Doiteronomio

8 “Le latele ditaelo ka moka tšeo ke le neago tšona lehono, e le gore le tle le tšwele pele le phela+ gomme le oketšege, ke moka le tsene nageng yeo Jehofa a e enetšego borakgolokhukhu ba lena le be le dule go yona.+ 2 Le gopole tsela e telele yeo Jehofa Modimo wa lena a dirilego gore le e sepele mengwageng ye e 40 lešokeng,+ ge a be a le kokobetša le go le leka+ gore a tsebe seo se bego se le ka dipelong tša lena,+ a tsebe ge e ba le be le tla latela melao ya gagwe goba le ka se e latele. 3 Ka gona o ile a le kokobetša ka go le bolaiša tlala,+ ke moka a le fepa ka manna+ ao lena le botatago lena le bego le sa a tsebe, e le gore le tsebe gore motho ga a phele ka dijo* feela, eupša o phela le ka mantšu ka moka ao a tšwago molomong wa Jehofa.+ 4 Diaparo tša lena ga se tša ka tša hlagala, le gona maoto a lena ga se a ka a ruruga mengwageng ye e 40.+ 5 Le tseba gabotse ka dipelong tša lena gore Jehofa Modimo wa lena o be a le phošolla, go swana le ge motho a phošolla ngwana wa gagwe.+

6 “Le latele ditaelo tša Jehofa Modimo wa lena ka go sepela ditseleng tša gagwe le ka go mmoifa. 7 Ka gobane Jehofa Modimo wa lena o le iša nageng e botse,+ naga ya meedi ya meetse, ya mafelo ao a nago le meetse a mantši le madiba ao a lego meeding le dithabeng, 8 naga ya korong, mabele,* meterebe, mego, megarenate,+ makhura a mohlware le todi ya dinose.+ 9 Naga yeo go yona le tlago go ba le dijo tše dintši, moo le ka se hlokego selo, naga yeo maswika a yona a nago le tšhipi le moo dithabeng tša yona le tlago go epa koporo.

10 “Ge le jele gomme le khoše, le rete Jehofa Modimo wa lena ka ge a le file naga e botse.+ 11 Le itlhokomeleng gore le se ke la lebala Jehofa Modimo wa lena ka gore le tlogele go latela ditaelo tša gagwe le melao ya gagwe yeo ke le neago yona lehono. 12 Ge le eja le khora, gomme le aga dintlo tše dibotse ebile le dula go tšona,+ 13 ge mehlape ya lena ya dikgomo le ya dinku le dipudi e oketšega, le silifera le gauta ya lena di oketšega, gomme dilo ka moka tšeo le nago le tšona e eba tše dintši, 14 le se ke la dumelela dipelo tša lena di ikgogomoša+ gomme la lebala Jehofa Modimo wa lena yo a le ntšhitšego nageng ya Egepeta moo le bego le le makgoba,+ 15 yena yo a ilego a le thuša gore le sepele lešokeng le legolo le leo le boifišago+ la dinoga tša mpholo le diphepheng le nageng e omilego yeo e se nago meetse. O ile a le ntšhetša meetse leswikeng,+ 16 gomme kua lešokeng a le fepa ka manna+ ao botatago lena ba bego ba sa a tsebe, a le kokobetša+ gomme a le leka e le gore nakong e tlago le tle le holege.+ 17 Ge e ba ka dipelong tša lena le ka re: ‘Mahumo a re a šometše ka maatla a rena le ka diatla tše tša rena,’+ 18 gona le gopoleng gore Jehofa Modimo wa lena ke yena a le neago maatla a gore le be le mahumo,+ e le gore a phethe kgwerano ya gagwe yeo a e enetšego borakgolokhukhu ba lena go etša ge a le bontšhitše seo lehono le.+

19 “Ge e ba le ka lebala Jehofa Modimo wa lena gomme la latela medimo e mengwe, la e hlankela la ba la e khunamela, gona lehono ke le botša gore ruri le tlo fedišwa.+ 20 Le tlo fedišwa go swana le ditšhaba tšeo Jehofa a di fedišago mo pele ga lena, ka gobane le tla be le se la theetša seo Jehofa Modimo wa lena a se bolelago.+