Ebangedi ya Mareka

7 Bjale ditsebi tše dingwe tša molao le Bafarasei bao ba bego ba etšwa Jerusalema ba ile ba kgobokanela Jesu.+ 2 Ke moka ba bona ba bangwe ba barutiwa ba Jesu ba eja ka diatla tša ditšhila, ke gore, diatla tšeo di sego tša hlapiwa.* 3 (Ka gobane Bafarasei le Bajuda ka moka ga ba je dijo ba se ba hlapa matsogo a bona go fihla ditšung,* ba latela dilo tšeo batho ba kgale ba bego ba tlwaetše go di dira, 4 gomme ge ba boa mmarakeng, ga ba je dijo ba se ba itlhwekiša ka meetse. Le gona ba be ba latela dilo tše dintši tšeo batho ba kgale ba bego ba di dira, go swana le go ina dikomiki, digo le dibjana tša koporo ka meetseng.)+ 5 Ka gona ditsebi tšeo tša molao le Bafarasei bao ba botšiša Jesu ba re: “Ke ka baka la eng barutiwa ba gago ba tshela setšo sa batho ba mehleng ya kgale ka go ja ka diatla tša ditšhila?”+ 6 A re go bona: “Lena baikaketši, Jesaya o porofetile ka mo go swanetšego ka lena ge a be a re: ‘Batho ba ba ntheta ka melomo feela, eupša dipelo tša bona di kgole kudu le nna.+ 7 Ba nthapelela lefeela ka gobane ba ruta melao ya batho bjalo ka ge eka ba ruta dithuto tša Modimo.’+ 8 Le tlogela taelo ya Modimo la kgomarela setšo sa batho.”+

9 Le gona a re go bona: “Le beela molao wa Modimo ka thoko ka mahlajana a lena gore le kgomarele setšo sa lena.+ 10 Ka mohlala, Moshe o itše: ‘Hlompha tatago le mmago,’+ a buša a re: ‘Yo a bolelago le* tatagwe goba mmagwe ka lenyatšo, a bolawe.’+ 11 Eupša lena le re: ‘Ge e ba motho a ka botša tatagwe goba mmagwe a re: “Selo le ge e le sefe seo ke nago le sona seo se ka go holago ke korobane (ke gore, mpho yeo e neetšwego Modimo),”’ 12 ga le sa mo dumelela gore a direle tatagwe goba mmagwe le selo se setee.+ 13 Ka gona le dira gore lentšu la Modimo le be bjalo ka ge eka ga le na mohola ka baka la setšo seo le se fetišeditšego go batho ba bangwe.+ Le gona le dira dilo tše dintši tše di swanago le tše.”+ 14 Ka morago ga ge a bileditše lešaba go yena, o ile a re: “Ntheetšeng ka moka ga lena gomme le kwešiše seo ke se bolelago.+ 15 Motho ga a šilafatšwe ke seo se tsenago ka molomong wa gagwe, eupša o šilafatšwa ke seo se tšwago go wona.”+ 16* ——

17 Bjale ge a be a tsene ka ntlong gomme a se sa le lešabeng, barutiwa ba gagwe ba ile ba thoma go mmotšiša mabapi le papišo yeo.+ 18 Ka gona, a re go bona: “Na le lena ga le kwešiše go no swana le bona? Na ga le lemoge gore motho ga a šilafatšwe ke seo se tsenago ka molomong wa gagwe, 19 ka ge se sa tsene ka pelong ya gagwe eupša se tsena ka maleng a gagwe sa ntšhetšwa mo go elelelago ditšhila?” Ka gona a bolela gore dijo ka moka di hlwekile. 20 Le gona, a re: “Seo se tšwago mothong ke sona seo se mo šilafatšago.+ 21 Ka gobane pelong ya motho+ go tšwa dikgopolo tše mpe, e lego: go itshwara gampe ka tša thobalano,* bohodu, go bolaya ka tsela le ge e le efe, 22 bohlotlolo,* megabaru, ditiro tše mpe, bofora, go itshwara gampe o sa jewe ke dihlong,* mona, maroga, boikgogomošo le bošilo. 23 Dilo tše ka moka tše mpe di tšwa pelong ya motho gomme di a mo šilafatša.”

24 Go tloga moo a ya tikologong ya Tiro le Sidone.+ Ge a le moo, a tsena ka ntlong ebile a sa nyake gore batho ba tsebe ka seo, eupša ba ile ba tseba. 25 Ka yona nako yeo, mosadi yo mongwe yoo morwedi wa gagwe yo monyenyane a bego a na le moya o mobe, o ile a kwa ka yena gomme a tla a khunama maotong a gagwe.+ 26 Mosadi yo e be e le Mogerika, yo a tšwago setšhabeng sa Sirofenikia.* Le gona o ile a dulela go mo kgopela gore a ntšhe letemona go morwedi wa gagwe. 27 Eupša Jesu a re go yena: “Tlogela bana ba je ba khore pele, ka gobane ke phošo go tšea dijo tša bana wa di lahlela dimpšanyana.”+ 28 Eupša mosadi yoo a mo araba a re: “Ee mohlomphegi, eupša dimpšanyana tšeo di lego ka fase ga tafola di ja marathana a bana ba banyenyane.” 29 Ge a realo Jesu a re go yena: “Ka ge o boletše bjalo, o ka ya gae. Letemona le ntšhitšwe go morwedi wa gago.”+ 30 Ka gona ge mosadi yoo a fihla gae, o ile a hwetša ngwana a robetše mpeteng, letemona le tšwile go yena.+

31 Ge Jesu a boa a etšwa tikologong ya Tiro, o ile a feta Sidone gomme a feta gare ga tikologo ya Dekapoli* ke moka a fihla Lewatleng la Galelia.+ 32 Ge a le moo, ba ile ba mo tlišetša monna yo e bego e le sefoa ebile a sa kgone go bolela gabotse+ ke moka ba mo kgopela gore a mmee diatla. 33 Jesu o ile a tšea monna yoo, a ya le yena ka thokwana kgole le lešaba ke moka a tsenya menwana ya gagwe ka ditsebeng tša monna yoo. Ka morago ga ge a tshwele mare, o ile a kgwatha leleme la monna yoo.+ 34 O ile a lebelela legodimong, ke moka a hemela godimo gomme a re go yena: “Efatha,” ke gore, “Thibologa.” 35 Ke moka ditsebe tša gagwe tša thibologa,+ a se sa ba le bothata bja go se kgone go bolela gabotse gomme a thoma go bolela gabotse. 36 Ka morago ga moo, a ba botša tsebe-go-kwa gore ba se ke ba botša motho ka taba yeo.+ Eupša ge a be a ba laela ka tsela yeo, o ile a ba gakatša gore ba e tsebatše.+ 37 Ruri ba ile ba šala ba maketše+ gomme ba re: “Jesu o dirile dilo ka moka gabotse. O dirile gore difoa di kwe le dimumu di bolele.”+