Kubhuda

3 Mozesi wakaba uyembeli kuna batezwale babe Jetro, umpristi wokuMidiyani. Wakajibinga imwizi akangwina muludwa, akanoswika kudunhu lyaMwali wechokomende, iHorebhi. 2 Ingilozi yaJehova yakaboneka kuna iye inanga seduba lyomoto libhuda mudenje. Paakalamba ekalinga wakabona idenje litutuma koga lisinopya. 3 Mozesi wakati: “Ndopambuka ndibone yechi chishamiso chokuti idenje alitopya chini biya.” 4 Jehova paakabona kuti wapambuka kunobona, Mwali wakonshoba elimukati mwedenje akati: “Mozesi! Mozesi!” iye wakashandula eti: “Ndiipo yopano.” 5 Akale wakati: “Usiswike pelyo yopano. Bhisa zukwabayila zuzo kumakumbo awo nokuti bugalo yobuno bowumile buchena.” 6 Wakandilila mbeli eti: “Ndimi Mwali wamatate awo, Mwali waAbhulahama naMwali waIsaka naMwali waJakobe.” Pakalepo Mozesi wakasisa chiso chiche nokuti wakatya kulingisana naMwali wechokomende. 7 Jehova wakati: “Ndakabona kuyabula kwabanhu bangu bamo muIjipiti, akale ndakawha kulila kwabo pezhulu pabaya banobamanikija kushinga; ndinokuziba kuyabula kwabo. 8 Ndichabheluka kunobasupula mumaboko abaIjipiti, ndibabhise muneyo inyika, ndibasenge kunyika imbuyanana yakatalabuka,inyika izhele unkaka nobuchi, kunogala baKanani, nabaHeti, nabaAmoli, nabaPelizi, nabaHivi, nabaJebusi. 9 Linga! Kulila kwabaIsrayeli kwakawhikwa kunami, akale ndakabona kubhatwa bubi kwabo nabaIjipiti. 10 Izha ndikutume kuna Faro, kutila kuti ubhise banhu bangu baIsrayeli muIjipiti.”