Mukosankha vosangalasa vamene vingakalifyelini Yehova

Yehova ni “Mulungu wachimwemwe.” (1 Timoteyo 1:11) Yove ofuna kuti tikonkhala na moyo wosangalala ndipo yove osangalala tikafwana nthawe yopumula pavuli pakuti takata ntchito. M’mutu wamene uyu tiwone vatingachite kuti tikokatishila ntchito nthawe yasu yopumula mu njila yakuti tikosangalala nosangalasasoti Yehova.

1. Kansi tufunika kuganizila vinthu votyani posankha vosangalasa?

Kansi mwewo mukonda kuchita chinji pa nthawe yopumula? Ŵanthu ayakine okonda kuŵankhale pa ng’anda—payakine oŵelenga mabuku, omvwishila nyimbo, ololela mavidiyo olo kusakila-sakila vinthu pa intaneti. Pamene ayakine okonda kuyendako kuyondololako mendo na ayawo—kuyanyaya, kuyatchaya bola olo kuchita masoŵela ayakine. Keno tasankhapo votyani, nthawe zonse tikosimikijila kuti vosangalasa vatasankha vamene ivo ni “vovomelejeka kwa Ambuye.” (Aefeso 5:10) Tetyo ni bwino kuganizila mfundo yamene iyi chifukwa ŵano masiku ŵanthu anyinji okonda vosangalasa vamene Yehova okatijana navolini, monga vachiwawa, vachiwelewele, olosoti vamizimu. (Ŵelengani Salimo 11:5.) Lomba ni chinji chingatiyavye kuti tikosankha vosangalasa mwanzelu?

Tikokonda kutandala na ŵanthu okonda Yehova, nase sewo tingatoleleko minkhalidwe yawo iweme ndipo tingosankha vosangalasa viweme. Monga mwetiwonela m’mutu 48, “munthu woyenda na ŵanthu anzelu azankhale wanzelu.” Komalomba keno tukonda kutandala na ŵanthu asakatishila ntchito mfundo za Mulungu pa moyo wawo “tizafwane mavuto.”—Miyambo 13:20.

2. Ndaŵa yanji tufunika kusamala kuti osati tikongonkhalila kuchita vosangalasa?

Olo tasankha vosangalasa vamene Yehova angakhumudwe navolini, tufunika kusamala kuti osati tikongonkhalila kuchita vosangalasa vamene ivo. Vili tetyo chifukwa tikaleka samala tingakangiwe kufwana nthawe yochita vinthu vofunika ngako. Baibolo yutilimbikisa kuti “tikokatishila ntchito luweme nthawe [yasu].”—Ŵelengani Aefeso 5:15, 16.

VATI TIPHUNZILE

Tiwone vingakuyavyeni kuti mukosankha vosangalasa mwanzelu.

3. Mukopewa vosangalasa viipa

Ndaŵa yanji tufunika kusamala posankha vosangalasa? Lolelani VIDIYO, ndipo pavuli pake mukambilane makonsho aŵa.

VIDIYO: Kansi nufunika kusankha vosangalasa votyani? (4:39)

• Kansi masoŵela enzechitika kale ku Roma olingana tyani na vosangalasa viyakine vakuchita ŵanthu masiku ŵano?

• Mu vidiyo iyi, kansi Danny ephunzila votyani vokhuza vosangalasa?

Ŵelengani Aroma 12:9, ndipo pavuli pake mukambilane konsho iyi:

• Kansi vesi yamene iyi ingakuyavyeni tyani posankha vosangalasa?

Kansi ni vinthu viyakine votyani vakunyansiwa navo Yehova? Ŵelengani Miyambo 6:16, 17 na Agalatiya 5:19-21. Pavuli poŵelenga lemba iliyonse, kambilanani konsho iyi:

• Kansi m’mavesi amene aŵa mwatomolewa vinthu votyani vamene vupezeka ngako mu vosangalasa vakukonda ŵanthu masiku ŵano?

Vamungachite kuti mukosankha vosangalasa mwanzelu

Mukolikonsha kuti:

• Kansi vosangalasa vamene ivi vuyangijilapo vinthu vakunyansiwa navo Yehova?

• Kansi vunikangisha kuchita vinthu vofunika ngako?

• Kansi vuchitisha kuti nikokatijana ngako na ŵanthu asakonda Yehova?

Tufunika kuyeja-yeja kupewa chilichonse chamene chingatiponeshele mmavuto. Tetyo keno pali vosangalasa viyakine vamene tuvikaikila, ni bwino kuvipewelatu

4. Mukokatishila ntchito nthawe yanu mwanzelu

VIDIYO: Kansi mukatishila ntchito tyani nthawe yanu? (2:45)

• Olo kuti m’bale watawona muvidiyo yamene iyi enzelolelalini vinthu viipa, kansi vuto yake yenze yotyani?

Ŵelengani Afilipi 1:10, ndipo pavuli pake mukambilane konsho iyi:

• Kansi vesi yamene iyi ingatiyavye tyani kuti tikopewa kuwononga nthawe ikulu pa vinthu vosangalasa?

5. Mukosankha vosangalasa viweme

Olo kuti pali vosangalasa viyakine vamene Yehova osangalala navolini, pali vinyinji vangaleke khumudwa navo. Ŵelengani Mlaliki 8:15 na Afilipi 4:8, ndipo pavuli pake mukambilane konsho iyi:

• Kansi ni vosangalasa viweme votyani vamukonda mwewo?

MFUNDO ZACHIDULE

Yehova ofuna kuti tikosankha vosangalasa viweme.

Makonsho oweleja

• Kansi Akhilisitu ofunika kupewa vosangalasa votyani?

• Ndaŵa yanji tufunikalini kutaya nthawe ikulu pa vosangalasa?

• Ndaŵa yanji mufunika kusankha vosangalasa vingakhumudwishelini Yehova?

PHUNZILANI VINYINJI

Kansi niŵani ali na udindo wotisankhila vosangalasa? Ŵelengani iyi nkhani kuti muziŵe yankho yake.

“Kansi muli na mphamvu yolesha mavidiyo, mabuku olo nyimbo ziyakine?” (Nkhani yapa webisaiti)

Onani mfundo zingakuyavyeni kusankha luweme vosangalasa.

“Kansi vamuchita pa nthawe yamusangalala vunkhala vopindulisha?” (Nsanja ya Olonda, 15 October, 2011)

Mu nkhani yakuti “Nileka kunyansiwa na azungu,” onani chifukwa chake munthu muyakine eleka venzekonda kuchita pa nthawe yosangalala.

“Baibolo yuchinja moyo wa ŵanthu” (Nsanja ya Olonda, 1 February, 2010)

Onani viyavya mayi muyakine kuti asankhe vinthu mwanzelu pa nkhani ya vosangalasa vokhuzana na vamizimu.

Mukopewa vosangalasa vokhuzana na vamizimu (2:02)