Vuwoneka kuti chigaŵenga chamene icho chilapa chamene chenzepachikiwe pambali pa Yesu akaliye kufwa, chenze Myuda. Ayuda enzelambila Mulungu mmozi, koma ŵanthu a mitundu iyakine enzekhulupilila milungu inyinji. (Eks. 20:2, 3; 1 Akor. 8:5, 6) Kuti chigaŵenga chamene icho chenzelini Myuda, sembe konsho ya mu lemba ya lelo ni yakuti, “Kansi wewo uyopalini milungu?” Kuyangijila pamene apa, Yesu aliyetumijiwe kuli ŵanthu a mitundu iyakine, koma kuli “mbelele zotaika za ng’anda ya Isiraeli.” (Mt. 15:24) Mulungu enze eulula kuli Aisiraeli kuti azaushe akufwa. Vingachitike kuti chigaŵenga chamene icho chamene chilapa cheziŵa vamene ivi, ndipo monga mwakuwoneshela mawu ŵake chezindikila kuti Yehova azaushe Yesu kuti azalamulile mu Ufumu wa Mulungu. Vuwoneka kuti munthu wamene uyo wamene enze chigaŵenga, enzeyembekezela kuti Mulungu azamuushe naye. Chifukwa chakuti chigaŵenga chamene icho chenze Myuda, vuwoneka kuti chenzeziŵa vokhuza Adamu na Hava. Tetyo, vuwoneka kuti chigaŵenga chamene icho chenzekhulupilila kuti Paladaiso wechinena Yesu pa Luka 23:43 ni malo aweme ngako akuti azankhale pano pachalo.—Gen. 2:15. Nsanja yophunzila 12.2022 pedji 8-9 ndim. 2-3

Kansi tufunikila thandizo yotyani kuti tikwanishe kukata ntchito yasu yolalikila? Kuti tiyankhe, tiyeni tiganizile vichitikila Ezekieli. Akaliyeyamba kulalikila, mzimu wa Mulungu wimupasa mphamvu zenzefunikila. Molingana na Ezekieli, nase masiku ŵano tukwanisha kulalikila chifukwa chakuti mzimu wa Mulungu utiyavya. Ndaŵa yanji? Ndaŵa yakuti Satana ali pa nkhondo yolimbana nase pofuna kusokoneza ntchito yasu yolalikila. (Chiv. 12:17) Ŵanthu anyinji oganiza kuti Satana ni wamphamvu ngako mwakuti tingapambanelini pa nkhondo yolimbana naye. Koma kupitila mu ntchito yasu yochitila umboni, tumupambana! (Chiv. 12:9-11) Mu njila yotyani? Tikolalikila, tuwonesha kuti tuchitalini wowa na vakutiyofya navo Satana. Tetyo, vuwonekelatu luweme kuti Yehova otipasa mphamvu kupitila mu mzimu wake utuŵa komasoti kuti otikonda. (Mt. 5:10-12; 1 Pet. 4:14) Mzimu wa Mulungu ungatipase mphamvu zatufunikila kuti tikwanishe kulimbana na vuto iliyonse yatingakumane nayo pa utumiki wasu. (2 Akor. 4:7-9) Lomba kansi tingachite tyani kuti tipitilije kulondela mzimu wa Mulungu? Tufunika kupitilija kuusenga, nonkhala na chidalilo chakuti Yehova aamvwe mapemphelo ŵasu. Nsanja yophunzila 11.2022 pedji 5 ndim. 10-11

Tuwonesha kuti tuŵakonda abale na alongo ŵasu mwa kuyeja-yeja kunkhala nawo mwantendele. Tuyeja-yeja kukonkheja chisanzo cha Yehova pa nkhani yokhululukila ayakine. Keno Yehova elola kuti Mwana wake atifwile chifukwa cha machimo ŵasu, kansi nase tufunikalini kunkhala okonzeka kukhululukila abale na alongo ŵasu akatiphoniyela? Tufunalini kunkhala monga ni kapolo muyakine muipa wamene efotokozewa mu fanizo iyakine ya Yesu. Olo kuti abwana ŵake enze emukhululukila nkhongole yake ikulu, kapolo wamene uyu ekangiwa kukhululukila kapolo muyake wamene enze naye na nkhongole itontho. (Mt. 18:23-35) Keno mwaphoniyana maganizo na munthu muyakine mumpingo, kansi mungayambe ni mwewo kuchitapo kanthu kuti munkhazikishe ntendele Chikumbukilo chikaliye chitika? (Mt. 5:23, 24) Keno mungachite vamene ivi, mungawoneshe kuti mukonda ngako Yehova na Yesu. Nsanja yophunzila 01.2023 pedji 29 ndim. 8-9