Mwakutiyavyila Yehova kukwanilisha utumiki wasu

 1. Kansi tingayembekezele chinji, ndipo tingankhale osimikijila za chinji?

PATUKATA ntchito yasu yolalikila, tingayembekezele kushushiwa. Ndipo kushushiwa kwamene uku payakine kungayangijilike kusogolo. (Dan. 11:44; 2 Tim. 3:12; Chiv. 16:21) Olo n’tetyo, tingankhale osimikijila kuti Yehova azatipase thandizo yatufunikila. Ndaŵa yanji? Yehova nthawe zonse wankhala oyavya atumiki ŵake kukwanilisha utumiki wawo—viliyekanthu kuti utumiki wamene uyo ni wovuta tyani. Monga chisanzo cha vamene ivi, tiyeni tikambilane vinthu viyakine vichitikila mneneli Ezekieli, wamene elalikila kuli Ayuda amene enze ku ukapolo ku Babulo.

 2. Kansi Yehova eŵafotokoza tyani ŵanthu ŵenzefunika kulalikila Ezekieli, lomba kansi tikambilane chinji mu nkhani ino? (Ezekieli 2:3-6)

² Kansi Ezekieli enzefunika kulalikila ŵanthu a ntundu wanji? Yehova enena kuti ove enze “amwano,” “anthota,” na “opanduka.” Ove enze owononga monga ni minga komasoti oyofya monga ni tulija. N’chifukwa chake Yehova euja Ezekieli moweleja-weleja kuti: “Osayopa”! (Ŵelengani Ezekieli 2:3-6.) Ezekieli ekwanilisha ntchito yake yolalikila chifukwa (1) etumiwa na Yehova, (2) mzimu wa Mulungu wimupasa mphamvu zenzefunikila, komasoti (3) mawu a Mulungu etang’isha chikhulupililo chake. Kansi vinthu vamene ivi vitatu vimuyavya tyani Ezekieli? Lomba kansi masiku ŵano vutiyavya tyani?

 3. Kansi vuwoneka kuti ni mawu otyani etang’isha Ezekieli, ndipo Yehova emusimikijila tyani kuti amuyavye?

³ Yehova euja Ezekieli kuti: “Nukutumija.” (Eze. 2:3, 4) Vuwoneka kuti mawu amene aŵa emutang’isha ngako Ezekieli. Ndaŵa yanji? Ndaŵa yakuti yove ekumbukila kuti Yehova ekatishilasoti ntchito mawu monga ni amene aŵa pechisankha Mose na Yesaya kuti ankhale aneneli ŵake. (Eks. 3:10; Yes. 6:8) Ezekieli enzeziŵasoti mwamene Yehova mwechiyavyila aneneli aŵili amene aŵa kuti akwanilishe ntchito zawo zovuta. Tetyo, Yehova pechiuja Ezekieli maulwendo aŵili kuti: “Nukutumija,” mneneli wamene uyo enze na vifukwa viweme vokhulupilila kuti Yehova amuyavye. Kuyangijila pamene apa, m’buku ya Ezekieli moweleja-weleja tufwanamo mawu akuti: “Yehova elaŵila nane.” (Eze. 3:16) Ndipo moweleja-weleja, yove elemba kuti: “Yehova epitilija kulaŵila nane.” (Eze. 6:1) Kulaŵila chendi, Ezekieli enzesimikijila kuti etumiwa na Yehova. Atata ŵake Ezekieli enze wansembe. Vuwonena kuti ove emuphunzisa Ezekieli kuti Yehova nthawe zonse enzeuja aneneli ŵake kuti Yove akoŵayavya. Mwachisanzo, Yehova euja Isaki, Yakobo, na Yeremiya kuti: “Newo nili nawe.”—Gen. 26:24; 28:15; Yer. 1:8.

 4. Kansi ni mawu otyani otonthoja amene emutang’isha Ezekieli?

⁴ Kansi Aisiraeli anyinji echita tyani pechilalikiliwa na Ezekieli? Yehova enena kuti: “A ng’anda ya Isiraeli azafunelini kukumvwila, chifukwa ove ofunalini kunimvwila.” (Eze. 3:7) Mwa kukana Ezekieli, ŵanthu amene awo ekana Yehova. Mawu amene aŵa emusimikijila Ezekieli kuti kukana kwa ŵanthu kwenzetanthauzalini kuti yove wakangiwa ntchito yake monga mneneli. Yehova emusimikijilasoti Ezekieli kuti uthenga wachiweluzo wechilengeza ukazakwanilishiwa, ŵanthu “azaziŵe mphela kuti pakati pawo penze mneneli.” (Eze. 2:5; 33:33) Mosakaikila, mawu amene aŵa otonthoja emupasa mphamvu Ezekieli zenzefunikila kuti akwanilishe utumiki wake.

 5. Mokatijana na Yesaya 44:8, kansi sewo tutang’ishiwa na chinji?

⁵ Sewo nase tutang’a ntima chifukwa tuziŵa kuti Yehova niye etituma kuti tikolalikila. Yove otilemekeza potiita kuti mboni zake. (Yes. 43:10) Wamene uyu ni mwayi ukulu ngako! Monga mwechiujila Ezekieli Yehova kuti: “Osayopa,” Yehova oujasoti sewo kuti: “Osachita wowa.” Ndaŵa yanji tufunikalini kuyopa ŵala otishusha? Ndaŵa yakuti molingana na Ezekieli, sewo tutumiwa na Yehova ndipo Yove otiyavya.—Ŵelengani Yesaya 44:8.

 6. (a) Kansi Yehova otisimikijila tyani kuti akotiyavya? (b) Kansi tutonthojewa notang’ishiwa na chinji?

⁶ Yehova otisimikijila kuti akotiyavya. Mwachisanzo, akaliyenena kuti: “Mwewo nimwe mboni zangu,” Yehova enena kuti: “Popita pa manzi, newo nizankhale nawe. Potauka mimana, manzi azakumbijelini. Popita pa mulilo uzapyelini ndipo olo mbaliŵali ya mulilo izakuŵaulelini.” (Yes. 43:2) Tikolalikila, nthawe ziyakine tukumana na mavuto anyinji amene tingaŵalinganije na chigumula, komasoti mayeselo ovuta ngako amene tingaŵalinganije na mulilo. Koma Yehova otiyavya kuti tipitilije kulalikila. (Yes. 41:13) Monga mwevenzele m’masiku a Ezekieli, ŵanthu anyinji masiku ŵano okana kulalikiliwa. Koma vamene ivi vutanthauzalini kuti tuŵalalikilalini bwino. Tutonthojewa komasoti kutang’ishiwa poziŵa kuti Yehova osangalala tikapitilija kulengeza uthenga wake mokhulupilika. Ntumwi Paulo enena kuti: “Aliyense payeka azalondele mphaso yake mokatijana na ntchito yake.” (1 Akor. 3:8; 4:1, 2) Mulongo muyakine wamene wankhala mpainiya kwa nthawe itali, enena kuti: “Nusangalala kuziŵa kuti Yehova odalisa khama yasu.”

 7. Kansi Ezekieli enzekumvwa tyani akaganizila za mensomphenya ŵechiwona? (Onani chithunzi chapachikuto.)

⁷ Ezekieli ewona mphamvu ya mzimu wa Mulungu. Vechiwona Ezekieli m’mensomphenya, vimuyavya kuziŵa kuti mzimu utuŵa wenzeyavya angelo amphamvu komasoti kuyendesha mawilo akulu-akulu a galeta yakululu. (Eze. 1:20, 21) Kansi Ezekieli echita chinji? Yove elemba vamene ivo vichitika kuti: “Peniwona vamene ivo, nigwada noŵelama mpaka chinso changu pansi.” Chifukwa chochita wowa, Ezekieli epona pansi. (Eze. 1:28) Pavuli pake, Ezekieli akaganizila mensomphenya ochitisha chidwi amene aŵa, vuwoneka kuti enzekhulupilila ngako kuti angakwanilishe utumiki wake moyavyiwa na mzimu wa Mulungu.

8-9. (a) Kansi n’chinji chichitikila Ezekieli pechiujiwa na Yehova kuti apaname? (b) Kansi Yehova emutang’isha tyani Ezekieli m’gawo yake yovuta?

⁸ Yehova elamula Ezekieli kuti: “Wewo mwana wa munthu, panama kuti nilaŵile nawe.” Yehova pechiuja Ezekieli kuti apaname, yove epasiwa mphamvu zenzefunikila kuti apaname. Ezekieli elemba kuti: “Mzimu wiloŵa muli newo ndipo winipanamika.” (Eze. 2:1, 2) Papita nthawe komasoti pa utumiki wake wonse, Ezekieli enzesogolelewa na “kwanja” ya Mulungu—kapena kuti mzimu utuŵa wa Mulungu. (Eze. 3:22; 8:1; 33:22; 37:1; 40:1) Mzimu wa Mulungu witang’isha Ezekieli kuti akate ntchito yechipasiwa—yolalikila kuli ŵanthu “anthota na asamvwa” a m’gawo yake. (Eze. 3:7) Yehova euja Ezekieli kuti: “Nachitisha chinso chako kuti chinkhale chotang’a molingana na vyinso vawo, komasoti mphumi yako kuti inkhale yotang’a molingana na mphumi zawo. Nachitisha mphumi yako kunkhala monga ni mwala wa daimondi, yotang’a kupambana mwala wa nsangalabwi. Osaŵayopa, ndipo osati uchite wowa na vyinso vawo.” (Eze. 3:8, 9) Venze monga Yehova ouja Ezekieli kuti: ‘Osalola kuti kuyuma mitima kwa ŵanthu amene awo kukufokeshe. Nikutang’ishe.’

⁹ Pavuli pake, mzimu wa Mulungu winyamula Ezekieli kuluta naye m’gawo yake kuti akalalikile. Ezekieli elemba kuti, “Kwanja ya Yehova inikata mwamphamvu.” Petola sondo imozi kuti mneneli wamene uyu aphunzile noumvwisha bwino uthenga wenzefuna kuyalengeza kuti akwanishe kulalikila mofumila pansi pa ntima. (Eze. 3:14, 15) Pavuli pake, Yehova emuuja kuti alute kunshambo ndipo kwamene uko “mzimu wiloŵa muli [yove].” (Eze. 3:23, 24) Ezekieli enze wokonzeka kuyamba utumiki wake.

10. Kansi tufunikila thandizo yotyani kuti tikwanishe kukata ntchito yasu yolalikila, ndipo ndaŵa yanji?

¹⁰ Kansi tufunikila thandizo yotyani kuti tikwanishe kukata ntchito yasu yolalikila? Kuti tiyankhe, tiyeni tiganizile vichitikila Ezekieli. Akaliyeyamba kulalikila, mzimu wa Mulungu wimupasa mphamvu zenzefunikila. Molingana na Ezekieli, nase masiku ŵano tukwanisha kulalikila chifukwa chakuti mzimu wa Mulungu utiyavya. Ndaŵa yanji? Ndaŵa yakuti Satana ali pa nkhondo yolimbana nase pofuna kusokoneza ntchito yasu yolalikila. (Chiv. 12:17) Ŵanthu anyinji oganiza kuti Satana ni wamphamvu ngako mwakuti tingapambanelini pa nkhondo yolimbana naye. Koma kupitila mu ntchito yasu yochitila umboni, tumupambana! (Chiv. 12:9-11) Mu njila yotyani? Tikolalikila, tuwonesha kuti tuchitalini wowa na vakutiyofya navo Satana. Nthawe iliyonse yatulalikila, tunkhala kuti tumugonjesa Satana. Kansi n’chinji chuwonekela tikaziŵa kuti tingakwanishe kupitilija kulalikila olo kuti adani ŵasu otishusha? Vuwonekelatu luweme kuti Yehova otipasa mphamvu kupitila mu mzimu wake utuŵa komasoti kuti otikonda.—Mt. 5:10-12; 1 Pet. 4:14.

11. Kansi mzimu wa Mulungu ungatichitile chinji, ndipo tingachite tyani kuti tipitilije kuulondela?

¹¹ Kansi tuphunzilaposoti chinji tikaganizila mwechipasiliwa mphamvu Ezekieli zenzefunikila na Yehova kuti akwanishe kulalikila? Mzimu wa Mulungu ungatipase mphamvu zatufunikila kuti tikwanishe kulimbana na vuto iliyonse yatingakumane nayo pa utumiki wasu. (2 Akor. 4:7–9) Lomba kansi tingachite tyani kuti tipitilije kulondela mzimu wa Mulungu? Tufunika kupitilija kuusenga, nonkhala na chidalilo chakuti Yehova aamvwe mapemphelo ŵasu. Yesu ephunzisa ophunzila ŵake kuti: “Pitilijani kusenga, . . . pitilijani kusakila-sakila, . . . pitilijani kugogoza.” Poyankha, Yehova “apeleke mzimu utuŵa kuli ŵala omusenga.”—Lk. 11:9, 13; Mac. 1:14; 2:4.

12. Mokatijana na Ezekieli 2:9–3:3, kansi mpukutu wamene uyo wifumila kuni ndipo mwenze chinji?

¹² Ezekieli aliyepasiwe tyala mphamvu na mzimu utuŵa wa Mulungu, koma epasiwasoti mphamvu na mawu a Mulungu. M’mensomphenya, Ezekieli ewona kwanja yamene yenze na mpukutu. (Ŵelengani Ezekieli 2:9–3:3.) Kansi mpukutu wamene uyo wifumila kuni? Kansi mwenze chinji? Kansi wimuyavya tyani Ezekieli? Tiyeni tiwone. Mpukutu wamene uyo wifumila ku mpando wachifumu wa Mulungu. Vuwoneka kuti Yehova ekatishila ntchito mmozi mwa angelo 4 ŵechiwona Ezekieli poyambilila, kuti amupase mpukutu wamene uyo. (Eze. 1:8; 10:7, 20) Mu mpukutu wamene uyo mwenze mawu a Mulungu—kapena kuti uthenga ukulu wachiweluzo wenzefunika kupeleka Ezekieli kuli akapolo opanduka. (Eze. 2:7) Uthenga wamene uyu wilembewa seli na seli mu mpukutu wamene uyo.

13. Kansi Yehova emuuja kuti achite chinji Ezekieli na mpukutu, ndipo ndaŵa yanji wenze wonzuna?

¹³ Yehova euja mneneli wake kuti alye mpukutu wamene uyo ndipo “luvumo [yake] ikute.” Ezekieli emvwila, ndipo echilya mpukutu wonse wamene uyo. Kansi mbali yamene iyi ya mensomphenya yenzetanthauza chinji? Ezekieli enzefunika kumvwishisha luweme uthenga wenzeyembekezela kuzalengeza. Yove enzefunika kukhulupilila uthenga wamene uyo kuti umupase mphamvu zakuti aulengeze. Pavuli pake, pechitika chinthu chodabwisa. Ezekieli echimvwa kuti mpukutu wamene uyo “wenze wonzuna ngako monga ni uchi.” (Eze. 3:3) Ndaŵa yanji? Kuli Ezekieli, mwayi wopanamila Yehova chenze chinthu chonzuna ngako, kapena kuti chokondwelesha. (Sal. 19:8-11) Yove enzetembeja kuti Yehova emuvomeleja kunkhala mneneli wake.

14. Kansi n’chinji chiyavya Ezekieli kunkhala wokonzeka kuti akwanilishe utumiki wake?

¹⁴ Pavuli pake, Yehova euja Ezekieli kuti: “Usunge muntima mwako mawu ŵangu onse ŵanukuuja, ndipo umvwe na matu ŵako.” (Eze. 3:10) Na malangizo amene aŵa, Yehova euja Ezekieli kuti asunge mmaganizo mwake mawu onse olembewa mu mpukutu wamene uyo noŵaganizila. Ezekieli pechichita vamene ivi, chikhulupililo chake chinkhala chotang’a. Komasoti vimuchitisha kuti akapeleke uthenga wamphamvu kuli ŵanthu. (Eze. 3:11) Pakuti uthenga wa Mulungu wenze muntima mwake na pakamwa pake, Ezekieli enze wokonzeka kukata ntchito yake noikwanilisha.—Yelekezelani na Salimo 19:14.

15. Kuti tipilile, kansi tufunika ‘kusunga chinji muntima mwasu’?

¹⁵ Kuti tipilile pokata ntchito yasu yolalikila, nase tufunika kulola kuti mawu a Mulungu apitilije kutang’isha chikhulupililo chasu. Tufunika “kusunga muntima” vinthu vonse vakutiuja Yehova. Masiku ŵano, Yehova olaŵila nase kupitila m’Mawu ŵake, Baibolo. Kansi tingasimikijile tyani kuti Mawu a Mulungu opitilija kukhuza maganizo ŵasu, mwatumvwila na volinga vasu?

16. Kansi tufunika kuchita tyani na Mawu a Mulungu, ndipo tingaŵaloŵeshe tyani muntima mwasu?

¹⁶ Tikalya chakulya ndipo chikagaika mmala, muŵili wasu unkhala wamphamvu. Ndipo keno tuphunzila Mawu a Mulungu noŵaganizila, chikhulupililo chasu chunkhala chotang’a. Yamene iyi ni phunzilo yakufuna Yehova kuti tiphunzile. Yehova ofuna kuti ‘tijuje maluvumo ŵasu na Mawu ŵake,’ kapena kuti kuŵamvwisha luweme. Tingakwanishe kuchita vamene ivi mwa kupemphela, kuŵelenga, komasoti kuganizila. Choyamba, tupemphela kuti tikonzekeleshe ntima wasu kulondela maganizo a Mulungu. Pavuli pake, tuŵelenga uthenga wa m’Baibolo. Pamapeto pake, tupanama noganizila ngako vataŵelenga. Kansi vokonkhapo vake vunkhala votyani? Keno tuganizila ngako, niye patumvwishasoti ngako Mawu a Mulungu, ndipo otang’isha chikhulupililo chasu.

17. Ndaŵa yanji kuganizila vatuŵelenga m’Baibolo n’kofunika?

¹⁷ Ndaŵa yanji kuŵelenga Baibolo noganizila n’kofunika? Kuchita vamene ivi kutipasa mphamvu zatufunikila kuti tikolalikila uthenga wa Ufumu palipano, na kuzalengeza uthenga wovuta ngako wachiweluzo watingazalalikila kwalombapano kusogolo. Komasoti, keno tuganizila za minkhalidwe iweme ya Yehova, ushamwali wasu na yove utang’e ngako. Monga vokonkhapo vake, tinkhale na chinthu chonzuna olo chosangalasa—chamene ni ntendele nonkhala wokhutila.—Sal. 119:103.

18. Kansi ŵanthu a m’gawo yasu azazindikile chinji, ndipo ndaŵa yanji?

¹⁸ Ezekieli enze mneneli, koma sewo niselini aneneli. Olo n’tetyo, nise osimikija kupitilija kulengeza uthenga woujiliwa wa Yehova wechisunga m’Mawu ŵake, mpaka ntchito yolalikila izasile. Nthawe yachiweluzo ikazafwika, ŵanthu a m’gawo yasu azaŵeve chifukwa chonenela kuti aliyechenjejewe kapena kuti Mulungu eŵanyalanyaza. (Eze. 3:19; 18:23) Mmalomwake, azafunike kuzindikila kuti uthenga wetenzelalikila wifumila kwa Mulungu.

19. Kansi n’chinji chutipasa mphamvu kuti tikwanilishe utumiki wasu?

¹⁹ Kansi n’chinji chutipasa mphamvu kuti tikwanilishe utumiki wasu? Ni vinthu vimo na vimo vokwana vitatu vitang’isha Ezekieli. Tupitilija kulalikila chifukwa tuziŵa kuti titumiwa na Yehova, tutang’ishiwa na mzimu utuŵa wa Mulungu, komasoti tulimbikisiwa na Mawu a Mulungu. Na thandizo ya Yehova, tulimbikisiwa kukwanilisha utumiki wasu, komasoti kupilila “mpaka pa mapeto.”—Mt. 24:13.