Eksodusi

28 Ema-Israyelini kufuze ungibizele umfowenu u-Aroni namadodanakhe ukwenzela bona babe baphristi bami,+ u-Aroni,+ uNadabi, u-Abihu,+ u-Elazara no-Itamara+ amadodana ka-Aroni.+ 2 Kufuze wenzele umfowenu u-Aroni izambatho ezicwengileko ukwenzela bona abe nesithunzi begodu abe muhle.+ 3 Kufuze ukhulume nalabo abanamakghono, labo engibaphe ukuhlakanipha+ bona benzele u-Aroni izambatho khona azokucwengeka begodu abe mphristami.

4 “Lezi zizambatho abazozenza: isikhwanyana sesifubeni,+ i-efodi,+ ijasi enganamikhono,+ iphuraphura enomphetho, itjhila elithwalwa ehloko+ nebhande elikghatjisiweko.+ Bazokwenzela u-Aroni namadodanakhe izambatho ezicwengilekwezi ukwenzela bona babe baphristi bami. 5 Iinsebenzi ezinekghonwezi zizokusebenzisa igolide, irhara ehlaza komkayi, iwulu esipiridzana, itjhila elibomvu be nelineni elisezingeni eliphezulu.

6 “Kufuze benze i-efodi ngegolide, irhara ehlaza komkayi, iwulu esipiridzana, itjhila elibomvu be nelineni elisezingeni eliphezulu begodu kufuze ikghatjiswe.+ 7 Kufuze ibe namatjhila amabili, langemva nelangaphambili ahlanganiswe emahlombe. 8 Ibhande ledinini+ elithungelelwe phezu kwe-efodi ukwenzela bona ihlale kuhle, kufuze lenziwe ngezinto ezifanako: Igolide, irhara ehlaza komkayi, iwulu esipiridzana, itjhila elibomvu be nelineni elisezingeni eliphezulu.

9 “Thatha amatje amabili we-oniksi+ utlole kiwo ngokugobhodlha amagama wamadodana ka-Israyeli,+ 10 amagama asithandathu kwelinye ilitje, kuthi ngakwelinye ilitje utlole amagama wamadodana asithandathu aseleko ngokulamana kwawo. 11 Umuntu otlola ngokugobhodlha uzokugobhodlha amagama wamadodana ka-Israyeli ematjeni amabili njengalokha nakagobhodlha itshwayo.+ Kufuze uwenzele iinsekelo zegolide bona ziwabambe. 12 Kufuze ubeke amatje amabili ematjhileni we-efodi asemahlombe bona abe mamatje wesikhumbuzo emadodaneni ka-Israyeli+ begodu u-Aroni kufuze athwale amagamawo emahlombe phambi kwakaJehova bona abe sikhumbuzo. 13 Kufuze wenze iinsekelo zegolide, 14 wenze iintambo ezimbili zegolide elihlwengileko ezilukwe njengerobho,+ ubophelele iintambezo eensekelweni.+

15 “Kufuze ube nomuntu othungako, athunge isikhwanyana sesifubeni sokwahlulela.+ Kufuze asenze njenge-efodi, senziwe ngegolide, irhara ehlaza komkayi, iwulu esipiridzana, itjhila elibomvu be nelineni elisezingeni eliphezulu.+ 16 Kufuze silingane mahlangothi woke nasibhinciweko, sibe masentimitha* angaba ma-22 ubude namasentimitha angaba ma-22 ububanzi. 17 Kufuze usifake amatje, abe marhemo amane. Erhemweni lokuthoma, kufuze kube lirubi, ithophazi ne-emeraldi. 18 Erhemweni lesibili, kufuze kube yisimaragidu, isafire nejasiperi. 19 Erhemweni lesithathu, kufuze kube yiletjhemu,* i-agade ne-amethisti. 20 Erhemweni lesine, kufuze kube yikhrisolithe, i-oniksi nejayide. Kufuze enzelwe iinsekelo zegolide. 21 Amatje la kufuze akhambisane namagama wamadodana ka-Israyeli ali-12. Ilitje ngalinye kufuze litlolwe ngokugobhodlhwa njengalokha nakugobhodlhwa itshwayo, igama lenye nenye ikoro kezili-12 lizokutlolwa ngokugobhodlhwa elitjeni lalo.

22 “Kufuze uphothe iintambo ngegolide elihlwengileko, uzinamathisele esikhwanyaneni esisesifubeni.+ 23 Kufuze wenzele isikhwanyana esisesifubeni amasongo amabili wegolide, ufake amasongo amabili lawo emakhoneni amabili wesikhwanyana esisesifubeni. 24 Ufake iintambo ezimbilezo zegolide emasongweni amabili asemakhoneni wesikhwanyana esisesifubeni. 25 Kufuze ufake iintambo ezimbilezo eensekelweni ezimbili begodu kufuze uzihlanganise namatjhila amabili we-efodi asemahlombe ngaphambili. 26 Uzokwenza amasongo amabili wegolide uwafake emakhoneni amabili ngaphakathi emphethweni wesikhwanyana esisesifubeni ahlanu kwe-efodi.+ 27 Kufuze wenze amanye amasongo amabili wegolide uwafake lapha ibhande lihlangana khona ne-efodi, ngaphambili kwe-efodi ngenzasana kwamatjhila amabili asemahlombe, ngaphezudlwana kwebhande ledinini.+ 28 Intambo ehlaza komkayi kufuze ibotjhelelwe emasongweni wesikhwanyana esisesifubeni, iye emasongweni we-efodi. Lokhu kuzokwenza bona isikhwanyana esisesifubeni sihlale kuhle e-efodini ngaphezudlwana kwebhande ledinini.

29 “U-Aroni kufuze ambathe isikhwanyana sesifubeni sokwahlulela esinamagama wamadodana ka-Israyeli lokha nakangena endaweni ecwengileko bona uJehova ahlale awakhumbula. 30 Kufuze ufake i-Urimi neThumimi*+ ngesikhwanyaneni sesifubeni sokwahlulela begodu u-Aroni kufuze ahlale asimbethe nakeza phambi kwakaJehova nalokha nakahlulela ama-Israyeli phambi kwakaJehova.

31 “Kufuze wenze ijasi enganamikhono embathwa ngaphasi kwe-efodi, yoke uyenze ngerhara ehlaza komkayi.+ 32 Phakathi naphakathi, kufuze kube nentamo lapho kungena khona ihloko. Lapha kuvuleke khona kufuze kube nomphetho, umphetho loyo kufuze ufane newejasi yamasotja ukwenzela bona ungadabuki. 33 Kufuze wenze umhlobiso obumbeke njengamarharinada, uwenze ngerhara ehlaza komkayi, ngewulu esipiridzana nangetjhila elibomvu be, emphethweni wayo kube neensimbi zegolide hlangana nawo. 34 Kufuze zilandelane, kube yisimbi yegolide, kulandele irharinada, kube yisimbi yegolide, kulandele irharinada, njalonjalo magega nomphetho wejasi enganamikhono. 35 Kufuze yembathwe ngu-Aroni ukwenzela bona enze umsebenzakhe begodu itjhada layo kufuze lizwakale nakangena endaweni ecwengileko phambi kwakaJehova nalokha nakaphumako, ukwenzela bona angafi.+

36 “Kufuze wenze isinjana emanyazelako yegolide elihlwengileko utlole kiyo njengalokha nakugobhodlhwa itshwayo, lithi: ‘Ukucwengeka ngekwakaJehova.’+ 37 Kufuze uyibophe etjhileni elithwalwa ehloko+ ngentambo ehlaza komkayi ibe ngaphambili etjhileni elithwalwa ehloko. 38 Kufuze ibe sepandla ka-Aroni begodu u-Aroni uzokuphendula lokha omunye nakenza umtjhapho malungana nezinto ezicwengileko,+ lezo ama-Israyeli azicwengisako nawazinikela bona zibe zizipho ezicwengileko. Kufuze ihlale isepandlakhe ukwenzela bona abantu bamukeleke kuJehova.

39 “Kufuze uthunge iphuraphura yelineni elisezingeni eliphezulu, wenze itjhila lokuthwala ehloko ngelineni elisezingeni eliphezulu, wenze nebhande elikghatjisiweko.+

40 “Uzokwenzela amadodana ka-Aroni+ iimphuraphura, amabhande neengwani ezenziwe ngetjhila ukwenzela bona ahlonipheke bekabe mahle.+ 41 Kufuze umbathise umfowenu u-Aroni namadodanakhe, ubazese,+ ubabeke+ bona babe baphristi bewubacwengise. 42 Kufuze ubenzele amabhrugwana welineni abazowambatha ngaphasi ukwenzela bona bavale ubuhlubule babo.+ Kufuze asuke edinini afike enyongeni. 43 U-Aroni namadodanakhe kufuze bawambathe nabeza etendeni lokuhlangana namkha lokha nabatjhidela e-aldareni bona benze iminikelo endaweni ecwengileko, ukwenzela bona bangafunyanwa bamlandu bebafe. Lo mthetho ozokusebenza kuye neenzukulwaneni zakhe eziza ngemva kwakhe.