Kansi uthenga uweme ulalikiliwa tyani?

Kwalombapano Yehova akatishile ntchito Ufumu wake kusilija mavuto onse ŵatukumana nawo. Uthenga wamene uyu ni uweme ngako ndipo ŵanthu onse ofunikila kuumvwa. Yesu euja ophunzila ŵake kuti ofunikila kuujako ŵanthu ayakine uthenga wamene uyu! (Mateyu 28:19, 20) Kansi a Mboni za Yehova ochita tyani vinthu vamene ivi vechisenga Yesu masiku ŵano?

1. Kansi lemba ya Mateyu 24:14 yukwanilishiwa tyani masiku ŵano?

Yesu enena kuti: “Uthenga uweme uyu wa Ufumu uzalalikiliwe pachalo chonse.” (Mateyu 24:14) A Mboni za Yehova onkhala okondwela ngako kukatanawo ntchito yamene iyi yofunika ngako. Tulalikila uthenga uweme wamene uyu pachalo chonse mu vilaŵilo vopitilila 1.000! Ntchito ikulu yamene iyi yufunikila khama ngako komasoti ŵanthu anyinji adongosolo. Koma paliye thandizo ya Yehova ntchito yamene iyi sembe iliye kwanishike.

2. Kansi tuwonesha tyani khama polalikila ŵanthu?

Cholinga chasu ni kulalikila ŵanthu paliye kanthu kuti onkhala kuni. N’chimozi-mozisoti na Akhilisitu a m’nthawe ya kuvuli enzelalikila “ng’anda na ng’anda.” (Machitidwe 5:​42) Mwa njila yamene iyi tukwanisha kulalikila ŵanthu mamiliyoni anyinji chaka chilichonse. Pakuti ŵanthu nthawe ziyakine opezekalini pa ng’anda, tulalikilasoti mmalo mupezeka ŵanthu anyinji. Nthawe zonse tusakila mipata yakuti tilaŵile na ŵanthu za Yehova komasoti zokhuza chifunilo chake.

3. Niŵani ali na udindo wolalikila uthenga uweme?

Akhilisitu onse achendi ali na udindo wolalikila uthenga uweme kuli ŵanthu ayakine. Ndipo sewo tuwona udindo wamene uyu kunkhala wofunikila ngako. Aliyense wa sewo ochita vilivonse vangakwanishe pa ntchito yamene iyi, tuchita vamene ivi chifukwa chakuti tuziŵa kuti moyo wa ŵanthu anyinji uli pa ngozi. (Ŵelengani 1 Timoteyo 4:​16.) Tulondelalini malipilo kuti tichite ntchito yamene iyi chifukwa Baibolo yunena kuti: “Mwilondela kwaulele, pelekani kwaulele.” (Mateyu 10:​7, 8) Niŵanthulini anyinji omvwishila uthenga wasu. Koma sewo tupitilija kulalikila, chifukwa tufuna kumvwila Yehova nakukondwelesha ntima wake.

VATI TIPHUNZILE

4. Sewo tuyeja-yeja ngako kuti tilalikile ŵanthu onse

VIDIYO: Kulalikila “mpaka kumapeto kwa chalo” (7:​33)

• Kansi mwewo muganiza tyani pa vonse vakuchita a Mboni za Yehova kuti alalikile?

Ŵelengani Mateyu 22:39 na Aroma 10:13-​15, ndipo pavuli pake mukambilane makonsho aŵa:

• Kansi ntchito yasu yolalikila yuwonesha tyani kuti tukonda ŵanthu?

• Kansi Yehova akumvwa tyani akawona ŵala olalikila uthenga uweme?—Onani vesi 15.

5. Nise antchito ayake a Mulungu

Tili na vokonkhapo viweme vamene vuwonesha kuti Yehova oyavya pa ntchito yamene iyi. Mwachisanzo, onani vechitika ku New Zealand na m’bale muyakine oitiwa kuti Paul, nsiku iyakine nzuŵa penzelalikila ku ng’anda na ng’anda yove efwana mwanakazi muyakine, wamene nsiku yamene iyo ku mmawa enze epemphela kwa Mulungu, pokatishila ntchito zina ya Mulungu, Yehova, esenga kuti munthu muyakine awele ku ng’anda kwake. Paul onena kuti “pechingopita ma awazi atatu newo nigogoza pa muliyango wake.”

Ŵelengani 1 Akorinto 3:9, ndipo pavuli pake mukambilane konsho iyi:

• Kansi visanzo volingana na vamene ivi vuwonesha tyani kuti Yehova osogolela ntchito yamene iyi yolalikila?

Ŵelengani Machitidwe 1:8, ndipo pavuli pake mukambilane konsho iyi:

• Ndaŵa yanji tufunika thandizo ya Yehova kuti tikwanishe kuchita ntchito yamene iyi yolalikila?

Kansi mwewo muziŵa?

Sondo iliyonse pa misonkhano yasu ya nkati mwa sondo, tulondela malangizo amene otiyavya kuziŵa mwatingalalikilile. Kansi mwewo mwelutako mwa umozi mwa misonkhano yamene iyi? Mwiyiwona tyani misonkhano yamene iyi?

6. Tumvwila lamulo yechitipasa Mulungu

Mu nthawe ya atumwi, ŵanthu ayakine eyeja-yeja kuti ophunzila ŵa Yesu aleke kulalikila. Akhilisitu achendi “epanga makonzedwe . . . akuti kulalikila uthenga uweme osati kupaname.” (Afilipi 1:7) A Mboni za Yehova ochitasoti chimozi -mozi masiku ŵano.a

VIDIYO: Kuteteza uthenga uweme mwalamulo (2:​28)

Ŵelengani Machitidwe 5:​27-​42, ndipo pavuli pake mukambilane konsho iyi:

• Ndaŵa yanji tingalekelini kulalikila?—Onani mavesi 29, 38, na 39.

MFUNDO ZACHIDULE

Yesu euja ophunzila ŵake kuti alalikile uthenga uweme kumitundu yonse. Yehova oyavya atumiki ŵake kuti akate ntchito yamene iyi.

Makonsho oweleja

• Kansi uthenga uweme ulalikiliwa tyani pa chalo chonse?

• Kansi ntchito yasu yolalikila yuwonesha tyani kuti tukonda ŵanthu?

• Kansi mwewo muwona kuti ntchito yolalikila ingakuleteleni chisangalalo? Ndaŵa yanji?

PHUNZILANI VINYINJI

Onani mwakulalikilila a Mboni za Yehova m’matauni a kulu-akulu.

Ulaliki wa padela ku malo opezeka ŵanthu anyinji ku Paris (5:​11)

Kansi a Mboni za Yehova ochita tyani kuti ayavye ŵanthu othaŵa kwawo?

Kuyavya ŵanthu othaŵa kwawo kusilija njota ya uzimu (5:​59)

Magireti enkhala ochita ntchito yolalikila pa moyo wake wonse. Onani kuti kuchita vamene ivi kwemuletela chisangalalo yove.

Nine wosangalala na ntchito yenisankha (6:29)

Onani milandu iyakine yetipambana kuti ntchito yolalikila uthenga uweme ipite pasogolo.

“Olalikila za ufumu akuya ku makhoti” (Ufumu wa Mulungu Ukulamulira!, mutu 13)

5. Ichi chalo chachinja ngako kufumila mu 1914

Lolelani VIDIYO.

VIDIYO: Ichi chalo chachinja ngako kufumila mu 1914 (1:​10)

Yesu elaŵililatu vinthu viti vizachitike pa chalo ichi, yove akezenkhala Mfumu. Ŵelengani Luka 21:​9-​11, ndipo pavuli pake mukambilane konsho iyi:

• Pa vinthu vatomolewa pa lemba iyi, ni vinthu votyani vimwiwonako vuchitika olo kumvwako kuti vachitika?

Mtumwi Paulo efotokoza minkhalidwe yati azankhale nayo ŵanthu m’masiku yosilija. Ŵelengani 2 Timoteyo 3:​1-5, ndipo pavuli pake mukambilane konsho iyi:

• Mokatijana na lemba iyi, muwona kuti ni minkhalidwe yotyani yakuwonesha ngako ŵanthu masiku ŵano?

6. Mukowonesha kuti mukhulupilila kuti Ufumu wa Mulungu utonga

Ŵelengani Mateyu 24:​3, 14, ndipo pavuli pake mukambilane makonsho aŵa:

• Kansi ni ntchito yofunika ngako yotyani yuwonesha kuti Ufumu wa Mulungu utonga?

• Kansi mungachite tyani kuti muyambe kukata nawo ntchito yamene iyi?

Ufumu wa Mulungu utonga pali pano, ndipo lombapano uyambe kutonga pa chalo chonse. Ŵelengani Aheberi 10:24, 25, ndipo pavuli pake mukambilane konsho iyi:

• Kansi aliyense wa sewo ofunika kuchita chinji ‘patuwona kuti nsiku yamene iyo ili pafupi kufwika’?