Joromiya

32 Ilizwi elafika kuJoromiya livela kuJehova ngomnyaka we-10 weKosi yakwaJuda uTsedekhiya, okutjho, umnyaka we-18 kaNebukadinetsari.*+ 2 Ngesikhatheso amabutho wekosi yeBhabhiloni bewavimbezele iJerusalema, begodu uJoromiya umphorofidi bekavaleleke esiRhodlweni sakaNogada+ endlini yekosi* yakwaJuda. 3 Ngombana iKosi yakwaJuda uTsedekhiya beyimvalele,+ ithi, “Kubayini uphorofida ngendlela le? Uthi, ‘Ngilokhu uJehova akutjhoko: “Ngizokunikela idorobheli esandleni sekosi yeBhabhiloni begodu izolithumba,+ 4 neKosi uTsedekhiya yakwaJuda angekhe iphunyurhe kumaKhaledi,* nakanjani izokunikelwa esandleni sekosi yeBhabhiloni, begodu izokukhuluma nayo ubuso nobuso, baqalene.”’+ 5 ‘Uzokusa uTsedekhiya eBhabhiloni, uzokuhlala lapho bekube kulapho ngimtjheja khona,’ kutjho uJehova. ‘Ngitjho nanyana ningasolo nilwa namaKhaledi,* angekhe niphumelele.’”+

6 UJoromiya wathi: “Ilizwi lakaJehova lifike kimi, lathi, 7 ‘URhanameli indodana kaTjhalumu usorhulwakho* uzokuza kuwe athi: “Zithengele isimu e-Anatothi,+ nguwe wokuthoma onelungelo lokuyithenga.”’”+

8 URhanameli indodana kasorhulu weza kimi, njengombana uJehova atjhilo, esiRhodlweni saboNogada, wathi kimi: “Ngibawa uthenge isimami ese-Anatothi, enarheni yakwaBhenjamini, ngombana unelungelo lokuhlala khona begodu uzithengele yona. Zithengele yona.” Ngesikhatheso ngabona ukuthi bekulilizwi lakaJehova.

9 Yeke ngathenga isimu e-Anatothi kuRhanameli umzawami. Ngamkalela imali+ ematjhekeli* alikhomba neempaparwana zesiliva ezilitjhumi. 10 Yeke ngatlola encwadini yesivumelwano,+ ngafaka itshwayo, ngabiza abofakazi,+ ngakala imali eenkalini. 11 Ngathatha incwadi yesivumelwano sokuthengiselana, ebeyifakwe itshwayo elimalungana neenkambiso neemfuneko ezingokomthetho, naleya ebeyingakafakwa itshwayo, 12 begodu ngathatha incwadi yesivumelwano sokuthengiselana ngayinikela uBharuki+ indodana kaNeriya+ indodana kaMarhaseya phambi kwakaRhanameli indodana kasorhulwami, abofakazi abatlola encwadini yesivumelwano sokuthengiselana nawo woke amaJuda ebekahlezi esiRhodlweni saboNogada.+

13 Nje-ke ngayala uBharuki phambi kwabo ngathi: 14 “Ngilokhu uJehova wamabutho, uZimu ka-Israyeli akutjhoko, ‘Thatha iincwadezi, incwadi yesivumelwano sokuthengiselana ebekwe itshwayo nenye engakabekwa itshwayo, uzifake esitjeni esenziwe ngebumba bona zihlale isikhathi eside.’ 15 Nakhu uJehova wamabutho, uZimu ka-Israyeli akutjhoko, ‘Izindlu, amasimu, wamadiribe azokuthengwa godu enarheni le.’”+

16 Nje-ke ngathandaza kuJehova ngemva kokunikela uBharuki indodana kaNeriya incwadi yesivumelwano sokuthengiselana, ngathi: 17 Maye! Kosi ePhakemeko Jehova, qala! Wenze izulu nephasi ngamandlakho amakhulu+ nangesandla sakho esivulekileko. Ayikho into ebudisi kuwe, 18 wena onethando elithembekileko eenkulungwaneni, kodwana ojezisa amadodana ngebanga lemitjhapho yabobaba,+ uZimu weqiniso, omkhulu nonamandla, igama lakhe nguJehova wamabutho. 19 Ukhamba phambili ngeseluleko begodu mikhulu imisebenzakho,+ wena amehlwakho abona zoke iindlela zabantu,+ bona uvuze ngamunye ngokweendlela zakhe nangokwalokho akwenzako.+ 20 Wenze amatshwayo neemangaliso enarheni yeGibhide, aziwa bekube kunamhlanjesi, wazenzela igama kwa-Israyeli nahlangana nabantu+ njengombana kunjalo namhlanjesi. 21 Wakhupha nabantu bakho u-Israyeli enarheni yeGibhide, ngamatshwayo, ngeemangaliso, ngesandla sakho esinamandla, ngomkhonwakho olulekileko nangezenzo zakho ezithusako.+

22 “Ngokukhamba kwesikhathi wabanikela inarha le ofunge ukuyinikela abokhokho babo,+ okuyinarha egeleza ibisi neliju.+ 23 Bangena bathatha indawo leyo, kodwana akhenge balalele ilizwi lakho namkha bakhambe ngomthethwakho. Akhenge balalele litho obayale ngayo, yeke wabangela bona behlelwe yihlekelele le.+ 24 Qala! Bakhe iindunduma zokuvimbezela bona bathumbe idorobho,+ ngebanga lesabula,+ indlala, nesibetho,*+ nakanjani idorobheli lizokuwela ezandleni zamaKhaledi* alwa ngokujamelene nalo; zoke izinto okhulume ngazo zenzekile njengombana ubona. 25 Maye! Kosi ePhakemeko Jehova uthe kimi, ‘Zithengele isimu ngemali, ubize abofakazi,’ ngitjho nanyana idorobheli lizokunikelwa esandleni samaKhaledi* nakanjani.”

26 Khonokho ilizwi lakaJehova lafika kuJoromiya, lathi: 27 “NginguJehova, uZimu wabo boke abantu. Ikhona na into engangibhalela? 28 Ngilokhu uJehova akutjhoko, ‘Nginikela idorobheli kumaKhaledi* nesandleni seKosi uNebukadinetsari* yeBhabhiloni bona ilithumbe.+ 29 Begodu amaKhaledi* alwa ngokujamelene nedorobheli azokuza athungelele idorobheli ngomlilo+ kuhlanganise nezindlu abantu ebebenzela uBhali iminikelo emaphahlenazo begodu bathululela iminikelo yokusela kwabanye abozimu bona bangisilinge.’+

30 “‘Ngombana abantu bakwa-Israyeli nebakwaJuda benze okumbi kwaphela emehlwenami, kusukela ebutjheni kuye phambili;+ abantu bakwa-Israyeli basolo bangisilinga ngemisebenzi yezandla zabo,’ kutjho uJehova. 31 ‘Ngombana kusukela idorobheli lakhiwa bekube kunamhlanjesi, belisolo lingisilinga begodu lingibangela ilaka,+ yeke kufuze lisuswe phambi kwami+ 32 ngebanga lokukhohlakala abantu bakwa-Israyeli abakwenzileko bona bangisilinge, bona, amakhosabo,+ amakhosanabo,+ abaphristi babo, abaphorofidi babo+ nabantu bakwaJuda nezakhamuzi zeJerusalema. 33 Bebasolo bangifulathela bangangiqali;+ ngitjho nanyana ngilinge kanengi ukubafundisa, akekho namunye kibo obekalalela bona afumane iseluleko.+ 34 Begodu babeke iinthombe zabo ezinyenyisako endlini ebizwa ngegama lami, bona bayisilaphaze.+ 35 Ukungezelela kilokho, bakhela uBhali iindawo eziphakemeko emRhobeni weNdodana kaHinomu,*+ bona benze umhlatjelo* kuMoleki+ ngamadodana namadodakazabo, into engingakhenge ngibayale bona bayenze,+ engakhenge nakancani ifike ehliziywenami, bona benze into enyenyisa kangaka, babangela uJuda bona one.’

36 “Nje-ke ngilokhu uJehova uZimu ka-Israyeli akutjhoko malungana nedorobho enithi lizokunikelwa esandleni sekosi yeBhabhiloni ngesabula, ngendlala nangesibetho, 37 ‘Ngizobahlanganisa ndawonye bavela eenarheni engabarhatjhela kizo ngokusilingeka kwami nangelaka elikhulu,+ ngizobabuyisa endaweni le, bahlale bavikelekile.+ 38 Bazokuba babantu bami begodu ngizokuba nguZimabo.+ 39 Ngizobanikela ihliziyo yinye+ nendlela yinye bona bahlale bangisaba begodu kubakhambele kuhle bona nabantwababo abeza ngemva kwabo.+ 40 Ngizokwenza isivumelwano esihlala ngokungapheliko nabo,+ angekhe ngilise ukubenzela okuhle;+ ngizokwenza iinhliziyo zabo zingisabe bona bangangifulatheli.+ 41 Ngizokuthabela ukubenzela okuhle,+ ngizobenza bahlale enarheni le ngokungapheliko,+ ngehliziywami yoke nangomphefumulwami woke.’”*

42 “Ngilokhu uJehova akutjhoko, ‘Njengombana ngilethele abantwaba yoke ihlekelele le, ngokunjalo-ke ngizobalethela boke ubuhle engibathembisa bona.+ 43 Amasimu azokubuya athengwe godu enarheni le,+ ngitjho nanyana nithi: “Imarubhi, ayinabantu neembandana begodu inikelwe kumaKhaledi.*”’

44 “‘Amasimu azokuthengwa ngemali, iincwadi zeemvumelwano zokuthengiselana zizokutlolwa begodu zibekwe amatshwayo, kuzokubizwa abofakazi abavela enarheni yakwaBhenjamini,+ eendaweni ezimagega neJerusalema, emadorobheni wakwaJuda,+ emadorobheni asesifundeni seentaba, esifundeni seTjhefela,+ emadorobheni wesewula, ngombana ngizokubuyisa abathunjiweko babo,’+ kutjho uJehova.”