MUTU 40
Kansi tingachite tyani kuti tinkhale atuŵa mmenso mwa Mulungu?
Tiyeni tiganizile vakuchita mama pakukonzekelesha mwana wake kuti alute ku sikulu. Yove owoneshesha kuti mwana wake wasamba bwino ndipo wavwala vovwala vituŵa. Vamene ivi vuthandiza kuti mwana wamene uyo ankhale na thanzi iweme, ndipo ŵanthu ayakine owona kuti makolo ŵake omusamalila luweme. N’chimozi-mozi na Atata ŵasu ŵachikondi Yehova, ofuna kuti tikonkhala atuŵa—mmbali zonse mwakuthupi, mwatuganizila na mwatulaŵilila vikowonesha kuti nise atuŵa. Tikoyeja-yeja kunkhala atuŵa, vinthu vutiyendela luweme komasoti tulemekeza Yehova.
1. Kansi tingachite tyani kuti tinkhale atuŵa mwakuthupi?
Yehova otiuja kuti: “Munkhale atuŵa.” (1 Petulo 1:16) Kuti Yehova akotiwona kuti nise atuŵa, tufunika kunkhala na minkhalidwe ituŵa komasoti kunkhala atuŵa mwakuthupi. Tingankhale atuŵa mwakuthupi keno tusamba nthawe zonse, kuchapa vovwala vasu, kuwamya pamulyango komasoti keno tuwoneshesha kuti motoka olo njinga yasu nizituŵa. Tingakate nawosoti ntchito yotuŵisha Ng’anda ya Ufumu yasu. Tikoyeja-yeja kunkhala atuŵa mwakuthupi, tulemekeza Yehova.—2 Akorinto 6:3, 4.
2. Kansi tufunika kupewa minkhalidwe yotyani kuti tinkhale atuŵa?
Baibolo yutilimbikisa kuti “tilituŵishe ndipo tichose chinthu chilichonse chuipisha muŵili olo mzimu.” (2 Akorinto 7:1) Vamene ivi vutanthauza kuti tufunika kupewa chilichonse chamene chingawononge muŵili olo maganizo ŵasu. Vatuganiza vufunika kukondwelesha Yehova, ndipo tufunika kuyeja-yeja kupewa kuganizila vinthu viipa. (Salimo 104:34) Tufunikasoti kuyeja-yeja kuti volaŵila vasu vikonkhala viweme.—Ŵelengani Akolose 3:8.
Kansi ni vinthusoti votyani vingachitishe kuti osati tinkhale atuŵa mwakuthupi komasoti mwa maganizo? Pali vinthu viyakine vingawononge miŵili yasu. Tetyo tupewa vinthu monga kupepa fwaka, chamba, kulya nshaŵa ziyakine zuitiwa kuti betel, kulya matepo ayakine anazina yakuti coca, kukatishila ntchito mankhwala okolwesha komasoti kukatishila ntchito mankhwala mu njila iipa. Tikopewa vinthu vamene ivi tunkhala ŵanthu athanzi komasoti tuwonesha kuti tulemekeza mphaso ya moyo. Tufunikasoti kuyeja-yeja kunkhala atuŵa mwa minkhalidwe popewa minkhalidwe yamene ingachitishe kuti tinkhale atuŵa monga, kulisoŵeleka viwalo vobisika nololela mavidiyo owonesha ŵanthu oyonana. (Salimo 119:37; Aefeso 5:5) Ni vipepulini kuleka minkhalidwe monga ni yamene iyi, koma olo n’tetyo Yehova angatiyavye kuti tiileke.—Ŵelengani Yesaya 41:13.
VATI TIPHUNZILE
Tiphunzile nowona chifukwa chake tikankhala atuŵa mwakuthupi tulemekeza Yehova, komasoti tiwone vatingachite kuti tileke minkhalidwe ingatichitishe kuti tileke kunkhala atuŵa.
3. Tikankhala atuŵa mwakuthupi tulemekeza Yehova
Tikoŵelenga vokhuza malamulo ŵechipeleka Yehova ku n’tundu wa Isiraeli, tuwona kuti Yehova ofuna kuti ŵanthu ŵake akonkhala atuŵa. Ŵelengani Ekisodo 19:10 na 30:17-19, ndipo pavuli pake mukambilane makonsho aŵa:
Kansi mavesi amene aŵa owonesha tyani kuti Yehova ofuna kuti ŵanthu ŵake akonkhala aukhondo?
Lomba kansi ni vinthu votyani vamufunikila kuchita kuti munkhalemphela atuŵa mwakuthupi?
Pofunikila nthawe komasoti khama kuti munthu ankhale waukhondo. Koma n’vokwanishika kuchita vamene ivi posatolela dela yatunkhala komasoti kuti nise olemela olo osauka. Lolelani VIDIYO, ndipo pavuli pake mukambilane konsho iyi.
Kansi vinthu vasu vikosungiwa mwa dongosolo komasoti mwaukhondo vingachitishe tyani kuti ŵanthu ŵatulalikila akolemekeza Yehova?
4. Lekani minkhalidwe iipa
Yehova angatiyavye kuleka minkhalidwe iipa
Keno mupepa fwaka olo kukatishila ntchito mankwala osokoneza tonfwe chifukwa chongofuna kusangalala, n’vowonekelatu kuti muziŵa mwavukuvutilani kuleka minkhalidwe yamene iyi. Kansi n’chinji chingakuyavyeni? Mukoganizila mwakungakhuzile moyo wanu kuchita vamene ivi. Ŵelengani Mateyu 22:37-39, ndipo pavuli pake mukambilane mwamene kupepa fwaka olo kukatishila ntchito mankhwala mophoniyeka mwakungakhuzile . . .
ushamwali wamene munthu walinawo na Yehova.
banja ya munthu na ŵanthu ayakine.
Ganizilani vamungachite kuti mukwanishe kuleka nkhalidwe iipa.a Lolelani VIDIYO.
Ŵelengani Afilipi 4:13, ndipo pavuli pake mukambilane konsho iyi:
Kansi kupemphela, kuphunzila Baibolo, komasoti kuchitanawo misonkhano nthawe zonse kungayavye tyani munthu kuleka nkhalidwe iipa?
5. Yeja-yejani kuleka kuganizila olo kuchita vinthu viipa
Ŵelengani Akolose 3:5, ndipo pavuli pake mukambilane makonsho aŵa:
Kansi tuziŵa tyani kuti kulolela volaula, kutumijila ayakine mauthenga, olo vinthu viyakine volaula komasoti kulisoŵelesha viwalo vobisika Yehova okuwona kuti n’kuipa?
Kansi muganiza kuti n’vomvwika kuti Yehova akoyembekezela kuti tikonkhala na minkhalidwe ituŵa? Ndaŵa yanji mwanena teti?
Onani vamungachite kuti osati mukoganizila viipa. Lolelani VIDIYO.
Yesu ekatishila ntchito fanizo yuwonesha kuti tufunika kuchita vonse vatingakwanishe kuti tinkhale atuŵa. Ŵelengani Mateyu 5:29, 30, ndipo pavuli pake mukambilane konsho iyi:
Pa lemba yamene iyi Yesu enzenenalini kuti tufunikila kuliwononga, koma enzetanthauza kuti tufunika kuchita vonse vatingakwanishe kuti tikochita vakufuna Mulungu. Kansi n’chinji chakufunika kuchita munthu kuti osati akoganizila vinthu viipa?b
Yehova otembeja ngako mukoyeja-yeja kuchita khama kuti muleke kuganizila vinthu viipa. Ŵelengani Salimo 103:13, 14, ndipo pavuli pake mukambilane konsho iyi:
Keno muyeja-yeja kulimbana na nkhalidwe iyakine iipa, Kansi lemba yamene iyi ingakuyavyeni tyani kuti osati mufoke?
Osataya ntima
Vunkhala vosavuta kuganiza kuti, ‘Pakuti nachitakale nkhalidwe iipa, ningakwanishelini kuleka.’Koma ganizilani mfundo iyi: Munthu wamene ali pa mpikishano woutuka akakhubulwa nopona, vutanthauzalini kuti angapambanelini pa mpikishano wamene uyo. Vutanthauzalinisoti kuti ofunika kujokela noyambasoti kuutuka. Niye vingachitike keno mwayambasoti kuchita nkhalidwe iipa. Mukakangiwa ulwendo umozi weka, vutanthauzalini kuti mwakangiwa kulimbana na nkhalidwe yamene iyo. Vutanthauzalinisoti kuti khama yonse yemwichita ichingopita patyala. Vuchitika chendi kuyambasoti nkhalidwe iyakine iipa. Koma keno n’tetyo vutanthauzalini—kuti mwakangiwa. Yehova angakuyavyeni kuleka nkhalidwe yamene iyo iipa.
ŴANTHU AYAKINE ONENA KUTI: “Newo nidjaila ngako. Mwakuti ningakwanishelini kuleka.”
Kansi mungakatishile ntchito lemba yotyani poyavya munthu wamene uyo kuziŵa kuti Yehova angamuyavye kuleka nkhalidwe iipa yamene iyo?
MFUNDO ZACHIDULE
Tukondwelesha Yehova tikoyeja-yeja kunkhala aukhondo komasoti tikopewa kuganizila olo kuchita minkhalidwe iipa.
Makonsho oweleja
Ndaŵa yanji kunkhala atuŵa ni kofunika ngako?
Kansi mungachite tyani kuti munkhale atuŵa?
Kansi mungachite tyani kuti mukopewa kuganizila olo kuchita vinthu viipa?
PHUNZILANI VINYINJI
Ni vinthu votyani vamungachite kuti munkhale aukhondo olo kuti nimwe osauka?
Onani vamungachite kuti muleke kupepa.
Onani kuyofya kololela volaula.
“Kansi kulolela volaula kuli na mavuto otyani?” (Nsanja ya Olonda, 1 August, 2013)
Onani vechichita munthu muyakine kuti aleke kulolela volaula.
“Nechinja nkhalidwe yangu movutikila ngako” (Nsanja ya Olonda N.° 4 2016)
a Nkhani ya mutu wakuti “N’vokwanishika kuleka fwaka,” yamene yupezeka pa mbali yakuti Punzilani vinyinji mmutu uno, yufotokoza mfundo zamene zingayavye munthu kusilijana na vuto yopepa fwaka.
b Kuti muziŵe vamungachite kuti osati mukolisoŵelesha viwalo, onani nkhani yakuti, “Kansi ningachite tyani kuti nileke chiyoloŵezi chosoŵelesha viwalo?” m’buku yakuti Mayankho a Zimene Achinyamata Amafunsa—Buku loyamba, mutu 25.