2. Kansi kufumila mu 1914, ni vinthu votyani vamene vankhala vuchitika pano pa chalo, n’nga ŵanthu ankhala owonesha minkhalidwe yotyani?

Ophunzila a Yesu ekonsha kuti: “Kansi chizindikilo cha kunkhalapo kwanu na cha mapeto a nthawe ino chizankhale chinji?” (Mateyu 24:3) Poyankha, Yesu eŵafotokozela vinthu vinyinji viti vizachitike yove akezeyamba kutonga monga Mfumu ya Ufumu wa Mulungu kululu. Viyakine mwa vinthu vamene ivi ni monga nkhondo, njala komasoti vivomezi. (Ŵelengani Mateyu 24:7.) Baibolo yeloselelatu kuti “m’masiku osilija” ŵanthu azankhale na minkhalidwe iipa yamene iti izachitishe kuti moyo unkhale wovuta ngako. (2 Timoteyo 3:​1-5) Vinthu vamene ivi vankhala vuchitika kufumila mu 1914.

3. Ndaŵa yanji pano pa chalo pochitika vinthu vinyinji viipa kufumila pa nthawe yewiyamba kutonga Ufumu wa Mulungu?

Yesu pechingonkhala Mfumu ya Ufumu wa Mulungu, eluta kuyaniyatana na Satana komasoti na viŵanda vake. Satana egonja pa nkhondo yamene iyi. Baibolo yunena kuti: “Yove eponyewa pa chalo, ndipo angelo ŵake nawo eponyelewa naye pamozi.” (Chivumbulutso 12:​9, 10, 12) Satana ni wokalipa ngako chifukwa oziŵa kuti lombapano awonongewe. Yove niye ochitisha kuti pa chalo pankhale mavuto anyiji teti. Vamene ivi vutiyavya kumvwisha chifukwa chake vinthu vafwika poipa ngako pano pa chalo. Koma chokondwelesha n’chakuti Ufumu wa Mulungu uzasilije mavuto onse amene aŵa.