MUTU 54
Kansi “Kapolo Wokhulupilika na Wanzelu” ni ŵani, ndipo ochita chinji?
Yesu niye Mutu wa mpingo wa Chikhilisitu. (Aefeso 5:23) Popeza kuti Yesu alikululu, masiku ŵano osogolela ŵanthu ŵake pano pachalo pokatishila ntchito “kapolo wokhulupilika na wanzelu.” (Ŵelengani Mateyu 24:45.) Yesu Khilisitu niye osankha “kapolo wamene uyu” ndipo emupasa vochita mu mpingo wa Chikhilisitu, komalomba kapolo wamene uyu ofunika kumvwila Khilisitu ndipo otumikila abale a Khilisitu. Kansi kapolo wamene uyu ni ŵani? Lomba otisamalila tyani?
1. Kansi “kapolo wokhulupilika na wanzelu” ni ŵani?
Yehova wankhala okatishila ntchito munthu olo kagulu ka ŵanthu popeleka malangizo kuli ŵanthu ŵake. (Malaki 2:7; Aheberi 1:1) Pavuli pakuti Yesu wapaiwa, atumwi komasoti akulu a ku Yerusalemu niye enzesogolela mpingo wa Chikhilisitu. (Machitidwe 15:2) Molingana na vamene ivi, masiku ŵano ka gulu katontho ka akulu—kamene ni Bungwe Yutonga ya Mboni za Yehova—kopeleka chakulya chauzimu komasoti kosogolela pa ntchito yolalikila. Kagulu kamene aka niye “kapolo wokhulupilika na wanzelu wamene [Yesu] wechiika.” (Mateyu 24:45a) Abale onse a m’Bungwe Yutonga ni Akhilisitu ozozewa na mzimu utuŵa ndipo oyembekezela kuti akazamwalila azalute kululu kuyalamulila pamozi na Khilisitu.
2. Kansi ni chakulya chauzimu chotyani chamene kapolo wokhulupilika chakupeleka?
Yesu enena kuti kapolo wokhulupilika akokuzapeleka “chakulya [kuli Akhilisitu ayawo] pa nthawe yoyenelela.” (Mateyu 24:45b) Molingana na chakulya chamene chutiyavya kuti tinkhale amphamvu komasoti athanzi, chakulya chauzimu—chamene ni malangizo ofumila m’Mawu a Mulungu—chutipasa mphamvu kuti tipitilije mphela kunkhala okhulupilika kwa Yehova komasoti kuti tikokata ntchito yechitipasa Yesu. (1 Timoteyo 4:6) Tulondela chakulya chamene ichi kupitila m’misonkhano ya mpingo, yadela komasoti yachigawo, tulondelasoti malangizo kupitila m’mabuku ofotokoza Baibolo komasoti mavidiyo amene otiyavya kuti tikochita vakufuna Mulungu na cholinga chakuti titang’ishe ushamwali wasu na yove.
VATI TIPHUNZILE
Tiwone chifukwa chatufunikila “kapolo wokhulupilika na wanzelu”—wamene ni Bungwe Yutonga.
Bungwe Yutonga yupeleka chakulya chauzimu, malangizo komasoti yuyavya a Mboni za Yehova amene akumana na mavuto pachalo chonse
3. Ŵanthu a Yehova ofunika kuchita vinthu mwadongosolo
Mosogolelewa na Yesu, Bungwe Yutonga yusogolela ntchito ya Mboni za Yehova kuti ikoyenda mwadongosolo. Yesu enzesogolela Akhilisitu a mu nthawe ya atumwi mu njila yolingana na yamene iyi. Lolelani VIDIYO.
Ŵelengani 1 Akorinto 14:33, 40, ndipo pavuli pake mukambilane konsho iyi:
Kansi mavesi aŵa owonesha tyani kuti Yehova ofuna kuti atumiki ŵake akochita vinthu mwadongosolo?
4. Kapolo wokhulupilika osogolela ntchito yolalikila
Ntchito yolalikila yenze yofunika ngako kuli Akhilisitu a mu nthawe ya atumwi. Ŵelengani Machitidwe 8:14, 25, ndipo pavuli pake mukambilane makonsho aŵa:
Kansi ni ŵani enzesogolela ntchito yolalikila mu nthawe ya atumwi?
Kansi Petulo na Yohane echita tyani pechipasiwa malangizo na atumwi ayawo?
Ntchito yofunika ngako yamene Bungwe Yutonga yayusogolela ni ntchito yolalikila. Lolelani VIDIYO.
Yesu enena kuti ntchito yolalikila ni yofunika ngako. Ŵelengani Maliko 13:10, ndipo pavuli pake mukambilane makonsho aŵa:
Ndaŵa yanji Bungwe Yutonga yuwona kuti ntchito yolalikila ni yofunika ngako?
Ndaŵa yanji tufunikila “kapolo wokhulupilika na wanzelu” kuti akoyendesha ntchito yolalikila yamene yuchitika pachalo chonse?
5. Kapolo wokhulupilika opeleka malangizo
Abale a m’Bungwe Yutonga opeleka malangizo kuli Akhilisitu pachalo chonse. Kansi oziŵa tyani malangizo ŵangafunike kupeleka? Onani mwamene bungwe yutonga ya mu nthawe ya atumwi mweyenzechitila vamene ivi. Ŵelengani Machitidwe 15:1, 2, ndipo pavuli pake mukambilane makonsho aŵa:
Kansi Akhilisitu a mu nthawe ya atumwi enzevutika kukatijana pa nkhani yotyani?
Kansi Paulo, Baranaba na ŵanthu ayakine eluta kwaŵani kuti akaŵapase malangizo osilijila nkhani yamene iyo?
Ŵelengani Machitidwe 15:12-18, 23-29, ndipo pavuli pake mukambilane konsho iyi:
Ikaliye gamula vochita, kansi bungwe yutonga ya mu nthawe ya atumwi ichita chinji kuti iziŵe maganizo a Mulungu pa nkhani yamene iyi?—Onani mavesi 12, 15, na 28.
Ŵelengani Machitidwe 15:30, 31 na 16:4, 5, ndipo pavuli pake mukambilane makonsho aŵa:
Kansi Akhilisitu a mu nthawe ya atumwi echita tyani pechilondela malangizo ofumila ku bungwe yutonga?
Kansi Yehova eŵadalisa tyani chifukwa chomvwila malangizo amene awo?
Ŵelengani 2 Timoteyo 3:16 na Yakobo 1:5, ndipo pavuli pake mukambilane konsho iyi:
Kansi Bungwe Yutonga ya masiku ŵano yuchita tyani kuti ifwane malangizo ikafuna kusankha vochita?
ŴANTHU AYAKINE ONENA KUTI: “Keno muzingomvwila Bungwe Yutonga munkhala kuti mukungokonkhelela malangizo a ŵanthu.”
Kansi ni chinji chukusimikijilani kuti Yesu niye osogolela Bungwe Yutonga?
MFUNDO ZACHIDULE
Bungwe Yutonga ni “kapolo wokhulupilika na wanzelu” wamene eikiwa na Khilisitu. Kapolo wamene uyu opeleka malangizo na chakulya chauzimu kuli Akhilisitu pachalo chonse.
Makonsho oweleja
Kansi “kapolo wokhulupilika na wanzelu eikiwa na ŵani”?
Kansi Bungwe Yutonga yutisamalila tyani?
Kansi mwewo mukhulupilila kuti Bungwe Yutonga ni “kapolo wokhulupilika na wanzelu”?
PHUNZILANI VINYINJI
Onani mwamene Bungwe Yutonga mwayukatila ntchito zake.
“Kansi Bungwe Yutonga ya Mboni za Yehova yuchita votyani?” (Nkhani yapa webisaiti)
Onani vayuchita Bungwe Yutonga pofuna kuloleshesha kuti tulondela chakulya chauzimu chiweme.
Kansi abale a m’Bungwe Yutonga oiwona tyani ntchito yechipasiwa na Yesu?
Kansi misonkhano yasu ya mpingo, ikulu-ikulu yuwonesha tyani kuti Yehova osogolela Bungwe Yutonga?