Amandla Okudala—“UMenzi Wezulu Lomhlaba”

 1, 2. Ilanga litshengisa njani ukuthi uJehova ulamandla?

SEWAKE wotha umlilo kuqanda kakhulu yini? Nxa usotha umlilo awusondeli kakhulu emlilweni ukuze ungatshi kodwa futhi awuhlaleli khatshana ngoba ungacina ugodola.

² Ilanga singalifanisa lomlilo osikhudumezayo. Liqhelelane lomhlaba ngamakhilomitha angaba yi-150 miliyoni!a Lanxa likhatshana kangaka siyakuzwa ukutshisa kwalo. Lokhu kutshengisa ukuthi lilamandla kakhulu! Kodwa ibanga eliphakathi komhlaba lelanga lifanele ngoba aluba ilanga belingaba seduze kakhulu, amanzi asemhlabeni abengatsha. Nxa belingaba khatshana kakhulu, amanzi wonke emhlabeni abengaba ngungqwaqwane. Ngakho kokubili ukuba seduze kwelanga lokuba khatshana kakhulu kwalo kungenza izinto ezisemhlabeni zingaphili. Ilanga yilo elenza izinto ezisemhlabeni ziphile. Lisinika ukukhanya kodwa aliwungcolisi umkhathi. Ukukhanya kwalo kwenza sithokoze.—UmTshumayeli 11:7.

 3. Ilanga lisifundisani?

³ Abantu abanengi abakwazi ukuqakatheka kwelanga. Abakwazi ukuthi liyabanceda ukuthi baqhubeke bephila. Yikho bengazwisisi ukuthi ilanga lisifundisani ngoJehova. IBhayibhili lithi: “Wenza ukukhanya lelanga.” (IHubo 74:16) Ilanga lidumisa uJehova, “uMenzi wezulu lomhlaba.” (IHubo 19:1; 146:6) Lisifundisa ukuthi uJehova ulamandla amakhulu futhi zinengi izinto ezidaliweyo ezisifundisa ngamandla akhe. Ake sihlolisise ezinye zakhona sibone ukuthi zisifundisani ngamandla kaJehova amakhulu.

 4, 5. Ilanga lilamandla angakanani futhi likhulu kangakanani, kodwa lingakanani nxa liqathaniswa lezinye inkanyezi?

⁴ Ilanga liyinkanyezi. Likhanya lilikhulu ukwedlula ezinye inkanyezi ngenxa yokuthi lona liseduze. Lilamandla angakanani? Enzikini yalo kutshisa okungaba yi-15 000 000°C. Litshisa kakhulu okokuthi nxa ungahlephula ingxenyana yelanga elingana lekhanda lephini, ubusuyifaka lapha emhlabeni, kuyabe kumele ume khatshana layo okwebanga elingaba ngamakhilomitha angu-140 ukuze ungatshi! Umzuzwana ngamunye ilanga likhipha amandla alingana lokudubuka kwamabhomba e-nuclear angamakhulu amamiliyoni.

⁵ Ilanga likhulu okokuthi kungangena kulo amaplanethi angangomhlaba angu-1 300 000. Kodwa ilanga likhulu ukwedlula zonke inkanyezi yini? Hatshi, abahlola izinkanyezi bathi lincane kakhulu. Umphostoli uPhawuli wabhala wathi: “Inkazimulo yenkanyezi ngayinye itshiyene lenkazimulo yezinye.” (1 KwabaseKhorinte 15:41) Umoya ongcwele yiwo kuphela owawungenza uPhawuli abekwazi lokho. Kulenkanyezi enkulu okokuthi nxa ingabekwa lapho ilanga elikhona, umhlaba wethu uyabe uphakathi kwayo. Besekusiba lenye futhi enkulu okokuthi nxa ingabekwa lapho ilanga elikhona, ingasibekela umhlaba wethu ize iyefika kuplanethi okuthiwa yiSaturn. Iplanethi leyo ikhatshana lomhlaba okokuthi kwathatha iminyaka emine ukuthi umtshina wabezesayensi uyefika khona. Umtshina lo wawugijima ngesiqubu sohlamvu lombhobho siphindwe ka-40!

 6. IBhayibhili likuveza njani ukuthi izinkanyezi zinengi?

⁶ Kodwa inani lezinkanyezi limangalisa ukwedlula ubukhulu bazo. IBhayibhili lithi izinkanyezi zinengi kakhulu ‘njengetshebetshebe eselwandle.’ (UJeremiya 33:22) Umutsho lo utshengisa ukuthi izinkanyezi zinengi kakhulu ukwedlula lezo esingazibona sisebenzisa umtshina okuthiwa yi-telescope. Ngakho nxa uJeremiya wayengakhangela esibhakabhakeni ebusuku azame ukubala izinkanyezi ayezibona, wayengabala ezingaba ngu-3 000 kuphela. Lokhu kungenxa yokuthi lelo yilo inani abantu abangenelisa ukulibona ngamehlo. Inani lelo lingalingana lenani letshebetshebe esesandleni. Kodwa iqiniso elikhona yikuthi izinkanyezi zinengi njengetshebetshebe eselwandle.b Kambe ngubani ongabala inani elikhulu kangaka?

 7. Umthala wethu ulezinkanyezi ezingaki futhi mingaki imithala ekhona?

⁷ U-Isaya 40:26 uthi: “Phakamisani amehlo enu likhangele phezulu. Ngubani odale izinto zonke lezi? Ngulowo okhokhela ibutho lazo, abale yinye ngayinye; azibize zonke ngamabizo azo.” IHubo 147:4 lithi: “Ubala izinkanyezi.” Kanti zingaki “izinkanyezi”? Umbuzo lo awulula. Abahlola izinkanyezi bathi kulezinkanyezi ezingaba ngamabhiliyoni alikhulu emthaleni wethu okuthiwa yi-Milky Way.c Kodwa minengi kakhulu imithala yezinkanyezi futhi eminengi yakhona ilezinkanyezi ezinengi ukwedlula ezisemthaleni wethu. Mingaki imithala ekhona? Abanye abahlola izinkanyezi bathi ingaba ngamabhiliyoni angu-50. Ikanti abanye bathi ingaba ngamabhiliyoni angu-125. Ngakho akulamuntu ongatsho sibisibili ukuthi mingaki imithala lokuthi izinkanyezi ezisemithaleni le zingaki. Kodwa uJehova uyakwazi futhi unika inkanyezi ngayinye ibizo.

 8. (a) Ungakanani umthala okuthiwa yi-Milky Way? (b) Imithala lezinkanyezi kuhlelwe njani futhi kungani kunjalo?

⁸ Ubukhulu bemithala labo buyamangalisa. Kucatshangelwa ukuthi umthala okuthiwa yi-Milky Way mkhulu okokuthi ukukhanya kuthatha iminyaka engu-100 000 ukusuka kwelinye icele kusiya kwelinye. Cabanga ngokukhanya okuhamba ngesiqubu samakhilomitha angu-300 000 umzuzwana ngamunye. Ukukhanya lokhu bekuzathatha iminyaka engu-100 000 ukusuka kwelinye icele kusiya kwelinye! Imithala eminengi mikhulu kakhulu ukwedlula umthala wethu. IBhayibhili lithi uJehova welula “amazulu” angathi welula amaseyili etende. (IHubo 104:2) UNkulunkulu nguye owahlela indlela izinkanyezi lemithala okuhamba ngayo. Konke nje okusemkhathini, kusukela kokuncane kakhulu kuze kuyefika emthaleni omkhulu kulayo yonke, kuhamba ngendlela ehlelekileyo ngenxa yokuthi uNkulunkulu nguye owakwenza kwaba njalo. (UJobe 38:31-33) Izazi zesayensi zithi indlela izinto lezi ezihamba ngayo ifanana labantu abagida ngendlela ehlelekileyo. Lokhu kutshengisa ukuthi lowo owadala izinkanyezi lamaplanethi la ulamandla amangalisayo!

 9, 10. UJehova uwufake ngaphi umhlaba futhi lokhu kusifundisani ngaye?

⁹ Indlela umhlaba odalwe ngayo itshengisa ukuthi uJehova ulamandla. Wawufaka endaweni efaneleyo. Abezesayensi abanengi bathi aluba umhlaba wethu wawufakwe eduze komunye nje umthala ongaso-Milky Way, bekungasoze kube lolutho olwenelisa ukuphila kuwo. Kanti futhi ingxenye enkulu yomthala wethu kayidalelwanga ukuthi ibe lezinto eziphilayo. Phakathi laphakathi komthala wethu kugcwele izinkanyezi. Kuyatshisa kakhulu futhi kwandile ukuthi izinkanyezi ziphose zithuzane. Emaphethelweni omthala lo akulazinto ezeneleyo ezingenza kube lempilo. Kodwa ilanga, umhlaba lamaplanethi aseduze kwawo kwafakwa endaweni efaneleyo.

¹⁰ Kuleplanethi enkulu futhi ekhatshana okuthiwa yiJupiter evikela umhlaba. Umhlaba ungena izikhathi ezedlula 1 000 kuJupiter futhi iplanethi le ilamandla okudonsela izinto kuyo. Lokhu kunceda ngani? IJupiter idonsa njalo iphambukise amatshe loba ezinye izinto ezingathuza umhlaba. Abezesayensi bathi ngabe iplanethi le ibingekho, amatshe amakhulu awela emhlabeni abezakuba manengi ngokuphindwe ka-10 000 kulalawo akhithika khathesi. Inyanga layo iyawunceda umhlaba njalo yona iseduze kwawo. Kayisikhanyiseli nje kuphela kodwa igcina umhlaba usendaweni yawo. Lokhu kwenza ukuthi umhlaba ube lezigaba zomnyaka ezingatshintshatshintshiyo, futhi lokhu kuyasinceda kakhulu.

11. Umkhathi usivikela njani?

¹¹ Amandla kaJehova akhanya lasendleleni adale ngayo izinto ezisemhlabeni. Cabanga ngomkhathi osivikelayo. Ilanga likhipha imisebe encedayo kanye lelimazayo. Nxa imisebe eyingozi ifika emkhathini, itshintsha i-oxygen ibe yigasi okuthiwa yi-ozone. Igasi le iba angathi yingubo evimba imisebe eyingozi ukuthi ingafiki emhlabeni.

12. Umjikelezo wamanzi utshengisa njani ukuthi uJehova ulamandla okudala?

¹² Umkhathi wenza sithole umoya esiwudingayo ukuze siphile njalo wenza lokunye okunengi okwenza kuphileke emhlabeni. Okunye futhi okumangalisayo ngomkhathi yikujikeleza kwamanzi. Ilanga lenza ukuthi amanzi aselwandle aphakame aye phezulu. Amanzi la manengi okokuthi angagcwala itanka elingamakhilomitha aphose abe ngu-75 ubude, ububanzi kanye lokutshona. Nxa amanzi angatshiswa lilanga ayaphakama aye emkhathini abe ngamayezi, umoya osemkhathini ubususenza ukuthi amayezi lawo agcwale yonke indawo. Amanzi la ayabe esecengekile futhi esehlanzekile. Yiwo athululeka emhlabeni eselizulu kumbe ungqwaqwane agcwalise ulwandle, imifula kanye lamadamu. UmTshumayeli 1:7 uthi: “Zonke izifula zigelezela elwandle kodwa ulwandle alugcwali. Izifula ziyabuyela endaweni ezigelezela kuyo ukuze ziphinde zigeleze.” NguJehova kuphela ongenza kube lomjikelezo wamanzi onjalo.

13. Izimila lomhlabathi kutshengisa njani ukuthi uJehova ulamandla?

¹³ Izinto eziphilayo zitshengisa ukuthi uMdali wethu ulamandla amangalisayo. Amandla kaJehova siyawabona ezintweni ezinkulu lezincane azidalileyo. Ngokwesibonelo, wadala izihlahla ezinde ezedlula amamitha angu-100 lezimila ezinengi ezincane kakhulu esingazibona nge-microscope kuphela. Umoya omnengi esiwuphefumulayo uvela ezimileni lezi. Umhlabathi lawo ugcwele izinto eziphilayo njengamawemusi lezinye izibungwana esingeke sizibone ngamehlo ethu. Izinto lezi zenza izimila zikhule kuhle yikho iBhayibhili lisithi umhlabathi ulamandla.—UGenesisi 4:12, amabala angaphansi.

14. Lanxa i-athomu incane kakhulu ilamandla angakanani?

¹⁴ Kuyacaca ukuthi uJehova “wenza umhlaba ngamandla akhe.” (UJeremiya 10:12) Amandla kaNkulunkulu ayakhanya ngitsho lasezintweni ezincane azidalileyo. Ngokwesibonelo i-athomu yinto encane kakhulu. Lanxa singabuthelela ama-athomu angu-1 miliyoni ngeke abe qatha kulonwele lomuntu. Kodwa inhliziyo ye-athomu (loba i-nucleus) ilamandla okokuthi isetshenziswe ukwenza amabhomba alamandla kakhulu.

15. Kuyini uJehova akufundisa uJobe esebenzisa inyamazana azidalayo?

¹⁵ Okunye okutshengisa ukuthi uJehova ulamandla amangalisayo zinyamazana ezinengi azidalayo. IHubo 148 liqamba izinto ezinengi ezadalwa nguJehova futhi ezenza simdumise. Ivesi 10 ikhuluma ‘ngezinyamazana zeganga lazo zonke izifuyo.’ Kanti njalo ngesikhathi uJehova ekhuluma loJobe emnceda ukuthi azwisise ukuthi ulamandla amakhulu, wakhuluma ngesilwane, ledube, lenkunzi yeganga, lemvubu kanye loLeviyathani (okungabe kusitsho ingwenya). UJehova wayefuna ukumfundisani uJobe? Wayefuna ukumfundisa ukuthi nxa abantu besesaba inyamazana lezi ezinkulu futhi ezesabekayo, akumelanga yini bamesabe uMdali wazo?—UJobe isahluko 38-41.

16. Kuyini okukumangalisa kakhulu ngezinye inyoni ezidalwe nguJehova?

¹⁶ IHubo 148:10 liphinda likhulume ‘ngezinyoni.’ Kulemihlobo eminengi yenyoni. UJehova watshela uJobe ngentshe, wathi “iyalihleka ibhiza lomgadi walo.” Inyoni le engamamitha angu-2,5 ubude kayiphaphi kodwa iyenelisa ukugijima amakhilomitha angu-65 ngehora. Ifidi layo elilodwa lingamamitha angu-4,5! (UJobe 39:13, 18) Kulenye futhi inyoni okuthiwa yi-albatross. Izikhathi ezinengi iyabe iphapha phezu kolwandle futhi amaphiko ayo nxa evuliwe angaba ngamamitha amathathu. Iyenelisa ukuphapha okwamahora amanengi ingazange itshaye amaphiko. Besekusiba leyinye inyoni okuthiwa yi-hummingbird. Inyoni le incane kulazo zonke futhi ingamasentimitha amahlanu ubude. Ingatshaya amaphiko ayo okwezikhathi ezingu-80 ngomzuzwana nje! Inyoni le inhle njengamatshe aligugu njalo iyenelisa ukuma emoyeni lokuphapha nyovane.

17. Inkulu kangakanani insikabayitshiye okuthiwa yi-blue whale futhi lokhu kwenza siphethe ngokuthini?

¹⁷ IHubo 148:7 lithi ‘lezilo zolwandle’ ziyamdumisa uJehova. Ngokwesibonelo kulomhlobo wensikabayitshiye okuthiwa yi-blue whale. Insikabayitshiye le inkulu ukwedlula zonke inyamazana emhlabeni futhi ihlala enzikini yolwandle. Ingaba ngamamitha angu-30 ubude kumbe yedlule lapho. Isisindo sayo singalingana lesendlovu ezingu-30 ezikhulileyo njalo ulimi lwayo lulesisindo esingangesendlovu eyodwa. Inhliziyo yayo ilingana lemota encane futhi itshaya ka-9 kuphela ngomzuzu. Kodwa inhliziyo yenyoni okuthiwa yi-hummingbird yona itshaya ka-1 200 ngomzuzu owodwa. Umthambo wegazi we-blue whale mkhulu okokuthi usane lungakhasa phakathi kwawo. Ukwazi lokhu kwenza sivumelane lamazwi asebhukwini lamaHubo athi: “Konke okuphilayo akudumise uJah!”—IHubo 150:6.

18, 19. Zinengi kangakanani izinto ezidalwe nguJehova futhi zisifundisani ngaye?

¹⁸ Kulemihlobohlobo yezinto ezidaliweyo esithi singazibona sisale sibambe owangaphansi. Omunye umhubi wathi: ‘Minengi imisebenzi yakho Jehova! Umhlaba ugcwele lokho okwenzileyo.’ (IHubo 104:24) Lokhu kuliqiniso sibili ngoba abezesayensi sebethole imihlobo yezinto eziphilayo eyedlula 1 miliyoni kodwa abanye bathi iyedlula lapho. Ngezinye izikhathi umdwebi angaswela ukuthi adwebeni. Kodwa amandla kaJehova okudala izinto wona awapheli. Manje indalo kaJehova isifundisani ngaye?

¹⁹ Amandla kaJehova okudala asifundisa ukuthi nguye okufanele abuse. Ibala elithi “Mdali” litshengisa ukuthi nguye owadala zonke izinto. Kwala yona iNdodana kaNkulunkulu ezelwe yodwa kayibizwa ngokuthi inguMdali lanxa yasebenza laye ngesikhathi edala izinto. (IZaga 8:30; UMathewu 19:4) Ibizwa ngokuthi “ilizibulo kukho konke okwadalwayo.” (KwabaseKholose 1:15) Ngakho uJehova ulelungelo lokuba nguMbusi wendawo yonke ngoba nguye owadala zonke izinto.—KwabaseRoma 1:20; ISambulo 4:11.

20. Kutshoni ukuthi uJehova waphumula ngemva kokudala umhlaba?

²⁰ UJehova ulokhe ewasebenzisa yini amandla akhe ukudala izinto? IBhayibhili lithi uJehova waqeda umsebenzi wakhe wokudala ngelanga lesithupha, ‘wasephumula ngosuku lwesikhombisa kuwo wonke umsebenzi ayewenza.’ (UGenesisi 2:2) Kwathi sekudlule izinkulungwane zeminyaka uJehova eqede umsebenzi wokudala, umphostoli uPhawuli wabhala amazwi atshengisa ukuthi ‘usuku’ lolu lwalulokhu lusaqhubeka. (KumaHebheru 4:3-6) Kodwa ‘ukuphumula’ lokhu sekusitsho yini ukuthi uJehova kasasebenzi ngitsho lakancane? Hatshi, uJehova uhlala esebenza. (IHubo 92:4; UJohane 5:17) Ngakho ukuphumula okukhulunywa ngakho lapha ngokokuma kwakhe ukudala izinto ezisemhlabeni. Kodwa uqhubeka esebenza ukuze agcwalise inhloso yakhe. Ngokwesibonelo waphefumulela abantu ukuthi balobe iMibhalo Engcwele njalo wenze lokuthi kube ‘lendalo entsha’ esizafunda ngayo eSahlukweni 19.—2 KwabaseKhorinte 5:17.

21. Amandla kaJehova okudala azasinceda njani ngesikhathi esizayo?

²¹ Akuthandabuzwa ukuthi nxa usuku lukaJehova lokuphumula seluphelile, konke ayabe ekwenzile kuyabe “kukuhle kakhulu” njengakho konke ayekwenzile ngamalanga ayisithupha okudala. (UGenesisi 1:31) Asikwazi ukuthi uzawasebenzisa njani amandla akhe okudala esikhathini esizayo. Kodwa sileqiniso lokuthi indlela awasebenzisa ngayo izahlala isimangalisa. Sizaqhubeka sifunda okunengi ngoJehova endalweni yakhe kuze kube nini lanini. (UmTshumayeli 3:11) Nxa singaqhubeka sifunda ngoMdali wethu, sizamhlonipha kakhulu njalo sibe ngabangane bakhe.