Ingilosi Ivakatshela uMariya

UMFAZI lo omuhle nguMariya. NgumIsrayeli ohlala edolobheni laseNazaretha. UNkulunkulu uyakwazi ukuthi ungumuntu olungileyo. Yikho ingilosi yakhe uGabhariyeli iyathunywa ukuthi ikhulume laye. Uyakwazi ukuthi uGabhariyeli ulande ukuzotshelani uMariya? Ake sibone.

UGabhariyeli uthi kuye: ‘Sabona, wena othandiweyo. UJehova ulawe.’ UMariya kazake ambone umuntu lo. Ukhathazekile ngoba kakuzwisisi akutshoyo. Kodwa ngokuphangisa uGabhariyeli umnika isibindi.

Uthi kuye: ‘Ungesabi Mariya. Uthandiwe nguJehova. Yikho ezakwenzela into enhle kakhulu. Usuzakuba lomntwana. Kumele umuthi nguJesu.’

UGabhariyeli uyaqhubeka echasisa: ‘Umntwana lo uzaba ngumuntu omkhulu njalo uzabizwa kuthiwe uyiNdodana kaNkulunkulu Ophezukonke. UJehova uzamenza ukuthi abe yinkosi njengoDavida. Kodwa uJesu uzakuba yinkosi kuze kube nini lanini njalo umbuso wakhe kawusoze uphele!’

UMariya uyabuza: ‘Lokhu kungenzakala njani? Kangitshadanga. Njalo kangikaze ngihlale lendoda, yikho-ke ngingaba njani lomntwana?’

UGabhariyeli uyaphendula: ‘Amandla kaNkulunkulu azakuba phezu kwakho. Yikho-ke umntwana uzabizwa kuthiwe yiNdodana kaNkulunkulu.’ Uphinda athi kuMariya: ‘Uyasikhumbula isihlobo sakho u-Elizabethi. Abantu bathi wayeguge kakhulu ukuthi abe labantwana. Kodwa khathesi uzakuba lomntwana ongumfana. Yikho-ke, uyabona ukuthi akula lutho uNkulunkulu angenelisi ukulwenza.’

Ngokuphangisa uMariya uthi: ‘Ngiyincekukazi kaJehova! Kakwenzeke kimi njengoba utshilo.’ Ingilosi iyasuka.

UMariya usuka ngokuphangisa avakatshele u-Elizabethi. Lapho u-Elizabethi esizwa ilizwi likaMariya, umntwana osesiswini sika-Elizabethi uyeqa ngenxa yokuthaba. U-Elizabethi ugcwala umoya kaNkulunkulu abesesithi kuMariya: ‘Ubusisiwe wena phakathi kwabesifazana.’ UMariya uhlala lo-Elizabethi phose izinyanga ezintathu abesebuyela ngakibo eNazaretha.

UMariya usezatshada lendoda okuthiwa nguJosefa. Kodwa lapho uJosefa esizwa ukuthi uMariya usezakuba lomntwana, ukhetha ukuthi angasatshadi laye. Ingilosi kaNkulunkulu ithi kuye: ‘Ungesabi ukuthatha uMariya ukuthi abe ngumkakho. Ngoba nguNkulunkulu omnike indodana.’ Yikho-ke, uMariya loJosefa bayatshada, besebemelela ukuthi uJesu azalwe.