13 Ka morago ga moo ba romela ba bangwe ba Bafarasei le balatedi ba Heroda gore ba mo tanye ka dilo tšeo a di bolelago.+ 14 Bona ge ba fihla ba re go yena: “Morutiši, re a tseba gore o bolela nnete le gona ga o nyake go amogelwa ke batho ka gobane ga o lebelele gore motho o bonagala bjang, eupša dilo tšeo o di rutago ka Modimo ke tša nnete. Na go dumeletšwe ke molao gore motho yo mongwe le yo mongwe a ntšhetše Kesara motšhelo goba ga go bjalo? 15 Na re swanetše go patela motšhelo goba na ga se ra swanela go o patela?” Ge Jesu a lemoga boikaketši bja bona o ile a re go bona: “Le ntekelang? Ntlišetšeng tenariase* ke e bone.” 16 Ba e tliša. Ke moka a re: “Seswantšho se le leina le ke tša mang?” Ba re go yena: “Ke tša Kesara.” 17 Ke moka Jesu a re: “Efang Kesara tša Kesara+ eupša Modimo le mo fe tša Modimo.”+ Ba makala kudu.

20 Ka ge ba be ba nyakana le sebaka sa go tanya Jesu ka dilo tšeo a di bolelago,+ ba ile ba patela banna ba bangwe ka sephiring gore ba itire eka ba lokile gore ba tle ba mo iše go bahlankedi ba mmušo le go mmušiši. 21 Ke moka ba mmotšiša ba re: “Morutiši, re a tseba gore o bolela nnete ebile o ruta nnete le gona ga o kgetholle batho, eupša o ba ruta nnete ka Modimo. 22 Bjale na go dumeletšwe ke molao gore re ntšhetše Kesara metšhelo goba ga go bjalo?” 23 Eupša ge Jesu a lemoga maanomabe a bona a re go bona: 24 “Mpontšheng tenariase.* Seswantšho se le leina le ke tša mang?” Ba re: “Ke tša Kesara.” 25 A re: “Le swanetše go fa Kesara tša Kesara+ eupša Modimo le mo fe tša Modimo.”+ 26 Bjale ba ile ba palelwa ke go mo tanya ka mantšu a gagwe pele ga batho, eupša ka ge ba be ba makaditšwe ke karabo ya gagwe ba ile ba homola.