Mukoyavya Mpingo wanu

Pa chalo chonse atumiki a Yehova okondwela kutumikila Yehova m’mipingo ya mudela yakunkhala. Ove osangalala na malangizo ŵakulondela ndipo oyeja-yeja kuyavya mpingo wawo mu njila zosiyana-siyana. Kansi muwona kuti namwesoti mufunika kuyavya mpingo wanu?

1. Kansi mungakatishile tyani ntchito nthawe komasoti mphamvu zanu poyavya mpingo?

Tonse tingayavye mu mpingo mu njila zosiyana-siyana. Mwachisanzo, kansi mu mpingo wanu muli ŵanthu ayakine amene ni achikulile komasoti amene olwala? Kansi mungaŵayavye kuti akopezeka pa misonkhano? Olo kansi mungaŵayavye vinthu viyakine monga kuyeŵagulila vinthu, olo kuŵayavya kukata ntchito za pamuliyango? (Ŵelengani Yakobo 1:27.) Tingalipelekesoti poyavya kuwamya notuŵisha Ng’anda ya Ufumu yasu. Paliye amene otikakamija kuti tikokata ntchito zamene izi. Koma chifukwa chakuti tukonda Yehova na abale ŵasu, “tulipeleka mofunishisha.”—Salimo 110:3.

A Mboni za Yehova obatiziwa angayavye mpingo mu njila ziyakinesoti. Abale amene akwanilisha mfundo za m’malemba zoŵayavya kuti ayenelele udindo mu mpingo, angasankhiwe kuti atumikile monga atumiki othandiza kupita kwa nthawe angayenelele kunkhala akulu. Abale na alongo angayangijile vakuchita pa ntchito yolalikila potumikila monga apainiya. A Mboni ayakine angayavye pokata nawo ntchito yomanga malo olambilila payakine angafulukile mu mpingo uyakine mwamene mufunikila ŵanthu kuti akayavye.

2. Kansi tingakatishile tyani ntchito ndalama na vinthu vasu viyakine poyavya mpingo?

Tingakwanishe “kulemekeza Yehova na vinthu vasu vantengo wapatali.” (Miyambo 3:9) Tusangalala ngako kukatishila ntchito ndalama na vinthu viyakine kuti tiyavye mpingo wasu komasoti ntchito yolalikila yamene yuchitika pa chalo chonse. (Ŵelengani 2 Akorinto 9:7.) Vinthu vatupeleka vukatishiliwasoti ntchito pakachitika ngozi za mu chilengedwe. Ŵanthu anyinji osankha kuti “akoika kayakine pa mbali” kuti akwanishe kupeleka. (Ŵelengani 1 Akorinto 16:2.) Tingakwanishe kupeleka ndalama zasu pokatishila ntchito mabokosi a vopeleka amene opezeka m’malo ŵasu olambilila payakine tingakwanishe kupeleka kupitila pa donate.jw.org. Yehova watipasa mwayi wowonesha kuti tumukonda ndipo tingachite vamene ivi popeleka vinthu vatili navo.

VATI TIPHUNZILE

3. Tingakatishile ntchito vinthu vatili navo

Yehova na Yesu okonda ŵanthu amene opeleka mosangalala. Mwachisanzo, Yesu etembeja mayi wamasiye wamene enze na tundalama tutontho ngako, koma etupeleka kwa Yehova. Ŵelengani Luka 21:1–4, ndipo pavuli pake mukambilane makonsho aŵa:

• Kansi tingapeleke kwa Yehova keno tili tyala na ndalama zinyinji?

• Kansi Yehova na Yesu akumvwa tyani tikapeleka kufumila pansi pa ntima?

Kuti muwone mwavukatila ntchito vopeleka vasu, lolelani VIDIYO. Ndipo pavuli pake mukambilane konsho iyi.

VIDIYO: ‘Mukopeleka mphaso kwa Yehova’ (4:47)

• Kansi vopeleka vukatishiliwa tyani ntchito kuti viyavye mipingo pa chalo chonse?

4. Tingalipeleke kukata ntchito ziyakine

Atumiki a Yehova akale enzelipeleka pokata ntchito yowamya malo ŵawo olambilila. Ove anzechita vamene ivi olo kuti enze epelekakale ndalama zoyavya pa ntchito yamene iyo. Ŵelengani 2 Mbiri 34:9-11, ndipo pavuli pake mukambilane konsho iyi:

• Kansi ntumiki wa Yehova aliyense ku Isiraeli enzeyavyako tyani posamalila ng’anda ya Yehova, olo kuti malo olambilila?

Kuti muwone mwakuchitila vinthu a Mboni za Yehova mokatijana na chisanzo chamene ichi cha m’Baibolo, lolelani VIDIYO. Ndipo pavuli pake mukambilane makonsho aŵa.

VIDIYO: Kusamalila malo ŵasu olambililapo (3:31)

• Ndaŵa yanji tufunikila kukata nawo ntchito yowamya notuŵisha Ng’anda ya Ufumu yasu?

• Kansi ni vinthu votyani vamungachite poyavya kusamalila malo olambilila?

5. Abale angayangijile vakuchita kuti ayenelele kupasiwa maudindo

Malemba olimbikisa abale kuti akoyeja-yeja kuchita vonse vangakwanishe poyavya mpingo. Kuti muwone chisanzo cha vangachite, lolelani VIDIYO. Ndipo pavuli pake muyankhe konsho iyi.

VIDIYO: Abale—Yeja-yejani kuti mukate ntchito iweme (5:19)

• Muvidiyo yamene iyi, kansi Ryan echita votyani kuti akochita vinyinji poyavya mpingo?

Baibolo yufotokoza vangachite abale kuti ayenelele kunkhala atumiki othandiza komasoti akulu. Ŵelengani 1 Timoteyo 3:1-13, ndipo pavuli pake mukambilane makonsho aŵa:

• Kansi abale amene ofuna kutumikila monga atumiki othandiza komasoti akulu ofunika kukwanilisha vinthu vini?

• N’nga ŵanthu am’banja mwawo ofunika kunkhala na minkhalidwe yotyani?—Onani vesi 4 na 11.

• Kansi aliyense mumpingo opindula tyani abale akoyeja-yeja kukwanilisha vinthu vamene ivi?

MFUNDO ZACHIDULE

Yehova otembeja ngako vonse vatuchita pokatishila ntchito nthawe yasu, mphamvu zasu komasoti vinthu vatili navo poyavya mpingo.

Makonsho oweleja

• Kansi tingakatishile tyani ntchito nthawe yasu komasoti mphamvu zasu poyavya mpingo?

• Kansi tingakatishile tyani ntchito vinthu vatili navo poyavya mpingo?

• Kansi ni vinthu votyani vamufuna kuchita mwewo poyavya mpingo?

PHUNZILANI VINYINJI

Onani chifukwa chake Mulungu ofunalini kuti ŵanthu omulambila akopeleka chakhumi masiku ŵano.

“Kansi Baibolo yunena votyani pa nkhani yopeleka chakhumi?” (Nkhani yapa webisaiti)

Baibolo yupeleka maudindo ayakine kwa enekwasu obatizika. Lomba tyani kalongosi kansi naye angapasiwe maudindo ayakine?

“Kumvwisha umutu mu Mpingo?” (Nsanja ya Olonda, Febuluwale 2021)

Lolelani vidiyo iyi kuti muwone venzechita a Mboni ayakine otang’a ntima kuti akapeleke mabuku kwa Akhilisitu ayawo.

Ntchito yotumija mabuku ku Congo (4:25)

Onani njila zatufwanila ndalama zoyendeshela ntchito yasu yamene ni yosiyana ngako na vipembezo viyakine.

“Kansi ndalama zoyendeshela ntchito ya Mboni za Yehova ozifwana kuni?” (Nkhani yapa webisaiti)