Wilembewa na Mateyo

24 Yesu penzefuma ku kachisi, ophunzila ŵake ewela kuli yove kuti amuwoneshe ng’anda za pa kachisi pamene apo. 2 Koma yove eŵauja kuti: “Kansi muviwonalini vinthu vonse vamene ivi? Shuwa nukuujani, pano pazasalelini mwala uliwonse palulu pa mwala uyake wamene ukuti uzaleke poneshewa.”

3 Pechinkhala pansi mu lupili ya Maolivi, ophunzila ewela kuli yove ali payeka nomukonsha kuti: “Tiujeni, kansi vinthu vamene ivi vizachitike nthawe yanji, ndipo chizindikilo cha kunkhalapo* kwanu na cha mapeto a nthawe* ino chizankhale chinji?”

4 Poyankha Yesu enena kuti: “Samalani kuti munthu osati akuluŵilisheni, 5 chifukwa anyinji azawele mu zina yangu nonena kuti, ‘Khilisitu wala ni newo,’ ndipo azaluŵilishe ŵanthu anyinji. 6 Muzamvwe chongo cha nkhondo na malipoti a nkhondo. Ivi osati vizakuchitisheni wowa, chifukwa vamene ivi vufunikila kuchitika chendi, koma mapeto azankhale kuti akaliye fwika mphela.

7 Ntundu uzayambane na ntundu uyakine ndipo ufumu uzayambane na ufumu uyakine. Kuzankhale njala na vivomezi m’malo osiyana-siyana. 8 Vonse vamene ivi ni chiyambi cha mavuto akulu.*

9 Pavuli pake ŵanthu azakupelekeni kuti mukatamanishiwe ndipo azakupayeni. Ŵanthu a mitundu yonse azakuzondeni chifukwa cha zina yangu. 10 Pa nthawe yamene iyo ŵanthu anyinji azasokonezeke ndipo azapelekane komasoti kuzondana. 11 Kuzankhale aneneli anyinji awenye ndipo azaluŵilishe ŵanthu anyinji. 12 Chifukwa cha kuyangijilika kwa kusamvwila malamulo, chikondi cha ŵanthu anyinji chizachepe. 13 Koma wamene akuti azapilile mpaka pa mapeto niye akuti azapulumuke. 14 Uthenga uweme wamene uyu wa Ufumu uzalalikiliwe pa chalo chonse kwamene kuli ŵanthu, kuti unkhale umboni kuŵanthu a mitundu yonse, pavuli pake mapeto azafwike.

15 Tetyo mukazawona chinthu chonyansa choleta chiwonongeko, chechinena Mneneli Danieli, chili paname m’malo atuŵa (woŵelenga azaziŵe), 16 wamene ali mu Yudeya azayambe kuthaŵila kumalupili. 17 Munthu wamene ali pa ntenje wa ng’anda osati azaseluke kuyatola katundu m’ng’anda mwake. 18 Munthu ali m’munda osati azajokele kuyatola malaya ŵake akunja. 19 Soka kuli anakazi amavumo komasoti onyonsha ŵana m’masiku amene awo! 20 Pitilijani kupemphela kuti osati muzathaŵe pa nthawe yozizila olo pa nsiku ya sondo. 21 Chifukwa pa nthawe yamene iyo kuzankhale chisauso chikulu chamene chikaliye chitikapo kufumila pechipangiwa chalo mpaka pano, ndipo chizachitikelini soti. 22 Kulaŵila chendi, kuti masiku amene awo aliye fupikishiwe, sembe paliye angazapulumuka. Koma chifukwa cha osankhiwa amene awo masiku amene awo azafupikishiwe.

23 Tetyo munthu akazakuujani kuti, ‘Onani! Khilisitu wala ali kuno,’ olo ‘Ali uko!’ osati muzakhulupilile vamene ivo. 24 Chifukwa kuzawele ŵanthu amene otalijila wenye kuti ni Khilisitu komasoti aneneli awenye ndipo azachite vizindikilo vamphamvu komasoti vodabwisa, kuti keno n’vokwanishika azaluŵilishe olo osankhiwa amene awo. 25 Onani! Newo nakuchenjejani vamene ivi vikaliye chitika. 26 Tetyo ŵanthu akazakuujani kuti, ‘Onani! Ali m’chipululu,’ osati muzaluteko. Akazanena kuti, ‘Onani! Ali m’vipinda va nkati,’ osati muzakhulupilile vamene ivo. 27 Chifukwa molingana na mokachelukila kaleza kufumila ku m’mawa nongweleŵela mpaka kuyafwika ku nchingulo, vizankhalesoti tetyo na kunkhalapo* kwa Mwana wa munthu. 28 Kulikonse kwamene kuli chinthu chakufwa, vinombo vuungana kwamene uko.

29 Chisauso cha masiku amene awo chikazakuti chasila, zuŵa izachite mfinzi ndipo mwezi uzawoneshelini kuŵala kwake. Nyenyezi zizapone kufumila kululu ndipo mphamvu za kululu zizanyang’anyike. 30 Pavuli pake chizindikilo cha Mwana wa munthu chizawonekele kululu ndipo mitundu yonse ya pano pa chalo izaliniyate panganga chifukwa cha chisoni. Ove azawone Mwana wa munthu akuza m’mikumbi ya kululu na mphamvu komasoti ulemelelo ukulu. 31 Yove azatumije angelo ŵake na kulila kwa mphamvu kwa belo ndipo azaunganije osankhiwa ŵake kufumila ku mphepo 4, kufumila kwamulekejela m’mululu mpaka kumalekejelo ayakine.

32 Lomba phunzilani vokhuza chimuti cha nkhuyu kufumila pa fanizo iyi: Msambo wake utete ukatumba nochita matepo, muziŵa kuti mainza ali pafupi. 33 Chimozi-mozisoti na mwewo, mukazawona vinthu vonse vamene ivi, muzaziŵe kuti yove ali pafupi, ali pa muliyango ngapo-ngapo. 34 Shuwa nukuujani kuti m’badwo wamene uyu uzasilelini wonse kufwa, mpaka vinthu vonse vamene ivi vichitike. 35 Kululu na chalo vizachoke, koma mawu ŵangu azankhalepo mpaka kale-kale.

36 Ponena za nsiku yamene iyo na nthawe yake, paliye oziŵa, olo angelo a kululu olosoti Mwana, koma Atata ŵeka. 37 Chifukwa molingana na mwenzele masiku a Nowa, niyesoti mwavikuti vizankhalile na kunkhalapo kwa Mwana wa munthu. 38 M’masiku amene awo chigumula chikaliye fwika, ŵanthu enzekulya na kumwa. Analume enzelungula ndipo anakazi enzelunguliwa mpaka nsiku yechiloŵa Nowa mu chingalaŵa. 39 Ŵanthu enyalanyaza vamene ivo venzechitika mpaka chigumula chifwika noŵapyelelatu onse amene awo. Vizankhalesoti tetyo na kunkhalapo kwa Mwana wa munthu. 40 Pa nthawe yamene iyo, analume aŵili azankhale ali m’munda. M’mozi azatolewe ndipo muyakine azasiiwe. 41 Anakazi aŵili azankhale opela pamphelo. M’mozi azatolewe ndipo muyakine azasiiwe. 42 Tetyo pitilijani mphela kunkhala tuni chifukwa muziŵalini nsiku yati azawele Ambuye ŵanu.

43 Koma ziŵani ivi: Keno munecho wa ng’anda angaziŵe nthawe yangawele kawalala, angankhale tuni ndipo angalolelini kuti kawalala wamene uyo atyole noloŵa m’ng’anda mwake. 44 Pa chifukwa chamene ichi, namwesoti nkhalani okonzeka chifukwa Mwana wa munthu azawele pa nthawe yamusaganizila.

45 Kansi ni ŵani ngaye-ngaye wamene ni kapolo wokhulupilika komasoti wanzelu wamene bwana wake emuika kuti akololela antchito ŵake apang’anda, noŵapasa chakulya pa nthawe iweme? 46 Kapolo wamene uyo azankhale wosangalala, keno bwana wake powela azamufwane kuti ochita vamene ivo! 47 Shuwa nukuujani, azamuike kuti akololela vinthu vake vonse.

48 Koma keno kapolo wamene uyu angawoneshe kuti ni muipa noyamba kulaŵila mu ntima mwake kuti, ‘Bwana wangu ochelwa,’ 49 noyamba kuniyata akapolo ayake komasoti kulya na kumwa pamozi na achakolwa ngawo-ngawo, 50 bwana wa kapolo wamene uyo azawele pa nsiku yasayembekezela yove na pa nthawe yasaziŵa. 51 Tetyo azamupase chilango choyofya ndipo azamuponyele kwamene kuli ŵanthu achinyengo. Kwamene uko yove azalile nokukuta menu.”