Yokuthoma YamaKhosi

6 Ngomnyaka wama-480 ngemva kokobana ama-Israyeli aphume enarheni yeGibhide,+ ngomnyaka wesine uSolomoni abe yikosi ngawo kwa-Israyeli, ngenyanga kaZifu*+ (okuyinyanga yesibili), wathoma ukwakha indlu kaJehova.*+ 2 Indlu iKosi uSolomoni eyayakhela uJehova beyimakhubhithi* ama-60 ubude, imakhubhithi ama-20 ububanzi begodu imakhubhithi ama-30 ukuphakama.+ 3 Ithuri+ elingaphambi kwethempeli belimakhubhithi ama-20 ububanzi, lilingana nobubanzi bendlu. Nalimedwa kusukela ngaphambi kwendlu belimakhubhithi alitjhumi.

4 Wenzela indlu le amafremu wamafesidere+ aba matsikani.* 5 Godu wakha umakhiwo okhamba magega neboda lendlu; umakhiwo lo bewubhoda amaboda wendlu, wethempeli* newekumba efihlekileko,+ wenza neenkumba eziseqadi mahlangothi woke.+ 6 Isitezi esiphasi seenkumba eziseqadi besimakhubhithi amahlanu ububanzi, isitezi esiphakathi besimakhubhithi asithandathu ububanzi, isitezi sesithathu besimakhubhithi alikhomba ububanzi ngombana wenza iboda ngendlela yokuthi iingodo zikghone ukuba nendawo ezingahlala kiyo magega nendlu ukwenzela bona kungenziwa iimbobo ebodeni lendlu.+

7 Indlu le yakhiwa ngamatje esele abaziwe+ avela egwarini ukwenzela bona kungazwakali amahamura namkha amazembe namkha nanyana ngimaphi amathulusi wesimbi nakwakhiwa indlu le. 8 Ubungeno besitezi esiphasi sekumba eseqadi bebungesewula* yendlu+ begodu bekusetjenziswa iintepisi ezizombelezako ukuya esitezi esiphakathi nokusuka esitezi esiphakathi uye kwesesithathu. 9 Waragela phambili nokwakha indlu bewayiqeda,+ wayinameka ngeengodo zomsedari nangamaplanka womsedari arhenyisiweko.+ 10 Wakha iinkumba eziseqadi magega nendlu,+ ngayinye beyimakhubhithi amahlanu ukuphakama begodu zahlanganiswa nendlu ngeengodo zomsedari.

11 Kuthe kusesenjalo, kwafika ilizwi lakaJehova kuSolomoni, lithi: 12 “Malungana nendlu oyakhako le, nawukhamba emithethwenami, uphethe izahlulelo zami, ulalele yoke imiyalwami ngokukhamba ngayo,+ ngizokufeza ngawe isithembiso sami engasenza kuyihlo uDavida,+ 13 ngizokuhlala hlangana nama-Israyeli,+ angekhe ngibalahle abantu bami u-Israyeli.”+

14 USolomoni waragela phambili akha indlu bona ayiqede. 15 Wakha amaboda wendlu angaphakathi ngamabhodi womsedari. Wavala amaboda angaphakathi ngeengodo, kusukela phasi kufikela eengodweni zesilinghi, wanameka ifluru yendlu ngamabhodi womjunipha.+ 16 Wakha ingcenye emakhubhithi ama-20 ngemuva kwendlu ngamabhodi womsedari, kusukela phasi kufika eengodweni zomfulelo begodu ngaphakathi kwawo,* wakha nekumba efihlekileko,+ okuyiNdawo eCwengeke Khulu.+ 17 Ithempeli,*+ ingcenye yendlu ephambi kwalo, beyimakhubhithi ama-40. 18 Umsedari obewungendlini bewukghatjiswe ngemifanekiso yeenkurwana+ namathuthumbo+ abazelwe ebodeni. Amaboda wendlu bewanamekwe ngomsedari; bekungabonakali ilitje.

19 Walungisa ikumba efihlekileko engaphakathi+ kwendlu bona abeke umfaji wesivumelwano kaJehova.+ 20 Ikumba efihlekileko le beyimakhubhithi ama-20, imakhubhithi ama-20 ububanzi begodu imakhubhithi ama-20 ukuphakama;+ wayisinda ngegolide elihlwengileko; wanameka i-aldara+ ngomsedari. 21 USolomoni wasinda ingaphakathi lendlu ngegolide elicwengileko,+ walembelelisa iinketani zegolide phambi kwekumba efihlekileko,+ ebeyinamekwe ngegolide. 22 Wasinda indlu yoke ngegolide beyaphelela; wanameka ngegolide i-aldara+ loke eliseduze nekumba efihlekileko.

23 Ngaphakathi kwekumba efihlekileko wenza amakherubhi+ amabili ngeengodo zomuthi wamafutha,* ikherubhi ngalinye belimakhubhithi alitjhumi ukuphakama.+ 24 Ikherubhi lokuthoma belinamaphiko amabili, iphiko ngalinye limakhubhithi amahlanu. Kusukela epenteni yelinye iphiko kuya epenteni yelinye bekumakhubhithi alitjhumi. 25 Ikherubhi lesibili nalo belimakhubhithi alitjhumi. Womabili bekalingana begodu akheke ngendlela efanako. 26 Ubude bekherubhi ngalinye bebumakhubhithi alitjhumi. 27 Wabeka amakherubhi+ ngaphakathi kweNdawo eCwengeke Khulu. Amaphiko wamakherubhi avulwa ukwenzela bona iphiko lelinye ikherubhi lifike kwelinye iboda nephiko lelinye ikherubhi lifike kwelinye iboda, amaphikwawo alulekelwa phakathi nendlu ukwenzela bona athintane. 28 Wanameka amakherubhi ngegolide.

29 Wabaza imikghabiso yamakherubhi,+ yemithi yesundu+ namathuthumbo+ emabodeni woke wendlu, mahlangothi woke weenkumba ezingaphakathi nezingaphandle. 30 Wanameka ifluru yendlu ngegolide eenkumbeni ezingaphakathi nezingaphandle. 31 Ebungenweni belawu elifihlekileko wenza iminyango ngeengodo zomuthi wamafutha, wenza iinsika eziseqadi namagoseni, njengengcenye yesihlanu.* 32 Iminyango emibili beyenziwe ngeengodo zomuthi wamafutha, wabaza amakherubhi, imithi yesundu namathuthumbo aqhakazileko kiyo begodu wanameka igolide phezu kwayo; wabethelela igolide phezu kwamakherubhi naphezu kwemithi yesundu. 33 Wabenza njalo nobungeno bethempeli;* wenza amagoseni ngeengodo zomuthi wamafutha, okungewengcenye yesine.* 34 Wenza iminyango emibili ngeengodo zomjunipha. Omunye umnyango bewunamabadi amabili ukghona ukuphayeka ukuya ngapha nangapha, nomunye unamabadi amabili ukghona ukuphayeka ukuya ngapha nangapha.+ 35 Wabaza amakherubhi, imithi yesundu namathuthumbo aqhakazileko, wanameka igolide phezu kokubaziwekokho.

36 Wakha isirhodlo esingaphakathi+ ngamalarha amathathu wamatje abaziweko nelarha leengodo zomsedari.+

37 Ngomnyaka we-4, ngenyanga kaZifu,* kwabekwa isisekelo sendlu kaJehova;+ 38 ngomnyaka we-11, ngenyanga kaBhulu* (okuyinyanga yobunane), kwaqedwa yoke into ephathelene nendlu begodu yakhiwa ngendlela ebeyihlelwe ngayo.+ Kumthethe iminyaka elikhomba ukuyakha.