Bagalatia

4 Ke re ge feela motho yo e lego mojabohwa e sa le ngwana, ga a fapane le mohlanka, le ge dilo ka moka e le tša gagwe. 2 Eupša go na le batho bao ba mo hlokomelago le bao ba mo šomelago, go ba go fihla letšatšing leo tatagwe a le kgethilego. 3 Ka mo go swanago, le rena ge re be re sa le bana, re be re nagana go swana le batho ba lefase le, ebile re dira dilo go swana le bona.+ 4 Eupša ge nako yeo Modimo a bego a e beile e fihla, o ile a romela Morwa wa gagwe yo a ilego a belegwa ke mosadi+ le yo a bego a ekwa molao,+ 5 e le gore a lokolle batho bao ba bego ba ekwa molao,+ gore Modimo a ba amogele e le bana ba gagwe.+

6 Ka ge re le bana ba Modimo, o tsentše moya o mokgethwa+ wo o lego go Morwa wa gagwe ka dipelong tša rena,+ gomme moya woo o re hlohleletša gore re re: “Aba,* Tate!”+ 7 Ka gona ga le sa le makgoba eupša le barwa, ge e ba le le barwa ba Modimo, gona o tla le nea bohwa.+

8 Ge le be le sa tsebe Modimo, le be le le makgoba a medimo ya maaka. 9 Eupša ka ge gona bjale le tseba Modimo ebile le yena a le tseba, go tla bjang gore le nyake go boela go dilo tše di se nago mohola+ tša lefase le, gomme le be makgoba a tšona gape?+ 10 Le tšea matšatši a itšego, dikgwedi,+ dihla le mengwaga di le bohlokwa, gomme le a di keteka. 11 Ke le kwela bohloko ka gobane ke bona eka ke sentše maatla a ka le nako ya ka ke le thuša.

12 Banabešo, ke kgopela gore le swane le nna, ka gobane le nna nkile ka swana le lena.+ Ga se la ntirela phošo. 13 Eupša le a tseba gore ke ile ka hwetša sebaka sa mathomo sa gore ke le botše ditaba tše dibotse ka baka la ge ke be ke babja. 14 Gaešita le ge taba ya gore ke a babja e be e le imela, ga se la ka la nnyatša goba ka le šišimiša, eupša le ile la nkamogela go swana le morongwa wa Modimo, goba go swana le Kriste Jesu. 15 Goreng okare ga le sa thabile go swana le mathomong? Ke kgodišegile gore mathomong ge e ba go be go kgonega le be le ka ntšha le mahlo a lena la mpha ona e le gore le nthuše.+ 16 Bjale na le ntlhoile ka gobane ke le botša nnete? 17 Go na le batho ba bangwe bao ba nyakago go le gogela go bona, e sego ka gobane ba le rata, eupša ka gobane ba nyaka go le aroganya le nna e le gore le latele bona. 18 Le ge go le bjalo, ga se phošo gore motho yo mongwe a nyake gore le mo latele, kudukudu ge e ba a dira bjalo ka maikemišetšo a mabotse. Eupša o swanetše go dira seo ka mehla e sego feela ge ke na le lena. 19 Bana ba ka,+ le nkweša bohloko bjo bo swanago le bja ge mosadi a belega. Ke tlo kwa bohloko bjo go fihlela le bontšha gore Kriste ke motho wa mohuta mang. 20 Ke duma okare nkabe ke na le lena gona bjale e le gore ke boledišane le lena gabotse, ka gobane ga ke tsebe gore ke dire eng ka lena.

21 Mpotšeng mo lena bao le nyakago go latela Molao wa Moshe: Na ga le tsebe gore Molao woo o reng? 22 Na mangwalo ga se a bolela gore Aborahama o be a na le barwa ba babedi? Yo mongwe o belegwe ke mohlanka+ gomme yo mongwe o belegwe ke mosadi yo a lokologilego.+ 23 Eupša morwa yo a belegwego ke mosadi wa mohlanka o ile a belegwa go swana le bana ba bangwe,+ gomme morwa wa mosadi yo a lokologilego yena o belegwe ka gobane Modimo a ile a tshepiša gore o tla belegwa.+ 24 Dilo tše ke papišo. Basadi ba ba swantšhetša dikgwerano tše pedi. E nngwe e dirilwe Thabeng ya Sinai,+ gomme bao ba lego kgweranong yeo ke makgoba. Kgwerano yeo ke ya Hagara. 25 Bjale Hagara o swantšhetša Thaba ya Sinai+ yeo e lego Arabia. Mehleng ye ya rena o swantšhetša Jerusalema, ka gobane o bokgobeng le bana ba gagwe. 26 Eupša Jerusalema ya legodimong e lokologile, ebile ke mmago rena.

27 Mangwalo a re: “Thaba wena mosadi yo a sa kago a ba le bana, goelela o thabile wena mosadi yo a sa kago a ba le dihlabi tša pelego, ka gobane bana ba mosadi yo a tlogetšwego ke ba bantši go feta ba mosadi yo a nago le monna.”+ 28 Banabešo, lena le bana bao ba holofeditšwego go swana le Isaka.+ 29 Mehleng ya kgale morwa yoo a belegwego go swana le bana ba bangwe o ile a thoma go tlaiša morwa yo a belegwego ka moya o mokgethwa,+ le mehleng ye ya rena go sa dutše go le bjalo.+ 30 Eupša mangwalo a re: “Raka mosadi yo wa lekgoba le morwa wa gagwe, ka gobane morwa wa gagwe a ka se je bohwa gotee le morwa wa mosadi yo a lokologilego.”+ 31 Ka gona banabešo, re bana ba mosadi yo a lokologilego, e sego bana ba mohlanka.