Abantu bakaNkulunkulu Basuka eBhabhiloni

SEKUDLULE phose iminyaka emibili iBhabhiloni ithunjwe ngamaMede lamaPhesiya. Khangela ukuthi kwenzakalani khathesi! Ama-Israyeli asesuka eBhabhiloni. Kwenzeka njani ukuthi bakhululwe? Ngubani obakhululileyo?

NguKhurosi inkosi yasePhesiya. Kudala uKhurosi engakazalwa, uJehova wenza ukuthi umphrofethi wakhe u-Isaya abhale ngoKhurosi amazwi alandelayo: ‘Uzakwenza konke engikufunayo. Amagedi azatshiywa evuliwe ukuze uthumbe idolobho.’ UKhurosi wenza njalo wakhokhela ekuthumbeni iBhabhiloni. AmaMede lamaPhesiya abuya edolobheni ebusuku, angena ngamagedi ayetshiywe evuliwe.

Kodwa umphrofethi kaJehova, u-Isaya wathi uKhurosi wayezanika umlayo wokuthi iJerusalema lethempeli lalo kwakhiwe kutsha. UKhurosi wawunika yini umlayo lo? Ye, wenza njalo. Nanku uKhurosi akutshela ama-Israyeli: ‘Hambani eJerusalema liyekwakha ithempeli likaJehova uNkulunkulu wenu.’ Yikho kanye ama-Israyeli la asendleleni ayakwenza.

Kodwa kakusiwo wonke ama-Israyeli angahamba umango omude wokubuyela eJerusalema. Ngumango omude kakhulu ongaba ngamakhilomitha angu-800 njalo abanengi sebeguge kakhulu, abanye bayagula kakhulu ukuthi bahambe umango ongaka. Zikhona ezinye izizatho ezenza abanye abantu bangahambi. Kodwa uKhurosi utshela laba abangahambiyo ukuthi: ‘Nikani abantu ababuyela ukuyakwakha iJerusalema lethempeli lalo isiliva legolide lezinye izipho.’

Yikho-ke, ama-Israyeli amanengi abuyela eJerusalema aphiwa izipho ezinengi. UKhurosi ubanika lemiganu lamankomitsho athathwa yiNkosi uNebhukadinezari ethempelini likaJehova lapho kubhujiswa iJerusalema. Abantu balezinto ezinengi okumele bazithwale sebehamba.

Ama-Israyeli afika eJerusalema ngesikhathi esifaneleyo ngemva kwenyanga ezine. Sekuyiminyaka engu-70 kusukela idolobho leli labhidlizwa njalo indawo yakhona yasala ingela muntu. Kodwa lanxa ama-Israyeli esephendukile elizweni lawo, azakuba lezikhathi ezinzima, njengoba sizafunda.