Mutitelele wiiwanana ni yaale ari oororomeleya wa Yehova. Yehova onachuna wi nimurumeeleke yoowo ni annihu mwawiiwanana. Nave pahiru nnahaala owerya weerano yeeyo wakhala wi noopharaxa eparipari. Muchu yoowo onamwaramwaxa miselo seiho sinavuhana ni eparipari onnatannya okawanyeya mmulokoni, mwa yeeyo Yehova onnanleela wi ‘naarapele yaawo.’ Wakhala wi haneenreno yeeyo, akaneene ahu nnahaala opacerya weemererya ichu seiyo sihiri seeparipari nave nikhale oohiroromeleya wa Yehova. (Aro. 16:17) Vaavaa nniiwexexaahu eparipari nave nipharaxa moolipa yeeyo, ninnawerya omwaacamela Yehova ni otitelela olipiha nroromelo nahu. (Aef. 4:​15, 16) Ohiya yeeyoru, haniwokiwa ni mahusiheryo atheru a Satana nave nnanwerya otitelela okhala ookhapeleleya ni okhapelela wa Yehova variyari va yoohooxa etokotoko. Mwawiihiiha, mpharexa moolipa eparipari “nave Muluku a murecele onarwa akhala ni nyuwaano.”—Afi. 4:​8, 9. Mulipeleli, 07/2024 epaax. 13 ipara. 16-17

Voopacerya, Yesu aatikitheren’ye wa achu yaawo yiisoona moonanara woona wi yaari achu oocheka nave owo aahaawopa okhala oomuchara awe. Owo aanasuwela wi yoocheka yaari mutathaari waaweeriha achu wiiceliwa. Mwawiihiiha, owo aanawaavya alopwana ni athiyana yaawo yaasuwela wi yaari alipa oocheka. Apharihelaka niphwanaphwaniho, aaloca: “Achu ahiniiceliwa hanamwaavya mulipa a murece, nyenya yaale aniiceliwa tanamwaavya.” Owo aahaaceererya: “Nkirweenle owiichana achu awookololowa, nyenya alipa oocheka.” (Mat. 9:​12, 13) Yesu aanakhala mwawiiwanana ni masu yaala. Owo moosivela aahilevelela soocheka sa muthiyana yoowo aarapiha inaani sa Yesu ni miithori sawe. (Luka 7:​37-50) Owo aahimuhusiha iparipari soochuneya muthiyana o Samariya veehimeni, naamwi Yesu aasuwela meecelo oohiphwanelela a muthiyana. (Yoh. 4:​7, 17-19, 25, 26) Ophiyerya wi Muluku aahimvaha Yesu ikuru sa waaviha alopwana, athiyana ni anamwane yaawo yaakhwile.—Mat. 11:5. Mulipeleli, 08/2024 epaax. 4 ipara. 9-10

Ti mwawiihai Yehova onahaaleiye ovuwiha nsina nawe omwaahiyu onaacamela? Moorweela wa othoriha wawe. Moohilekela owo onahaala omutoloxa Papulu Mutokotoko, nthowa nawi malapelo atheru annapaka ichu soonanaraxa ni annahusiha sawootha soonanaraxa vooloca sa nsina nawe. (Wup. 17:​5, 16; 19:​1, 2) Vaavaa Papulu Mutokotoko onahaaleiye otoloxiwa achu akina ananwerya othanla opacerya omulapela Yehova. Wookuchulani, mu Armaketo, Yehova onahaala otoloxa mukhalelo yoola wa ichu wa Satana, aatoloxaka oothene yaawo anamwaakaaha owo ni oriipiha nsina nawe, nyenya onamwaavuluxa oothene yaawo anamusivela ni omwiiwelela, nave tho aniirumiha nthowa na omvaha ovuwa wawe. (Mar. 8:38; 2 Ate. 1:​6-10) Evinre yaweeha yookuchula mu Olamulelo wa Kristu wa Iyaakha Ncikhwi, Yehova onahaala weeliha nsina nawe moomalela. (Wup. 20:​7-10) Mu elukuluku yeeyo, “ntoko maahi anahuruwelaaya ephareya, hiihaa elapo enarwa esareya osuwela ncicimiho na Apwiya.” (Hab. 2:14) Chiryeene enahaala okhala elukuluku yoohakalaliha vaavaa akumi oothene eneeraaya emvahe ncicimiho Yehova moorweela wa nsina nawe! Mulipeleli, 01/2025 epaax. 7 ipara. 15-16