ISIFUNDO 29
Kwenzakalani Emuntwini Ofileyo?
Sowake wafelwa ngumuntu omthandayo yini? Mhlawumbe wazibuza ngesikhathi usebuhlungwini ukuthi: ‘Kwenzakalani ebantwini abafileyo? Kambe sizaphinda sibabone yini?’ Ukuhlola okutshiwo liBhayibhili ngendaba le kuzakududuza kakhulu.
1. Kwenzakalani emuntwini ofileyo?
UJesu wafanisa ukufa lokulala nya! Umuntu olele ubuthongo obunjalo kezwa lutho futhi kaboni izinto ezenzakalayo. Ukufa kufanana njani lokulala? Umuntu ofileyo kezwa buhlungu futhi kaboni okwenzakalayo. IBhayibhili lithi: “Abafileyo abazi lutho ngitsho.”—Bala umTshumayeli 9:5.
2. Kusinceda ngani ukwazi iqiniso ngokufa?
Abantu abanengi bayakwesaba ukufa, baze besabe labantu abafileyo. Kodwa ukwazi okutshiwo liBhayibhili ngendaba le kuzakududuza. UJesu wathi: “Iqiniso lizalikhulula.” (UJohane 8:32) Amanye amasonto afundisa ukuthi nxa umuntu angafa, umphefumulo loba umoya wakhe uyaqhubeka uphila kwenye indawo. Kodwa lokhu ayisikho okufundiswa liBhayibhili. Lona lifundisa ukuthi umuntu ofileyo kazi lutho futhi kezwa buhlungu, yikho ngeke asithwalise nzima. Akumelanga sizihluphe ngokukhuluma labafileyo, ukubakhulekela kumbe ukubesaba.
Abanye abantu bathi bayenelisa ukukhuluma labafileyo, kodwa ayisiloqiniso lelo. Khumbula ukuthi iBhayibhili lithi abafileyo “abazi lutho.” Yikho labo abathi bakhuluma labafileyo bayabe bekhuluma lamadimoni. Phela amadimoni ayenelisa ukulingisela abantu abafileyo okokuthi ungacabanga ukuthi ukhuluma labo sibili. Ukwazi iqiniso ngabafileyo kuyasivikela emadimonini. UJehova uthi akumelanga sikhulume labafileyo ngoba uyakwazi ukuthi siyabe sikhuluma lamadimoni lokuthi angasilimaza.—Bala uDutheronomi 18:10-12.
GEBHA UJULE
Engxenyeni le uzafunda okutshiwo liBhayibhili ngokufa futhi uzabona ukuthi uNkulunkulu kabajezisi esihogweni abantu abafileyo ngoba uluthando.
3. Okutshiwo liBhayibhili ngesimo sabafileyo
Abantu balemibono etshiyeneyo ngokuthi kwenzakalani kithi nxa sisifa. Kodwa yiwuphi umbono oqondileyo endabeni le?
Ujayele ukuzwa abantu besithi abafileyo bakusiphi isimo?
Bukelani IVIDIYO ukuze libone ukuthi iBhayibhili lithini ngesimo sabafileyo.
Bala umTshumayeli 3:20 beselixoxa ngemibuzo elandelayo:
Ivesi le ithi kwenzakalani nxa umuntu angafa?
Kukhona yini okuqhubeka kuphila nxa umuntu angafa?
IBhayibhili lisitshela ngokufa komngane kaJesu okwakuthiwa nguLazaro. Bala uJohane 11:11-14 ukuze ubone ukuthi uJesu wathini ngokufa kukaLazaro. Ngemva kwalokho xoxani ngemibuzo le:
UJesu wakufanisa lani ukufa?
Lokhu kusitshelani ngesimo sabafileyo?
Wena uthini ngendlela iBhayibhili elichasisa ngayo isimo sabafileyo?
4. Ukwazi iqiniso ngabafileyo kuyasinceda
Ukuzwisisa iqiniso ngesimo sabafileyo kuyasinceda ukuthi singabesabi. Bala umTshumayeli 9:10 beselixoxa ngombuzo lo:
Abafileyo bangasilimaza yini?
Ukwazi okutshiwo liBhayibhili mayelana labafileyo kuyasivikela ngoba asisoze sizihluphe ngokuzama ukubathokozisa. Bala u-Isaya 8:19 loSambulo 4:11 beselixoxa ngombuzo lo:
Ubona angani uJehova uzwa njani nxa ebona abantu bedinga uncedo kwabafileyo?
Ukwazi iqiniso ngabantu abafileyo kuyasinceda ukuthi sibalekele imikhuba engathokozisi uJehova
5. Ukwazi iqiniso ngabafileyo kuyasiduduza
Abantu abanengi bafundiswa ukuthi nxa bangenza izinto ezimbi bazajeziswa sebefile. Kodwa kuyaduduza ukwazi ukuthi umuntu osefile kasoze ajeziswe ngenxa yezinto ezimbi azenza esaphila. Bala uRoma 6:7 beselixoxa ngombuzo olandelayo:
Njengoba iBhayibhili lisithi ukufa kuyamkhulula umuntu esonweni, ucabanga ukuthi bakhona yini abantu abajeziselwa izono ababezenza besaphila?
Nxa ungaqhubeka ufunda okunengi ngoJehova, uzabona ukuthi kabajezisi abantu abafileyo. Bala uDutheronomi 32:4 lo-1 Johane 4:8 beselixoxa ngemibuzo le:
Amavesi la atshengisa njani ukuthi uNkulunkulu kabajezisi abantu abafileyo?
Iqiniso osulifunde eBhayibhilini mayelana labafileyo liyakududuza yini? Kungani usitsho njalo?
ABANYE BATHI: “Ngiyesaba ukutshiswa esihogweni nxa ngingafa.”
Yiwaphi amavesi aduduzayo ongawabalela umuntu otshonjalo?
ISIFINQO
Akulalutho olusala luphila nxa umuntu angafa. Umuntu ofileyo kazi lutho futhi kezwa buhlungu yikho ngeke asithwalise nzima.
Ufundeni?
Kwenzakalani emuntwini ofileyo?
Kusinceda ngani ukwazi iqiniso ngokufa?
Ukwazi iqiniso ngabafileyo kusiduduza njani?
THOLA OKUNENGI
Bala isihloko lesi ukuze ubone ukuthi ibala elithi umphefumulo litshoni eBhayibhilini.
Bukela ividiyo le ukuze ubone ukuthi uNkulunkulu kajezisi bantu esihogweni.
Kumele sibesabe yini abantu abafileyo?
Imimoya Yabafileyo—Ingakusiza Noma Ikulimaze Yini? Kambe Ikhona Yini? (ibhukwana)
Bala isihloko lesi uzwe ukuthi ukufunda iqiniso ngabantu abafileyo kwayinceda njani enye indoda.
“Ngazithanda Impendulo Ezicacileyo EziseBhayibhilini” (INqabayokulinda, February 1, 2015)