ISIFUNDO 17
Unjani UJesu?
Ukufunda ngalokho uJesu ayekwenza lalokho ayekufundisa kuzakwenza umthande futhi ufunde okunengi ngoYise uJehova. Ake sixoxe ngokuthi uJesu unjani lokuthi ungamlingisela njani empilweni yakho.
1. UJesu ufanana njani loYise?
Kunengi uJesu akufunde kuYise ngoba useleminyaka engamabhiliyoni elaye ezulwini. Yikho ecabanga futhi esenza njengaye. (Bala uJohane 5:19.) UJesu umfuze xathu uYise okokuthi wathi: “Loba ngubani ongibonileyo usembonile loBaba.” (UJohane 14:9) Ukufunda ngobuntu bukaJesu kuzakwenza umazi ngcono uJehova. Ngokwesibonelo, indlela uJesu athanda ngayo abantu itshengisa indlela uJehova akuthanda ngayo.
2. UJesu watshengisa njani ukuthi uyamthanda uJehova?
UJesu wathi: “Ngenza lokho uBaba angitshele khona ukuze umhlaba wazi ukuthi ngiyamthanda uBaba.” (UJohane 14:31) Ngesikhathi esemhlabeni, uJesu watshengisa ukuthi uyamthanda uYise ngokumlalela kukho konke lanxa kwakunzima ngezinye izikhathi. UJesu wayekuthanda ukutshela abanye ngoYise futhi ezimisele ukubancedisa ukuthi babe ngabangane bakaNkulunkulu.—UJohane 14:23.
3. UJesu watshengisa njani ukuthi uyabathanda abantu?
IBhayibhili lithi uJesu ‘uyabathanda kakhulu abantu.’ (IZaga 8:31, amabala angaphansi) Watshengisa ukuthi uyabathanda abantu ngokubakhuthaza langokubancedisa. Wenza izimangaliso ezinengi ezazitshengisa ukuthi ulamandla lesihawu. (UMakho 1:40-42) Wayengabandlululi kodwa wayelomusa kubo bonke abantu. Amazwi akhe ayeduduza labo ababemlalela njalo ebenza babe lethemba. UJesu wayezimisele ukuhlupheka lokufela abantu ngenxa yokuthi wayebathanda. Kodwa ayebathanda kakhulu yilabo ababesenza lokho akufundisayo.—Bala uJohane 15:13, 14.
GEBHA UJULE
Engxenyeni le uzafunda ngobuntu bukaJesu lokuthi ungenzani ukuze ube ngumuntu ophanayo futhi olothando njengaye.
4. UJesu uyamthanda uYise
Ukuhlola isibonelo sikaJesu kuzasinceda sibone ukuthi singatshengisa njani ukuthi siyamthanda uNkulunkulu. Bala uLukha 6:12 loJohane 15:10; lo-17:26. Ngemva kokubala umbhalo ngamunye, xoxani ngombuzo lo:
Singatshengisa njani ukuthi siyamthanda uJehova njengoJesu?
UJesu wayemthanda uYise njalo wayehlala ethandaza kuye
5. UJesu ulendaba labantu
UJesu wayelendaba labantu futhi eqakathekisa ababekufuna ukwedlula lokho okwakufunwa nguye. Kungelani lokuthi ngezinye izikhathi wayediniwe, uJesu wayehlala ezimisele ukusebenzisa isikhathi sakhe lamandla akhe ukuze ancede abanye. Bala uMakho 6:30-44 beselixoxa ngemibuzo elandelayo:
UJesu watshengisa njani ukuthi ulendaba labanye?—Khangela amavesi 31 34, 41 lo-42.
Kuyini okwenza uJesu wanceda abantu?—Khangela ivesi 34.
Okwenziwa nguJesu kukufundisani ngoJehova?
Singamlingisela njani uJesu endabeni le?
6. UJesu uyaphana
UJesu wayengelazinto ezinengi kodwa wayephana. Ufuna lathi sibe ngabantu abaphanayo. Bala imiSebenzi 20:35 beselixoxa ngombuzo lo:
UJesu wathi kuyini okuzasenza sithokoze?
Bukelani IVIDIYO beselixoxa ngombuzo olandelayo.
Lanxa singelazinto ezinengi, kuyini esingakwenzela abanye?
Ubukwazi yini?
IBhayibhili lisifundisa ukuthi sikhuleke kuJehova ngebizo likaJesu. (Bala uJohane 16:23, 24.) Singenza njalo siyabe sitshengisa ukuthi siyakuqakathekisa esikwenzelwe nguJesu ukuze sibe ngabangane bakaJehova.
ABANYE BATHI: “UNkulunkulu kalandaba lathi.”
Okwenziwa nguJesu kutshengisa njani ukuthi uJehova ulendaba lathi?
ISIFINQO
UJesu uyamthanda uJehova njalo uyabathanda labantu. UJesu ufuze uYise, yikho ukufunda ngobuntu bakhe kuzakwenza umazi ngcono uJehova.
Ufundeni?
Singatshengisa njani ukuthi siyamthanda uJehova njengoJesu?
Singatshengisa njani ukuthi siyabathanda abantu njengoJesu?
Kuyini okuthanda kakhulu ngoJesu?
THOLA OKUNENGI
Bala isihloko lesi ubone ukuthi ungamlingisela njani uJesu.
“Lingisela UJesu . . .” (UJesu Uyindlela, Leqiniso, Lokuphila, ikhasi 317)
Bala isihloko lesi uzwe ukuthi yindaba kuqakathekile ukuthandaza ngebizo likaJesu.
“Kungani Kumele Sithandaze Ngebizo LikaJesu?” (INqabayokulinda, February 1, 2008)
Bala isihloko lesi uzwe ukuthi iBhayibhili lithi uJesu wayenjani.
Bala isihloko lesi uzwe ukuthi indlela uJesu ayephatha ngayo abesifazana isifundisani.
“UNkulunkulu Uyabaqakathekisa Abesifazana” (INqabayokulinda, September 1, 2012)