Kiteyoni amanle othanliwa ntoko muthoriha, wiiwelela wawe ni olipa wawe murima waaheehiwa. Owo aahivahiwa murici woovilaxa wa omutoloxa altare a muluku Paala yoowo atiithi awe yaamulapelaaya. (Amut. 6:25, 26) Ohoolo vaya, amanle waathukumanya anakhoco awe, Kiteyoni mu ikwaha piili aahaakhela sooleeliherya sa waavukula anakhoco awe. (Amut. 7:2-7) Wookuchulani owo aahileeliwa wi aahiphele amwiichane awe mmiceche mwaya mu ohiyu eriyari. (Amut. 7:9-11) Atokweene anaphwanela okhala ‘ooreheryeya wiiwelela.’ Mutokweene awiiwelela ori ooreheryeya wiiwelela yeeyo soorepa sinalocaaya ni ohoolela woorweela mmarehereryo a Muluku. Hiihaa, owo tho onnatikitherya yootakiherya yaphaama wa akina. Nlelo, wiiwelela wawe onanwerya weehiwa. Ntoko yootakiherya, owo akhweya onanwerya woona okhala woovila ochariha ohoolela yoowo onaakheleiye. Mmikhalelo mikina, owo onanwerya wiikoha waakhanle wi ohoolela owo chiryeene ti woophara muteko naari wamiruku. Naari owo onahaala wiikoha waakhanle wi aahaala weemererya murici yoowo akhweya waahaala okuha va yawoopiha otaphuwa wawe. Ti mwawiihai atokweene aneeraaya etakiherye wiiwelela wa Kiteyoni mmikhalelo ntoko seiya? Muwiriyaneke moomaaleleya ohoolela nave mphariheleke yoowo. w23.06 ipaax. 4-5 ipara. 9-11

Alapeli oororomeleya a Yehova akhalai yaahihoolela makacamiho yaawo yaahiwehereryaaya. Moone yootakiherya ya Yakopo. Apapaawe yaahimuleela wi amuthanle mmoha a anamwane a Lapani ntoko mwaariye, yoowo aari Mmusi nave tho aamulapela Yehova. Apapaawe Yaakopo yaahiloca wi eerano yeeyo, moohikhwa minikwa aahaala oreelihiwa vancipale ni Yehova. (Map. 28:1-4) Mwawiihiiha, Yakopo aahiwiiwelela. Owo aahikhuma o Kana nave apaka mukwaha ayaaka vaate va Lapani, yoowo aarino anamwane eeli—Liiya ni Rakeli. Yakopo aamuchuna mwaana amwaamukhaani, Rakeli, nave aaheemererya omulapa Lapani mu iyaakha 7 wi awerye omuthela yoowo. (Map. 29:18) Nyenya tahi yeeyo yeeren’ye. Lapani aahinwoka Yakopo, eerihaka wi owo amuthele mwaana a mutokweene, Liiya. Lapani aaheemererya wi Yakopo amuthele Rakeli emanle oviravo esumana emoha, nyenya owo tho aaphwanela olapa iyaakha ikina 7 ntakhara yoowo. (Map. 29:26, 27) Lapani tho haari oororomeleya mu anakoso aapakeiye ni Yakopo, naalakhanyerya, Yakopo aahimulapa Lapani mu iyaakha 20!—Map. 31:41, 42. w23.04 epaax. 15 epara. 5

Taani nnaphwanelaahu omveka nihakararyo ni ohoolela? Noosuwela naakhulo na nikoho nenla. Nnaphwanela omwaacamela Yehova Muluku mu nivekelo. Yehova pahiru onaniwopa weerano yeeyo. Nave Piipiliya onanleela wi ‘nivekeleke moohihiyererya,’ mwawiihiiha, ninnasuwela wi owo onachuna wi nivekeleke wiiliwiili. (1 Ate. 5:17) Nnanwerya ovekelaka mwa yoowo mootaphuwa ni oveka ohoolela wawe mmikhalelo soothene sa okumi ahu. (Mas. 3:5, 6) Woona wi Yehova tamahala matokweene, owo ooloca wi nnanwerya ovekela wa yoowo mu ikwaha soothene nnachunaahu. Yesu aahiiwexexa wi Yehova onnavaha esisapo mavekelo. Mu iyaakha sincipale ahaakumve orwa veelaponi yavathi, owo aahimoona Tiithi awe aakhulaka mavekelo a alopwana ni athiyana oororomeleya. Ntoko yootakiherya, Yesu aari ni Tiithi awe vaavaa Owo aakhunleiye mavekelo a Ana, Tavite, Eliya ni akina. (1 Sam. 1:10, 11, 20; 1 Mam. 19:4-6; Sal. 32:5) Ti nthowa nene Yesu aahusinheiye oohuserya awe otitelela ovekela ni nroromelo!—Mat. 7:7-11. w23.05 epaax. 2 ipara. 1, 3