Nyenya, wi mwaakhaviherye anamwane anyu wunnuwiha nroromelo naya, honaakhwana pahiru waaleela echu yaphaama ni yoonanara. Munaphwanelatho waakhaviherya wi yuupuwelele makoho ntoko ala: ‘Ntakhara heeni Piipiliya onnawatiiha ichu seiyo sinakhala wi ti saphaama? Kini kisuwele hai wi malakiheryo a Piipiliya mahiku oothene taphaama wa miyaano?’ (Isa. 48:17, 18) Wakhala wi mwaninyu onachuna opatisiwa, mmukhaviherye wuupuwelela mwawiiseela vooloca sa mirici inarweela mu opatiso. Owo onoona hai vooloca sa mirici iho? Tisivi siri miphurelo? Taavi ari makacamiho? Ntakhara heeni miphurelo ti sincipale opwaha makacamiho? (Mar. 10:29, 30) Ti wookhweleya wuupuwelela ichu seiya mweephoole ahaakumve opatisiwa. Mmukhaviherye mwaninyu wuupuwelela mareeliho a wiiwelela ni sookhumelela soonanara sa ohiiwelela. Voocharela owo akhweya onahaala weemererya wi ochariha malakiheryo a Piipiliya mahiku oothene enahaala okhala echu yaphaama wa yoowo. w17.12 18-19 ¶14-15

Anna ni arokora ancipale annahooseya ni ireca sa miloko miloko. Akina yaawo ari awuuluvala annaakhapelela amusi aya aniiceliwa. Nlelo akina anniilipiserya wi evakulele soothowa sa aveechokoni vaya. Nave noosuwela wi ancipale a nyuwo munnahooseya, ohiya pahiru ni nikacamiho nimoha na yaala, nyenya ni oothene mu elukuluku emohamoha! Waakhanle wi Yehova onnapwacha itheneeri sihirino ekumi, nkuupuwelani mukhalelo onooneiye vooloca sa nyuwo! Nyuwaano munnamurumeela, ohiya nthowa na okhinyereryiwa, nyenya nthowa na omusivela wanyu. (Sal. 19:2, 4, 15) Tiithiihu oosivela osuwela echu eri yoothene vooloca sa nyuwaano. Piipiliya onaloca wi naamwi “mìhi a mmuruni mwanyu àhalikhanyiwa” ni yoowo. (Mat. 10:30) Yehova onachuna wi nsuwele wi owo ‘òsuwela mahiku a atxhu aphama.’ (Sal. 37:18) Mwawooneya, Yehova oosuwela makacamiho oothene muryaanyuno, nave owo onahaala woovahaani ikuru munachunaanyu wi nvilele ni yaawo. w18.01 3 ¶1; 4 ¶4

Petro omviiha wawe Tabithá waahiweeriha ancipale o epooma ‘owemererya Apwiya.’ Amuhuserya yaale avyaani yanwerya waaleela akina sa michaka saphaama vooloca sa Yesu navetho waaleela achu oothene vooloca sa owerya wa Yehova wa waaviiha alipa ookhwa. (Saw. 9:36-42) Aakhalavo akina yeerenle onamoona ovinya mookhwani okina. Mu ekwaha emoha Murummwa Paulo aari va muthukumano mu esaala ya empa yanachaaru yoosulu o Trowate weiwo vano oniichaniwawo Turkiya. Paulo aahiloca ophiyerya ohiyu eriyari. Mmiravo iichaniwa Eutiko aanawiriyana akiranthe vaxanelani. Nyenya ikhove saanwerya nave aahimora va empa yanachaaru yoosulu. Akhweya Luka aari oopacerya omphwanya Eutiko. Ntoko totore, aahisuwela wi mmiravo owo tahi wi aarimphoreya pahiru naari otuthuwa. Owo aarimukhwa chiryene! Paulo aahikhuruwatho. Amukhupaarela Eutiko nave aahaatikhiniha achu oothene, aalocaka: “Onnona!” Yootikhiniha yeela yaahaavolowela oothene yaale yoonne yeeyo yeeren’ye. Esuwelaka wi mmiravo owo aahikhwa nave wi aahivinya mookhwani, awo “yàhakalala vatokovene.”—Saw. 20:7-12. w17.12 5-6 ¶10-11