Yachiŵili yoluta kuli Akolinto

2 Nasankha kuti powelasoti kuli mwewo, ulwendo wangu osati uzankhale wachisoni. 2 Chifukwa keno ningakuchitisheni kumvwa chisoni, akuti azanikondweleshe ni ŵani pakuti mwewo nakuchitishani kumvwa chisoni? 3 Nilemba vamene vala kuti nikazawela kwamene uko, osati nizankhale na chisoni chifukwa cha ŵanthu ŵanufunikila kusangalala nawo. Chifukwa nukhulupilila kuti vinthu vunichitisha kunkhala wosangalala, niyesoti vuchitisha mwewo monse kunkhala osangalala. 4 Newo nikulembelani yala kalata nuvutika, nili na nkhaŵa ngako komasoti nulila, osati nenzefuna kuti mumvwe chisoni, koma kuti muziŵe kuti nukukondani ngako.

5 Keno muyakine wachita vinthu vomvwisha chisoni, aliyemvwishe chisoni newo, koma maka-maka wamvwisha chisoni mwewo monse. Koma olo n’tetyo nufunalini kulaŵila ngako za nkhani yamene iyi. 6 Kuzuzuliwa na ŵanthu anyinji teti ni kokwanila kuli munthu wamene uyu. 7 Tetyo mukhululukileni na ntima wonse komasoti kumutonthoja, kuchitila kuti yove angankhale na chisoni chikulu ngako mpaka kutaya ntima. 8 Tetyo nukudandaulilani kuti mumusimikijile kuti mumukonda. 9 Nikulembelani na cholinga chakuti niziŵe keno nimwe chendi omvwila pa vinthu vonse. 10 Chilichonse chamwakhululukila munthu, nanesoti numukhululukila. Ndipo chilichonse chanakhululukila munthu (keno chilipo chanakhululuka) nachita vamene ivo chifukwa cha mwewo, pamenso pa Khilisitu, 11 kuti Satana osati atichenjelele, chifukwa tuziŵa luweme volinga* vake.

12 Penifwika ku Tolowa kuyalalikila uthenga uweme unena za Khilisitu, komasoti mwayi wokata ntchito ya Ambuye pewinisegukila, 13 ntima wangu uliye nkhale mmalo chifukwa niliye mufwane nkwangu Tito. Tetyo nilailana na akwasu kwamene uko noluta ku Makedoniya.

14 Koma tutembeja Mulungu wamene nthawe zonse otisogolela pamozi na Khilisitu monga kuti tukondwela pa chiwoneshelo chomekela kupambana. Ndipo kupitila muli sewo kavumba konunkhila luweme koziŵa Mulungu kofalikila paliponse. 15 Chifukwa kwa Mulungu nise kavumba konunkhila luweme konena za uthenga wa Khilisitu, kamene komvwiwa na ŵanthu amene akuyapulumushiwa komasoti amene akuyawonongewa. 16 Kuli amene awo akuyawonongewa nise vumba ya imfwa kuluta ku imfwa, koma kuli ŵala amene akuyapulumuka nise kavumba kaweme ka moyo kuluta ku moyo. Ndipo kansi ni ŵani wamene ni woyenelela kukata ntchito yamene iyi? 17 Sewo nise oyenelela. Chifukwa mawu a Mulungu tugulisalini* monga ni mwakuchitila ŵanthu anyinji, koma tulalikila mwachilungamo mokatijana na mwakufunikila kuchitila ophunzila a Khilisitu. Tatumiwa na Mulungu ndipo tuchita vamene ivi pamenso pa Mulungu wamene uyo.