Malekat Yehowa Mangalindung Hizkia

Karajaan Israel sapuluh suku jadi inguasa awi karajaan Asiria. Sanherib, raja Asiria handak kea manguasa karajaan Yehuda due suku. Iye marabut kota intu Yehuda ije-mije. Tapi, kota je paling ingahandak iete Yerusalem. Sanherib dia katawan amun Yehowa mangalindung Yerusalem.

Hizkia, raja Yehuda manenga are duit akan Sanherib mangat iye dia manyarang Yerusalem. Sanherib manarima duit te, tapi iye tatap manyuhu pasuka manyarang Yerusalem. Uluh hong kota te mikeh awi uluh Asiria sasar manukep. Tapi Hizkia hamauh, ’Ela mikeh. Uluh Asiria kuat, tapi Yehowa akan manampa itah labih kuat bara ewen.’

Sanherib mangirim utusan je inyewut Rabsyake, uka mambaka uluh hong Yerusalem. Rabsyake mendeng intu luar tembok kota tuntang mangkariak, ’Yehowa dia tau mandohop ketun. Ela kana tanjaru Hizkia. Jatunti hatalla je tau mangalindung ketun.’

Hizkia balaku pandohop Yehowa. Yehowa manjawab, ’Ela mikeh dengan auh Rabsyake te. Sanherib dia akan marabut Yerusalem.’ Limbah te, Hizkia dinun surat bara Sanherib. Iye manulis, ’Manyarah ih. Yehowa dia tau manyalamat ketun.’ Awi te Hizkia balakudoa, ’Yehowa, nyalamat ikei. Mangat uras uluh katawan amun Ikau Hatalla je bujur.’ Yehowa hamauh, ’Raja Asiria dia akan sampai hong Yerusalem. Aku akan mangalindung kota Ayungku.’

Sanherib yakin tau mampakalah Yerusalem. Tapi hamalem te, Yehowa mangirim ije malekat akan kemah pasukan Asiria hong luar kota te. Malekat te mampatei 185.000 prajurit! Uras prajurit Sanherib je kuat matei. Maka, tapaksa iye buli. Yehowa mangalindung Hizkia tuntang Yerusalem, kilau janjin Ayu. Amun metuh te ikau tege hong Yerusalem, en ikau percaya dengan Yehowa?