokho uJehova angitshele ukuthi ngikwenze.’ Ngakho abasemkhunjini bayabuza: ‘Kumele senzeni kuwe ukuze isiphepho siphele?’

UJona uthi: ‘Ngiphoselani olwandle, ulwandle luzathula.’ Abasemkhunjini kabafuni ukwenza njalo, kodwa lapho isiphepho silokhu siqina bacina bemphosela olwandle. Isiphepho siyama beqeda nje ukwenzanjalo futhi ulwandle luyathula.

UJona ucwila emanzini, inhlanzi enkulu ibisimginya. Kodwa akafi. Uhlala esiswini senhlanzi le amalanga amathathu lobusuku obuthathu. UJona uyazisola ngokuthi kalalelanga uJehova lapho esithi kaye eNineve. Ngakho uyakwazi yini ukuthi wenzani?

UJona ukhuleka kuJehova ecela ukuthi amncede. UJehova wenza ukuthi inhlanzi ikhafulele uJona emhlabathini owomileyo. Ngemva kwalokho, uJona uya eNineve. Lokhu kusifundisa ukuthi kuqakathekile ukuthi senze konke uJehova athi sikwenze.